໕-໗. ປຐມວິຕ຺ຖາຣສຸຕ຺ຕາທິວຓ຺ຓນາ

໔໘໕-໔໘໗. ວິປສ຺ສນາວເສນ ນິສ຺ສກ຺ກໍ ເວທິຕພ຺ພໍ, ນ ມຄ຺ຄຜລວເສນ, ອິມສ຺ມິໍ ສຸຕ຺ເຕ ສພ຺ພໂສວ ວິປສ຺ສນິນ຺ທ຺ຣິຍານໍ ເອວ ອຘິປ຺ເປຕຕ຺ຕາ. ອິທານິ ຕມຕ຺ຖໍ ປາກຏໍ ກາຕຸໍ ‘‘ປຣິປຸຓ຺ຓານິ ຫີ’’ຕິອາທິ ວຸຕ຺ຕໍ. ອວິຫາທີສຸ ປຎ຺ຈສຸ ສຸທ຺ຘາວາເສສຸ ຕຕ຺ຖ ຕຕ຺ຖ ອາຍຸເວມຊ຺ຌໍ ອນຕິກ຺ກມິຕ຺ວາ ອນ຺ຕຣາ ກິເລສປຣິນິພ຺ພາເນນ ປຣິນິພ຺ພາຍນໂຕ ອນ຺ຕຣາປຣິນິພ຺ພາຍີ, ອສງ຺ຂາເຣນ ອປ຺ປໂຍເຄນ ສຣສໂຕວ ປຣິນິພ຺ພາຍນໂຕ ອສງ຺ຂາຣປຣິນິພ຺ພາຍີ, ຕພ຺ພິປຣິຍາຍໂຕ ສສງ຺ຂາຣປຣິນິພ຺ພາຍີ, ອຸທ຺ຘໍ ວາຫິຠາເວນ ອຸທ຺ຘມສ຺ສ ຕຓ຺ຫາໂສຕໍ ວຏ຺ຏໂສຕໍ ວາຕິ ອຸທ຺ຘໍໂສໂຕ, ອຸທ຺ຘໍ ວາ ຄນ຺ຕ຺ວາ ປຏິລຠິຕພ຺ພໂຕ ອຸທ຺ຘມສ຺ສ ມຄ຺ຄໂສຕນ຺ຕິ ອຸທ຺ຘໍໂສໂຕ, ອກນິຏ຺ຐຠວໍ ຄຈ຺ຉຕີຕິ ອກນິຏ຺ຐຄາມີຕິ ເອວເມຕ຺ຖ ສທ຺ທຕ຺ໂຖ ທຏ຺ຐພ຺ໂພ.

ອິມສ຺ມິໍ ປນ ຐາເນຕິ ‘‘ວິປສ຺ສນາວເສນ ນິສ຺ສກ຺ກ’’ນ຺ຕິ ວຸຕ຺ຕຏ຺ຐາເນ. ອຣຫຕ຺ຕມຄ຺ເຄເຍວ ຐຕ຺ວາຕິ ອິມສ຺ມິໍເຍວ ຠເວ ອຣຫຕ຺ຕມຄ຺ເຄເຍວ, ນ ວິປສ຺ສນາຍ ຈ ຐຕ຺ວາ. ປຎ຺ຈ ນິສ຺ສກ຺ການິ ນີຫຣິຕພ຺ພານີຕິ ‘‘ຕໂຕ ມຸທຸຕເຣຫິ ອນ຺ຕຣາປຣິນິພ຺ພາຍີ ໂຫຕີ’’ຕິອາທີນິ ປຎ຺ຈ ນິສ຺ສກ຺ການິ ນິທ຺ຘາເຣຕ຺ວາ ກເຖຕພ຺ພານິ. ອິທານິ ຕມຕ຺ຖໍ ວິວຣນ຺ໂຕ ‘‘ອຣຫຕ຺ຕມຄ຺ຄສ຺ສ ຫີ’’ຕິອາທິມາຫ. ຕຕ຺ຖ ອວິຫາທີສຸ ອຸປ຺ປຊ຺ຊິຕ຺ວາ ອຸປ຺ປນ຺ນສມນນ຺ຕຣາຍ ປຣິນິພ຺ພາຍນໂຕ ປຐມອນ຺ຕຣາປຣິນິພ຺ພາຍີ. ຕຕ຺ຖ ອາຍຸປ຺ປມາຓເວມຊ຺ຌໍ ອປ຺ປຕ຺ວາວ ປຣິນິພ຺ພາຍນໂຕ ທຸຕິຍອນ຺ຕຣາປຣິນິພ຺ພາຍີ, ອາຍຸເວມຊ຺ຌໍ ປຕ຺ວາ ປຣິນິພ຺ພາຍນໂຕ ຕໂຕ ປຣໍ ຕຕິຍອນ຺ຕຣາປຣິນິພ຺ພາຍີ ເວທິຕພ຺ໂພ. ‘‘ປຎ຺ຈ ນິສ຺ສກ຺ການີ’’ຕິ ກສ຺ມາ ວຸຕ຺ຕໍ? ນນຸ ອສງ຺ຂາຣສສງ຺ຂາຣປຣິນິພ຺ພາຍີຕິ ວຕ຺ຕພ຺ພນ຺ຕິ? ນ ວຕ຺ຕພ຺ພນ຺ຕິ ທສ຺ເສນ຺ໂຕ ອາຫ ‘‘ອສງ຺ຂາຣປຣິນິພ຺ພາຍິສ຺ສ ສສງ຺ຂາຣປຣິນິພ຺ພາຍິໂນປິ ເອເຕວ ປຎ຺ຈ ຊນາ’’ຕິ.

ຕີຓິ ນິສ຺ສກ຺ການີຕິ ‘‘ຕໂຕ ມຸທຸຕເຣຫິ ໂສຕາປນ຺ໂນ ໂຫຕີ’’ຕິອາທີນິ ຕີຓິ ນິສ຺ສກ຺ກປທານິ. ອິຘ ສກທາຄາມີ ນ ຄຫິໂຕ, ໂສ ອນາຄາມິມຄ຺ເຄ ຐຕ຺ວາ ນີຫຣິຕພ຺ໂພ, ອນາຄາມິມຄ຺ຄສ຺ສ ວິປສ຺ສນິນ຺ທ຺ຣິເຍຫິ ມຸທຸຕເຣຫິ ສກທາຄາມີ ໂຫຕິ. ສກທາ…ເປ… ມຸທຸຕຣານີຕິ ອິທໍ ສກທາຄາມິມຄ຺ຄສ຺ສ ວິປສ຺ສນິນ຺ທ຺ຣິເຍຫິ ເອກພີຊິສງ຺ຂາຕໂສຕາປນ຺ນວິປສ຺ສນິນ຺ທ຺ຣິຍານິ ມຸທຸຕຣານິ ໂຫນ຺ຕີຕິ ຕີຓິ ກຕ຺ວາ ວຸຕ຺ຕໍ. ຘມ຺ມານຸສາຣີຕິອາທິທ຺ວຍໍ ໂກລໍໂກລາທິທ຺ວເຍນ ຄຫິຕໍ ໂຫຕີຕິ. ສກທາຄາມິມຄ຺ຄສ຺ສ ຫີຕິອາທິ ວຸຕ຺ຕສ຺ເສວ ອຕ຺ຖສ຺ສ ວິວຣຓໍ. ເສສໍ ເຫຏ຺ຐາ ວຸຕ຺ຕນຍເມວ. ຉຏ຺ຐສຕ຺ຕມານິ ວຸຕ຺ຕນຍາເນວາຕິ ຉຏ຺ຐສຕ຺ຕມານິ ສຸຕ຺ຕານິ ທຸຕິຍຕຕິເຍສຸ ວຸຕ຺ຕນຍາເນວ. ຕຕ຺ຖ ປນ ມິສ຺ສການິ ອິນ຺ທ຺ຣິຍານິ ກຖິຕານິ, ອິຘ ປຸພ຺ພຠາຄວິປສ຺ສນິນ຺ທ຺ຣິຍານິ ກຖິຕານີຕິ ອຍເມວ ວິເສໂສ.