໙. ຄິລານສຸຕ຺ຕວຓ຺ຓນາ

໓໗໕. ປາທຄາໂມຕິ ນຄຣສ຺ສ ປທສທິໂສ ມຫນ຺ຕຄາໂມ. ເຕເນວາຫ ‘‘ເວສາລິຍໍ ວິຫຣຕິ ເວຬຸວຄາມເກ’’ຕິ. ອຫິຕນິເສຘນ-ຫິຕນິໂຍຊນ-ພ຺ຍສນປຣິຈ຺ຈຊນ-ລກ຺ຂໂຓ ມິຕ຺ຕຠາໂວ ເຍສຸ ອຕ຺ຖິ, ເຕ ມິຕ຺ຕາ. ເຍ ປນ ທິຏ຺ຐມຕ຺ຕສຫາຍາ, ເຕ ສນ຺ທິຏ຺ຐາ. ເຍ ສວິເສສໍ ຠຕ຺ຕິມນ຺ໂຕ, ເຕ ສມ຺ຠຕ຺ຕາຕິ ທສ຺ເສນ຺ໂຕ ‘‘ມິຕ຺ຕາຕິ ມິຕ຺ຕາວາ’’ຕິອາທິມາຫ. ອສ຺ສາຕິ ຠຄວໂຕ. ປຎ຺ຈມິຍໍ ອຏ຺ຐມິຍໍ ຈາຕຸທ຺ທສິຍໍ ປຎ຺ຈທສິຍນ຺ຕິ ເອເກກສ຺ມິໍ ປກ຺ເຂ ຈຕ຺ຕາໂຣ ວາເຣ ກຕ຺ວາ ມາສສ຺ສ ອຏ຺ຐວາເຣ.

ເວທນານໍ ພລວຠາເວນ ຂໂຣ ຜຣຸໂສ ກກ຺ຂໂຬ. ອາພາໂຘຕິ ປຸພ຺ພກມ຺ມເຫຕຸຕາຍ ກມ຺ມສມຸຏ຺ຐາໂນ ອາພາໂຘ ສງ຺ຂາຣທຸກ຺ຂຕາສງ຺ຂາໂຕ ສພ຺ພກາລິກຕ຺ຕາ ສຣີຣສ຺ສ ສຠາຄໂຣໂຄ ນາມ. ນາຍມີທິໂສ ອາພາໂຘ, ອຍໍ ປນ ພຫລຕຣພ຺ຍາຘິຕາຍ ‘‘ວິສຠາຄໂຣໂຄ’’ຕິ ວຸຕ຺ໂຕ. ອນ຺ຕ-ສທ຺ໂທ ສມີປປວຕ຺ໂຕຕິ ອາຫ – ‘‘ມຣຓນ຺ຕໍ ມຣຓສນ຺ຕິກ’’ນ຺ຕິ. ເວທນາ…ເປ… ອກໂຣນ຺ໂຕ ອຸກ຺ກໍສຄຕຠາວິຕກາຍາທິຕາຍ. ອປີຬິຍມາໂນຕິ ອປີຬິຍມາໂນ ວິຍ. ໂອວາທເມວ ຠິກ຺ຂຸສງ຺ຆສ຺ສ ອປໂລກນນ຺ຕິ ອາຫ – ‘‘ໂອວາທານຸສາສນິໍ ອທຕ຺ວາຕິ ວຸຕ຺ຕໍ ໂຫຕີ’’ຕິ. ປຸພ຺ພຠາຄວີຣິຍໍ ນາມ ຜລສມາປຕ຺ຕິຍາ ປຣິກມ຺ມຠູຕວິປສ຺ສນາວີຣິຍໍ. ຊີວິຕມ຺ປິ ຊີວິຕສງ຺ຂາໂຣ ປຕິຕຸໍ ອທຕ຺ວາ ອຕ຺ຕຠາວສ຺ສ ອຠິສງ຺ຂຣຓໂຕ.

‘‘ເອຕ຺ຕກໍ ກາລໍ ອຕິກ຺ກມິຕ຺ວາ ວຸຏ຺ຐຫິສ຺ສາມີ’’ຕິ ຂຓປຣິຈ຺ເຉທວຕີ ສມາປຕ຺ຕິ ຂຓິກສມາປຕ຺ຕິ. ນິຄ຺ຄຸມ຺ພໍ ນິຊ຺ຊຏໍ ກຕ຺ວາຕິ ຣູປສຕ຺ຕກາຣູປສຕ຺ຕກວເສນ ປວຕ຺ຕິຍມານໍ ວິປສ຺ສນາຠາວນໍ ສພ຺ພໂສ ຂິລວິຣເຫນ ນິຄ຺ຄຸມ຺ພໍ, ອພ຺ຍາກຸລຕາຍ ນິຊ຺ຊຏໍ ກຕ຺ວາ. ມຫາວິປສ຺ສນາວເສນາຕິ ປຈ຺ເຈກໍ ສວິເສສໍ ວິຕ຺ຖາຣິຕານໍ ອຏ຺ຐາຣສາທີນໍ ມຫາວິປສ຺ສນານໍ ວເສນ ວິປສ຺ສິຕ຺ວາ ສມາປນ຺ນາ ຍາ ສມາປຕ຺ຕິ, ສາ ສຸຏ຺ຐຸ ວິກ຺ຂມ຺ເຠຕິ ເວທນໍ ມຫາພລວຕາຍ ປຸພ຺ພາຣມ຺ມຓສ຺ສ, ມຫານຸຠາວຕາຍ ຕຖາປວຕ຺ຕິຕວິປສ຺ສນາວີຣິຍສ຺ສ. ຍຖາ ນາມາຕິອາທິນາ ຕສ຺ສ ນິທສ຺ສນໍ ທສ຺ເສຕິ. ເວທນາຕິ ທຸກ຺ຂເວທນາ. ຈຸທ຺ທສຫາກາເຣຫີຕິ ຕສ຺ເສວ ສຕ຺ຕກທ຺ວຍສ຺ສ ວເສນ ວທຕິ. ສນ຺ເນຕ຺ວາຕິ ອນ຺ຕຣນ຺ຕຣາ ສມາປນ຺ນຊ຺ຌານສມາປຕ຺ຕິສມ຺ຠູເຕນ ວິປສ຺ສນາປີຕິສິເນເຫນ ເຕເມຕ຺ວາ. ສມາປຕ຺ຕີຕິ ຜລສມາປຕ຺ຕິ.

ຄິລານາ ວຸຏ຺ຐິໂຕຕິ ຄິລານຠາວໂຕ ວຸຏ຺ຐິໂຕ. ສຣີຣສ຺ສ ຄຣຸຖທ຺ຘຠາວປ຺ປຕ຺ຕິ ມຘຸຣກຕາຕິ ອາຫ – ‘‘ສຎ຺ຊາຕຄຣຸຠາໂວ ສຎ຺ຊາຕຖທ຺ຘຠາໂວ’’ຕິ. ນານາກາຣໂຕຕິ ປຸຣຕ຺ຖິມາທິເຠທໂຕ. ສຕິປຏ຺ຐານຘມ຺ມາຕິ ປຸພ຺ເພ ອຕ຺ຕນາ ຠາວິຍມານາ ສຕິປຏ຺ຐານຘມ຺ມາ. ປາກຏາ ນ ໂຫນ຺ຕິ ກາຍຈິຕ຺ຕານໍ ອກມ຺ມຎ຺ຎຕາຍ. ຕນ຺ຕິ ຘມ຺ມາຕິ ປຣິຍຕ຺ຕິຘມ຺ມາ ນ ຎາຍນ຺ຕິ.

ອນນ຺ຕຣໍ ອພາຫິຣນ຺ຕິ ຘມ຺ມວເສນ ປຸຄ຺ຄລວເສນ ຈ ອນ຺ຕຣພາຫິຣໍ ອກຕ຺ວາ. ເອຕ຺ຕກນ຺ຕິອາທິນາ ວຸຕ຺ຕເມວຕ຺ຖໍ ວິວຣຕິ. ທຫຣກາເລຕິ ອຕ຺ຕໂນ ທຫຣກາເລ. ນ ເອວໍ ໂຫຕີຕິ ‘‘ອຫໍ ຠິກ຺ຂຸສງ຺ຆໍ ປຣິຫຣິສ຺ສາມີ’’ຕິອາທິໂກ ມານຕຓ຺ຫາມູລໂກ ອິສ຺ສາມຈ຺ຉຣິຍານໍ ປວຕ຺ຕິອາກາໂຣ ຕຖາຄຕສ຺ສ ນ ໂຫຕິ, ນຕ຺ເຖວ ປເຄວ ເຕສໍ ສມຸຈ຺ຉິນ຺ນຕ຺ຕາຕິ ອາຫ – ‘‘ໂພຘິປລ຺ລງ຺ເກເຍວາ’’ຕິອາທິ. ປຏິສງ຺ຂຣເຓນ ເວເຐນ ມິສ຺ສເກນ. ມຎ຺ເຎຕິ ຍຖາວຸຕ຺ຕໍ ປຏິສງ຺ຂຣຓສຎ຺ຎິເຕນ ເວຐມິສ຺ສເກນ ວິຍ ຊຣສກຏໍ. ອຣຫຕ຺ຕຜລເວເຐນາຕິ ອຣຫຕ຺ຕຜລສມາປຕ຺ຕິສຎ຺ຎິເຕນ ອຕ຺ຖຠາວເວເຐນ.

ຜລສມາປຕ຺ຕິຍາ ອຘິປ຺ເປຕຕ຺ຕາ ‘‘ເອກຈ຺ຈານໍ ເວທນານນ຺ຕິ ໂລກິຍານໍ ເວທນານ’’ນ຺ຕິ ວຸຕ຺ຕໍ. ອຕ຺ຕທີປາຕິ ເອຕ຺ຖ ອຕ຺ຕ-ສທ຺ເທນ ຘມ຺ໂມ ເອວ ວຸຕ຺ໂຕ, ສ຺ວາຍມຕ຺ໂຖ ເຫຏ຺ຐາ ວິຠາວິໂຕ ເອວ. ນວວິໂຘ ໂລກຸຕ຺ຕຣຘມ຺ໂມ ເວທິຕພ຺ໂພ. ໂສ ຫິ ຈຕູຫິ ໂອເຆຫິ ອນຊ຺ໂຌຕ຺ຖຣຓີຍໂຕ ‘‘ທີໂປ’’ຕິ ວຸຕ຺ໂຕ. ຕມອຄ຺ເຄຕິ ຕມໂຍຄາຠາເວນ ສເທວກສ຺ສ ໂລກສ຺ສ ອຄ຺ເຄ. ສພ຺ເພສນ຺ຕິ ສພ຺ເພສໍ ສິກ຺ຂາກາມານໍ. ເຕ ‘‘ຘມ຺ມທີປາ ວິຫຣຖາ’’ຕິ ວຸຕ຺ຕາ ຈຕຸສຕິປຏ຺ຐານໂຄຈຣາວ ຠິກ຺ຂູ ອຄ຺ເຄ ຠວິສ຺ສນ຺ຕິ.