໑໐. ຠິກ຺ຂຸນຸປສ຺ສຍສຸຕ຺ຕວຓ຺ຓນາ

໓໗໖. ກມ຺ມຏ຺ຐານກມ຺ມິກາຕິ ກມ຺ມຏ຺ຐານມນຸຍຸຕ຺ຕາ. ວິເສເສຕີຕິ ວິເສໂສ, ອຕິສໂຍ, ສ຺ວາຍໍ ປຸພ຺ພາປຣວິເສໂສ ອຸປາທາຍຸປາທາຍ ຄເຫຕພ຺ໂພຕິ ຕໍ ທສ຺ເສຕຸໍ ‘‘ຕຕ຺ຖາ’’ຕິອາທິມາຫ.

ອຸປ຺ປຊ຺ຊຕິ ກິເລສປຣິຬາໂຫຕິ ກາເຍ ອສຸຠາທິວເສນ ມນສິກາຣໍ ອທຫນ຺ຕສ຺ສ ມນສິກາຣສ຺ສ ວີຖິຍໍ ອປຏິປນ຺ນຕາ ສຸຠາທິວເສນ ກາຍາຣມ຺ມໂຓ ກິເລສປຣິຬາໂຫ ຈ ອຸປ຺ປຊ຺ຊຕິ. ວີຣິຍາຣມ຺ຠສ຺ສ ອຠາເວນ ຕສ຺ມິໍ ອາຣມ຺ມເຓ ເຈຕໂສ ວາ ລີນຕ຺ຕໍ ໂຫຕິ, ໂຄຈຣຊ຺ຌຕ຺ຕໂຕ ພຫິທ຺ຘາ ປຸຖຸຕ຺ຕາຣມ຺ມເຓ ຈິຕ຺ຕໍ ວິກ຺ຂິປຕິ. ເອວໍ ກິເລສປຣິຬາເຫ ຈາຕິອາທິນາ ຕິວິຘມ຺ປິ ຠາວນານຸໂຍຄສ຺ສ ກິເລສວຕ຺ຖຸຠາວໍ ອຸປາທາຍ ສມຸຈ຺ຈຍວເສນ ອຏ຺ຐກຖາຍໍ ວຸຕ຺ຕໍ. ຍສ຺ມາ ປນ ເຕ ປຣິຬາຫລີນຕ຺ຕວິກ຺ເຂປາ ເອກຊ຺ຌໍ ນ ປວຕ຺ຕນ຺ຕິ, ຕສ຺ມາ ປາຬິຍໍ ‘‘ກາຍາຣມ຺ມໂຓ ວາ’’ຕິອາທິນາ ອນິຍມຕ຺ໂຖ ວາ-ສທ຺ໂທ ຄຫິໂຕ. ກິເລສານຸຣຎ຺ຊິເຕນາຕິ ກິເລສວິວຓ຺ຓິຕຈິຕ຺ເຕນ ຫຸຕ຺ວາ ນ ວຕ຺ຕິຕພ຺ພໍ. ກຖໍ ປນ ວຕ຺ຕິຕພ຺ພນ຺ຕິ ອາຫ ‘‘ກິສ຺ມິຎ຺ຈິເທວາ’’ຕິ. ນ ຈ ວິຕກ຺ເກຕິ ນ ຈ ວິຈາເຣຕີຕິ ກິເລສສຫຄເຕ ວິຕກ຺ກວິຈາເຣ ນ ປວຕ຺ເຕຕິ. ສຸຂິໂຕຕິ ຌານສຸເຂນ ສຸຂິໂຕ.

ອິມສ຺ສ ຠິກ຺ຂຸໂນ ຠາວນາ ປວຕ຺ຕາຕິ ສມ຺ພນ຺ໂຘ. ຍສ຺ມາ ຫິ ອິມສ຺ສ ຠິກ຺ຂຸໂນ ຕໍ ມູລກມ຺ມຏ຺ຐານໍ ປຣິປນ຺ເຖ ສຕິ ຐເປຕ຺ວາ ພຸທ຺ຘຄຸຓາທິອນຸສ຺ສຣເຓນ ຈິຕ຺ຕໍ ປສາເທຕ຺ວາ ມູລກມ຺ມຏ຺ຐານຠາວນາ ປວຕ຺ຕາ, ຕສ຺ມາ ປຓິຘາຍ ຠາວນາຕິ ວຸຕ຺ຕນ຺ຕິ ສມ຺ພນ຺ໂຘ. ອຏ຺ຐເປຕ຺ວາຕິ ຈິຕ຺ຕໍ ອປ຺ປວຕ຺ເຕຕ຺ວາຕິ ອຕ຺ໂຖ ເວທິຕພ຺ໂພ. ກມ຺ມຏ຺ຐານາທີນໍ ຕິຓ຺ຓມ຺ປິ ວເສນ ອຕ຺ຖໂຍຊນາ ສມ຺ຠວຕິ. ເຕນາຫ ‘‘ຕຕ຺ຖາ’’ຕິອາທິ. ສາເຣນ຺ໂຕ ວິຍາຕິ ຣຖໍ ວາຫຍນ຺ໂຕ ວິຍ. ສມປ຺ປມາຓໂຕ ອຏ຺ຐກາທິວເສນ ສຸຕຈ຺ຉິຕໍ ປກ຺ຂິປນ຺ໂຕ ວິຍ. ສຸເຂເນວ ກິເລສານໍ ໂອກາສໍ ອເທນ຺ໂຕ ອນ຺ຕຣາ ອສຊ຺ຊນ຺ໂຕ ອລຄ຺ຄນ຺ໂຕ. ວິປສ຺ສນາຈາຣສ຺ສ ອາຣທ຺ຘວຸຕ຺ຕິຕໍ ອປຣິປນ຺ຖຕຎ຺ຈ ທສ຺ເສນ຺ໂຕ ໂອປມ຺ມທ຺ວຍມາຫ. ພ຺ຍາຠງ຺ຄິຍາຕິ ກາຊທຓ຺ເຑນ. ກິເລສປຣິຬາຫາທີນນ຺ຕິ ກິເລສປຣິຬາຫລີນຕ຺ຕວິກ຺ເຂປານໍ.

ຄຸຬຂຓ຺ຑາທີນີຕິ ຄຸຬຂຓ຺ຑສກ຺ຂຣຂຓ຺ຑາທີນິ ອຸຈ຺ຉຸວິກາຣຠູຕານິ. ‘‘ກາເຍ ກາຍານຸປສ຺ສີ ວິຫຣາມີ’’ຕິອາທິວຈນໂຕ ‘‘ປຸພ຺ພຠາຄວິປສ຺ສນາ ກຖິຕາ’’ຕິ ວຸຕ຺ຕໍ.

ອມ຺ພປາລິວຄ຺ຄວຓ຺ຓນາ ນິຏ຺ຐິຕາ.