໘. ສູທສຸຕ຺ຕວຓ຺ຓນາ

໓໗໔. ອາຫາຣສມ຺ປາທເນນ ຕໍຕໍອາຫາຣວຕ຺ຖຸຄເຕ ສູເທຕິ ປຄ຺ຆເຣຕີຕິ ສູໂທ, ຠຕ຺ຕກາຣໂກ. ທຫເຣຫິ ມນາປຕຣໍ ອຈ຺ເຈຕພ຺ພໂຕ ອຕິກ຺ກມິຕພ຺ພໂຕ ອຈ຺ຈຍາ, ໂຠຊເນ ຣສວິເສສາ, ຕສ຺ມາ ນານຈ຺ຈເຍຫີຕິ ນານປ຺ປກາຣຣສວິເສເສຫີຕິ ອຕ຺ໂຖ. ເຕນ ວຸຕ຺ຕໍ ‘‘ນານຈ຺ຈເຍຫີ’’ຕິອາທິ. ອຄ຺ຄີຍຕິ ອສງ຺ກຣໂຕ ວິຠຊີຍຕີຕິ ອຄ຺ໂຄ, ອມ຺ພິລເມວ ອຄ຺ໂຄ ອມ຺ພິລຄ຺ໂຄຕິ ອາຫ – ‘‘ອມ຺ພິລຄ຺ເຄຫີຕິ ອມ຺ພິລໂກຏ຺ຐາເສຫີ’’ຕິ. ທາຕຸໍ ອຠິຫຣິຕພ຺ພຕາຍ ອຠິຫາຣາ, ເທຍ຺ຍຘມ຺ມາ. ເຕນາຫ – ‘‘ອຠິຫຏານໍ ທາຍານ’’ນ຺ຕິ. ອິທໍ ເມ ກມ຺ມຏ຺ຐານໍ ອນຸໂລມໍວາຕິ ອິທໍ ມມ ກມ຺ມຏ຺ຐານໍ ເອວໍ ປວຕ຺ຕມານໍ ອນຸໂລມາວສານເມວ ຫຸຕ຺ວາ ຕິຏ຺ຐຕິ. ເອວໍ ປຸນ ປວຕ຺ຕມານໍ ອຸສ຺ສກ຺ກິຕ຺ວາ ວິເສສນິພ຺ພຕ຺ຕນຕ຺ຖເມວ ໂຫຕີຕິ ເອວໍ ນິມິຕ຺ຕໍ ຄເຫຕຸໍ ນ ສກ຺ໂກຕິ ພາໂລ ອພ຺ຍຕ຺ໂຕ, ປຓ຺ຑິໂຕ ປນ ສກ຺ໂກຕິ. ອຕ຺ຕໂນ ຈິຕ຺ຕສ຺ສາຕິ ອຕ຺ຕໂນ ຠາວນາຈິຕ຺ຕສ຺ສ. ປຸພ຺ພຠາຄວິປສ຺ສນາ ສຕິປຏ຺ຐານາວ ກຖິຕາ ‘‘ສກສ຺ສ ຈິຕ຺ຕສ຺ສ ນິມິຕ຺ຕໍ ອຸຄ຺ຄຓ຺ຫາຕີ’’ຕິ ວຸຕ຺ຕຕ຺ຕາ.