໔. ເມຕ຺ຕາສຫຄຕສຸຕ຺ຕວຓ຺ຓນາ

໒໓໕. ກີທິສາ ຄຕິ ນິພ຺ພຕ຺ຕິ ເອຕິສ຺ສາຕິ ກິໍຄຕິກາ, ກິໍນິຏ຺ຐາຕິ ວຸຕ຺ຕໍ ໂຫຕິ. ກີທິສີ ປຣມາ ອຸຕ຺ຕມາ ໂກຏິ ເອຕິສ຺ສາຕິ ກິໍປຣມາ. ກີທິສໍ ຜລໍ ອານິສໍສໍ ອຸທໂຍ ເອຕິສ຺ສາຕິ ກິໍຜລາ. ສໍສຏ຺ຐໍ ສມ຺ປຍຸຕ຺ຕນ຺ຕິ ອິທໍ ສຫຄຕ-ສທ຺ທສ຺ສ ອຕ຺ຖທສ຺ສນມຕ຺ຕໍ, ອິຘ ປນ ເມຕ຺ຕາຌານໍ ປາທກໍ ກຕ຺ວາ ວິປສ຺ສນາປຸພ຺ພຠາຄໂພຊ຺ຌງ຺ຄາ ຈ ‘‘ເມຕ຺ຕາສຫຄຕໍ ສຕິສມ຺ໂພຊ຺ຌງ຺ຄ’’ນ຺ຕິອາທິນາ ວຸຕ຺ຕາຕິ ເວທິຕພ຺ພໍ. ສພ຺ພຕ຺ຖາຕິ ສພ຺ເພສຸ ໂພຊ຺ຌງ຺ເຄສຸ ສພ຺ເພສຸ ຈ ພ຺ຣຫ຺ມວິຫາເຣສຸ.

ປຏິກູເລຕິ ວິຣຊ຺ຊຕີຕິ ປຏິກູລໍ, ອນິຏ຺ຐໍ. ນ ປຏິກູລໍ ອປ຺ປຏິກູລໍ, ອິຏ຺ຐໍ. ເຕນາຫ ‘‘ອິຏ຺ເຐ ວຕ຺ຖຸສ຺ມິ’’ນ຺ຕິ. ເອຕ຺ຖາຕິ ອປ຺ປຏິກູລວຕ຺ຖຸສ຺ມິໍ. ເອວນ຺ຕິ ປຏິກູລສຎ຺ຎີ. ສຕ຺ເຕ ອປ຺ປຏິກູເລ ອສຸຠຜຣຓໍ, ສງ຺ຂາເຣ ອປ຺ປຏິກູເລ ອນິຈ຺ຈນ຺ຕິ ມນສິກາຣໍ ກໂຣນ຺ໂຕ. ອສຸຠາຍາຕິ ອສຸຠສຎ຺ຎາຍ. ອນິຈ຺ຈໂຕ ວາ ອຸປສໍຫຣຕີຕິ ອນິຈ຺ຈນ຺ຕິ ມນສິກາຣໍ ປວຕ຺ເຕຕິ. ‘‘ເອເສວ ນໂຍ’’ຕິ ສງ຺ເຂປໂຕ ວຸຕ຺ຕມຕ຺ຖໍ ວິວຣິຕຸໍ ‘‘ອປ຺ປຏິກູລປຏິກູເລສູ’’ຕິອາທິ ວຸຕ຺ຕໍ. ຉຬງ຺ຄຸເປກ຺ຂນ຺ຕິ ຉສຸ ອາຣມ຺ມເຓສຸ ປຫີນານຸໂຣຘສ຺ສ ອຸປ຺ປຕ຺ຕິຍາ ຉຬງ຺ຄວນ຺ຕໍ ອຸເປກ຺ຂໍ.

ເມຕ຺ຕາຍາຕິ ເມຕ຺ຕາຠາວນາຍ. ປຏິກູລາທີສຸ ວຕ຺ຖູສຸ ອິຈ຺ຉິຕວິຫາເຣນ ວິຫຣິຕຸໍ ສມຕ຺ຖຕາ ອຣິຍານໍ ເອວ, ຕຕ຺ຖ ຈ ອຣຫໂຕ ເອວ ອິຊ຺ຌນໂຕ ອຣິຍິທ຺ຘິ ນາມ. ຕສ຺ສາ ອຣິຍິທ຺ຘິຍາ ຈ ທສ຺ສິຕຕ຺ຕາ ເທສນາ ວິນິວຏ຺ເຏຕພ຺ພາ ປຣິໂຍສາເນຕພ຺ພາ ສິຍາ. ອຣຫຕ຺ຕໍ ປາປຸຓິຕຸໍ ນ ສກ຺ໂກຕິ ອິນ຺ທ຺ຣິຍານໍ ອປຣິປກ຺ກຕ຺ຕາ ນິກນ຺ຕິຍາ ຈ ທຸປ຺ປຣິຍາທານໂຕ. ອຍໍ ເທສນາຕິ ‘‘ເມຕ຺ຕາສຫຄຕໍ ໂພຊ຺ຌງ຺ຄໍ ຠາເວຕີ’’ຕິອາທິນາ ອຍໍ ເທສນາ ອາຣທ຺ຘາ. ໂຍ ຫິ ເມຕ຺ຕາຌານໍ ປາທກໍ ກຕ຺ວາ ສມ຺ມສນໍ ອາຣຠິຕ຺ວາ ອຣຫຕ຺ຕໍ ປາປຸຓິຕຸໍ ອສກ຺ໂກນ຺ໂຕ ປຣິສຸທ຺ເຘສຸ ວຓ຺ຓກສິເຓສຸ ວິໂມກ຺ຂສງ຺ຂາຕໍ ຣູປາວຈຣຊ຺ຌານໍ ນິພ຺ພຕ຺ເຕຕິ, ຕໍ ສນ຺ຘາຍາຫ ຠຄວາ – ‘‘ສຸຠໍ ໂຂ ປນ ວິໂມກ຺ຂໍ ອຸປສມ຺ປຊ຺ຊ ວິຫຣຕີ’’ຕິ.

ສຸຠປຣມນ຺ຕິ ສຸຠວິໂມກ຺ຂປຣມໍ. ອິຘ ໂລເກ ເອວ ປຎ຺ຎາ ອສ຺ສ. ເຕນາຫ ‘‘ໂລກິຍປຎ຺ຎສ຺ສາຕິ ອຕ຺ໂຖ’’ຕິ. ອຣຫຕ຺ຕປຣມາວ ເມຕ຺ຕາ ອຣຫຕ຺ຕມຄ຺ຄສ຺ສ ປາທກຕ຺ຕາ. ກຣຸຓາທີສຸປິ ເອເສວ ນໂຍຕິ ກຣຸຓາທິຌານໍ ປາທກໍ ກຕ຺ວາ ສງ຺ຂາເຣ ສມ຺ມສນ຺ໂຕ ອຣຫຕ຺ຕໍ ປຕ຺ຕຸໍ ສກ຺ໂກຕິ, ຕສ຺ສ ອຣຫຕ຺ຖປຣມາ ກຣຸຓາ ໂຫຕິ, ເອວໍ ມຸທິຕາອຸເປກ຺ຂາສຸປິ ວຕ຺ຕພ຺ພນ຺ຕິ ອິມມຕ຺ຖໍ ອຕິທິສຕິ. ປຸນ ເທສນາຣມ຺ຠປໂຍຊນໍ ປນ ‘‘ອິມິນາ ນເຍນາ’’ຕິ ເຫຏ຺ຐາ ອຕິທິຏ຺ຐເມວ.

ສຸຠປຣມາທິຕາຕິ ເມຕ຺ຕາກຣຸຓາມຸທິຕາອຸເປກ຺ຂານໍ ສຸຠປຣມຕາ ອາກາສານຎ຺ຈາຍຕນປຣມຕາ, ວິຎ຺ຎາຓຎ຺ຈາຍຕນປຣມຕາ, ອາກິຎ຺ຈຎ຺ຎາຍຕນປຣມຕາ. ຕສ຺ສ ຕສ຺ສາຕິ ສຸຠວິໂມກ຺ຂສ຺ສ ເຫຏ຺ຐາ ຕິຓ຺ຓໍ ອຣູປຊ຺ຌານານຎ຺ຈ ຍຖາກ຺ກມໍ ອຸປນິສ຺ສຍຕ຺ຕາ. ອປ຺ປຏິກູລປຣິຈຍາຕິ ອິຏ຺ຐາຣມ຺ມເຓ ມນສິກາຣພຫຸລີກາຣາ. ອປ຺ປກສິເຣເນວາຕິ ສຸເຂເນວ. ຕຕ຺ຖາຕິ ວິສຸທ຺ຘຕາຍ ອິຏ຺ເຐສຸ ວຓ຺ຓກສິເຓສຸ. ຈິຕ຺ຕນ຺ຕິ ຠາວນາມຍຈິຕ຺ຕໍ ປກ຺ຂນ຺ທຕິ ອປ຺ປນາວເສນ. ຕໂຕ ປຣນ຺ຕິ ຕໂຕ ສຸຠວິໂມກ຺ຂໂຕ ປຣໍ ວິໂມກ຺ຂານໍ ອຸປນິສ຺ສໂຍ ນາມ ນ ໂຫຕິ, ເມຕ຺ຕາສຫຄຕຠາໂວ ທຏ຺ຐພ຺ໂພ.

ສຕ຺ຕທຸກ຺ຂໍ ສມນຸປສ຺ສນ຺ຕສ຺ສາຕິ ທຓ຺ເຑນ ອຠິຫຏປ຺ປຕ຺ຕຣູປເຫຕຸໍ ສຕ຺ເຕສຸ ອຸປ຺ປຊ຺ຊນກທຸກ຺ຂໍ ຎາເຓນ ວີມໍສນ຺ຕສ຺ສ. ຕຍິທໍ ຣູປນິມິຕ຺ຕກໍ ສຕ຺ເຕສຸ ອຸປ຺ປຊ຺ຊນກໍ ທຸກ຺ຂໍ ຎາເຓນ ກຣຸຓາວິຫາຣິສ຺ສ ວິເສສໂຕ ປກ຺ຂນ຺ທຕີຕິ ກຕ຺ວາ ວຸຕ຺ຕໍ ‘‘ອປ຺ປກສິເຣເນວ ຕຕ຺ຖ ຈິຕ຺ຕໍ ປກ຺ຂນ຺ທຕີ’’ຕິ, ນ ປນ ສພ຺ພໂສ ອຣູເປ ອານິສໍສທສ຺ສນໂຕ.

ວິຎ຺ຎາຓໍ ສມນຸປສ຺ສນ຺ຕສ຺ສາຕິ ອິທໍ ປາໂມຊ຺ຊຄຫຓມຸເຂນ ຕນ຺ນິສ຺ສຍວິຎ຺ຎາຓສ຺ສ ຄຫຓໍ ສມ຺ຠວຕີຕິ ກຕ຺ວາ ວຸຕ຺ຕໍ. ວິຎ຺ຎາຓຄ຺ຄຫຓປຣິຈິຕນ຺ຕິ ວຸຕ຺ຕນເຍນ ວິຎ຺ຎາຓຄ຺ຄຫເຓ ປຣິຈິຕໍ.

ອຸເປກ຺ຂາວິຫາຣິສ຺ສາຕິ ອຸເປກ຺ຂາພ຺ຣຫ຺ມວິຫາຣໍ ວິຫຣໂຕ. ອາໂຠຄາຠາວໂຕຕິ ສຸຂາທິວເສນ ອາຠຸຊນາຠາວໂຕ. ສຸຂ…ເປ… ສມ຺ຠວໂຕຕິ ສຸຂທຸກ຺ຂາຕິ ປຣມຕ຺ຖກມ຺ມຄ຺ຄຫເຓ ວິມຸຂຕາສມ຺ຠວໂຕ. ອວິຊ຺ຊມານຄ຺ຄຫຓທຸກ຺ຂນ຺ຕິ ປຣມຕ຺ຖໂຕ ອວິຊ຺ຊມານສຕ຺ຕປຎ຺ຎຕ຺ຕິຄຫຓປຣິຈິຕໍ ຕສ຺ສ ຕສ຺ສ ອຠາວມຕ຺ຕກສ຺ສ ຄຫຓມ຺ປິ ທຸກ຺ຂໍ ກຸສລມ຺ປິ ໂຫຕິ. ເສສໍ ສຸວິຎ຺ເຎຍ຺ຍເມວ.

ເມຕ຺ຕາສຫຄຕສຸຕ຺ຕວຓ຺ຓນາ ນິຏ຺ຐິຕາ.