໕. ຠິກ຺ຂຸສຸຕ຺ຕວຓ຺ຓນາ

໑໘໖. ໂພຘາຍາຕິ ເອຕ຺ຖ ໂພໂຘ ນາມ ພຸຊ຺ຌນໍ, ຕໍ ປນ ກິສ຺ສ ເກນາຕິ ປຸຈ຺ຉນ຺ໂຕ ‘‘ກິໍ ພຸຊ຺ຌນຕ຺ຖາຍາ’’ຕິ ວຕ຺ວາ ຕໍ ທສ຺ເສນ຺ໂຕ ‘‘ມຄ຺ເຄນາ’’ຕິອາທິມາຫ. ມຄ຺ເຄນ ນິພ຺ພານໍ ພຸຊ຺ຌນຕ຺ຖາຍ ສໍວຕ຺ຕນ຺ຕິ, ປຈ຺ຈເວກ຺ຂຓາຍ ກຕກິຈ຺ຈຕໍ ພຸຊ຺ຌນຕ຺ຖາຍ ສໍວຕ຺ຕນ຺ຕິ, ປຐມວິກປ຺ເປ ສຈ຺ຉິກິຣິຍາຠິສມໂຍ ເອວ ທສ຺ສິໂຕຕິ ເຕນ ອຕຸຏ຺ເຐ ‘‘ມຄ຺ເຄນ ວາ’’ຕິ ທຸຕິຍວິກປ຺ປມາຫ. ວິເວກນິສ຺ສິຕໍ ວິຣາຄນິສ຺ສິຕນ຺ຕິ ປເທຫິ ສພ຺ພໍ ມຄ຺ຄກິຈ຺ຈໍ ຕສ຺ສ ຜລຎ຺ຈ ທສ຺ສິຕໍ. ນິໂຣຘນິສ຺ສິຕນ຺ຕິ ອິມິນາ ນິພ຺ພານສຈ຺ຉິກິຣິຍາ. ກາມາສວາປິ ຈິຕ຺ຕໍ ວິມຸຈ຺ຈຕີຕິອາທິນາ ກິເລສປ຺ປຫານໍ. ວິມຸຕ຺ຕສ຺ມິໍ ວິມຸຕ຺ຕມິຕິ ຎາຓໍ ໂຫຕີຕິອາທິນາ ປຈ຺ຈເວກ຺ຂຓາ ທສ຺ສິຕາ.

ຠິກ຺ຂຸສຸຕ຺ຕວຓ຺ຓນາ ນິຏ຺ຐິຕາ.