໑. ໂລກຈິນ຺ຕາສຸຕ຺ຕວຓ຺ຓນາ

໑໑໑໑. ໂລກຈິນ຺ຕນ຺ຕິ ໂລກສນ຺ນິເວສປຏິສໍຍຸຕ຺ຕວີມໍສາວ. ‘‘ໂລກຈິຕ຺ຕ’’ນ຺ຕິປິ ປາໂຐ, ຕໍຕໍໂລກປຣິຍາປນ຺ນໍ ຈິຕ຺ຕນ຺ຕິ ອຕ຺ໂຖ. ນາຬິເກຣາທໂຍຕິ ອາທິ-ສທ຺ເທນ ອວຸຕ຺ຕານໍ ໂອສຘິຕິຓວນປ຺ປຕິອາທີນໍ ສງ຺ຄໂຫ. ເອວຣູປນ຺ຕິ ເອທິສໍ ອຎ຺ຎມ຺ປິ ຕໍຕໍໂລກຈິຕ຺ຕໍ.

ວິຄຕຈິຕ຺ໂຕຕິ ອຕ຺ຕຕ຺ຖປຣຕ຺ຖໂຕ ອປຄຕວິຕກ຺ໂກ ອທ຺ທສ ເອວໍ ອຘິຏ຺ຐຫິໍສູຕິ ສມ຺ພນ຺ໂຘ. ສມ຺ພຣິມາຍນ຺ຕິ ສມ຺ພເຣນ ອສຸຣິນ຺ເທນ ອຸປ຺ປາທິຕໍ ອສຸຣມາຍໍ, ຍໍ ‘‘ອິນ຺ທຊາລ’’ນ຺ຕິປິ ວຸຈ຺ຈຕິ ອິນ຺ທສ຺ສ ໂມຫນຕ຺ຖໍ ອຸປ຺ປາທິຕຕ຺ຕາ. ສມ຺ປຣິວຕ຺ເຕຕ຺ວາຕິ ປຣິຘາເວຕ຺ວາ. ຍຖາ ເນຕິ ເນ ອສຸເຣ ຍຖາ ໂສ ປຸຣິໂສ ປສ຺ສຕິ, ເອວໍ ອຘິຏ຺ຐຫິໍສຸ. ກສ຺ມາ ປເນເຕ ເອວໍ ອຘິຏ຺ຐຫິໍສູຕິ? ຕໍ ປຸຣິສໍ ຕຕ຺ຖ ຕຖານິສິນ຺ນໍ ທິສ຺ວາ ‘‘ອຍຎ຺ຈ ເທໂວ’’ຕິ ອາສງ຺ກນ຺ຕາ ຕຖາ ອຘິຏ຺ຐຫິຕ຺ວາ ຠິສມຸຬາລຉິທ຺ເທຫິ ປວິສິຕ຺ວາ ອຕ຺ຕໂນ ອສຸຣຠວນໍ ຄຕາ. ເຕນາຫ ຠຄວາ – ‘‘ເທວານໍເຍວ ໂມຫຍມານາ’’ຕິ.