໑. ສພ຺ພສຸຕ຺ຕວຓ຺ຓນາ

໒໓. ສພ຺ພ-ສທ຺ໂທ ປກຣຓວເສນ ກຕ຺ຖຈິ ສປ຺ປເທເສປິ ປວຕ຺ຕຕີຕິ ຕໂຕ ນິວຕ຺ຕນຕ຺ຖໍ ອນວເສສວິສເຍນ ສພ຺ພ-ສທ຺ເທນ ວິເສເສຕ຺ວາ ວຸຕ຺ຕໍ ‘‘ສພ຺ພສພ຺ພ’’ນ຺ຕິ, ສພ຺ພເມວ ຫຸຕ຺ວາ ສພ຺ພນ຺ຕິ ອຕ຺ໂຖ. ອາຍຕນຠາວໍ ສພ຺ພໍ ອາຍຕນສພ຺ພໍ, ເສສທ຺ວເຍປິ ເອເສວ ນໂຍ.

ຕສ຺ສ ອວິສຍາຠາວໂຕ ນ ອທ຺ທິຏ຺ຐມິຘຕ຺ຖິ ກິຎ຺ຈີຕິ. ອິຘາຕິ ນິປາຕມຕ຺ຕໍ, ອິຘ ວາ ສເທວເກ ໂລເກ, ທສ຺ສນຠູເຕນ ຎາເຓນ ອທິຏ຺ຐໍ ນາມ ກິຎ຺ຈິ ນຕ຺ຖີຕິ ອຕ຺ໂຖ. ຍທິ ເອວໍ ອນຸມານວິສຍໍ ນຸ ໂຂ ກຖນ຺ຕິ ອາຫ ‘‘ອໂຖ ອວິຎ຺ຎາຕ’’ນ຺ຕິ. ອຎ຺ເຎສໍ ອປຈ຺ຈກ຺ຂມ຺ປິ ອວິຎ຺ຎາຕໍ ຕສ຺ສ ກິຎ຺ຈິ ນຕ຺ຖີຕິ ອທິຏ຺ຐໍ ອວິຎ຺ຎາຕໍ ນຕ຺ຖິ. ປຈ຺ຈຸປ຺ປນ຺ນໍ ອຕີຕເມວ ເຎຍ຺ຍໍ ຄຫິຕໍ, ອນາຄຕໍ ນຸ ໂຂ ກຖນ຺ຕິ ອາຫ – ‘‘ອຊານິຕພ຺ພ’’ນ຺ຕິ, ຕສ຺ສ ກິຎ຺ຈິ ນຕ຺ຖີຕິ ອາເນຕ຺ວາ ສມ຺ພນ຺ໂຘ. ຊານິຕຸໍ ຎາຕຸໍ ອສກ຺ກຸເຓຍ຺ຍໍ ນາມ ຕສ຺ສ ກິຎ຺ຈິ ນຕ຺ຖີຕິ ທສ຺ເສນ຺ໂຕ ອາຫ ‘‘ສພ຺ພໍ ອຠິຎ຺ຎາສີ’’ຕິອາທິ.

ສກລສ຺ສ ສກ຺ກາຍຘມ຺ມສ຺ສ ປຣິຄ຺ຄຫິຕຕ຺ຕາ ສກ຺ກາຍສພ຺ພໍ. ສພ຺ພຘມ຺ເມສູຕິ ປຎ຺ຈນ຺ນໍ ທ຺ວາຣານໍ ອາຣມ຺ມຓຠູເຕສຸ ສພ຺ເພສຸ ຘມ຺ເມສຸ. ຍສ຺ມາ ຉສຸປິ ອາຣມ຺ມເຓສຸ ຄຫິເຕສຸ ປເທສສພ຺ພໍ ນາມ ນ ໂຫຕິ, ຕສ຺ມາ ‘‘ປຎ຺ຈາຣມ຺ມຓມຕ຺ຕ’’ນ຺ຕິ ວຸຕ຺ຕໍ. ປເທສສພ຺ພໍ ສກ຺ກາຍສພ຺ພໍ ນ ປາປຸຓາຕິ ຕສ຺ສ ເຕຠູມກຘມ຺ເມສຸ ເອກເທສສ຺ສ ອສງ຺ຄຓ຺ຫນໂຕ. ສກ຺ກາຍສພ຺ພໍ ອາຍຕນສພ຺ພໍ ນ ປາປຸຓາຕິ ໂລກຸຕ຺ຕຣຘມ຺ມານໍ ອສງ຺ຄຓ຺ຫນໂຕ. ອາຍຕນສພ຺ພໍ ສພ຺ພສພ຺ພໍ ນ ປາປຸຓາຕິ. ຍສ຺ມາ ອາຍຕນສພ຺ເພນ ຈຕຸຠູມກຘມ຺ມາວ ປຣິຄ຺ຄຫິຕາ, ນ ລກ຺ຂຓປຎ຺ຎຕ຺ຕິໂຍ, ຍສ຺ມາ ສພ຺ພສພ຺ພໍ ທສ຺ເສນ຺ເຕນ ພຸທ຺ຘຎາຓວິສໂຍ ທສ຺ສິໂຕ, ຕສ຺ມາ ‘‘ສພ຺ພສພ຺ພໍ ນ ປາປຸຓາຕີ’’ຕິ ເອຕ຺ຖາປິ ‘‘ກສ຺ມາ…ເປ… ນຕ຺ຖິຕາຍາ’’ຕິ ສພ຺ພໍ ຎາຕາຣມ຺ມເຓເນວ ປຸຈ຺ຉາວິສ຺ສຊ຺ຊນໍ ກຕໍ. ‘‘ອາຍຕນສພ຺ເພປິ ອິຘ ວິປສ຺ສນຸປຄຘມ຺ມາວ ຄເຫຕພ຺ພາ ອຠິຎ຺ເຎຍ຺ຍນິທ຺ເທສວເສນປິ ສມ຺ມສນຈາຣສ຺ເສວ ອິຈ຺ຉິຕຕ຺ຕາ’’ຕິ ວທນ຺ຕິ.

ປຏິກ຺ຂິປິຕ຺ວາຕິ ‘‘ອິທໍ ສພ຺ພໍ ນາມ ນ ໂຫຕີ’’ຕິ ເອວໍ ປຏິກ຺ຂິປິຕ຺ວາ. ຕສ຺ສາຕິ ‘‘ອຎ຺ຎໍ ສພ຺ພໍ ປຎ຺ຎາເປສ຺ສາມີ’’ຕິ ວທນ຺ຕສ຺ສ. ວາຈາຍ ວຕ຺ຕພ຺ພວຕ຺ຖຸມຕ຺ຕກເມວາຕິ ວຎ຺ຌາປຸຕ຺ຕຄຄນກຸສຸມາທິວາຈາ ວິຍ ເອຕສ຺ສ ວາຈາຍ ເກວລໍ ວຕ຺ຕພ຺ພວຕ຺ຖຸກເມວ ຠເວຍ຺ຍ, ນ ອຕ຺ໂຖ, ວຈນມຕ຺ຕກເມວາຕິ ອຕ຺ໂຖ. ອຕິກ຺ກມິຕ຺ວາຕິ ອນາມສິຕ຺ວາ ອຄ຺ຄເຫຕ຺ວາ. ຕໍ ກິສ຺ສ ເຫຕູຕິ ວິຆາຕາປຊ຺ຊນໍ ເກນ ເຫຕຸນາ. ຍຖາ ຕໍ ອວິສຍສ຺ມິນ຺ຕິ ຍຖາ ອຎ຺ໂຎປິ ໂກຈິ ອວິສເຍ ວາຍມນ຺ໂຕ, ເອວນ຺ຕິ ອຕ຺ໂຖ. ອຏ຺ຐກຖາຍໍ ປນ ຍສ຺ມາ ປາຬິຍໍ ‘‘ຕໍ ກິສ຺ສ ເຫຕູ’’ຕິ ວຸຕ຺ຕກາຣຓເມວ ອຸປນຍນວເສນ ທສ຺ເສຕຸໍ ‘‘ຍຖາ ຕ’’ນ຺ຕິອາທິ ວຸຕ຺ຕໍ. ກາຣໂຓປນຍນຎ຺ຈ ກາຣຓເມວາຕິ ‘‘ຍຖາຕິ ກາຣຓວຈນ’’ນ຺ຕິ ວຸຕ຺ຕນ຺ຕິ ທຏ຺ຐພ຺ພໍ. ເຕເນວາຫ ‘‘ເອວໍ ອິມສ຺ມິມ຺ປິ ອວິສເຍ’’ຕິອາທິ.

ສພ຺ພສຸຕ຺ຕວຓ຺ຓນາ ນິຏ຺ຐິຕາ.