໒. ປຫານສຸຕ຺ຕວຓ຺ຓນາ

໒໔. ສພ຺ພສ຺ສາຕິ ທ຺ວາຣາຣມ຺ມເຓຫິ ສທ຺ຘິໍ ທ຺ວາຣປ຺ປວຕ຺ຕສ຺ສ. ປຫານາຍາຕິ ຕປ຺ປຏິພທ຺ຘຉນ຺ທຣາຄປຫານວເສນ ປຊຫນາຍ. ຈກ຺ຂຸສມ຺ຜສ຺ສນ຺ຕິ ຈກ຺ຂຸສນ຺ນິສ຺ສິຕຜສ຺ສໍ. ມູລປຈ຺ຈຍນ຺ຕິ ມູລຠູຕໍ ປຈ຺ຈຍໍ ກຕ຺ວາ, ສຫຊາຕເວທນາຍ ຈກ຺ຂຸສມ຺ຜສ຺ສປຈ຺ຈຍຠາເວ ວຕ຺ຕພ຺ພເມວ ນຕ຺ຖິ. ເອເສວ ນໂຍຕິ ອປເທເສນ ‘‘ໂສຕສມ຺ຜສ຺ສໍ ມູລປຈ຺ຈຍໍ ກຕ຺ວາ’’ຕິອາທິນາ ວຕ຺ຕພ຺ພນ຺ຕິ ທສ຺ເສຕິ. ມໂນຕິ ຠວງ຺ຄຈິຕ຺ຕໍ ມໂນທ຺ວາຣສ຺ສ ອຘິປ຺ເປຕຕ຺ຕາ. ອາຣມ຺ມຓນ຺ຕິ ຘມ຺ມາຣມ຺ມຓໍ. ສຫາວຊ຺ຊນກຊວນນ຺ຕິ ສຫມໂນທ຺ວາຣາວຊ຺ຊນກໍ ຊວນໍ. ຕໍປຸພ຺ພກຕ຺ຕາ ມໂນວິຎ຺ຎາຓຜສ຺ສເວທນານໍ ມູລປຈ຺ຈຍຠູຕາ ສພ຺ເພສ຺ເວວ ຈກ຺ຂຸທ຺ວາຣາທີສຸ ວຸຕ຺ຕິຕ຺ຕາ ຕທນຸຣູປໂຕ ‘‘ຠວງ຺ຄສຫຊາໂຕ ສມ຺ຜສ຺ໂສ’’ຕິ ວຸຕ຺ຕໍ. ສຫາວຊ຺ຊນເວທນາຍ ຊວນເວທນາ ‘‘ເວທຍິຕ’’ນ຺ຕິ ອຘິປ຺ເປຕາ, ຠວງ຺ຄສມ຺ປຍຸຕ຺ຕາຍ ປນ ເວທນາຍ ຄຫເຓ ວຕ຺ຕພ຺ພເມວ ນຕ຺ຖິ. ຠວງ຺ຄໂຕ ອໂມເຈຕ຺ວາ ຠວງ຺ຄຈິຕ຺ເຕນ ສທ຺ຘິໍເຍວ ອາວຊ຺ຊນໍ ຄເຫຕ຺ວາ ມໂນທ຺ວາຣາວຊ຺ຊນໍ ຠວງ຺ຄໍ ທຏ຺ຐພ຺ພໍ. ຍາ ປເນຕ຺ຖ ເທສນາຕິ ຍາ ເອຕ຺ຖ ‘‘ປຫານາຍາ’’ຕິອາທິນາ ປວຕ຺ຕເທສນາ ສຕ຺ຖຸ ອນສິຏ຺ຐິ ອາຓາ. ອຍໍ ປຓ຺ຓຕ຺ຕິ ນາມ ຕສ຺ສ ຕສ຺ສ ອຕ຺ຖສ຺ສ ປກາຣໂຕ ຎາປນໂຕ. ເອຕ຺ຖ ສພ຺ພຄ຺ຄຫເຓນ ສພ຺ເພ ສຠາວຘມ຺ມາ ຄຫິຕາ, ປຎ຺ຎຕ຺ຕິ ປນ ກຕມາຕິ ວິຈາຣຓາຍ ຕໍ ທສ຺ເສຕຸໍ ‘‘ຍາ ປເນຕ຺ຖາ’’ຕິອາທິ ວຸຕ຺ຕນ຺ຕິ ທຏ຺ຐພ຺ພໍ.

ປຫານສຸຕ຺ຕວຓ຺ຓນາ ນິຏ຺ຐິຕາ.