໗. ທຸກ຺ຂຘມ຺ມສຸຕ຺ຕວຓ຺ຓນາ

໒໔໔. ທຸກ຺ຂຘມ຺ມານນ຺ຕິ ທຸກ຺ຂກາຣຓານໍ. ເຕນາຫ ‘‘ທຸກ຺ຂສມ຺ຠວຘມ຺ມານ’’ນ຺ຕິອາທິ. ຕຕ຺ຖ ກິໍ ທຸກ຺ຂໍ, ກາ ທຸກ຺ຂຘມ຺ມາຕິ ຕທຸຠຍໍ ທສ຺ເສຕຸໍ ‘‘ປຎ຺ຈສຸ ຫີ’’ຕິ ວຸຕ຺ຕໍ. ເຕຕິ ປຎ຺ຈກ຺ຂນ຺ຘາ. ທຸກ຺ຂສມ຺ຠວຘມ຺ມຕ຺ຕາຕິ ທຸກ຺ຂຸປ຺ປຕ຺ຕິກາຣຓຕ຺ຕາ. ອສ຺ສາຕິ ເຕນ. ກຣເຓ ເຫຕໍ ສາມິວຈນໍ. ກາເມຕິ ວຕ຺ຖຸກາເມ ກິເລສກາເມ ຈ. ປຸນ ອສ຺ສາຕິ ສາມິອຕ຺ເຖ ເອວ ສາມິວຈນໍ. ຈາຣນ຺ຕິ ຈິຕ຺ຕາຈາຣໍ. ວິຫາຣນ຺ຕິ ປຎ຺ຈທ຺ວາຣປ຺ປວຕ຺ຕິຈາຣວິຫາຣໍ. ‘‘ເອກຏ຺ຐາ’’ຕິ ຈ ວທນ຺ຕິ. ເຕເນວ ຫິ ‘‘ອນຸພນ຺ຘິຕ຺ວາ ຈຣນ຺ຕໍ’’ອິຈ຺ເຈວ ວຸຕ຺ຕໍ. ອນຸພນ຺ຘິຕ຺ວາຕິ ຈ ວີຖິຈິຕ຺ຕປ຺ປວຕ຺ຕິໂຕ ປຏ຺ຐາຍ ຍາວ ຕຕິຍຊວນວາຣາ ອນຸ ອນຸ ພນ຺ຘິຕ຺ວາ. ປກ຺ຂນ຺ທນາທີຕິ ອາທິ-ສທ຺ເທນ ກສິໂຄຣກ຺ຂາທິວເສນປິ ກາມານໍ ປຣິເຍສນທຸກ຺ຂໍ ສງ຺ຄຓ຺ຫາຕິ.

ທາຍຕີຕິ ທາໂຍ, ວນໍ. ເຕນາຫ ‘‘ອຏວິ’’ນ຺ຕິ. ກຓ຺ຏກຄພ຺ຠນ຺ຕິ ໂອວຣກສທິສໍ ວນໍ. ນາມປທໍ ນາມ ກິຣິຍາປທາເປກ຺ຂນ຺ຕິ ‘‘ວິຊ຺ຌີ’’ຕິ ວຈນເສເສນ ກິຣິຍາປທໍ ຄຓ຺ຫາຕິ.

ທນ຺ຘາຍິຕຕ຺ຕໍ ອຸປ຺ປນ຺ນກິເລສານໍ ອວຏ຺ຐານໍ. ເຕນາຫ ‘‘ອຸປ຺ປນ຺ນມຕ຺ຕາຍາ’’ຕິອາທິ. ຕາຍາຕິ ສຕິຍາ. ກາຈິ ກິເລສາຕິ ຈຸທ຺ທສວິເຘ ຈິຕ຺ຕສ຺ສ ກິຈ຺ເຈ ຊວນກິຈ຺ເຈ ເອວ ຈິຕ຺ຕກິເລສານໍ ອຸປ຺ປຕ຺ຕິໍ ກຕ຺ວາ ຕຖາ ວຸຕ຺ຕໍ. ນິຄ຺ຄຫິຕາວ ໂຫນ຺ຕິ ປວຕ຺ຕິຕຸໍ ອປ຺ປທານວເສນ. ເຕນາຫ ‘‘ນ ສຓ຺ຐາຕຸໍ ສກ຺ໂກນ຺ຕີ’’ຕິ. ຈກ຺ຂຸທ຺ວາຣສ຺ມິນ຺ຕິ ປາຬິຍໍ ຕສ຺ສ ປຐມໍ ຄຫິຕຕາຍ ວຸຕ຺ຕໍ, ເຕນ ນເຍນ ເສສທ຺ວາຣານິປິ ຄຫິຕາເນວ ໂຫນ຺ຕິ. ຣາຄາທີສຸ ອຸປ຺ປນ຺ເນສຸ ປຐມຊວນວາເຣ. ສຕິສມ຺ໂມເສນ ‘‘ກິເລສາ ເມ ອຸປ຺ປນ຺ນາ’’ຕິ ຎຕ຺ວາ ຕຖາ ປຈ຺ຈາມາສສຕິຍາ ລພ຺ຠນໂຕ. ເຕນາຫ – ‘‘ອນຈ຺ຉຣິຍໍ ເຈຕ’’ນ຺ຕິ. ອາວຏ຺ເຏຕ຺ວາຕິ ອໂຍນິໂສ ອາວຏ຺ເຏຕ຺ວາ. ອາວຊ຺ຊນາທີສູຕິ ຕໂຕ ເອວ ອໂຍນິໂສ ອາວຊ຺ຊນາທີສຸ ອຸປ຺ປນ຺ເນສຸ ອິຏ຺ຐາຣມ຺ມຓສ຺ສ ລທ຺ຘຕ຺ຕາ ປຈ຺ຈຍສິທ຺ຘິຍາ ສມ຺ປຕ຺ຕໍ ປວຕ຺ຕນາຣຫໍ. ນິວຕ຺ເຕຕ຺ວາຕິ ທຸຕິຍຊວນວາເຣປິ ກິເລສຸປ຺ປຕ຺ຕິໍ ນິວຕ຺ເຕຕ຺ວາ. ກຖໍ ປນສ຺ສ ເອວໍ ລທ຺ຘຸໍ ສກ຺ກາຕິ ອາຫ ‘‘ອາຣທ຺ຘວິປສ຺ສການໍ ຫີ’’ຕິອາທິ. ຠາວນາປຏິສງ຺ຂາເນຕິ ຠາວນາຍໍ ປຏິສງ຺ຂາເນ ຈ ໂຍຄິໂນ ປຕິຏ຺ຐິຕຠາໂວ. ຕສ຺ສ ອຍມານິສໍໂສ – ຍໍ ປຈ຺ຈຍລາເຠນ ອຸປ຺ປຊ຺ຊິຕຸໍ ລທ຺ໂຘກາສາປິ ກິເລສາ ປຸພ຺ເພ ປວຕ຺ຕຠາວນານຸຠາເວນ ວິກ຺ຂມ຺ຠິຕາ ຕຖາ ຕຖາ ນິຄ຺ຄຫິຕາ ເອວ ຫຸຕ຺ວາ ນິວຕ຺ຕນ຺ຕິ, ກຸສລາ ຘມ຺ມາວ ລທ຺ໂຘກາສາ ອຸປຣູປຣິ ວຑ຺ຒນ຺ຕິ.

ອຠິຫຏ຺ຐຸນ຺ຕິ ອຠິຫຣິຕ຺ວາ. ອນຸທຫນ຺ຕີຕິ ອນຸທຫນ຺ຕາ ວິຍ ໂຫນ຺ຕິ. ອນຸເສນ຺ຕີຕິ ເອຕ຺ຖາປິ ເອເສວ ນໂຍ. ອນາວຏ຺ຏນ຺ເຕຕິ ອນິວຕ຺ຕນ຺ເຕ ສາມຎ຺ຎໂຕຕິ ອຘິປ຺ປາໂຍ. ວິປສ຺ສນາພລເມວ ທີປິຕໍ ມຄ຺ຄຜລາຘິຄມສ຺ສ ອໂຊຕິຕຕ຺ຕາ.

ທຸກ຺ຂຘມ຺ມສຸຕ຺ຕວຓ຺ຓນາ ນິຏ຺ຐິຕາ.