໑. ອທນ຺ຕອຄຸຕ຺ຕສຸຕ຺ຕວຓ຺ຓນາ

໙໔. ອທມິຕາຕິ ທມໍ ນິພ຺ພິເສວນຠາວໍ ອນີຕາ. ອໂຄປິຕາຕິ ສຕິສງ຺ຂາຕາຍ ວຕິຍາ ນ ຣກ຺ຂິຕາ. ອປິຫິຕາຕິ ສຕິກວາເຏນ ນ ປິຫິຕາ. ຈຕູຫິປິ ປເທຫິ ອິນ຺ທ຺ຣິຍານໍ ອນາວຣຓເມວາຫ. ອຘິກໍ ວຫນ຺ຕີຕິ ອຘິວາຫາ, ທຸກ຺ຂສ຺ສ ອຘິວາຫາ ທຸກ຺ຂາຘິວາຫາ. ນິຣເຍສຸ ອຸປ຺ປຊ຺ຊນກໍ ເນຣຍິກໍ. ອາທິ-ສທ຺ເທນ ເສສປາຬິໍ ສງ຺ຄຓ຺ຫາຕິ.

ສເຬວາຕິ ຉ-ກາຣສ຺ສ ສ-ກາໂຣ, ຬ-ກາໂຣ ປທສນ຺ຘິກໂຣ. ຍຕ຺ຖາຕິ ນິມິຕ຺ຕຕ຺ເຖ ຠຸມ຺ມໍ. ອນວສ຺ສຸຕາ ອຕິນ຺ຕາຕິ ຣາເຄນ ອເຕມິຕາ.

ອສ຺ສາທິຕນ຺ຕິ ອສ຺ສາທໍ ອິຕໍ ອຸປຄຕໍ. ເຕນາຫ ‘‘ອສ຺ສາທວນ຺ຕ’’ນ຺ຕິ. ສຸຂທຸກ຺ຂນ຺ຕິ ອິຏ຺ຐານິຏ຺ຐໍ. ອນ຺ວຍຕີຕິ ອນ຺ວໂຍ, ເຫຕຸ. ຜສ຺ໂສຕິ ອນ຺ວໂຍ ເອຕສ຺ສາຕິ ຜສ຺ສນ຺ວຍນ຺ຕິ ອາຫ – ‘‘ຜສ຺ສເຫຕຸກ’’ນ຺ຕິ. ‘‘ອວິຣຸທ຺ຘ’’ອິຕິ ວິຠຕ຺ຕິໂລເປນ ນິທ຺ເທໂສ.

ປປຎ຺ຈສຎ຺ຎາຕິ ຕຓ຺ຫາທິສມຘູປສໍຫຕສຎ຺ຎາ. ເຕນາຫ ‘‘ກິເລສສຎ຺ຎາຍ ປປຎ຺ຈສຎ຺ຎາ ນາມ ຫຸຕ຺ວາ’’ຕິ. ປປຎ຺ຈສຎ຺ຎາ ເອເຕສໍ ອຕ຺ຖີຕິ ປປຎ຺ຈສຎ຺ຎາ, ອິຕຣີຕຣາ ນຣາ. ປປຎ຺ຈຍນ຺ຕາຕິ ສໍສາເຣ ປປຎ຺ຈໍ ຈິຣາຍນໍ ກໂຣນ຺ຕາ. ສຎ຺ຎິໂນຕິ ເຄຫສ຺ສິຕສຎ຺ຎາຍ ສຎ຺ຎາວນ຺ໂຕ. ມໂນມຍໍ ວິຕກ຺ກນ຺ຕິ ເກວລໍ ມນສາ ສມ຺ຠາວິຕໍ ມິຈ຺ຉາວິຕກ຺ກໍ. ອິຣີຍຕີຕິ ອິຣິຍໍ ປຏິປຕ຺ຕິໍ ອິຣີຍຕິ ປຏິປຊ຺ຊຕິ.

ສຸຏ຺ຐຸ ຠາວິໂຕຕິ ສຸຏ຺ຐຸຠາວໍ ສຸຠາວນໍ ອິໂຕ ຠາວິຕຠາວິໂຕ. ຜຸຏ຺ຐສ຺ສ ຈິຕ຺ຕນ຺ຕິ ເຕນ ຍຖາວຸຕ຺ຕຜສ຺ເສນ ຜຸຏ຺ຐໍ ອສ຺ສ ຈິຕ຺ຕໍ. ນ ວິກມ຺ປເຕ ກ຺ວຈີຕິ ກິສ຺ມິຎ຺ຈິ ອິຏ຺ຐານິຏ຺ຐາຣມ຺ມເຓ ນ ກມ຺ປຕິ. ປາຣຄາຕິ ປາຣຄາມິໂນ ຠວຖ.

ອທນ຺ຕອຄຸຕ຺ຕສຸຕ຺ຕວຓ຺ຓນາ ນິຏ຺ຐິຕາ.