໑໐. ນິຣຸຕ຺ຕິປຖສຸຕ຺ຕວຓ຺ຓນາ

໖໒. ນິຣຸຕ຺ຕິໂຍວ ນິຣຸຕ຺ຕິປຖາຕິ ປຖ-ສທ຺ເທນ ປທວຑ຺ຒນມາຫ ຍຖາ ‘‘ພີຊານິເຍວ ພີຊຊາຕານີ’’ຕິ. ນິຣຸຕ຺ຕິວເສນາຕິ ນິພ຺ພຈນວເສນ. ປຖາ ຈ ອຕ຺ຖານຸຣູປຠາວໂຕ. ຕີຓິປີຕິ ນິຣຸຕ຺ຕິອຘິວຈນປຎ຺ຎຕ຺ຕິປຖປທານິ. ຕຖາ ຫິ ‘‘ຜຸສຕີຕິ ຜສ຺ໂສ’’ຕິອາທິນາ ນີຫຣິຕ຺ວາ ວຈນໍ ນິຣຸຕ຺ຕິ, ‘‘ສິຣີວຑ຺ຒໂກ ຘນວຑ຺ຒໂກ’’ຕິອາທິນາ ວຈນມຕ຺ຕເມວ ອຘິກາຣໍ ກຕ຺ວາ ປວຕ຺ຕໍ ອຘິວຈນໍ, ‘‘ຕກ຺ໂກ ວິຕກ຺ໂກ’’ຕິອາທິນາ ຕໍຕໍປກາເຣນ ຎາປນໂຕ ປຎ຺ຎຕ຺ຕິ. ອຖ ວາ ຕໍຕໍອຕ຺ຖປ຺ປກາສເນນ ນິຈ຺ຉິຕໍ, ນິຍຕໍ ວາ ວຈນໍ ນິຣຸຕ຺ຕິ. ອຘິ-ສທ຺ໂທ ອຸປຣິຠາເຄ, ອຸປຣິ ວຈນໍ ອຘິວຈນໍ. ກສ຺ສ ອຸປຣິ? ປກາເສຕພ຺ພສ຺ສ ອຕ຺ຖສ຺ສາຕິ ປາກໂຏຍມຕ຺ໂຖ. ອຘີນໍ ວຈນໍ ອຘິວຈນໍ. ເກນ ອຘີນໍ? ອຕ຺ເຖນ. ອຕ຺ຖສ຺ສ ປຎ຺ຎາປນຕ຺ເຖນ ປຎ຺ຎຕ຺ຕີຕິ ເອວໍ ນິຣຸຕ຺ຕິອາທິປທານໍ ສພ຺ພວຈເນສຸ ປວຕ຺ຕິ ເວທິຕພ຺ພາ. ອຎ຺ຎຖາ ‘‘ຜຸສຕີຕິ ຜສ຺ໂສ’’ຕິອາທິປ຺ປກາເຣນ ນິທ຺ຘາຣຓວຈນານໍເຍວ ນິຣຸຕ຺ຕິຕາ, ສິຣິວຑ຺ຒກຘນວຑ຺ຒກປກາຣານເມວ ອຠິລາປນໍ ອຘິວຈນຕາ. ‘‘ຕກ຺ໂກ ວິຕກ຺ໂກ’’ຕິ ເອວໍປກາຣານເມວ ເອກເມວ ອຕ຺ຖໍ ເຕນ ເຕນ ປກາເຣນ ຎາເປນ຺ຕານໍ ວຈນານໍ ປຎ຺ຎຕ຺ຕິຕາ ຈ ອາປຊ຺ເຊຍ຺ຍ. ອສໍກິຓ຺ຓາຕິ ນ ສໍກິຓ຺ຓາ. ເຕນາຫ ‘‘ອວິຊຫິຕາ…ເປ… ອຉຑ຺ຑິຕາ’’ຕິ. ນ ສໍກີຍນ຺ຕີຕິ ນ ສໍກິຣີຍນ຺ຕິ, ນ ສໍກີຍິສ຺ສນ຺ຕິ ນ ສໍກິຣີຍິສ຺ສນ຺ຕີຕິ ອຕ຺ໂຖ. ອປ຺ປຏິກຸຏ຺ຐາຕິ ນ ປຏິກ຺ຂິຕ຺ຕາ. ຍສ຺ມາ ຠງ຺ຄໍ ອຕິກ຺ກນ຺ຕໍ ອຸປ຺ປາທາທິ ອຕິກ຺ກນ຺ຕເມວ ໂຫຕິ, ຕສ຺ມາ ວຸຕ຺ຕໍ ‘‘ຠງ຺ຄເມວາ’’ຕິ. ຍສ຺ມາ ເທສນ຺ຕຣໍ ສງ຺ກນ຺ໂຕປິ ອຕິກ຺ກນ຺ຕນ຺ຕິ ວຸຈ຺ຈຕິ, ຕສ຺ມາ ຕທາຠາວໍ ທສ຺ເສຕຸໍ ‘‘ເທສນ຺ຕຣໍ ອສງ຺ກມິຕ຺ວາ’’ຕິ ວຸຕ຺ຕໍ. ຍຕ຺ຖ ຍຕ຺ຖ ຫິ ສງ຺ຂາຣາ ອຸປ຺ປຊ຺ຊນ຺ຕິ, ຕຕ຺ຖ ຕຕ຺ເຖວ ຠິຊ຺ຊນ຺ຕິ ນິຣຸຊ຺ຌນ຺ຕິ ວິປຣິຓມນ຺ຕິ ວິນາສໍ ອາປຊ຺ຊນ຺ຕິ. ເຕນາຫ ‘‘ວິປຣິຓຕນ຺ຕິ…ເປ… ນຏ຺ຐ’’ນ຺ຕິ. ອປາກຏີຠູຕໍ ອຊາຕຕ຺ຕາ ເອວ.

ວສຠຓໂຄຕ຺ຕຕາຍ ວສ຺ສຠຎ຺ຎາ. ມູລທິຏ຺ຐິຄຕິກາຕິ ມູລຠູຕາ ທິຏ຺ຐິຄຕິກາ, ອິມສ຺ມິໍ ກປ຺ເປ ສພ຺ພປຐມໍ ຕາທິສທິຏ຺ຐິສມຸປ຺ປາທກາ. ປຸນປ຺ປຸນໍ ອາວຊ຺ເຊນ຺ຕສ຺ສາຕິ ອເຫຕຸວາທປຏິສໍຍຸຕ຺ຕຄນ຺ຖໍ ອຸຄ຺ຄເຫຕ຺ວາ ປຣິຍາປຸຓິຕ຺ວາ ຕທຕ຺ຖໍ ວີມໍສນ຺ຕສ຺ສ ‘‘ນຕ຺ຖິ ເຫຕຸ, ນຕ຺ຖິ ປຈ຺ຈໂຍ ສຕ຺ຕານໍ ສໍກິເລສາຍາ’’ຕິອາທິນຍປ຺ປວຕ຺ຕາຍ ລທ຺ຘິຍາ ອາຣມ຺ມເຓ ມິຈ຺ຉາສຕິ ສນ຺ຕິຏ຺ຐຕິ, ‘‘ນຕ຺ຖິ ເຫຕູ’’ຕິອາທິວເສນ ອນຸສ຺ສວູປລທ຺ເຘ ອຕ຺ເຖ ຕທາກາຣປຣິວິຕກ຺ກເນຫິ ສວິຄ຺ຄເຫ ວິຍ ສຣູປໂຕ ຈິຕ຺ຕສ຺ສ ປຈ຺ຈຸປຏ຺ຐິເຕ ຈິຣກາລປຣິຈເຍນ ‘‘ເອວເມຕ’’ນ຺ຕິ ນິຊ຺ຌານກ຺ຂມຠາວູປຄມເນນ ນິຊ຺ຌານກ຺ຂນ຺ຕິຍາ ຕຖາຄຫິເຕ ປຸນປ຺ປຸນໍ ຕເຖວ ອາເສວນ຺ຕສ຺ສ ພຫຸລີກໂຣນ຺ຕສ຺ສ ມິຈ຺ຉາວິຕກ຺ເກນ ສມາທິຍມານາ ມິຈ຺ຉາວາຍາມູປຕ຺ຖມ຺ຠິຕາ ອຕໍສຠາວໍ ‘‘ຕໍສຠາວ’’ນ຺ຕິ ຄຓ຺ຫນ຺ຕີ ມິຈ຺ຉາສຕີຕິ ລທ຺ຘນາມາ ຕໍລທ຺ຘິສຫຄຕາ ຕຓ຺ຫາ ສນ຺ຕິຏ຺ຐຕິ. ຍຖາສກໍ ວິຕກ຺ກາທິປຈ຺ຈຍລາເຠນ ຕສ຺ມິໍ ອາຣມ຺ມເຓ ອຘິຏ຺ຐິຕຕາຍ ອເນກຄ຺ຄຕໍ ປຫາຍ ຈິຕ຺ຕໍ ເອກຄ຺ຄຕໍ ອປ຺ປິຕໍ ວິຍ ໂຫຕິ ມິຈ຺ຉາສມາຘິນາ. ໂສປິ ຫິ ປຈ຺ຈຍວິເສເສຫິ ລທ຺ຘຠາວນາພໂລ ອີທິເສ ຐາເນ ສມາຘານປຕິຣູປກິຈ຺ຈກໂຣ ໂຫຕິເຍວ ວາລວິຊ຺ຌນາທີສຸ ວິຍາຕິ ທຏ຺ຐພ຺ພໍ. ຕຖາ ຫິ ອເນກກ຺ຂຕ຺ຕຸໍ ເຕນາກາເຣນ ປຸພ຺ພຠາຄິເຍສຸ ຊວນວາເຣສຸ ປວຕ຺ເຕສຸ ສພ຺ພປຈ຺ຉິເມ ຊວນວາເຣ ສຕ຺ຕ ຊວນານິ ຊວນ຺ຕິ. ຕຕ຺ຖ ປຐເມ ສເຕກິຈ຺ໂຉ ໂຫຕິ, ຕຖາ ທຸຕິຍາທີສຸ. ສຕ຺ຕເມ ປນ ຊວເນ ສມ຺ປຕ຺ເຕ ອເຕກິຈ຺ໂຉ ໂຫຕິ. ເຕນາຫ ‘‘ອສ຺ສາເທນ຺ຕສ຺ສາ’’ຕິອາທິ. ອິເມສຸປີຕິ ທ຺ວີສຸປິ ຐາເນສຸ.

ປຈ຺ຈຸປ຺ປນ຺ນໍ ວາຕິ ເອຕ຺ຖ ອິຕິ-ສທ຺ໂທ ອາທິອຕ຺ໂຖ. ເຕນ ‘‘ຍເທຕໍ ອນາຄຕໍ ນາມ, ນຍິທໍ ອນາຄຕ’’ນ຺ຕິອາທິກໍ ສງ຺ຄຓ຺ຫາຕິ. ເຕປີຕິ ເຕ ວສ຺ສຠຎ຺ຎາປິ ນ ມຎ຺ຎິໍສຸ ໂລກສມຎ຺ຎາຍ ອນຕິກ຺ກມນີຍໂຕ. ເຕນາຫ ‘‘ອຕີຕໍ ປນາ’’ຕິອາທິ. ຂນ຺ຘານໍ ອຸປຣິ ນິຣຸຬ຺ຫາ ປຓ຺ຓຕ຺ຕິ.

ນິຣຸຕ຺ຕິປຖສຸຕ຺ຕວຓ຺ຓນາ ນິຏ຺ຐິຕາ.

ອຸປຍວຄ຺ຄວຓ຺ຓນາ ນິຏ຺ຐິຕາ.