໗. ອຣຫນ຺ຕວຄ຺ໂຄ

໑. ອຸປາທິຍມານສຸຕ຺ຕວຓ຺ຓນາ

໖໓. ຄຓ຺ຫມາໂນຕິ ‘‘ເອຕໍ ມມາ’’ຕິອາທິນາ ຄຓ຺ຫມາໂນ. ປາເສນາຕິ ຣາຄປາເສນ. ຕຎ຺ຫິ ມາໂຣ ມາຣປາໂສຕິ ມຎ຺ຎຕິ. ເຕນາຫ ‘‘ອນ຺ຕລິກ຺ຂຈໂຣ ປາໂສ, ຍ຺ວາຍໍ ຈຣຕິ ມານໂສ’’ຕິ (ສໍ. ນິ. ໑.໑໕໑; ມຫາວ. ໓໓). ມຸຕ຺ໂຕ ນາມ ໂຫຕິ ອນຸປາທິຍໂຕ ສພ຺ພໂສ ຂນ຺ຘສ຺ສ ອຠາວໂຕ.

ອຸປາທິຍມານສຸຕ຺ຕວຓ຺ຓນາ ນິຏ຺ຐິຕາ.

໒-໖. ມຎ຺ຎມານສຸຕ຺ຕາທິວຓ຺ຓນາ

໖໔-໖໘. ‘‘ເອຕໍ ມມາ’’ຕິອາທິນາ. ມຎ຺ຎນາ ອຠິນນ຺ທນາ ຈ. ຕຓ຺ຫາຉນ຺ໂທຕິ ຕຓ຺ຫາ ເອວ ຉນ຺ໂທ. ສາ ຫິ ຕຓ຺ຫາຍນຏ຺ເຐນ ຕຓ຺ຫາ, ຉນ຺ທິກຕຏ຺ເຐນ ຉນ຺ໂທ. ຈຕຸຕ຺ຖໍ ອນິຈ຺ຈລກ຺ຂຓມຸເຂນ ວຸຕ຺ຕໍ, ປຎ຺ຈມໍ ທຸກ຺ຂລກ຺ຂຓມຸເຂນ, ຉຏ຺ຐໍ ອນຕ຺ຕລກ຺ຂຓມຸເຂນ. ເສສໍ ຕີສຸປິ ສທິສເມວາຕິ ວຸຕ຺ຕໍ ‘‘ເອເສວ ນໂຍ’’ຕິ.

ມຎ຺ຎມານສຸຕ຺ຕາທິວຓ຺ຓນາ ນິຏ຺ຐິຕາ.

໗. ອນຕ຺ຕນິຍສຸຕ຺ຕວຓ຺ຓນາ

໖໙. ອນຕ຺ຕນິຍນ຺ຕິ ນ ອຕ຺ຕນິຍໍ. ເຕນາຫ ‘‘ນ ອຕ຺ຕໂນ ສນ຺ຕກ’’ນ຺ຕິ.

ອນຕ຺ຕນິຍສຸຕ຺ຕວຓ຺ຓນາ ນິຏ຺ຐິຕາ.

໘-໑໐. ຣຊນີຍສຓ຺ຐິຕສຸຕ຺ຕາທິວຓ຺ຓນາ

໗໐-໗໒. ຣຊນີເຍນາຕິ ຣຊນີເຍນ ຣາຄຸປ຺ປາທເກນ. ເຕນາຫ ‘‘ຣາຄສ຺ສ ປຈ຺ຈຍຠາເວນາ’’ຕິ. ຣາຫຸລສໍຍຸຕ຺ເຕ ຣາຫຸລຕ຺ເຖຣສ຺ສ ປຸຈ຺ຉາວເສນ ອາຄຕາ. ອິຘ ຣາຘຕ຺ເຖຣສ຺ສ ສຸຣາຘຕ຺ເຖຣສ຺ສ ຈ ປຸຈ຺ຉາວເສນ, ປາຬິ ປນ ສພ຺ພຕ຺ຖ ສທິສາ. ເຕນາຫ ‘‘ວຸຕ຺ຕນເຍເນວ ເວທິຕພ຺ພານີ’’ຕິ.

ຣຊນີຍສຓ຺ຐິຕສຸຕ຺ຕາທິວຓ຺ຓນາ ນິຏ຺ຐິຕາ.

ອຣຫນ຺ຕວຄ຺ຄວຓ຺ຓນາ ນິຏ຺ຐິຕາ.