໘. ຂຊ຺ຊນີຍວຄ຺ໂຄ

໑-໓. ອສ຺ສາທສຸຕ຺ຕາທິວຓ຺ຓນາ

໗໓-໗໕. ຈຕຸສຈ຺ຈເມວ ກຖິຕໍ ອສ຺ສາທາທີນຎ຺ເຈວ ສມຸທຍາທີນຎ຺ຈ ວເສນ ເທສນາຍ ປວຕ຺ຕຕ຺ຕາ. ຍສ຺ມາ ອສ຺ສາໂທ ສມຸທຍສຈ຺ຈໍ, ອາທີນໂວ ທຸກ຺ຂສຈ຺ຈໍ, ນິສ຺ສຣຓໍ ມຄ຺ຄສຈ຺ຈໍ ນິໂຣຘສຈ຺ຈຎ຺ຈາຕິ ວຸຕ຺ໂຕວາຍມຕ຺ໂຖ; ທຸຕິເຍ ສມຸທຍສ຺ສາໂທ ສມຸທຍສຈ຺ຈໍ, ອາທີນໂວ ທຸກ຺ຂສຈ຺ຈໍ, ອຕ຺ຖງ຺ຄໂມ ນິໂຣຘສຈ຺ຈໍ, ນິສ຺ສຣຓໍ ມຄ຺ຄສຈ຺ຈນ຺ຕິ ວຸຕ຺ໂຕວາຍມຕ຺ໂຖ; ຕຕິຍໍ ອຣິຍສາວກສ຺ເສວ ວເສນ ວຸຕ຺ຕໍ.

ອສ຺ສາທສຸຕ຺ຕາທິວຓ຺ຓນາ ນິຏ຺ຐິຕາ.

໔. ອຣຫນ຺ຕສຸຕ຺ຕວຓ຺ຓນາ

໗໖. ຍຕ຺ຕກາ ສຕ຺ຕາວາສາຕິ ຕສ຺ມິໍ ຕສ຺ມິໍ ສຕ຺ຕນິກາເຍ ອາວສນຏ຺ເຐນ ສຕ຺ຕາ ເອວ ສຕ຺ຕາວາສາ. ເຕນ ຍຕ຺ຕກາ ສຕ຺ຕາວາສາ, ເຕຫິ ສພ຺ເພຫິປິ ເອເຕ ອຄ຺ຄາ ເອເຕ ເສຏ຺ຐາ, ເຍ ອິເມ ອຣຫນ຺ຕາຕິ ທສ຺ເສຕິ. ປຸຣິມນເຍເນວາຕິ ປຸຣິມສ຺ມິໍ ສຕ຺ຕຏ຺ຐານໂກສລ຺ລສຸຕ຺ເຕ ວຸຕ຺ຕນເຍນ.

ຕທຕ຺ຖປຣິທີປນາຫີຕິ ‘‘ປຎ຺ຈກ຺ຂນ຺ເຘ ປຣິຎ຺ຎາຍ. ຕຓ຺ຫາ ເຕສໍ ນ ວິຊ຺ຊຕິ. ອສ຺ມິມາໂນ ສມຸຈ຺ຉິນ຺ໂນ’’ຕິອາທິນາ ຕສ຺ສ ຍຖານິທ຺ທິຏ຺ຐສ຺ສ ສຸຕ຺ຕສ຺ສ ອຕ຺ຖທີປນາຫິ ເຈວ ‘‘ອເນຊໍ ເຕ ອນຸປ຺ປຕ຺ຕາ, ຈິຕ຺ຕໍ ເຕສໍ ອນາວິລ’’ນ຺ຕິອາທິນາ ວິເສສຕ຺ຖປຣິທີປນາຫິ ຈ. ຌານມຄ຺ຄຜລປຣິຍາປນ຺ນໍ ອຕິສຍິຕສຸຂໍ ເອເຕສມຕ຺ຖີຕິ ສຸຂິໂນຕິ ອາຫ ‘‘ຌານ…ເປ… ສຸຂິຕາ’’ຕິ. ຕຓ຺ຫາ ເຕສໍ ນ ວິຊ຺ຊຕີຕິ ເອຕ຺ຖ ເຕສໍ ອປາຍທຸກ຺ຂຊນິກາ ຕຓ຺ຫາ ນ ວິຊ຺ຊຕີຕິ ວຸຕ຺ຕໍ. ວຏ຺ຏມູລິກາຍ ຕຓ຺ຫາຍ ອຠາວາ ‘‘ນນ຺ທີ ເຕສໍ ນ ວິຊ຺ຊຕີ’’ຕິ ເອຕ຺ຖ ວຸຈ຺ຈຕີຕິ. ອິມສ຺ສປີຕິ ປິ-ສທ຺ເທນ ທຸກ຺ຂສ຺ສາຠາເວນປີຕິ ທຸກ຺ຂາຠາໂວ ວິຍ ວຏ຺ຏມູລິກຕຓ຺ຫາຠາໂວ ສມ຺ປິຓ຺ຑີຍຕີຕິ ທຏ຺ຐພ຺ພໍ. ເຕນ ຫິ ເຕ ອນຸປາທິເສສນິພ຺ພານປ຺ປຕ຺ຕິຍາ ອຈ຺ຈນ຺ຕສຸຂິຕາ ເອວາຕິ ວຸຈ຺ຈນ຺ຕີຕິ. ‘‘ເສຍ຺ໂຍຫມສ຺ມີ’’ຕິອາທິນຍປ຺ປວຕ຺ຕິຍາ ນວວິໂຘ. ຎາເຓນາຕິ ອຄ຺ຄມຄ຺ຄຎ຺ຎາເຓນ.

ອຣຫຕ຺ຕໍ ອນຸປ຺ປຕ຺ຕາ. ອລິຕ຺ຕາຕິ ອມກ຺ຂິຕາ. ພ຺ຣຫ຺ມຠູຕາຕິ ພ຺ຣຫ຺ມຠາວໍ ປຕ຺ຕາ, ພ຺ຣຫ຺ມໂຕ ວາ ອຣິຍມຄ຺ຄຎາຓໂຕ ຠູຕາ ອຣິຍາຍ ຊາຕິຍາ ຊາຕາ. ສຕ຺ຕ ສທ຺ຘມ຺ມາ ໂຄຈໂຣ ປວຕ຺ຕິຏ຺ຐານໍ ເອເຕສນ຺ຕິ ສຕ຺ຕສທ຺ຘມ຺ມໂຄຈຣາ.

ນິຣາສງ຺ກຈາໂຣ ນາມ ຄຫິໂຕ ກຸໂຕຈິປິ ເຕສໍ ອາສງ຺ກາຍ ອຠາວໂຕ. ສມ຺ມາທິຏ຺ຐິອາທີຫິ ທສຫິ ອງ຺ເຄຫິ ສມ຺ມາວິມຸຕ຺ຕິ-ສມ຺ມາຎາຓປຣິໂຍສາເນຫິ. ‘‘ອາຄຸໍ ນ ກໂຣຕີ’’ຕິອາທີຫິ ຈຕູຫິ ກາຣເຓຫິ. ຕຓ຺ຫາ ເຕສໍ ນ ວິຊ຺ຊຕີຕິ ອິທມ຺ປິ ຕຓ຺ຫາປຫານສ຺ສ ພຫູປກາຣຕາທສ຺ສນໍ. ເຕນາຫ ‘‘ທາສກາຣິກາ ຕຓ຺ຫາປິ ເຕສໍ ນຕ຺ຖີ’’ຕິ.

ນ ວິກມ຺ປນ຺ຕິ ‘‘ເສຍ຺ໂຍຫມສ຺ມີ’’ຕິອາທິນາ.

ອຸທ຺ຘໍ ຕິຣິຍໍ ອປາຈີນນ຺ຕິ ເອຕ຺ຖ ‘‘ອຸທ຺ຘໍ ວຸຈ຺ຈຕີ’’ຕິອາທິນາ ຣູປມຸເຂນ ອຕ຺ຕຠາວໍ ຄເຫຕ຺ວາ ປວຕ຺ໂຕ ປຐມນໂຍ. ກາລຕ຺ຕຍວເສນ ຘມ຺ມປ຺ປວຕ຺ຕິໍ ຄເຫຕ຺ວາ ປວຕ຺ໂຕ ທຸຕິຍນໂຍ. ຐານວເສນ ສກລໂລກຘາຕຸໍ ຄເຫຕ຺ວາ ປວຕ຺ໂຕ ຕຕິຍນໂຍ. ພຸທ຺ຘາຕິ ຈຕ຺ຕາຣິ ສຈ຺ຈານິ ພຸທ຺ຘວນ຺ໂຕ.

ສີຫນາທສໂມຘານນ຺ຕິ ສີຫນາທານໍ ສໍກລນໍ. ໂລເກ ອຕ຺ຕໂນ ອຸຕ຺ຕຣິຕຣສ຺ສາຠາວາ ອນຸຕ຺ຕຣາ. ອຸຕ຺ຕໂຣ ຕາວ ຕິຏ຺ຐຕຸ ປຸຣິໂສ, ສທິໂສປິ ຕາວ ນຕ຺ຖີຕິ ອສທິສາ. ສກລມ຺ປິ ຠວໍ ອຸຕ຺ຕຣິຕ຺ວາ ຠວປິຏ຺ເຐ ຐຕ຺ວາ ວິມຸຕ຺ຕິສຸເຂນ ສຸຂິຕຕ຺ຕາທິວເສນ ເອກວີສຕິຍາກາເຣຫິ ສີຫນາທໍ ນທນ຺ຕິ.

ອຣຫນ຺ຕສຸຕ຺ຕວຓ຺ຓນາ ນິຏ຺ຐິຕາ.

໕. ທຸຕິຍອຣຫນ຺ຕສຸຕ຺ຕວຓ຺ຓນາ

໗໗. ສຸທ຺ຘິກເມວາຕິ ສຸທ຺ຘສໍຂິຕ຺ຕພນ຺ຘເມວ ກຕ຺ວາ.

ທຸຕິຍອຣຫນ຺ຕສຸຕ຺ຕວຓ຺ຓນາ ນິຏ຺ຐິຕາ.

໖. ສີຫສຸຕ຺ຕວຓ຺ຓນາ

໗໘. ສີໂຫຕິ ປຣິສ຺ສຍສຫນໂຕ ປຏິປກ຺ຂຫນນໂຕ ຈ ‘‘ສີໂຫ’ຕິ ລທ຺ຘນາໂມ ມິຄາຘິປຕິ. ຈຕ຺ຕາໂຣຕິ ຈ ສມາເນປິ ສີຫຊາຕິກຠາເວ ວຓ຺ຓວິເສສາທິສິທ຺ເຘນ ວິເສເສນ ຈຕ຺ຕາໂຣ ສີຫາ. ເຕ ອິທານິ ນາມໂຕ ວຓ຺ຓໂຕ ອາຫາຣໂຕ ທສ຺ເສຕ຺ວາ ອິຘາຘິປ຺ເປຕສີຫໍ ນານປ຺ປກາຣໂຕ ວິຠາເວຕຸໍ ‘‘ຕິຓສີໂຫ’’ຕິອາທິ ອາຣທ຺ຘໍ. ຕິຓຠກ຺ໂຂ ສີໂຫ ຕິຓສີໂຫ ປຸຣິມປເທ ອຸຕ຺ຕຣປທໂລເປນ ຍຖາ ‘‘ສາກປຕ຺ຖິໂວ’’ຕິ. ກາຬວຓ຺ຓຕາຍ ກາຬສີໂຫ. ຕຖາ ປຓ຺ຑຸສີໂຫ. ເຕນາຫ ‘‘ກາຬສີໂຫ ກາຬຄາວິສທິໂສ, ປຓ຺ຑຸສີໂຫ ປຓ຺ຑຸປລາສວຓ຺ຓຄາວິສທິໂສ’’ຕິ. ຣຕ຺ຕກມ຺ພລສ຺ສ ວິຍ ເກສໂຣ ເກສຣກລາໂປ ເອຕສ຺ສ ອຕ຺ຖີຕິ ເກສຣີ. ລາຂາຣສປຣິກມ຺ມກເຕຫິ ວິຍ ປາທປຣິຍນ຺ເຕຫີຕິ ໂຍຊນາ.

ກມ຺ມານຸຠາວສິທ຺ຘອາຘິປຈ຺ຈມເຫສກ຺ຂຕາຫິ ສພ຺ພມິຄຄຓສ຺ສ ຣາຊາ ສຸວຓ຺ຓຄຸຫໂຕ ວາຕິອາທິ ‘‘ສີຫສ຺ສ ວິຫາໂຣ ກິຣິຍາ ເອວໍ ໂຫຕີ’’ຕິ ກຕ຺ວາ ວຸຕ຺ຕໍ.

ສມໍ ປຕິຏ຺ຐາເປຕ຺ວາຕິ ສພ຺ພຠາເຄຫິ ສມເມວ ຠູມິຍໍ ປຕິຏ຺ຐາເປຕ຺ວາ. ອາກຑ຺ຒິຕ຺ວາຕິ ປຸຣໂຕ ອາກຑ຺ຒິຕ຺ວາ. ອຠິຫຣິຕ຺ວາຕິ ອຠິມຸຂໍ ຫຣິຕ຺ວາ. ສງ຺ຆາຕນ຺ຕິ ວິນາສໍ. ວີສຕິຍຏ຺ຐິກໍ ຐານໍ ອຸສຠໍ.

ສມສີໂຫຕິ ສມຊາຕິໂກ ສມຠາໂຄ ຈ ສີໂຫ. ສມາໂນສ຺ມີຕິ ເທສນາມຕ຺ຕໍ, ສມປ຺ປຠາວຕາຍປິ ນ ຠາຍຕິ. ສກ຺ກາຍທິຏ຺ຐິພລວຕາຍາຕິ ‘‘ເກ ອຎ຺ເຎ ອມ຺ເຫຫິ ອຸຕ຺ຕຣິຕຣາ, ອຖ ໂຂ ມຍເມວ ມຫາພລາ’’ຕິ ເອວໍ ພລາຕິມານນິມິຕ຺ຕາຍ ອຫງ຺ກາຣເຫຕຸຠູຕາຍ ສກ຺ກາຍທິຏ຺ຐິຍາ ພລຠາເວນ. ສກ຺ກາຍທິຏ຺ຐິປຫີນຕ຺ຕາຕິ ສກ຺ກາຍທິຏ຺ຐິຍາ ປຫີນຕ຺ຕາ ນິຣຫງ຺ກາຣຕ຺ຕາ ອຕ຺ຕສິເນຫສ຺ສ ສຸຏ຺ຐຸ ສມຸຄ຺ຆາຏິຕຕ຺ຕາ ນ ຠາຍຕິ.

ຕຖາ ຕຖາຕິ ສີຫສທິສຕາທິນາ ເຕນ ເຕນ ປກາເຣນ ອຕ຺ຕານໍ ກເຖສີຕິ ວຕ຺ວາ ຕມຕ຺ຖໍ ວິວຣິຕ຺ວາ ທສ຺ເສຕຸໍ ‘‘ສີໂຫຕິ ໂຂ’’ຕິອາທິ ວຸຕ຺ຕໍ.

ກຕາຠິນີຫາຣສ຺ສ ໂລກນາຖສ຺ສ ໂພຘິຍາ ນິຍຕຠາວປ຺ປຕ຺ຕິຍາ ເອກນ຺ຕຠາວີພຸທ຺ຘຠາໂວຕິ ກຕ຺ວາ ‘‘ຕີສຸ ປາສາເທສຸ ນິວາສກາໂລ, ມຄຘຣຎ຺ໂຎ ປຏິຎ຺ຎາທານກາໂລ, ປາຍາສສ຺ສ ປຣິຠຸຕ຺ຕກາໂລ’’ຕິອາທິນາ ອຠິສມ຺ໂພຘິໂຕ ປຸຣິມາວຕ຺ຖາປິ ສີຫສທິສໍ ກຕ຺ວາ ທສ຺ສິຕາ. ຠາວິນິ, ຠູໂຕປຈາໂຣປິ ຫິ ໂລກໂວຫາໂຣ. ວິຊ຺ຊາຠາວສາມຎ຺ຎໂຕ ຠູຕວິຊ຺ຊາ ອິຕຣວິຊ຺ຊາປິ ເອກຊ຺ຌໍ ຄເຫຕ຺ວາ ປຏິຈ຺ຈສມຸປ຺ປາທສມ຺ມສນໂຕ ຕໍ ປຸເຣຕຣໍ ສິທ຺ຘໍ ວິປາກໍ ວິຍ ກຕ຺ວາ ອາຫ ‘‘ຕິສ຺ໂສ ວິຊ຺ຊາ ວິໂສເຘຕ຺ວາ’’ຕິ. ອນຸໂລມປຏິໂລມໂຕ ປວຕ຺ຕຎາຓວເສນ ‘‘ຍມກຎາຓມນ຺ຖເນນາ’’ຕິ ວຸຕ຺ຕໍ.

ຕຕ຺ຖ ວິຫຣນ຺ຕສ຺ສາຕິ ອຊປາລນິຄ຺ໂຣຘມູເລ ວິຫຣນ຺ຕສ຺ສ. ເອກາທສເມ ທິວເສຕິ ສຕ຺ຕສຕ຺ຕາຫໂຕ ປຣໍ ເອກາທສເມ ທິວເສ. ອຈລປລ຺ລງ຺ເກຕິ ອິສິປຕເນ ຘມ຺ມຈກ຺ກປວຕ຺ຕນຕ຺ຖໍ ນິສິນ຺ນປລ຺ລງ຺ເກ. ຕມ຺ປິ ຫິ ເກນຈິ ອປ຺ປຏິວຕ຺ຕິຍຘມ຺ມຈກ຺ກປວຕ຺ຕນຕ຺ຖໍ ນິສຊ຺ຊາຕິ ກຕ຺ວາ ວຊິຣາສນໍ ວິຍ ອຈລປລ຺ລງ຺ກໍ ວຸຈ຺ຈຕິ. ອິມສ຺ມິຎ຺ຈ ປນ ປເທຕິ ‘‘ທ຺ເວເມ, ຠິກ຺ຂເວ, ອນ຺ຕາ’’ຕິອາທິນຍປ຺ປວຕ຺ເຕ ອິມສ຺ມິໍ ສທ຺ຘມ຺ມໂກຏ຺ຐາເສ. ຘມ຺ມໂຆໂສ…ເປ… ທສສຫສ຺ສິໂລກຘາຕຸໍ ປຏິຈ຺ຉາເທສິ ‘‘ສພ຺ພຕ຺ຖ ຐິຕາ ສຸຓນ຺ຕູ’’ຕິ ອຘິຏ຺ຐາເນນ. ໂສຬສຫາກາເຣຫີຕິ ‘‘ທຸກ຺ຂປຣິຎ຺ຎາ, ສມຸທຍປ຺ປຫານໍ, ນິໂຣຘສຈ຺ຉິກິຣິຍາ, ມຄ຺ຄຠາວນາ’’ຕິ ເອວໍ ເອເກກສ຺ມິໍ ມຄ຺ເຄ ຈຕ຺ຕາຣິ ຈຕ຺ຕາຣິ ກຕ຺ວາ ໂສຬສຫິ ອາກາເຣຫິ.

ວຸຕ຺ໂຕເຍວ, ນ ອິຘ ວຕ຺ຕພ຺ໂພ, ຕສ຺ມາ ຕຕ຺ຖ ວຸຕ຺ຕນເຍເນວ ເວທິຕພ຺ໂພຕິ ອຘິປ຺ປາໂຍ. ຍສ຺ມາ ຈ ອປເຣຫິປິ ອຏ຺ຐຫິ ກາຣເຓຫິ ຠຄວາ ຕຖາຄໂຕຕິ ອາຣຠິຕ຺ວາ ອຸທານຏ຺ຐກຖາທີສຸປິ (ອຸທາ. ອຏ຺ຐ. ໑໘; ອິຕິວຸ. ໓໘) ຕຖາຄຕປທສ຺ສ ອຕ຺ໂຖ ວຸຕ຺ໂຕ ເອວ, ຕສ຺ມາ ຕຕ຺ຖ ວຸຕ຺ຕນເຍນ ອຕ຺ໂຖ ເວທິຕພ຺ໂພ. ຍທິປິ ຠຄວາ ນ ໂພຘິປລ຺ລງ຺ເກ ນິສິນ຺ນມຕ຺ໂຕວ ອຠິສມ຺ພຸທ຺ໂຘ ຊາໂຕ, ຕຖາປິ ຕາຍ ນິສຊ຺ຊາຍ ນິສິນ຺ໂນວ ປນຸຊ຺ຊ ສພ຺ພປຣິສ຺ສຍໍ ອຠິສມ຺ພຸທ຺ໂຘ ຊາໂຕ. ຕຖາ ຫິ ຕໍ ‘‘ອປຣາຊິຕປລ຺ລງ຺ກ’’ນ຺ຕິ ວຸຈ຺ຈຕິ. ຕສ຺ມາ ‘‘ຍາວ ໂພຘິປລ຺ລງ຺ກາ ວາ’’ຕິ ວຕ຺ວາ ເຕນ ອປຣິຕຸສ຺ສນ຺ໂຕ ‘‘ຍາວ ອຣຫຕ຺ຕມຄ຺ຄຎາຓາ ວາ’’ຕິ ອາຫ.

ອິຕິ ຣູປນ຺ຕິ ເອຕ຺ຖ ອິຕິ-ສທ຺ໂທ ນິທສ຺ສນຕ຺ໂຖ. ເຕນ ຣູປໍ ສຣູປໂຕ ປຣິມາຓໂຕ ປຣິຈ຺ເຉທໂຕ ທສ຺ສິຕນ຺ຕິ ອາຫ ‘‘ອິທໍ ຣຸປ’’ນ຺ຕິອາທິ. ‘‘ອິທໍ ຣູປ’’ນ຺ຕິ ຫິ ອິມິນາ ຠູຕຸປາທາຍເຠທຣູປໍ ສຣູປໂຕ ທສ຺ສິຕໍ. ເອຕ຺ຕກໍ ຣູປນ຺ຕິ ອິມິນາ ຕໍ ປຣິມາຓໂຕ ທສ຺ສິຕໍ. ຕສ຺ສ ຈ ປຣິມາຓສ຺ສ ເອກນ຺ຕຠາວທສ຺ສເນນ ‘‘ນ ອິໂຕ ຠິຍ຺ໂຍ ຣູປໍ ອຕ຺ຖີ’’ຕິ ວຸຕ຺ຕໍ. ສຠາວໂຕຕິ ສລກ຺ຂຓໂຕ. ສຣສໂຕຕິ ສກິຈ຺ຈໂຕ. ປຣິຍນ຺ຕໂຕຕິ ປຣິມາຓປຣິຍນ຺ຕໂຕ. ປຣິຈ຺ເຉທໂຕຕິ ຍຕ຺ຕເກ ຐາເນ ຕສ຺ສ ປວຕ຺ຕິ, ຕສ຺ສ ປຣິຈ຺ເຉທນໂຕ. ປຣິຈ຺ຉິນ຺ທນໂຕຕິ ປຣິໂຍສານປ຺ປຕ຺ຕິໂຕ. ຕໍ ສພ຺ພໍ ທສ຺ສິຕໍ ໂຫຕິ ຍຖາວຸຕ຺ເຕນ ວິຠາເຄນ. ອຍໍ ຣູປສ຺ສ ສມຸທໂຍ ນາມາຕິ ອຍໍ ອາຫາຣາທິ ຣູປສ຺ສ ສມຸທໂຍ ນາມ. ເຕນາຫ ‘‘ເອຕ຺ຕາວຕາ’’ຕິອາທິ. ອຕ຺ຖງ຺ຄໂມຕິ ນິໂຣໂຘ. ‘‘ອາຫາຣສມຸທຍາ ອາຫາຣນິໂຣຘາ’’ຕິ ຈ ອສາຘາຣຓເມວ ຄເຫຕ຺ວາ ເສເສ ອາທິ-ສທ຺ເທນ ສງ຺ຄຓ຺ຫາຕິ.

ປຓ຺ຓາສລກ຺ຂຓປຏິມຓ຺ຑິຕນ຺ຕິ ປຓ຺ຓາສອຸທຍພ຺ພຍລກ຺ຂຓວິຠູສິຕໍ ສມຸທຍຕ຺ຖງ຺ຄມຄຫຓໂຕ. ຂີຓາສວຕ຺ຕາຕິ ອນວເສສໍ ສາວເສສຎ຺ຈ ອາສວານໍ ປຣິກ຺ຂີຓຕ຺ຕາ. ອນາຄາມີນມ຺ປິ ຫິ ຠຍໍ ຈິຕ຺ຕຸຕ຺ຣາໂສ ຈ ນ ໂຫຕີຕິ. ຎາຓສໍເວໂຄ ຠຍຕູປຏ຺ຐານຎາຓໍ. ອິຕເຣສໍ ປນ ເທວານນ຺ຕິ ອຂີຓາສເວ ເທເວ ສນ຺ຘາຍ ວທຕິ. ໂຠຕິ ຘມ຺ມາລປນມຕ຺ຕນ຺ຕິ ວາຈສິກໍ ຕຖາລປນມຕ຺ຕໍ.

ຈກ຺ກນ຺ຕິ ສຕ຺ຖຸ ອາຓາຈກ຺ກໍ, ຕໍ ປນ ຘມ຺ມໂຕ ອາຄຕນ຺ຕິ ຘມ຺ມຈກ຺ກໍ. ຕຕ຺ຖ ອຣິຍສາວການໍ ປຏິເວຘຘມ຺ມໂຕ ອາຄຕນ຺ຕິ ຘມ຺ມຈກ຺ກໍ. ອິຕເຣສໍ ເທສນາຘມ຺ມໂຕ ອາຄຕນ຺ຕິ ຘມ຺ມຈກ຺ກໍ. ທຸວິເຘປິ ຎາຓໍ ປຘານນ຺ຕິ ຎາຓສີເສນ ວຸຕ຺ຕໍ ‘‘ປຏິເວຘຎາຓມ຺ປິ ເທສນາຎາຓມ຺ປີ’’ຕິ. ອິທານິ ຕໍ ຎາຓທ຺ວຍໍ ສຣູປໂຕ ທສ຺ເສຕຸໍ ‘‘ປຏິເວຘຎາຓໍ ນາມາ’’ຕິອາທິ ວຸຕ຺ຕໍ. ຍສ຺ມາ ຈສ຺ສ ຎາຓສ຺ສ ສຸປ຺ປຏິວິທ຺ຘຕ຺ຕາ ຠຄວາ ຕານິ ສຏ຺ຐິ ນຍສຫສ຺ສານິ ເວເນຍ຺ຍານໍ ທສ຺ເສຕຸໍ ສມຕ຺ໂຖ ອໂຫສິ, ຕສ຺ມາ ຕານິ ສຏ຺ຐິ ນຍສຫສ຺ສານິ ເຕນ ຎາເຓນ ສທ຺ຘິໍເຍວ ສິທ຺ຘານີຕິ ກຕ຺ວາ ທສ຺ເສນ຺ໂຕ ‘‘ສຏ຺ຐິຍາ ຈ ນຍສຫສ຺ເສຫິ ປຏິວິຊ຺ຌີ’’ຕິ ອາຫ. ຕິປຣິວຏ຺ຏນ຺ຕິ ອິທໍ ທຸກ຺ຂນ຺ຕິ ຈ, ປຣິຎ຺ເຎຍ຺ຍນ຺ຕິ ຈ, ປຣິຎ຺ຎາຕນ຺ຕິ ຈ ເອວໍ ຕິປຣິວຏ຺ຏໍ, ຕໍເຍວ ທ຺ວາທສາກາຣໍ. ຕນ຺ຕິ ເທສນາຎາຓໍ ປວຕ຺ເຕຕິ ເອສ ຠຄວາ. ອປ຺ປຏິປຸຄ຺ຄໂລຕິ ປຕິນິຘິຠູຕປຸຄ຺ຄລຣຫິໂຕ. ເອກສທິສສ຺ສາຕິ ນິພ຺ພິກາຣສ຺ສ.

ສີຫສຸຕ຺ຕວຓ຺ຓນາ ນິຏ຺ຐິຕາ.

໗. ຂຊ຺ຊນີຍສຸຕ຺ຕວຓ຺ຓນາ

໗໙. ວິປສ຺ສນາວເສນາຕິ ເອຕຣຫິ ຣູປເວທນາທໂຍ ອນຸສ຺ສຣິຕ຺ວາ ‘‘ປຸພ຺ເພປາຫໍ ເອວໍເວທໂນ ອໂຫສິ’’ນ຺ຕິ ອຕີຕານໍ ຣູປເວທນາທີນໍ ປຈ຺ຈຸປ຺ປນ຺ເນຫິ ວິເສສາຠາວທສ຺ສນາ ວິປສ຺ສນາ, ຕສ຺ສາ ວິປສ຺ສນາຍ ວເສນ. ຍ຺ວາຍໍ ‘‘ນ ອິທໍ ອຠິຎ຺ຎາວເສນາ’’ຕິ ປຏິກ຺ເຂໂປ ກໂຕ, ຕສ຺ສ ກາຣຓໍ ທສ຺ເສນ຺ໂຕ ‘‘ອຠິຎ຺ຎາວເສນ ຫີ’’ຕິອາທິມາຫ. ຂນ຺ຘປຏິພທ຺ຘາ ນາມ ໂຄຕ຺ຕວຓ຺ຓຫາຣາທໂຍ. ເອວໍ ອນຸສ຺ສຣນ຺ໂຕຕິ ຍຖາວຸຕ຺ຕວິປສ຺ສນາວເສນ ອນຸສ຺ສຣນ຺ໂຕ. ສຠາວຘມ຺ມານໍ ເອວ ອນຸສ຺ສຣຓສ຺ສ ວຸຕ຺ຕຕ຺ຕາ ‘‘ສຸຎ຺ຎຕາປພ຺ພ’’ນ຺ຕິ ວຸຕ຺ຕໍ.

ຍສ຺ມາ ເຕ ເອວ ຣູປາທໂຍ ເນວ ອຕ຺ຕາ, ນ ອຕ຺ຕນິຍາ ອສາຣາ ອນິສ຺ສຣາ, ຕສ຺ມາ ຕໂຕ ສຸຎ຺ຎາ, ເຕສໍ ຠາໂວ ສຸຎ຺ຎຕາ, ຕສ຺ສາ ລກ຺ຂຓໍ ຣຸປ຺ປນາທິກໍ ທສ຺ເສຕຸໍ.

ກິຎ຺ຈາຕິ ເຫຕຸອຕ຺ຖໂຊຕເກ ກາຣເຓ ປຈ຺ຈຕ຺ຕວຈນນ຺ຕິ ອາຫ ‘‘ກິຎ຺ຈາຕິ ກາຣຓປຸຈ຺ຉາ, ເກນ ກາຣເຓນ ຣູປໍ ວເທຖາ’’ຕິ. ເອຕນ຺ຕິ ເອຕໍ ຠູຕຸປາທາຍເຠທໍ ຘມ຺ມຊາຕໍ. ເກນ ກາຣເຓນ ຣູປໍ ນາມາຕິ ກິໍ ກາຣຓໍ ນິສ຺ສາຍ ຣູປນ຺ຕິ ວຸຈ຺ຈຕີຕິ ອຕ຺ໂຖ. ກາຣຓຸທ຺ເທໂສຕິ ກາຣຓສ຺ສ ອຸທ຺ທິສນໍ. ຣຸປ຺ປຕີຕິ ເອຕ຺ຖ ຣູປໍ ນາມ ສີຕາທິວິໂຣຘິປຈ຺ຈຍສນ຺ນິປາເຕນ ວິສທິສຸປ຺ປຕ຺ຕິ. ເຕນາຫ ‘‘ສີເຕນປີ’’ຕິອາທິ. ປພ຺ພຕປາເທຕິ ຈກ຺ກວາຬປພ຺ພຕປາເທ, ໂສ ປນ ຕຕ຺ຖ ອຈ຺ຈຸຄ຺ຄໂຕ ປາກາໂຣ ວິຍ ຐິໂຕ. ຕຖາ ຫິ ຕຕ຺ຖ ສຕ຺ຕາ ໂອລມ຺ພນ຺ຕາ ຕິຏ຺ຐນ຺ຕິ. ຫຕ຺ຖປາສາຄຕາຕິ ຫຕ຺ຖປາສໍ ອາຄຕາ ອຸປາຄຕາ. ຕຕ຺ຖາຕິ ຕສ຺ມິໍ ຫຕ຺ຖປາສາຄເຕ ສຕ຺ເຕ. ຉິຊ຺ຊິຕ຺ວາຕິ ມຸຈ຺ຉາປຕ຺ຕິຍາ ມຸຈ຺ຈິຕ຺ວາ, ອງ຺ຄປຈ຺ຈງ຺ຄອຸຈ຺ເຉທວເສນ ວາ ປຣິຈ຺ຉິຊ຺ຊິຕ຺ວາ. ອຈ຺ຈນ຺ຕຂາເຣ ອຸທເກຕິ ອາຕປສນ຺ຕາປາຠາເວນ ອຕິສີຕຠາວເມວ ສນ຺ຘາຍ ອຈ຺ຈນ຺ຕຂາຣຕາ ວຸຕ຺ຕາ ສິຍາ. ນ ຫິ ຕໍ ກປ຺ປສຓ຺ຐານອຸທກໍ ສມ຺ປຕ຺ຕິກຣມຫາເມຆວຸຏ຺ຐໍ ປຖວີສນ຺ຘາຣກໍ ກປ຺ປວິນາສອຸທກໍ ວິຍ ຂາຣໍ ຠວິຕຸໍ ອຣຫຕິ, ຕຖາ ສຕິ ປຖວີປິ ວິລີເຍຍ຺ຍາຕິ. ມຫິໍສກຣຏ຺ຐໍ ນາມ ຫິມວນ຺ຕປເທເສ ເອກໍ ຣຏ຺ຐໍ.

ອວີຈິມຫານິຣເຍຕິ ສອຸສ຺ສທໍ ອວີຈິນິຣຍໍ ວຸຕ຺ຕໍ. ຄງ຺ຄາປິຏ຺ເຐຕິ ຄງ຺ຄາຕີເຣ.

ສຣນ຺ຕາ ຄຈ຺ຉນ຺ຕີຕິ ສຣີສປປທສ຺ສ ອຕ຺ຖໍ ວທຕິ. ເອຕນ຺ຕິ ຣຸປ຺ປນໍ. ຍຖາ ກຐິນຕາ ປຖວິຍາ ປຈ຺ຈຕ຺ຕລກ຺ຂຓໍ, ເອວໍ ຣຸປ຺ປນໍ ຣູປກ຺ຂນ຺ຘສ຺ສ ປຈ຺ຈຕ຺ຕລກ຺ຂຓໍ, ສຠາວຠູຕລກ຺ຂຓນ຺ຕິ ອຕ຺ໂຖ.

ປຸຣິມສທິສນ຺ຕິ ປຸຣິເມ ຣູປກ຺ຂນ຺ເຘ ວຸຕ຺ເຕນ ສທິສໍ. ຕໍ ‘‘ກິນ຺ຕິ ກາຣຓປຸຈ຺ຉາ’’ຕິອາທິນາ ວຸຕ຺ຕນເຍເນວ ເວທິຕພ຺ພໍ. ສຸຂໍ ອິຏ຺ຐາຣມ຺ມຓໍ. ສຸຂາທີນໍ ເວທນານໍ. ປຈ຺ຈຍໂຕຕິ ອາຣມ຺ມຓປຈ຺ຈຍໂຕ. ອຍມຕ຺ໂຖຕິ ‘‘ສຸຂາຣມ຺ມຓໍ ສຸຂນ຺ຕິ ວຸຈ຺ຈຕີ’’ຕິ ອຍມຕ຺ໂຖ. ອຸຕ຺ຕຣປທໂລເປນ ເຫສ ນິທ຺ເທໂສ. ເວທຍຕີຕິ ອນຸຠວຕິ. ເວທຍິຕລກ຺ຂຓາຕິ ອນຸຠວນລກ຺ຂຓາ.

ນີລປຸປ຺ເຜຕິ ນີລວຓ຺ຓປຸປ຺ເຜ. ວຕ຺ເຖ ວາຕິ ນີລວຕ຺ເຖ. ວາ-ສທ຺ເທນ ວຓ຺ຓຘາຕຸອາທິໍ ສງ຺ຄຓ຺ຫາຕິ. ອປ຺ປນໍ ວາ ຌານໍ ວາເປນ຺ໂຕ. ອຸປ຺ປຊ຺ຊນສຎ຺ຎາປີຕິ ຍໍ ກິຎ຺ຈິ ນີລໍ ຣູປາຍຕນໍ ອາຣພ຺ຠ ອຸປ຺ປຊ຺ຊນສຎ຺ຎາປິ, ຍາ ປກິຓ຺ຓກສຎ຺ຎາຕິ ວຸຈ຺ຈຕິ.

ຣູປຕ຺ຕາຍາຕິ ຣູປຠາວາຍ. ຍາຄຸເມວາຕິ ຍາຄຸຠາວິນເມວ ວຕ຺ຖຸໍ. ຍາຄຸຕ຺ຕາຍ ຍາຄຸຠາວາຍ. ປຈຕິ ນາມ ປຸຄ຺ຄໂລ. ເອວນ຺ຕິ ຍຖາ ຍາຄຸອາທິວຕ຺ຖຸໍ ປຸຣິໂສ ຍາຄຸອາທິອຕ຺ຖາຍ ປຈຕິ ນິປ຺ຜາເທຕິ, ອຍໍ ເອວໍ ຣຸປ຺ປນາທິສຠາເວ ຘມ຺ມສມູເຫ ຍຖາສກໍ ປຈ຺ຈເຍຫິ ອຠິສງ຺ຂຣິຍມາເນ ເຈຕນາປຘາໂນ ຘມ຺ມສມູໂຫ ປວຕ຺ຕນຕ຺ຖໍ ວິເສສປຈ຺ຈໂຍ ຫຸຕ຺ວາ ເຕ ອຠິສງ຺ຂໂຣຕິ ນິໂຣເປຕິ ນິພ຺ພຕ຺ເຕຕິ. ເຕນາຫ ‘‘ປຈ຺ຈເຍຫີ’’ຕິອາທິ. ຣູປເມວາຕິ ຣູປສຠາວເມວ, ນ ອຎ຺ຎໍ ສຠາວໍ. ອຠິສງ຺ຂໂຣຕີຕິ ອິຕເຣຫິ ປຈ຺ຈຍຘມ຺ເມຫິ ອຘິກໍ ສຸຏ຺ຐຸ ປຈ຺ຈຍຕໍ ກໂຣຕິ. ‘‘ອຸປຄຈ຺ຉຕິ ຍາເປຕິ ອາຍູຫຕີ’’ຕິ ຕສ຺ເສວ ເວວຈນານິ. ອຠິສງ຺ຂຣຓເມວ ຫິ ອາຍູຫນາທີນິ. ນິພ຺ພຕ຺ເຕຕີຕິ ເຕສໍ ຘມ຺ມານໍ ຣຸປ຺ປນາທິຠາເວນ ນິພ຺ພຕ຺ຕິຍາ ປຈ຺ຈໂຍ ໂຫຕີຕິ ອຕ຺ໂຖ. ເຈຕຍິຕລກ຺ຂຓສ຺ສ ສງ຺ຂາຣສ຺ສາຕິ ອິທໍ ສງ຺ຂາຣກ຺ຂນ຺ຘຘມ຺ມານໍ ເຈຕນາປຘານຕ຺ຕາ ວຸຕ຺ຕໍ. ຕຖາ ຫິ ຠຄວາ ສຸຕ຺ຕນ຺ຕຠາຊນີເຍ ສງ຺ຂາຣກ຺ຂນ຺ຘໍ ວິຠຊນ຺ເຕນ ເຈຕນາວ ວິຠຕ຺ຕາ.

ວາຕິງ຺ຄຓໍ ພ຺ຣຫຕິຜລໍ. ຈຕຸຣສ຺ສວລ຺ລີຕິ ຕິວຸຕາລຕາ. ອຂາຣິກນ຺ຕິ ຂາຣຣສຣຫິຕໍ, ຕໍ ປນ ປຓ຺ຓຜລາທິ. ຍຕ຺ຖ ໂລຓຣໂສ ອຘິໂກ, ຕໍ ໂລຓິກນ຺ຕິ ອາຫ ‘‘ໂລຓຍາຄູ’’ຕິອາທິ. ອມ຺ພິລາທິເຠທໍ ຣສໍ.

ອາກາຣສຓ຺ຐານຄຫຓວເສນາຕິ ນີລປີຕາທິອາກາຣຄຫຓວເສນ ເຈວ ວຏ຺ຏຈຕຸຣສ຺ສາທິສຓ຺ຐານຄຫຓວເສນ ຈ. ວິນາປິ ອາກາຣສຓ຺ຐານາຕິ ອາກາຣສຓ຺ຐາເນຫິ ວິນາ, ເຕ ຐເປຕ຺ວາປິ. ປຈ຺ຈຕ຺ຕເຠທຄຫຓວເສນາຕິ ຕສ຺ສ ຕສ຺ສ ອາຣມ຺ມຓສ຺ສ ປເຠທຄຫຓວເສນ. ອສມ຺ໂມຫໂຕຕິ ຍາຖາວໂຕ. ວິເສໂສ ວິເສສຕ຺ຖທີປນໂຕ, ອວິເສໂສ ອຍໍ ຘມ຺ໂມ ອວິເສສທີປນໂຕ. ເຕນາຫ ‘‘ວິເສໂສ ເວທິຕພ຺ໂພ’’ຕິ. ຊານນຎ຺ຫິ ອວິສິຏ຺ຐໍ, ຕໍ ສມາສປທໂຕ ອຸປສຄ຺ຄາ ວິເສເສນ຺ຕິ. ຕຖາ ຫິ ສຎ຺ຊານນປທໍ ປຈ຺ຈຠິຎ຺ຎາຓນິມິຕ຺ຕໍ ອາກາຣຄຫຓມຕ຺ຕໍ ໂພເຘຕິ, ວິຊານນປທໍ ຕໂຕ ວິສິຏ຺ຐວິສຍຄຫຓໍ. ປຊານນປທໍ ປນ ຕໂຕປິ ວິສິຏ຺ຐຕຣໍ ປກາຣໂຕ ອວໂພຘໍ ໂພເຘຕິ. ເຕນາຫ ‘‘ຕສ຺ສາປີ’’ຕິອາທິ. ອາຣມ຺ມຓສຎ຺ຊານນມຕ຺ຕເມວາຕິ ນີລາທິເຠທສ຺ສ ອາຣມ຺ມຓສ຺ສ ສລ຺ລກ຺ຂຓມຕ຺ຕເມວ. ອວຘາຣເຓນ ລກ຺ຂຓປຏິເວຘຕ຺ຕໍ ນິວຕ຺ເຕຕິ. ເຕນາຫ ‘‘ອນິຈ຺ຈ’’ນ຺ຕິອາທິ. ຎາຓສມ຺ປຍຸຕ຺ຕຈິຕ຺ເຕຫິ ວິປສ຺ສນ຺ຕສ຺ສ ວິປສ຺ສນາຍ ປຄຸຓຠາເວ ສຕິ ຎາຓວິປ຺ປຍຸຕ຺ເຕນ ຈິຕ຺ເຕນປິ ວິປສ຺ສນາ ໂຫຕິເຍວາຕິ ອາຫ ‘‘ອນິຈ຺ຈາທິວເສນ ລກ຺ຂຓປຏິເວຘຎ຺ຈ ປາເປຕີ’’ຕິ. ປຏິເວຘນ຺ຕິ ຈ ອຸປລທ຺ຘິເມວ ວທຕິ, ນ ປຏິວິຊ຺ຌນໍ. ເຕນາຫ ‘‘ອຸສ຺ສກ຺ກິຕ຺ວາ ປນາ’’ຕິອາທິ. ອຸສ຺ສກ຺ກິຕ຺ວາຕິ ອຸສ຺ສກ຺ກາເປຕ຺ວາ ມຄ຺ຄປາຕຸຠາວມ຺ປິ ປາເປຕິ ອສມ຺ໂມຫສຠາວຕ຺ຕາ. ຍຖາ ລກ຺ຂຓປຏິເວຘກາເລ ສຎ຺ຊານນລກ຺ຂຓວເສນ ສຎ຺ຎາຓອນຸຣູປວເສເນວ ປວຕ຺ຕໍ, ເອວໍ ວິຎ຺ຎາຓວິຊານນວເສນ ວາຍໍ ອນຸຣູປວເສເນວ ປວຕ຺ຕຕີຕິ ທຏ຺ຐພ຺ພໍ.

ອິທານິ ຕມຕ຺ຖໍ ເຫຣຎ຺ຎິກາທິອຸປມາຍ ວິຠາເວຕຸໍ ‘‘ຍຖາ ຫີ’’ຕິອາທິມາຫ. ຫິຣຎ຺ຎໍ ວຸຈ຺ຈຕິ ກຫາປຓໍ, ຫິຣຎ຺ຎຊານເນ ນິຍຸຕ຺ໂຕ ເຫຣຎ຺ຎິໂກ. ໂລກໂວຫາເຣ ອຊາຕາ ອສຎ຺ຊາຕາ ພຸທ຺ຘິ ເອຕສ຺ສາຕິ ອຊາຕພຸທ຺ຘິ, ພາລທາຣໂກ. ໂວຫາຣກຸສໂລ ຄາມວາສີ ປຸຣິໂສ ຄາມິກປຸຣິໂສ. ອຸປໂຠຄປຣິໂຠຄາຣຫຕ຺ຕາ ອຸປໂຠຄປຣິໂຠຄໍ. ຕມ຺ພກໍສມຍຕ຺ຕາ ກູໂຏ. ມຫາສາຣຕ຺ຕາ ເຉໂກ. ອຑ຺ຒສາຣຕ຺ຕາ ກຣໂຏ. ນິຫີນສາຣຕ຺ຕາ ສຓ຺ໂຫ. ເອຕ຺ຖ ຈ ຍຖາ ເຫຣຎ຺ຎິໂກ ກຫາປຓໍ ຈິຕ຺ຕາທິຠາວໂຕ ອຸທ຺ຘໍ ກູຏາທິຠາວໍ ຣູປທສ຺ສນາທິວເສນ ອຸປ຺ປຕ຺ຕິຏ຺ຐານໂຕປິ ຊານນ຺ໂຕ ອເນກາກາຣໂຕ ຊານາຕິ, ເອວໍ ປຎ຺ຎາ ອາຣມ຺ມຓໍ ນານປ຺ປກາຣໂຕ ຊານາຕິ ປຏິວິຊ຺ຌຕິ, ຕາຍ ສທ຺ຘິໍ ປວຕ຺ຕມານວິຎ຺ຎາຓມ຺ປິ ຍຖາວິສຍໍ ອາຣມ຺ມຓໍ ຊານາຕິ.

ເອວໍ ສ຺ວາຍໍ ເນສໍ ຊານເນ ວິເສໂສ ອຎ຺ເຎສໍ ອວິສໂຍ, ພຸທ຺ຘານໍ ເອວ ວິສໂຍຕິ ອິທໍ ວິເສສໍ ມິລິນ຺ທປຎ຺ເຫນ ວິຠາເວຕຸໍ ‘‘ເຕນາຫາ’’ຕິອາທິມາຫ, ຕໍ ສຸວິຎ຺ເຎຍ຺ຍເມວ.

ອຕ຺ຕສຸຎ຺ຎານໍ ສຠາວຘມ຺ມານໍ ຘມ຺ມມຕ຺ຕຕາຍ ກຖິຕຕ຺ຕາ ‘‘ອນຕ຺ຕລກ຺ຂຓໍ ກເຖຕ຺ວາ’’ຕິ ວຸຕ຺ຕໍ. ເຫຏ຺ຐິມມຄ຺ຄາ ຈ ຍທິ ອຘິຄຕາ, ອຣຫຕ຺ຕສ຺ສ ອນຘິຄຕຕ຺ຕາ ‘‘ເອກເທສມຕ຺ເຕນາ’’ຕິ ວຸຕ຺ຕໍ, ຕໍ ອນິຈ຺ຈລກ຺ຂຓໍ ທສ຺ເສຕຸໍ ອິທໍ ປພ຺ພມາຣທ຺ຘໍ, ອິຕຣານິ ທ຺ເວ ລກ຺ຂຓານິ ຕສ຺ສ ປຣິຫາຣຠາເວນາຕິ ອຘິປ຺ປາໂຍ.

ຍສ຺ມາ ປເນຕ຺ຖ ‘‘ຕໍ ກິໍ ມຎ຺ຎຖ, ຠິກ຺ຂເວ’’ຕິອາທິເທສນາຍ ຕີສຸ ລກ຺ຂເຓສຸ ອິທເມວ ປຘານຠາເວນ ທສ຺ສິຕໍ, ອິທໍ ອປ຺ປຘານຠາເວນາຕິ ນ ສກ຺ກາ ວຕ຺ຕຸໍ, ຕສ຺ມາ ‘‘ຕີຓິ ລກ຺ຂຓານິ ສໂມຘາເນຕ຺ວາ ທສ຺ເສຕຸມ຺ປີ’’ຕິ ວຸຕ຺ຕໍ. ອປຈິນາຕີຕິ ອປຈຍຄາມິຘມ຺ເມ ນິວຕ຺ເຕຕິ ເອກໍສໂຕ ອປຈຍຄາມິປຏິປທາຍ ປຣິປູຣຓໂຕ. ເຕນາຫ ‘‘ໂນ ອາຈິນາຕີ’’ຕິອາທິ. ວຏ຺ຏໍ ວິນາເສຕີຕິ ວິຘມຕິ ອທສ຺ສນໍ ຄເມຕິ. ເນວ ຈິນາຕີຕິ ນ ວຑ຺ເຒຕິ. ຕເທວາຕິ ຕໍ ວຏ຺ຏໍ ເອວ. ວິສ຺ສຊ຺ເຊຕີຕິ ຉຑ຺ເຑຕິ. ວິກິຣຕີຕິ ວິທ຺ຘໍເສຕິ. ວິຘູເປຕີຕິ ວຏ຺ຏຕ຺ຕຍສງ຺ຂາຕໍ ອຄ຺ຄິກ຺ຂນ຺ຘໍ ວິຄຕຘູມໍ ວິຄຕສນ຺ຕາປໍ ກໂຣຕີຕິ ອຕ຺ໂຖຕິ ອາຫ ‘‘ນິພ຺ພາເປຕີ’’ຕິ.

ເອວໍ ປສ຺ສນ຺ຕິອາທິ ອນາຄາມິຜເລ ຐິຕສ຺ສ ອຣິຍສາວກສ຺ສ ອຄ຺ຄມຄ຺ຄຜລາຘິຄມາຍ ເທສນາຕິ ອຘິປ຺ປາເຍນາຫ ‘‘ວຏ຺ຏໍ ວິນາເສຕ຺ວາ ຐິຕໍ ມຫາຂີຓາສວໍ ທສ຺ເສສ຺ສາມີ’’ຕິ. ຂີຓາສວສ຺ສ ອນາຄຕຠາວທສ຺ສນໍເຍວ, ສພ຺ພາ ຈາຍໍ ເຫຏ຺ຐິມາ ເທສນາ ສຸທ຺ຘວິປສ຺ສນາກຖາ, ສຫປຐມມຄ຺ຄາ ວາ ສຫວິຊ຺ຊູປມຘມ຺ມາ ວາ ວິປສ຺ສນາກຖາຕິ ທສ຺ເສນ຺ໂຕ ‘‘ເອຕ຺ຕເກນ ຐາເນນາ’’ຕິອາທິມາຫ.

ນມສ຺ສນ຺ຕິເຍວ ມຫຕາ ຄາຣວພຫຸມາເນນ. ເຕນາຫ ‘‘ນໂມ ເຕ ປຸຣິສາຊຎ຺ຎາ’’ຕິອາທິ. ຕຕ຺ຖ ນິທສ຺ສນໍ ທສ຺ເສນ຺ໂຕ ‘‘ອາຍສ຺ມນ຺ຕໍ ນີຕຕ຺ເຖຣໍ ວິຍາ’’ຕິ ວຕ຺ວາ ຕມຕ຺ຖໍ ວິຠາເວຕຸໍ ‘‘ເຖໂຣ’’ຕິອາທິມາຫ. ຕຕ຺ຖ ຂຸຣຄ຺ເຄເຍວາຕິ ເກໂສໂຣປນຕ຺ຖໍ ຂຸຣຘາຣາຍ ອຄ຺ເຄ ສີເສ ຐປິເຕ ຕຈປຎ຺ຈກກມ຺ມຏ຺ຐານມຸເຂນ ຠາວນໍ ອນຸຍຸຎ຺ຊນ຺ໂຕ ອຣຫຕ຺ຕໍ ປຕ຺ວາ. ພ຺ຣຫ຺ມວິມານາຕິ ພ຺ຣຫ຺ມານໍ ນິວາສຠູຕາ ວິມານາ.

ຂຊ຺ຊນີຍສຸຕ຺ຕວຓ຺ຓນາ ນິຏ຺ຐິຕາ.

໘. ປິຓ຺ໂຑລ຺ຍສຸຕ຺ຕວຓ຺ຓນາ

໘໐. ອປກຣີຍຕິ ເອເຕນາຕິ ອປກຣຓໍ, ປທໍ. ອປກຣຓໍ ປກຣຓໍ ກາຣຓນ຺ຕິ ອຕ຺ຖໂຕ ເອກໍ. ເຕນາຫ ‘‘ກິສ຺ມິຎ຺ຈິເທວ ກາຣເຓ’’ຕິ. ນີຫຣິຕ຺ວາຕິ ອຕ຺ຕໂນ ສມີປຈາຣຠາວໂຕ ອປເນຕ຺ວາ. ຕຖາກຣຓຎ຺ຈ ເອວເມເຕ ເອຕ຺ຕກມ຺ປິ ອປ຺ປຏິຣູປໍ ອກຕ຺ວາ ອາຍຕິໍ ສມ຺ມາ ປຏິປຊ຺ຊິສ຺ສນ຺ຕີຕິ. ລທ຺ຘພລາຕິ ລທ຺ຘຎາຓພລາ.

ເອກທ຺ວີຫິກາຍາຕິ ເອເກກສ຺ສ ເຈວ ທ຺ວິນ຺ນໍ ທ຺ວິນ຺ນຎ຺ຈ ອີຫິກາ ຄຕິ ອຸປສງ຺ກມນາ ເອກທ຺ວີຫິກາ. ເຕນາຫ ‘‘ເອເກໂກ ເຈວ ທ຺ເວ ທ຺ເວ ຈ ຫຸຕ຺ວາ’’ຕິ. ປຸຖຸຊ຺ຊນານໍ ສມຸທິຕານໍ ນາມ ກິຣິຍາ ຕາທິສີປິ ສິຍາຕິ ວຸຕ຺ຕໍ ‘‘ເກຬິມ຺ປິ ກເຣຍ຺ຍຸ’’ນ຺ຕິ. ປຣິກປ຺ປນວເສນ ສມ຺ມາສມ຺ພຸທ຺ຘໍ ອຸທ຺ທິສ຺ສ ເປສລາ ຠິກ຺ຂູປິ ເອວໍ ກໂຣນ຺ຕີຕິ.

ຍຸຄນ຺ຘຣປພ຺ພຕາທີນໍ ອນ຺ຕເຣ ສີທນ຺ຕຣໍ ສມຸທ຺ທໍ ນາມ. ຕຕ຺ຖ ກິຣ ວາໂຕ ນ ວາຍຕິ, ປຕິຕໍ ຍໍ ກິຎ຺ຈິປິ ສີທນ຺ຕຣນທິຍໍ ວິລີຍນ຺ຕາ ສີທນ຺ເຕວ, ຕສ຺ມາ ຕໍ ປຣິວາເຣຕ຺ວາ ຐິຕາ ຍຸຄນ຺ຘຣາທໂຍປິ ສີທປພ຺ພຕາ ນາມ. ຕໍ ສນ຺ຘາຍ ວຸຕ຺ຕໍ ‘‘ສີທນ຺ຕເຣ ສນ຺ນິສິນ຺ນໍ ມຫາສມຸທ຺ທໍ ວິຍາ’’ຕິ. ອາຫາຣເຫຕູຕິ ອາມິສເຫຕຸ ສປ຺ປິເຕລາທິນິມິຕ຺ຕໍ, ເຕສໍ ປຓາມນາ.

ປຈ຺ຉິມນ຺ຕິ ນິຫີນໍ. ເຕນາຫ ‘‘ລາມກ’’ນ຺ຕິ, ລາມກນ຺ໂຕ ອິຘາຘິປ຺ເປໂຕ –

‘‘ມິຄານໍ ໂກຏ຺ຐຸໂກ ອນ຺ໂຕ, ປກ຺ຂີນໍ ປນ ວາຍໂສ;

ເອຣຓ຺ໂຑ ອນ຺ໂຕ ຣຸກ຺ຂານໍ, ຕໂຍ ອນ຺ຕາ ສມາຄຕາ’’ຕິ. –

ອາທີສຸ (ຊາ. ໑.໓.໑໓໕) ວິຍ. ອຸລຕີຕິ ອຠິຈຣຕິ. ອຠິສປນ຺ຕິ ເອເຕນາຕິ ອຠິສາໂປ. ອຠິສາປວຕ຺ຖຸ ປິຓ຺ໂຑລ຺ຍໍ. ອຕ຺ໂຖ ຜລໍ ວໂສ ເອຕສ຺ສາຕິ ອຕ຺ຖວສໍ, ກາຣຓໍ, ຕມ຺ປິ ເຕສຸ ອຕ຺ຖິ, ຕຕ຺ຖ ນິຍຸຕ຺ຕາຕິ ອຕ຺ຖວສິກາ.

ອນ຺ໂຕ ຫທຍສ຺ສ ອພ຺ຠນ຺ຕເຣ ອນຸປວິຏ຺ຐາ ໂສກວຕ຺ຖູຫິ.

ອຠິຊ຺ຌາຍິຕາຕິ ອຠິຊ຺ຌາຍນສີໂລ. ອຠິຓ຺ຫປ຺ປວຕ຺ຕິຍາ ເຈວ ພຫຸລຠາເວນ ຈ ພຫຸລຣາໂຄ. ປູຕິຠາເວນາຕິ ກຸຖິຕຠາເວນ. ພ຺ຍາປາໂທ ຫິ ອຸປ຺ປຊ຺ຊມາໂນ ຈິຕ຺ຕໍ ອປຄນ຺ຘໍ ກໂຣຕິ, ນ ສຸຈິມນຸຎ຺ຎຠາວໍ. ຠຕ຺ຕນິກ຺ຂິຕ຺ຕກາໂກ ວິຍາຕິ ອິທໍ ຠຕ຺ຕຏ຺ຐານສ຺ສ ອສຣເຓນ ກາກສ຺ສ ນຏ຺ຐສຕິຕາ ປຎ຺ຎາຍຕີຕິ ກຕ຺ວາ ວຸຕ຺ຕໍ, ນ ຠຕ຺ຕນິກ຺ຂິຕ຺ຕຕາຍ. ອສຓ຺ຐິໂຕຕິ ອສຓ຺ຐິຕຈິຕ຺ໂຕ. ກຏ຺ຐຕ຺ຖນ຺ຕິ ກຏ຺ເຐນ ກຕ຺ຕພ຺ພກິຈ຺ຈໍ.

ປາປວິຕກ຺ເກຫິ ກໂຕ, ຕສ຺ມາ ເຕ ອນວເສສໂຕ ປຫາຕພ຺ພາຕິ ທສ຺ສນຕ຺ຖໍ. ທ຺ວິນ຺ນໍ ວຸຕ຺ຕຕ຺ຕາ ເອໂກ ປຸພ຺ພຠາໂຄ, ອິຕໂຣ ມິສ຺ສໂກຕິ ວຕ຺ຕຸໍ ຍຸຕ຺ຕນ຺ຕິ ອຘິປ຺ປາເຍນ ‘‘ເອຕ຺ຖ ຈາ’’ຕິອາທິ ວຸຕ຺ຕໍ. ເອວໍ ຕໍ ຠາເວນ຺ຕສ຺ສ ນິຣຸຊ຺ຌນ຺ຕິ ເອວາຕິ ເອເກກມິສ຺ສກຕາວເສນ ຄເຫຕພ຺ພນ຺ຕິ ໂປຣາຓາ. ອຸປຣິ ຕິປຣິວຏ຺ຏເທສນາຍ ອນິມິຕ຺ຕສມາຘິເຍວ ທີປິໂຕ. ເຕນາຫ ‘‘ຍາວຎ຺ຈິທ’’ນ຺ຕິ. ນິທ຺ໂທໂສຕິ ວີຕຣາຄາທິນາ ນິທ຺ໂທໂສ.

ປິຓ຺ໂຑລ຺ຍສຸຕ຺ຕວຓ຺ຓນາ ນິຏ຺ຐິຕາ.

໙. ປາລິເລຍ຺ຍສຸຕ຺ຕວຓ຺ຓນາ

໘໑. ປຣິຍາທິຓ຺ຓຣູປຈິຕ຺ຕາຕິ ຣາຄາທີຫິ ປຣິຍາທິຍິຕ຺ວາ ເຂເປຕ຺ວາ ຄຫິຕຈິຕ຺ຕາ.

ຠຄວໂຕ ຈາໂຣ ວິທິໂຕ ປຣິຈຍວເສນ. ສຕ຺ຖາ ປຣິໂຠຄໍ ກໂຣຕິ ອນຸຄ຺ຄຓ຺ຫນ຺ໂຕ ‘‘ເອວໍ ຫິສ຺ສ ທຸຄ຺ຄຕິໂມກ຺ໂຂ ຠວິສ຺ສຕີ’’ຕິ. ອຎ຺ຎຕ຺ຣາຕິ ວິນາ.

ນາເຄນາຕິ ພຸທ຺ຘນາເຄນ ອງ຺ກຸສຣຫິເຕນ. ຕໂຕ ເອວ ອຸຊຸຠູເຕນ ຈິຕ຺ເຕນ. ອີສາທນ຺ຕສ຺ສ ນງ຺ຄລສທິສທນ຺ຕສ຺ສ ຫຕ຺ຖິໂນ ເອວໍ ຈິຕ຺ຕໍ ສເມຕິ. ຕຕ຺ຖ ກາຣຓມາຫ ‘‘ຍເທໂກ ຣມຕີ ວເນ’’ຕິ. ເອເຕນ ກາຍວິເວເກນ ຣຕິສາມຎ຺ຎໍ ວທຕິ.

ອຕ຺ຕໂນ ຘມ຺ມຕາຍາຕິ ປກຕິຍາ ສຍເມວ.

ອາສວານໍ ຂໂຍຕິ ອິຘ ອຣຫຕ຺ຕໍ ອຘິປ຺ເປຕໍ, ຕໍ ປນ ອຄ຺ຄມຄ຺ຄານນ຺ຕຣເມວາຕິ ອາຫ ‘‘ມຄ຺ຄານນ຺ຕຣໍ ອຣຫຕ຺ຕຜລ’’ນ຺ຕິ. ວິຈໂຍ ເທສນາປຎ຺ຎາ ອຘິປ຺ເປຕາ, ສາ ຈ ອເນກຘາ ປວຕ຺ຕາ ເອວາຕິ ວຸຕ຺ຕໍ ‘‘ວິຈຍໂສ’’ຕິ, ອເນກກ຺ຂຕ຺ຕຸໍ ປວຕ຺ຕມານາປິ ວິຈໂຍ ເອວາຕິ ກຕ຺ວາ ‘‘ວິຈເຍນາ’’ຕິ ອຕ຺ໂຖ ວຸຕ຺ໂຕ. ສາສນຘມ຺ໂມຕິ ສີລກ຺ຂນ຺ຘາທິປຣິທີປໂນ ປຣິຍຕ຺ຕິຘມ຺ໂມ. ປຣິວິຕກ຺ໂກ ອຸທປາທິ ‘‘ຈຕ຺ຕາໂຣ ສຕິປຏ຺ຐານາ’’ຕິອາທິນາ, ເອວໍ ໂກຏ຺ຐາສໂຕ ປຣິຈ຺ຉິຊ຺ຊ ເທສິເຕ ມຍາ ຘມ຺ເມ ກຕມສ຺ສ ຊານນສ຺ສ ອນ຺ຕຣາ ອາສວານໍ ຂໂຍ ໂຫຕີຕິ ເອກຈ຺ຈສ຺ສ ກງ຺ຂາ ໂຫຕິເຍວາຕິ ອຘິປ຺ປາໂຍ. ທິຏ຺ຐິ ເອວ ສມນຸປສ຺ສນາ ທິຏ຺ຐິສມນຸປສ຺ສນາ. ທິຏ຺ຐິສງ຺ຂາໂຣຕິ ທິຏ຺ຐິປຈ຺ຈໂຍ ສງ຺ຂາໂຣ. ຕໂຕ ເອວ ຕຓ຺ຫາປຈ຺ຈໂຍ ໂຫຕີຕິ ວຸຕ຺ຕໍ ‘‘ຕໂຕໂຊ ໂສ ສງ຺ຂາໂຣ’’ຕິ. ຕໂຕ ຕຓ຺ຫາໂຕ ໂສ ສງ຺ຂາໂຣ ຊາໂຕຕິ ຈຕູສຸ ເອສ ທິຏ຺ຐິສງ຺ຂາໂຣ ທິຏ຺ຐູປນິສ຺ສໂຍ ສງ຺ຂາໂຣ ຊາຍຕິ. ອວິຊ຺ຊາສມ຺ຜສ຺ໂສຕິ ອວິຊ຺ຊາສມ຺ປຍຸຕ຺ຕສມ຺ຜສ຺ໂສ. ເອວເມຕ຺ຖ ຠຄວາ ສຬາຍຕນນາມຣູປວິຎ຺ຎາຓານິ ສງ຺ຂາຣປກ຺ຂິກາເນວ ກຕ຺ວາ ທສ຺ເສຕິ.

ເອຕ຺ຕເກ ຐາເນຕິ ‘‘ອິຘ ຠິກ຺ຂເວ ອສ຺ສຸຕວາ ປຸຖຸຊ຺ຊໂນ’’ຕິອາທິໍ ກຕ຺ວາ ຍາວ ‘‘ນ ເມ ຠວິສ຺ສຕີ’’ຕິ ເອຕ຺ຕເກ ຐາເນ. ຄຫິຕຄຫິຕທິຏ຺ຐິນ຺ຕິ ສກ຺ກາຍທິຏ຺ຐິຍາ ‘‘ໂສ ອຕ຺ຕາ, ໂສ ໂລໂກ’’ຕິອາທິນາ ປວຕ຺ຕໍ ສສ຺ສຕທິຏ຺ຐິໍ, ໂນ ຈສ຺ສໍ, ໂນ ຈ ເມ ສິຍາ’’ຕິອາທິນາ ປວຕ຺ຕໍ ອຸຈ຺ເຉທທິຏ຺ຐິນ຺ຕິ ຕຖາ ຕຖາ ຄຫິຕທິຏ຺ຐິໍ. ‘‘ອິຕິ ໂຂ, ຠິກ຺ຂເວ, ໂສປິ ສງ຺ຂາໂຣ ອນິຈ຺ໂຈ’’ຕິອາທິເທສນາຍ ວິສ຺ສຊ຺ຊາເປນ຺ໂຕ ອາຄໂຕ. ຕຕ຺ຖ ຕຕ຺ເຖວາສ຺ສ ອຸປ຺ປນ຺ນທິຏ຺ຐິວິເວຈນໂຕ ອິມິສ຺ສາ ເທສນາຍ ປຸຄ຺ຄລຊ຺ຌາສເຍນ ປວຕ຺ຕິຕຕາ ເວທິຕພ຺ພາ, ເຕວີສຕິຍາ ຐາເນສຸ ອຣຫຕ຺ຕປາປເນນ ເທສນາວິລາໂສ. ຕໂຕໂຊ ໂສ ສງ຺ຂາໂຣຕິ ຕໂຕ ວິຈິກິຈ຺ຉາຍ ປຈ຺ຈຍຠູຕຕຓ຺ຫາໂຕ ຊາໂຕ ວິຈິກິຈ຺ຉາຍ ສມ຺ປຍຸຕ຺ໂຕ ສງ຺ຂາໂຣ. ຍທິ ສຫຊາຕາທິປຈ຺ຈຍວເສນ ຕໂຕ ຕຓ຺ຫາໂຕ ຊາໂຕຕິ ຕໂຕໂຊ ສງ຺ຂາໂຣຕິ ວຸຈ຺ເຈຍ຺ຍ, ອິທມຍຸຕ຺ຕນ຺ຕິ ທສ຺ເສນ຺ໂຕ ‘‘ຕຓ຺ຫາສມ຺ປຍຸຕ຺ຕ…ເປ… ຊາຍຕີ’’ຕິ ໂຈເທຕິ. ອິຕໂຣ ອຸປນິສ຺ສຍໂກຏິ ອິຘາຘິປ຺ເປຕາຕິ ທສ຺ເສນ຺ໂຕ ‘‘ອປ຺ປຫີນຕ຺ຕາ’’ຕິ ວຕ຺ວາ ‘‘ຍສ຺ສ ຫີ’’ຕິອາທິນາ ຕມຕ຺ຖໍ ວິວຣຕິ. ນ ຫິ ຕຓ຺ຫາຍ ວິຈິກິຈ຺ຉາ ສມ຺ຠວຕິ. ຍທິ ອສຕິ ສຫຊາຕໂກຏິຍາ ອຸປນິສ຺ສຍໂກຏິຍາ ຕຓ຺ຫາປຈ຺ຈຍາ ວິຈິກິຈ຺ຉາຍ ສມ຺ຠໂວ ເອວ. ທິຏ຺ຐິຍາປີຕິ ທ຺ວາສຏ຺ຐິທິຏ຺ຐິຍາປິ. ເຕນາຫ ‘‘ຈຕູສຸ ຫີ’’ຕິອາທິ. ວີສຕິ ສກ຺ກາຍທິຏ຺ຐິໂຍ ສສ຺ສຕທິຏ຺ຐິໍ ອຸຈ຺ເຉທທິຏ຺ຐິໍ ວິຈິກິຈ຺ຉຎ຺ຈ ປກ຺ຂິປິຕ຺ວາ ປຈ຺ເຈກໍ ອນິຈ຺ຈຕາມຸເຂນ ວິປສ຺ສນໍ ທສ຺ເສຕ຺ວາ ອຣຫຕ຺ຕໍ ປາເປຕ຺ວາ ເທສນາ ນິຏ຺ຐາປິຕາຕິ ອາຫ ‘‘ເຕວີສຕິຍາ ຐາເນສູ’’ຕິອາທິ.

ປາລິເລຍ຺ຍສຸຕ຺ຕວຓ຺ຓນາ ນິຏ຺ຐິຕາ.

໑໐. ປຸຓ຺ຓມສຸຕ຺ຕວຓ຺ຓນາ

໘໒. ທິສ຺ສຕິ ອປທິສ຺ສຕີຕິ ເທໂສ, ກາຣຓໍ, ຕຎ຺ຈ ໂຂ ຎາປກໍ ທຏ຺ຐພ຺ພໍ. ຍຎ຺ຫິ ໂສ ຊານິຕຸກາໂມ ຣຸປ຺ປນາທິສຠາວໍ, ປຐມໍ ປນ ສຣູປໍ ປຸຈ຺ຉິຕ຺ວາ ປຸນ ຕສ຺ສ ວິເສໂສ ປຸຈ຺ຉິຕພ຺ໂພຕິ ປຐມໍ ‘‘ອິເມ ນຸ ໂຂ’’ຕິອາທິນາ ປຸຈ຺ຉໍ ກໂຣຕິ, ອິຘາປິ ຈ ໂສ ວິເສໂສ ເອວ ຕສ຺ສ ຠິກ຺ຂຸໂນ ອນ຺ຕນ຺ຕິ ທສ຺ເສຕິ. ອຊານນ຺ໂຕ ວິຍ ປຸຈ຺ຉຕິ ເຕສໍ ເຫຕຸນ຺ຕິ ອຘິປ຺ປາໂຍ.

ຕຓ຺ຫາຉນ຺ທມູລກາ ປຠວຕ຺ຕາ. ປຎ຺ຈຸປາທານກ຺ຂນ຺ຘາຕິ ເອຕ຺ຖ ວິເສສໂຕ ຕຓ຺ຫຸປາທານສ຺ສ ຄຫຓໍ ອິຕຣສ຺ສ ຕຄ຺ຄຫເຓເນວ ຄຫິຕໍ ຕທວິນາຠາວໂຕຕິ ຉນ຺ທຣາໂຄ ເອວ ອຸທ຺ຘໂຏ. ອິທນ຺ຕິ ຕປ຺ປຎ຺ຫປຏິກ຺ຂິປນໍ. ຍທິປິ ຂນ຺ຘາ ອຸປາທາເນຫິ ອສຫຊາຕາປິ ໂຫນ຺ຕິ ອຸປາທານສ຺ສ ອນາຣມ຺ມຓຠູຕາປິ, ອຸປາທານໍ ປນ ເຕຫິ ສຫຊາຕເມວ, ຕທາຣມ຺ມຓຎ຺ຈ ໂຫຕິເຍວາຕິ ທສ຺ເສຕິ. ນ ຫິ ອສຫຊາຕໍ ອນາຣມ຺ມຓຎ຺ຈ ອຸປາທານໍ ອຕ຺ຖີຕິ. ອິທານິ ຕມຕ຺ຖໍ ວິວຣິຕ຺ວາ ທສ຺ເສຕຸໍ ‘‘ຕຓ຺ຫາສມ຺ປຍຸຕ຺ຕສ຺ມິ’’ນ຺ຕິອາທິ ວຸຕ຺ຕໍ, ຕໍ ສຸວິຎ຺ເຎຍ຺ຍເມວ. ອາຣມ຺ມຓໂຕຕິ ອາຣມ຺ມຓກຣຓໂຕ. ‘‘ເອວໍຣູໂປ ສິຍ’’ນ຺ຕິ ເອວໍປວຕ຺ຕສ຺ສ ຉນ຺ທຣາຄສ຺ສ ‘‘ເອວໍເວທໂນ ສິຍ’’ນ຺ຕິ ເອວໍປວຕ຺ຕິຍາ ອຠາວໂຕ ຕຕ຺ຖ ຕຕ຺ເຖວ ນຕສງ຺ຂາຣາ ຠິຊ຺ຊນ຺ຕິ, ຕສ຺ມາ ຣູປເວທນາຣມ຺ມຓານໍ ຉນ຺ທຣາຄາທີນໍ ອຠາວໂຕ ອຕ຺ເຖວ ຉນ຺ທຣາຄເວມຕ຺ຕຕາ. ຉນ຺ທຣາຄສ຺ສ ປຫານາທິວເສນ ຉນ຺ທຣາຄປຏິສໍຍຸຕ຺ຕສ຺ສ ອປຸຈ຺ຉິຕຕ຺ຕາ, ‘‘ອນຸສນ຺ຘິ ນ ຆຏິຍຕີ’’ຕິ ວຸຕ຺ຕໍ. ກິຎ຺ຈາປິ ນ ຆຏິຍຕີຕິ ອຎ຺ຎສ຺ເສວ ປຸຈ຺ຉິຕຕ຺ຕາ, ຕຖາປິ ສານຸສນ຺ຘິກາວ ປຸຈ຺ຉາ, ຕໂຕ ເອວ ສານຸສນ຺ຘິກໍ ວິສ຺ສຊ຺ຊນໍ. ຕຕ຺ຖ ກາຣຓມາຫ ‘‘ເຕສໍ ເຕສ’’ນ຺ຕິອາທິນາ. ເຕນ ອຊ຺ຌາສຍານຸສນ຺ຘິວເສນ ສານຸສນ຺ຘິກາເນວ ປຸຈ຺ຉາວິສ຺ສຊ຺ຊນານີຕິ ທສ຺ເສຕິ.

ປຸຓ຺ຓມສຸຕ຺ຕວຓ຺ຓນາ ນິຏ຺ຐິຕາ.

ຂຊ຺ຊນີຍວຄ຺ຄວຓ຺ຓນາ ນິຏ຺ຐິຕາ.