໘. ທຸຕິຍຄທ຺ທຸລພທ຺ຘສຸຕ຺ຕວຓ຺ຓນາ

໑໐໐. ທິຏ຺ຐິຄທ຺ທຸລນິສ຺ສິຕາຍາຕິ ສຫຊາຕາທິປຈ຺ຈຍວເສນ ທິຏ຺ຐິຄທ຺ທຸລນິສ຺ສິຕາຍ ນິສ຺ສາເຍວ ປວຕ຺ຕຕິ ຕໂຕ ອຕ຺ຕານໍ ວິເວເຈຕຸໍ ອສກ຺ກຸເຓຍ຺ຍຕ຺ຕາ. ຈິຕ຺ຕສໍກິເລເສເນວາຕິ ທສວິຘກິເລສວຕ຺ຖຸວເສນ ຈິຕ຺ຕສ຺ສ ສໍກິລິຏ຺ຐຠາເວນ. ອຣິຍມຄ຺ຄາຘິຄມເນນ ຈິຕ຺ຕສ຺ສ ໂວທານຕ຺ຕາ ໂວທາຍນ຺ຕິ ວິສຸຊ຺ຌນ຺ຕິ.

ວິຈຣຓຈິຕ຺ຕນ຺ຕິ ຄເຫຕ຺ວາ ວິຈຣຓວເສນ ວິຈຣຓຈິຕ຺ຕໍ. ສງ຺ຂານາມາຕິ ເອວໍນາມກາ. ພ຺ຣາຫ຺ມຓປາສຓ຺ຑິກາຕິ ຊາຕິຍາ ພ຺ຣາຫ຺ມຓາ, ຉນ຺ນວຸຕິຍາ ປາສຓ຺ເຑສຸ ຕໍ ສງ຺ຂາສຎ຺ຎິຕໍ ປາສຓ຺ຑໍ ປຄ຺ຄຍ຺ຫ ວິຈຣຓກາ. ປຏໂກຏ຺ຐກນ຺ຕິ ທຸສ຺ສາປຓກໍ. ທສ຺ເສນ຺ຕາຕິ ຍຖາຄຕິກມ຺ມວິປາກຈິຕ຺ຕຕໍ ທສ຺ເສນ຺ຕາ. ຕໍ ຈິຕ຺ຕນ຺ຕິ ຕໍ ປຏໂກຏ຺ຐກຈິຕ຺ຕໍ ຄເຫຕ຺ວາ ວິຈຣນ຺ຕິ. ຈິນ຺ເຕຕ຺ວາ ກຕຕ຺ຕາຕິ ‘‘ອິມສ຺ສ ຣູປສ຺ສ ເອວໍ ຫຕ຺ຖປາທາ, ເອວໍ ມຸຂໍ ລິຂິຕພ຺ພໍ, ເອວໍ ອາກາຣວຕ຺ຖຄ຺ຄຫຓານິ, ເອວໍ ກິຣິຍາວິເສສາ, ເອວໍ ກິຣິຍາວິຠາຄໍ, ສຕ຺ຕວິເສສານໍ ວິຠາຄໍ ກາຕພ຺ພ’’ນ຺ຕິ ຕສ຺ສ ອຸພ຺ພຕ຺ຕນຂິປນປວຕ຺ຕນາທິປໂຍຊນຎ຺ຈາຕິ ສພ຺ພເມຕໍ ຕຖາ ຈິນ຺ເຕຕ຺ວາ ກຕຕ຺ຕາ ຈິຕ຺ເຕນ ມນສາ ຈິນ຺ຕິຕໍ ນາມ. ອຸປາຍປຣິເຍສນຈິຕ຺ຕນ຺ຕິ ‘‘ຫຕ຺ຖປາທາ ເອວໍ ລິຂິຕພ຺ພາ’’ຕິອາທິນາ ຍຖາວຸຕ຺ຕອຸປາຍສ຺ສ ເຈວ ປຸພ຺ເພ ປວຕ຺ຕສ຺ສ ຠູມິປຣິກມ຺ມວຓ຺ຓຘາຕຸສມ຺ມາໂຍຊນຸປາຍສ຺ສ ຈ ວເສນ ປວຕ຺ຕໍ ຈິຕ຺ຕໍ. ຕໂຕປິ ຈິຕ຺ຕຕຣນ຺ຕິ ຕໂຕ ຈິຕ຺ຕກມ຺ມໂຕປິ ຈິຕ຺ຕຕຣໍ ຈິຕ຺ຕກາເຣນ ຈິນ຺ຕິຕປ຺ປກາຣານໍ ສພ຺ເພສໍເຍວ ຈິຕ຺ຕກມ຺ເມ ອນິປ຺ຜຊ຺ຊນໂຕ. ກມ຺ມຈິຕ຺ເຕນາຕິ ກມ຺ມວິຎ຺ຎາເຓນ. ກມ຺ມຈິຕ຺ເຕນາຕິ ວາ ກມ຺ມສ຺ສ ຈິຕ຺ຕຠາເວນ. ໂສ ກມ຺ມສ຺ສ ວິຈິຕ຺ຕຠາໂວ ຕຓ຺ຫາວເສນ ຊາຍຕີຕິ ເວທິຕພ຺ໂພ. ສ຺ວາຍມຕ຺ໂຖ ອຏ຺ຐສາລິນີຏີກາຍໍ ວິຠາວິໂຕ. ເອວໍ ຈິຕ຺ຕາຕິ ເອວໍ ຈິຕ຺ຕຣູປວິເສສາ. ໂຍນິໍ ອຸປເນຕີຕິ ຕໍ ຕໍ ອຓ຺ຑຊາທິເຠທໍ ໂຍນິວິເສສໍ ປາເປຕິ ວຓ຺ຓວິເສໂສ ວິຍ ຜລິກມຓິກໍ. ນ ຫິ ວິເສສາ ຫິຕວິຈິຕ຺ຕສາມຕ຺ຖິຍກມ຺ມໍ ໂຍນິໍ ອຸປເນຕິ, ຕສ຺ສ ຕສ຺ສ ວິປາກຸປ຺ປຕ຺ຕິຍາ ປຈ຺ຈໂຍ ໂຫຕິ. ໂຍນິມູລໂກ ເຕສໍ ຈິຕ຺ຕຠາໂວຕິ ຍໍ ຍໍ ໂຍນິໍ ກມ຺ມໍ ສຕ຺ເຕ ອຸປເນຕິ, ຕໍຕໍໂຍນິມູລໂກ ເຕສໍ ສຕ຺ຕານໍ ຈິຕ຺ຕວິຈິຕ຺ຕຠາໂວ. ເຕນາຫ ‘‘ໂຍນິອຸປຄຕາ’’ຕິອາທິ. ສທິສຈິຕ຺ຕາວ ສທິສຈິຕ຺ຕຠາວາ ເອວ. ອິຕີຕິອາທິ ວຸຕ຺ຕສ຺ເສວ ອຕ຺ຖສ຺ສ ອຸປ຺ປຏິປາຏິຍາ ນິຄມນໍ.

ຕິຣຈ຺ຉານຄຕຈິຕ຺ຕຠາວໂຕ ຈິຕ຺ຕສ຺ເສວ ສວິເສສໍ ຈິຕ຺ຕຠາວກຣຓໍ ທສ຺ເສຕຸໍ ‘‘ອປິຈາ’’ຕິອາທິ ວຸຕ຺ຕໍ. ຕຕ຺ຖ ຈິຕ຺ຕໍ ນາເມຕໍ ຈິຕ຺ຕຕຣເມວ ເວທິຕພ຺ພນ຺ຕິ ສມ຺ພນ຺ໂຘ. ສຫຊາຕຘມ຺ມຈິຕ຺ຕຕາຍາຕິ ຣາຄາທິສທ຺ຘາທິຘມ຺ມວິຈິຕ຺ຕຠາເວນ. ຠູມິຈິຕ຺ຕຕາຍາຕິ ອຘິຏ຺ຐານຈິຕ຺ຕຕາຍ. ກມ຺ມນານຕ຺ຕໍ ມູລໍ ກາຣຓໍ ເອເຕສນ຺ຕິ ກມ຺ມນານຕ຺ຕມູລກາ, ເຕສໍ. ລິງ຺ຄນານຕ຺ຕໍ ອິຕ຺ຖິລິງ຺ຄາທິນານຕ຺ຕວເສນ ເຈວ ຕໍຕໍສຓ຺ຐານນານຕ຺ຕວເສນ ຈ ເວທິຕພ຺ພໍ. ສຎ຺ຎານານຕ຺ຕໍ ອິຕ຺ຖິປຸຣິສເທວມນຸສ຺ສາທິສຎ຺ຎານານຕ຺ຕວເສນ. ໂວຫາຣນານຕ຺ຕໍ ຕິສ຺ໂສຕິອາທິໂວຫາຣນານຕ຺ຕວເສນ. ຈິຕ຺ຕານໍ ວິຈິຕ຺ຕານໍ. ຕໍຕໍໂວຫາຣນານຕ຺ຕມ຺ປິ ຈິຕ຺ເຕເນວ ປຎ຺ຎປີຍຕິ. ຣງ຺ຄຊາຕຣູປສມຸຏ຺ຐາປນາທິນາ ວຕ຺ຖໍ ຣຎ຺ຊຍຕີຕິ ຣຊໂກ, ວຓ຺ຓກາໂຣ. ປຸຖຸຊ຺ຊນສ຺ສ ອຕ຺ຕຠາວສຎ຺ຎິຕຣູປສມຸຏ຺ຐາປນຕາ ນິຍຕາ ເອກນ຺ຕິກາຕິ ປຸຖຸຊ຺ຊນຄ຺ຄຫຓໍ. ‘‘ອຠິຣູປໍ ຣູປໍ ສມຸຏ຺ຐາເປຕີ’’ຕິ ອາເນຕ຺ວາ ສມ຺ພນ຺ໂຘ.

ທຸຕິຍຄທ຺ທຸລພທ຺ຘສຸຕ຺ຕວຓ຺ຓນາ ນິຏ຺ຐິຕາ.