໙. ວາສິຊຏສຸຕ຺ຕວຓ຺ຓນາ

໑໐໑. ອຕ຺ຖສ຺ສາຕິ ຫິຕສ຺ສ. ອສາຘິກາ ‘‘ຠາວນານຸໂຍຄໍ ອນນຸຍຸຕ຺ຕສ຺ສາ’’ຕິ ອນນຸຍຸຕ຺ຕສ຺ສ ວຸຕ຺ຕຕ຺ຕາ. ອິຕຣາຕິ ສຸກ຺ກປກ຺ຂອຸປມາ. ສາຘິກາ ຠາວນາໂຍຄສ຺ສ ອນຸຍຸຕ຺ຕຕ຺ຕາ. ຕຎ຺ຫິ ຕສ຺ສ ສາຘິກາ ເວທິຕພ຺ພາ. ສມ຺ຠາວນຕ຺ເຖຕິ ປຣມຕ຺ຖສມ຺ຠາວເນ. ເອວຎ຺ຫິ ກຓ຺ຫປກ຺ເຂປິ ອປິສທ຺ທຄ຺ຄຫຓໍ ສມຕ຺ຖິຕໍ ໂຫຕິ. ສມ຺ຠາວນຕ຺ເຖຕິ ວາ ປຣິກປ຺ປນຕ຺ເຖຕິ ອຕ຺ໂຖ. ສງ຺ຂາຕພ຺ເພ ອຕ຺ເຖ ອນິຍມໂຕ ວຸຈ຺ຈມາເນ ສງ຺ຂາໂຕ ອນິຍມຕ຺ໂຖ ວາສທ຺ໂທ ວຕ຺ຕພ຺ໂພຕິ ‘‘ອຏ຺ຐ ວາ’’ຕິອາທິ ວຸຕ຺ຕໍ. ອູນາຘິການີຕິ ອູນານິປິ ອຘິການິປິ ກິຎ຺ຈາປິ ໂຫນ຺ຕິ, ເອກໍໂສ ປນ ຄເຫຕພ຺ໂພຕິ ‘‘ອຏ຺ຐ ວາ ທສ ວາ ທ຺ວາທສ ວາ’’ຕິ ວຸຕ຺ຕໍ. ເອວໍ ວຈນໍ ສນ຺ຘາຍ ‘‘ວຈນສິລິຏ຺ຐຕາຍາ’’ຕິອາທິ ວຸຕ຺ຕໍ. ປາທນຂສິຂາຫິ ອໂກປນວເສນ ສມ຺ມາ ອຘິສຍິຕານິ. ອຸຕຸນ຺ຕິ ອຸຓ຺ຫອຸຕຸໍ ກາຍຸສ຺ມາວເສນ. ເຕນາຫ ‘‘ອຸສ຺ມີກຕານີ’’ຕິ. ຠາວິຕານີຕິ ກຸກ຺ກຸຏວາສນາຍ ວາສິຕານິ. ສມ຺ມາອຘິສຍນາທິຕິວິຘກິຣິຍາກຣເຓນ ອິມໍ ອປ຺ປມາທໍ ກຕ຺ວາ. ໂສຕ຺ຖິນາ ອຠິນິພ຺ຠິຊ຺ຊິຕຸນ຺ຕິ ອນນ຺ຕຣາເຍນ ຕໂຕ ນິກ຺ຂມິຕຸໍ. ອິທານິ ຕມຕ຺ຖໍ ວິວຣນ຺ໂຕ ‘‘ເຕ ຫີ’’ຕິອາທິມາຫ. ສຍມ຺ປີຕິ ອຓ຺ຑານິ. ປຣິຓາມນ຺ຕິ ປຣິປກ຺ກໍ ພຫິນິກ຺ຂມນໂຍຄ຺ຄຕໍ.

ຕນ຺ຕິ ໂອປມ຺ມສມ຺ປຏິປາທນໍ. ເອວນ຺ຕິ ອິທານິ ວຸຈ຺ຈມານາກາເຣນ. ອຕ຺ເຖນາຕິ ອຸປເມຍ຺ຍຕ຺ເຖນ. ສໍສນ຺ທິຕ຺ວາ ສມ຺ມາ ໂຍເຊຕ຺ວາ. ສມ຺ປຍຸຕ຺ຕຘມ຺ມວເສນ ຎາຓສ຺ສ ຕິກ຺ຂາທິຠາໂວ ເວທິຕພ຺ໂພ. ຎາຓສ຺ສ ຫິ ສຠາວໂຕ ສຕິເນປກ຺ກໂຕ ຈ ຕິກ຺ຂຠາໂວ, ສມາຘິວເສນ ສູຣຠາໂວ, ສທ຺ຘາວເສນ ວິປ຺ປສນ຺ນຠາໂວ, ວີຣິຍວເສນ ປຣິຓາມຠາໂວ. ປຣິຓາມກາໂລຕິ ພລວວິປສ຺ສນາກາໂລ. ວຑ຺ຒິຕກາໂລຕິ ວຸຏ຺ຐານຄາມິນິວິປສ຺ສນາກາໂລ. ອນຸໂລມຏ຺ຐານສ຺ສ ຫິ ວິປສ຺ສນາ ຄຫິຕຄພ຺ຠາ ນາມ ຕທາ ມຄ຺ຄຄພ຺ຠສ຺ສ ຄຫິຕຕ຺ຕາ. ຕຊ຺ຊາຕິກນ຺ຕິ ຕສ຺ສ ວິປສ຺ສນານຸໂຍຄສ຺ສ ອນຸຣູປໍ. ສຕ຺ຖາປິ ຄາຖາຍ ອວິຊ຺ຊຓ຺ຑໂກສໍ ປຫຣຕິ ຠິນ຺ທາເປຕິ.

ໂອລມ຺ພກສງ຺ຂາຕນ຺ຕິ ໂອລມ຺ພກສຸຕ຺ຕສງ຺ຂາຕໍ. ປລນ຺ຕິ ຕສ຺ສ ສຸຕ຺ຕສ຺ສ ນາມໍ. ຘາເຣຕ຺ວາຕິ ທາຣູນໍ ເຫຍ຺ຍາທິຊານນຕ຺ຖໍ ອຸປເນຕ຺ວາ. ທາຣູນໍ ຄຓ຺ຑໍ ຫຣຕີຕິ ປລຄຓ຺ໂຑຕິ ເອເຕນ ປເລນ ຄຓ຺ຑຫາໂຣ ‘‘ປລຄຓ຺ໂຑ’’ຕິ ປຈ຺ຉິມປເທ ອຸຕ຺ຕຣປທໂລເປນ ນິທ຺ເທໂສຕິ ທສ຺ເສຕິ. ຄຫຓຏ຺ຐາເນຕິ ຫຕ຺ເຖນ ຄເຫຕພ຺ພຏ຺ຐາເນ. ສມ຺ມເທວ ເຂປີຍນ຺ຕິ ເອເຕນ ກາຍທຸຈ຺ຈຣິຕາທີນີຕິ ສງ຺ເຂໂປ, ເຕນ. ວິປສ຺ສນໍ ອນຸຍຸຎ຺ຊນ຺ຕສ຺ສ ປຸຄ຺ຄລສ຺ເສວ ທິວເສ ທິວເສ ອາສວານໍ ປຣິກ຺ຂໂຍ ອິຘ ‘‘ວິປສ຺ສນາຍານິສໍໂສ’’ຕິ ອຘິປ຺ເປໂຕ. ເຫມນ຺ຕິເກນ ກຣຓຠູເຕນ. ຠຸມ຺ມຕ຺ເຖ ວາ ເອຕໍ ກຣຓວຈນໍ, ເຫມນ຺ຕິເກຕິ ອຕ຺ໂຖ. ປຏິປ຺ປສ຺ສມ຺ຠນ຺ຕີຕິ ປຏິປ຺ປສ຺ສທ຺ຘຜລານິ ໂຫນ຺ຕິ. ເຕນາຫ ‘‘ປູຕິການິ ຠວນ຺ຕີ’’ຕິ.

ມຫາສມຸທ຺ໂທ ວິຍ ສາສນໍ ສຠາວຄມ຺ຠີຣຠາວໂຕ. ນາວາ ວິຍ ໂຍຄາວຈໂຣ ມໂຫຆຸຕ຺ຕຣຓໂຕ. ປຣິຍາທານໍ ວິຍາຕິ ປຣິໂຕ ອປຣິປູຣຓໍ ວິຍ. ຂຊ຺ຊມານານນ຺ຕິ ສງ຺ຂາທນ຺ເຕນ ວິຍ ອຸທເກນ ເຂປິຍມານານໍ ພນ຺ຘນານໍ. ຕນຸຠາໂວຕິ ປຣິຍຸຏ຺ຐານຸປ຺ປຕ຺ຕິຍາ ອສມຕ຺ຖຕາຍ ທຸພ຺ພລຠາໂວ. ວິປສ຺ສນາຎາຓປີຕິປາໂມຊ຺ເຊຫີຕິ ວິປສ຺ສນາຎາຓສມຸຏ຺ຐິເຕຫິ ປີຕິປາໂມຊ຺ເຊຫິ. ໂອກ຺ຂາຍມາເນ ປກ຺ຂາຍມາເນຕິ ວິວິຘປຏິປຕ຺ຕິຍາ ອຸກ຺ຂາຍມາເນ ປຏິສງ຺ຂານຸປສ຺ສນາຍ ປກ຺ຂາຍມາເນ. ທຸພ຺ພລຕາ ທີປິຕາ ‘‘ອປ຺ປກສິເຣເນວ ສໍໂຍຊນານິ ປຏິປ຺ປສ຺ສມ຺ຠນ຺ຕິ, ປູຕິການິ ຠວນ຺ຕີ’’ຕິ ວຸຕ຺ຕຕ຺ຕາ.

ວາສິຊຏສຸຕ຺ຕວຓ຺ຓນາ ນິຏ຺ຐິຕາ.