໒. ເທວທຫສຸຕ຺ຕວຓ຺ຓນາ

໒. ເທວາ ວຸຈ຺ຈນ຺ຕິ ຣາຊາໂນ ‘‘ທິພ຺ພນ຺ຕິ ກາມຄຸເຓຫິ ກີຬນ຺ຕິ ລຬນ຺ຕິ, ອຕ຺ຕໂນ ວາ ປຸຎ຺ຎານຸຠາເວນ ໂຊຕນ຺ຕີ’’ຕິ ກຕ຺ວາ. ເຕສໍ ທໂຫຕິ ເທວທໂຫ. ສຍໍຊາໂຕ ວາ ໂສ ໂຫຕິ, ຕສ຺ມາປິ ‘‘ເທວທໂຫ’’ຕິ ວຸຕ຺ໂຕ. ຕສ຺ສ ອວິທູເຣ ນິຄໂມ ‘‘ເທວທຫ’’ນ຺ຕ຺ເວວ ສງ຺ຂໍ ຄໂຕ ຍຖາ ‘‘ວຣຓານຄຣໍ, ໂຄຘາຄາໂມ’’ຕິ. ປຈ຺ຉາຠູມິຍໍ ອປຣທິສາຍໍ ນິວິຏ຺ຐຊນປໂທ ປຈ຺ຉາຠູມໍ, ຕໍ ຄນ຺ຕຸກາມາ ປຈ຺ຉາຠູມຄມິກາ. ເຕ ສຠາເຣຕິ ເຕ ຠິກ຺ຂູ ເຖຣສ຺ສ ວເສນ ສຠາເຣ ກາຕຸກາມຕາຍ. ຍທິ ເຖໂຣ ເຕສໍ ຠາໂຣ, ເຖຣສ຺ສປິ ເຕ ຠາຣາ ເອວາຕິ ‘‘ເຕ ສຠາເຣ ກາຕຸກາມຕາຍາ’’ຕິ ວຸຕ຺ຕໍ. ເອວຎ຺ຫິ ເຖໂຣ ເຕ ໂອວທິຕພ຺ເພ ອນຸສາສິຕພ຺ເພ ມຎ຺ຎຕີຕິ. ອິທານິ ຕມຕ຺ຖໍ ວິວຣນ຺ໂຕ ‘‘ໂຍ ຫີ’’ຕິອາທິມາຫ. ອຍໍ ນິພ຺ຠາໂຣ ນາມ ກຎ຺ຈິ ປຸຄ຺ຄລໍ ອຕ຺ຕໂນ ຠາຣໍ ກຕ຺ວາ ອວຕ຺ຕນໂຕ.

ຈຕຸພ຺ພິເຘນາຕິ ຘາຕຸໂກສລ຺ລໍ ອາຍຕນໂກສລ຺ລໍ ປຏິຈ຺ຈສມຸປ຺ປາທໂກສລ຺ລໍ ຐານາຏ຺ຐານໂກສລ຺ລນ຺ຕິ ເອວໍ ຈຕຸພ຺ພິເຘນ.

ເຕ ມຫລ຺ລກາພາຘິກາຕິທຫຣປຸຄ຺ຄເລ ຄຓ຺ຫິຕ຺ວາວ ຄຈ຺ຉຕິ. ເຕ ຫິ ທິວສທ຺ວເຍນ ວູປສນ຺ຕປຣິສ຺ສມາ ເອວ. ຫຕ຺ຖິວານຣຕິຕ຺ຕິຣປຏິພທ຺ຘໍ ວຕ຺ຖຸໍ ກເຖຕ຺ວາ. ‘‘ເອຬກາຬຄຸມ຺ເພຕິ ກາຬຕິຓຄຈ຺ຉມຓ຺ຑເປ’’ຕິປິ ວທນ຺ຕິ.

ວິວິຘໍ ນານາຠູຕໍ ຣຊ຺ຊໍ ວິຣຊ຺ຊໍ, ວິຣຊ຺ຊເມວ ເວຣຊ຺ຊໍ, ຕຕ຺ຖ ຄຕໍ, ປຣເທສຄຕນ຺ຕິ ອຕ຺ໂຖ. ເຕນາຫ ‘‘ເອກສ຺ສາ’’ຕິອາທິ. ຈິຕ຺ຕສຸທຕ຺ຕາທໂຍຕິ ຈິຕ຺ຕຄຫປຕິອນາຖປິຓ຺ຑິກາທໂຍ. ວີມໍສກາຕິ ຘມ຺ມວິຈາຣກາ. ກິນ຺ຕິ ກີທິສໍ. ທສ຺ສນນ຺ຕິ ສິທ຺ຘນ຺ຕໍ. ອາຈິກ຺ຂຕິ ກີທິສນ຺ຕິ ອຘິປ຺ປາໂຍ. ຘມ຺ມສ຺ສາຕິ ຠຄວຕາ ວຸຕ຺ຕຘມ຺ມສ຺ສ. ອນຸຘມ຺ມນ຺ຕິ ອນຸກູລໍ ອວິຣຸຊ຺ຌນຘມ຺ມໍ. ໂສ ປນ ເວເນຍ຺ຍຊ຺ຌາສຍານຸຣູປເທສນາວິຕ຺ຖາໂຣຕິ ອາຫ – ‘‘ວຸຕ຺ຕພ຺ຍາກຣຓສ຺ສ ອນຸພ຺ຍາກຣຓ’’ນ຺ຕິ. ຘາເຣຕິ ອຕ຺ຕໂນ ຜລນ຺ຕິ ຘມ຺ໂມ, ກາຣຓນ຺ຕິ ອາຫ – ‘‘ສຫຘມ຺ມິໂກຕິ ສກາຣໂຓ’’ຕິ. ອິມິນາປິ ປາຐນ຺ຕເຣນ ວາໂທ ເອວ ທີປິໂຕ, ນ ເຕນ ປກາສິຕາ ກິຣິຍາ.

ຕຓ຺ຫາວເສເນວ ຉນ຺ນມ຺ປິ ປທານໍ ອຕ຺ໂຖ ເວທິຕພ຺ໂພ. ຍສ຺ມາ ຣາຄາທໂຍ ຕຓ຺ຫາຍ ເອວ ອວຕ຺ຖາວິເສສາຕິ. ເຕນາຫ ‘‘ຕຓ຺ຫາ ຫີ’’ຕິອາທິ. ວິຫນນ຺ຕິ ກາຍໍ ຈິຕ຺ຕຎ຺ຈາຕິ ວິຆາໂຕ, ທຸກ຺ຂນ຺ຕິ ອາຫ – ‘‘ອວິຆາໂຕຕິ ນິທຸກ຺ໂຂ’’ຕິ. ອຸປາຍາເສຕິ ອຸປຕາເປຕີຕິ ອຸປາຍາໂສ, ອຸປຕາໂປ. ຕປ຺ປຏິປກ຺ໂຂ ປນ ອນຸປາຍາໂສ ນິຣູປຕາໂປ ທຏ຺ຐພ຺ໂພ. ສພ຺ພຕ຺ຖາຕິ ສພ຺ພວາເຣສຸ.

ເທວທຫສຸຕ຺ຕວຓ຺ຓນາ ນິຏ຺ຐິຕາ.