໘. ໂກສມ຺ພິສຸຕ຺ຕວຓ຺ຓນາ

໖໘. ອຏ຺ຐເມ ປຣສ຺ສ ສທ຺ທຫິຕ຺ວາຕິ ປຣສ຺ສ ວຈນໍ ສທ຺ທຫິຕ຺ວາ. ເຕນາຫ ‘‘ຍໍ ເອສ ຠຓຕິ, ຕໍ ຠູຕນ຺ຕິ ຄຓ຺ຫາຕີ’’ຕິ. ປຣປຕ຺ຕິໂຍ ຫິ ເອໂສ ປຣເນຍ຺ຍພຸທ຺ຘິໂກ. ຍໍ ກາຣຓນ຺ຕິ ຍໍ ອຕ຺ຕນາ ຈິນ຺ຕິຕວຕ຺ຖຸ. ຣຸຈ຺ຈຕີຕິ ‘‘ເອວເມຕໍ ຠວິສ຺ສຕິ, ນ ອຎ຺ຎຖາ’’ຕິ ອຕ຺ຕໂນ ມຕິຍາ ຈິນ຺ເຕນ຺ຕສ຺ສ ຣຸຈ຺ຈຕິ. ຣຸຈິຍາ ຄຓ຺ຫາຕີຕິ ປຣປຕ຺ຕິໂຍ ອຫຸຕ຺ວາ ສຍເມວ ຕຖາ ໂຣເຈນ຺ໂຕ ຄຓ຺ຫາຕິ. ອນຸສ຺ສໂວຕິ ‘‘ອນຸ ອນຸ ສຸຕ’’ນ຺ຕິ ເອວໍ ຈິຣກາລຄຕາຍ ອນຸສ຺ສຸຕິຍາ ລພ຺ຠມານໍ ‘‘ກຖມິທໍ ສິຍາ, ກສ຺ມາ ຠູຕເມຕ’’ນ຺ຕິ ອນຸສ຺ສເວນ ຄຓ຺ຫາຕິ. ວິຕກ຺ກຍໂຕຕິ ‘‘ເອວເມຕໍ ສິຍາ’’ຕິ ປຣິກປ຺ເປນ຺ຕສ຺ສ. ເອກໍ ກາຣຓໍ ອຸປຏ຺ຐາຕີຕິ ຍຖາປຣິກປ຺ປິຕວຕ຺ຖຸ ຈິຕ຺ຕສ຺ສ ອຸປຏ຺ຐາຕິ. ອາກາຣປຣິວິຕກ຺ເກນາຕິ ອຕ຺ຕນາ ກປ຺ປິຕາກາເຣນາ ຕໍ ຄຓ຺ຫາຕິ. ເອກາ ທິຏ຺ຐິ ອຸປ຺ປຊ຺ຊຕີຕິ ‘‘ຍຖາປຣິກປ຺ປິຕໍ ກິຎ຺ຈິ ອຕ຺ຖໍ ເອວເມຕໍ, ນາຎ຺ຎຖາ’’ຕິ ອຠິນິວິສນ຺ຕສ຺ສ ເອໂກ ອຠິນິເວໂສ ອຸປ຺ປຊ຺ຊຕິ. ຍາຍສ຺ສາຕິ ຍາຍ ທິຏ຺ຐິຍາ ອສ຺ສ ປຸຄ຺ຄລສ຺ສ. ນິຊ຺ຌາຍນ຺ຕສ຺ສາຕິ ປຈ຺ຈກ຺ຂໍ ວິຍ ນິຣູເປຕ຺ວາ ຈິນ຺ເຕນ຺ຕສ຺ສ. ຂມຕີຕິ ຕຖາ ຄຫຓກ຺ຂໂມ ໂຫຕິ. ເຕນາຫ ‘‘ໂສ…ເປ… ຄຓ຺ຫາຕີ’’ຕິ. ເອຕານີຕິ ສທ຺ຘາທີນິ. ຕານິ ຫິ ສທ຺ເຘຍ຺ຍານໍ ວຕ຺ຖູນໍ ຄຫຓເຫຕຸຠາວໂຕ ‘‘ກາຣຓານີ’’ຕິ ວຸຕ຺ຕານິ. ຠວນິໂຣໂຘ ນິພ຺ພານນ຺ຕິ ນວວິໂຘປິ ຠໂວ ນິຣຸຊ຺ຌຕິ ເອຕ຺ຖ ເອຕສ຺ມິໍ ອຘິຄເຕຕິ ຠວນິໂຣໂຘ, ນິພ຺ພານໍ. ສ຺ວາຍໍ ຠໂວ ປຎ຺ຈກ຺ຂນ຺ຘສງ຺ຄໂຫ ຕພ຺ພິນິມຸຕ຺ໂຕ ນຕ຺ຖີຕິ ອາຫ ‘‘ປຎ຺ຈກ຺ຂນ຺ຘນິໂຣໂຘ ນິພ຺ພານ’’ນ຺ຕິ. ຠວນິໂຣໂຘ ນິພ຺ພານໍ ນາມາຕິ ‘‘ນິພ຺ພານໍ ນາມ ຠວນິໂຣໂຘ’’ຕິ ເອສ ປຎ຺ໂຫ ເສກ຺ເຂຫິປິ ຊານິຕພ຺ໂພ, ນ ອເສກ຺ເຂເຫວ. ອິມໍ ຐານນ຺ຕິ ອິມໍ ຍາຖາວກາຣຓໍ.

ສຸຏ຺ຐຸ ທິຏ຺ຐນ຺ຕິ ‘‘ຠວນິໂຣໂຘ ນິພ຺ພານ’’ນ຺ຕິ ມຍາ ສຸຏ຺ຐຸ ຍາຖາວໂຕ ທິຏ຺ຐໍ, ຠວສ຺ສ ປີຬນສງ຺ຂຕສນ຺ຕາປວິປຣິຓາມຏ຺ຐານໍ, ຠວນິໂຣຘສ຺ສ ຈ ນິສ຺ສຣຓວິເວກາສງ຺ຂຕາມຕຏ຺ຐານໍ ຍຖາຠູຕໍ ສມ຺ມປ຺ປຎ຺ຎາຍ ທິຏ຺ຐຕ຺ຕາ. ອນາຄາມິຜເລ ຐິໂຕ ຫິ ອນາຄາມິມຄ຺ເຄ ຐິໂຕ ເອວ ນາມ ອຸປຣິມຄ຺ຄສ຺ສ ອນຘິຄຕຕ຺ຕາຕິ ວຸຕ຺ຕໍ ‘‘ອນາຄາມິມຄ຺ເຄ ຐິຕຕ຺ຕາ’’ຕິ. ນິພ຺ພານໍ ອາຣພ຺ຠ ປວຕ຺ຕມ຺ປິ ເຖຣສ຺ເສຕໍ ຎາຓໍ ‘‘ນິພ຺ພານໍ ປຈ຺ຈເວກ຺ຂຕີ’’ຕິ ວຸຕ຺ຕຎາຓໍ ວິຍ ນ ໂຫຕີຕິ ວຸຕ຺ຕໍ ‘‘ເອກູນວີສຕິຍາ…ເປ… ປຈ຺ຈເວກ຺ຂຓຎາຓ’’ນ຺ຕິ. ເອເຕນ ເອຕໍ ນິພ຺ພານປຈ຺ຈເວກ຺ຂຓາ ວິຍ ນ ໂຫຕິ ສປ຺ປເທສຠາວໂຕຕິ ທສ຺ເສຕິ. ເອວຎ຺ຈ ກຕ຺ວາ ອິຘ ອຸທປານນິທສ຺ສນມ຺ປິ ສມຕ຺ຖິຕນ຺ຕິ ທຏ຺ຐພ຺ພໍ. ປຈ຺ຈເວກ຺ຂຓຎາເຓນາຕິ ອວເສສກິເລສານໍ, ນິພ຺ພານສ຺ເສວ ວາ ປຈ຺ຈເວກ຺ຂຓຎາເຓນ. ອຸປຣິ ອຣຫຕ຺ຕຜລສມໂຍຕິ ອຸປຣິ ສິຊ຺ຌນໂຕ ອຣຫຕ຺ຕປຏິລາໂຠ ຕຖາ ອຕ຺ຖິ. ‘‘ເຍນາຫໍ ຕໍ ປຣິເຍສໂຕ ນິພ຺ພານໍ ສຈ຺ຉິກຣິສ຺ສາມີ’’ຕິ ຊານາຕິ.

ໂກສມ຺ພິສຸຕ຺ຕວຓ຺ຓນາ ນິຏ຺ຐິຕາ.