໙. ອຸປຍນ຺ຕິສຸຕ຺ຕວຓ຺ຓນາ

໖໙. ນວເມ ອຸທກວຑ຺ຒນສມເຍຕິ ສພ຺ພທິວເສສຸ ມຫາສມຸທ຺ທສ຺ສ ອນ຺ໂຕ ມຫນ຺ຕຈນ຺ທກນ຺ຕມຓິປພ຺ພຕານໍ ຊຸຓ຺ຫສມ຺ຜສ຺ເສນ ປຫຕຕ຺ຕາ ຊລາຠິສນ຺ທນວເສນ ອຸທກສ຺ສ ວຑ຺ຒນສມເຍ. ອຸປຣິ ຄຈ຺ຉນ຺ໂຕຕິ ປກຕິຍາ ອຸທກສ຺ສ ຕິຏ຺ຐຏ຺ຐານສ຺ສ ຕໂຕ ອຸປຣິ ຄຈ຺ຉນ຺ໂຕຕິ ອຕ຺ໂຖ. ອຸປຣິ ຍາເປຕີຕິ ອຸທກໍ ຕຕ຺ຖ ອຸປຣູປຣິ ວຑ຺ເຒຕິ. ຕຖາຠູໂຕ ຈ ຕໍ ພ຺ຣູເຫນ຺ໂຕ ປູເຣນ຺ໂຕຕິ ວຸຈ຺ຈຕີຕິ ອາຫ ‘‘ວຑ຺ເຒຕິ ປູເຣຕີຕິ ອຕ຺ໂຖ’’ຕິ. ຍສ຺ມາ ປຈ຺ຈຍຘມ຺ມາ ອຕ຺ຕໂນ ຜລສມວາຍປຈ຺ຈເຍ ໂຫນ຺ເຕ ຕສ຺ສ ອຸປຣິ ຐິໂຕ ວິຍ ໂຫຕິ ຕສ຺ສ ອຕ຺ຕໂນ ວເສ ວຕ຺ຕາປນໂຕ, ຕສ຺ມາ ວຸຕ຺ຕໍ ‘‘ອວິຊ຺ຊາ ອຸປຣິ ຄຈ຺ຉນ຺ຕີ’’ຕິ. ປຈ຺ຈຍຠາເວນ ຫິ ສາ ຕຖາ ວຸຈ຺ຈຕິ. ເຕນາຫ ‘‘ສງ຺ຂາຣານໍ ປຈ຺ຈໂຍ ຠວິຕຸໍ ສກ຺ກຸຓນ຺ຕີ’’ຕິ. ອປຄຈ຺ຉນ຺ໂຕ ຍາຍນ຺ໂຕ. ເຕນາຫ ‘‘ໂອສຣນ຺ໂຕ’’ຕິ, ອວຑ຺ຒນ຺ໂຕ ປຣິຫີຍມາໂນຕິ ອຕ຺ໂຖ.

ອຸປຍນ຺ຕິສຸຕ຺ຕວຓ຺ຓນາ ນິຏ຺ຐິຕາ.