໔. ອຕ຺ຖິຣາຄສຸຕ຺ຕວຓ຺ຓນາ

໖໔. ຈຕຸຕ຺ເຖ ໂສຕິ ໂລໂຠ. ຣຎ຺ຊນວເສນາຕິ ຣງ຺ຄຊາຕໍ ວິຍ ຕສ຺ສ ຈິຕ຺ຕສ຺ສ ອນຸຣຎ຺ຊນວເສນ. ນນ຺ທນວເສນາຕິ ສປ຺ປີຕິກຕາຍ ອາຣມ຺ມຓສ຺ສ ອຠິນນ຺ທນວເສນ. ຕຓ຺ຫາຍນວເສນາຕິ ວິສຍກຕ຺ຕຸກາມຕາຍ ວເສນ. ເອໂກ ເອວ ຫິ ໂລໂຠ ປວຕ຺ຕິອາກາຣວເສນ ຕຖາ ວຸຕ຺ໂຕ. ປຕິຏ຺ຐິຕນ຺ຕິ ລທ຺ຘສຠາວໍ. ຕຕ຺ຖາຕິ ວຏ຺ເຏ. ອາຫາເຣຕິ ເກຈິ. ວິຎ຺ຎາຓນ຺ຕິ ອຠິສງ຺ຂາຣວິຎ຺ຎາຓໍ. ວິຣຸຬ຺ຫນ຺ຕິ ຜລນິພ຺ພຕ຺ຕິຍາ ວິຣຸຬ຺ຫິປ຺ປຕ຺ຕໍ. ເຕນາຫ ‘‘ກມ຺ມໍ ຊວາເປຕ຺ວາ’’ຕິອາທິ. ຕຕ຺ຖ ຊວາເປຕ຺ວາຕິ ຜລໍ ຄາຫາເປຕ຺ວາ. ອຠິສງ຺ຂາຣວິຎ຺ຎາຓຎ຺ຫິ ອຕ຺ຕນາ ສຫຊາຕານໍ ສຫຊາຕາທິປຈ຺ຈເຍຫິ ເຈວ ອາຫາຣປຈ຺ຈເຍນ ຈ ປຈ຺ຈໂຍ ຫຸຕ຺ວາ ຕສ຺ສ ອຕ຺ຕໂນ ຜລຸປ຺ປາທເນ ສາມຕ຺ຖິຍຕ຺ຕາ ວິຣຸຬ຺ຫິປ຺ປຕ຺ຕໍ. ເຕນາຫ ‘‘ກມ຺ມໍ ສນ຺ຕາເນ ລທ຺ຘຠາວໍ ວິຣຸຬ຺ຫິປ຺ປຕ຺ຕຎ຺ຈສ຺ສ ໂຫຕີ’’ຕິ. ວຏ຺ຏກຖາ ເອສາຕິ ກຕ຺ວາ ‘‘ຍຕ຺ຖາຕິ ເຕຠູມກວຏ຺ເຏ ຠຸມ຺ມ’’ນ຺ຕິ ວຸຕ຺ຕໍ. ສພ຺ພຕ຺ຖາຕິ ສພ຺ເພສຸ. ປຸຣິມປເທ ເອຕໍ ຠຸມ຺ມນ຺ຕິ ‘‘ຍຕ຺ຖ ຕຕ຺ຖາ’’ຕິ ອາຄຕໍ ເອຕໍ ຠຸມ຺ມວຈນໍ ປຸຣິມສ຺ມິໍ ປຸຣິມສ຺ມິໍ ປເທ ວິສຍຠູເຕ. ຕຎ຺ຫິ ອາຣພ຺ຠ ເອຕໍ ‘‘ຍຕ຺ຖ ຕຕ຺ຖາ’’ຕິ ຠຸມ຺ມວຈນໍ ວຸຕ຺ຕໍ. ອິມສ຺ມິໍ ວິປາກວຏ຺ເຏຕິ ປຈ຺ຈຸປ຺ປນ຺ເນ ວິປາກວຏ຺ເຏ. ອາຍຕິໍ ວຏ຺ຏເຫຕຸເກ ສງ຺ຂາເຣ ສນ຺ຘາຍ ວຸຕ຺ຕໍ ‘‘ຍຕ຺ຖ ອຕ຺ຖິ ອາຍຕິໍ ປຸນພ຺ຠວາຠິນິພ຺ພຕ຺ຕີ’’ຕິ ວຈນໂຕ. ປຸນພ຺ຠວາຠິນິພ຺ພຕ຺ຕີຕິ ຈ ປຏິສນ຺ຘິ ອຘິປ຺ເປຕາຕິ ວຸຕ຺ຕໍ ‘‘ຍຕ຺ຖ ອຕ຺ຖິ ອາຍຕິໍ ປຸນພ຺ຠວາຠິນິພ຺ພຕ຺ຕິ, ອຕ຺ຖິ ຕຕ຺ຖ ອາຍຕິໍ ຊາຕິຊຣາມຣຓ’’ນ຺ຕິ. ຊາຕີຕິ ເຈຕ຺ຖ ມາຕຸກຸຈ຺ຉິໂຕ ນິກ຺ຂມນໍ ອຘິປ຺ເປຕໍ. ຍສ຺ມິໍ ຐາເນຕິ ຍສ຺ມິໍ ກາຣເຓ ສຕິ.

ກາຣຓຎ຺ເຈຕ຺ຖ ສງ຺ຂາຣາ ເວທິຕພ຺ພາ. ເຕ ຫິ ອາຍຕິໍ ປຸນພ຺ຠວາຠິນິພ຺ພຕ຺ຕິຍາ ເຫຕູ, ຕຓ຺ຫາອວິຊ຺ຊາໂຍ, ກາລຄຕິອາທໂຍ ຈ ກມ຺ມສ຺ສ ສມ຺ຠາຣາ. ເກຈິ ປນ ກິເລສວຏ຺ຏກມ຺ມຄຕິກາລາ ຈາຕິ ອຘິປ຺ປາເຍນ ‘‘ກາລຄຕິອາທໂຍ ຈ ກມ຺ມສ຺ສ ສມ຺ຠາຣາ’’ຕິ ວທນ຺ຕິ. ຕໍຕໍຠວປຕ຺ຖນາຍ ຕຖາ ຕຖາ ຄໂຕ ຕິວິໂຘ ຠໂວວ ເຕຠູມກວຏ຺ຏໍ. ເຕນາຫ ‘‘ຍຕ຺ຖາຕິ ເຕຠູມກວຏ຺ເຏ’’ຕິ. ຕຖາ ຈາຫ ‘‘ສສມ຺ຠາຣກກມ຺ມໍ ຠເວສຸ ຣູປໍ ສມຸຏ຺ຐາເປຕີ’’ຕິ. ຣູປນ຺ຕິ ອຕ຺ຕຠາວໍ.

ສງ຺ຂິປິຕ຺ວາຕິ ຕີສຸ ອກຕ຺ວາ ວິຎ຺ຎາເຓນ ເອກສງ຺ເຂປໍ ກຕ຺ວາຕິ ອຕ຺ໂຖ. ເອໂກ ສນ຺ຘີຕິ ເອໂກ ເຫຕຸຜລສນ຺ຘິ. ວິປາກວິຘິນ຺ຕິ ສຬາຍຕນາທິກໍ ເວທນາວສານໍ ວິປາກວິຘິໍ. ‘‘ນາມຣູເປນ ສທ຺ຘິ’’ນ຺ຕິ ປທໍ ອາເນຕ຺ວາ ສມ຺ພນ຺ໂຘ. ນາມຣູເປນາຕິ ວາ ສຫໂຍເຄ ກຣຓວຈນໍ. ອິຘ ເອໂກ ສນ຺ຘີຕິ ເອໂກ ເຫຕຸຜລສນ຺ຘິ. ອາຍຕິຠວສ຺ສາຕິ ອາຍຕິໍ ອຸປປຕ຺ຕິຠວສ຺ສ. ເຕນ ເຈຕ຺ຖ ເອໂກ ສນ຺ຘິ ເຫຕຸຜລສນ຺ຘິ ເວທິຕພ຺ໂພ.

ຂີຓາສວສ຺ສ ອຄ຺ຄມຄ຺ຄາຘິຄມນໂຕວ ປວຕ຺ຕກມ຺ມສ຺ສ ມຄ຺ເຄນ ສຫາຍເວກລ຺ລສ຺ສ ກຕຕ຺ຕາ ອວິຊ຺ຊມານໍ. ສູຣິຍຣສ຺ມິສມນ຺ຕິ ຕໂຕ ເອວ ວຸຕ຺ຕນເຍເນວ ອປ຺ປຕິຏ຺ຐິຕສູຣິຍຣສ຺ມິສມໍ. ສາຕິ ຣສ຺ມິ. ກາຍາທໂຍຕິ ກາຍທ຺ວາຣາທໂຍ. ກຕກມ຺ມນ຺ຕິ ປຈ຺ຈເຍຫິ ກຕຠາວໍ ອຸປາທາຍ ວຸຕ຺ຕໍ, ນ ກມ຺ມລກ຺ຂຓປຕ຺ຕໂຕ. ເຕນາຫ ‘‘ກຸສລາກຸສລໍ ນາມ ນ ໂຫຕີ’’ຕິ. ກິຣິຍມຕ຺ເຕຕິ ອວິປາກຘມ຺ມຕ຺ຕາ ກາຍິກາທິປໂຍຄມຕ຺ເຕ ຐຕ຺ວາ. ອວິປາກໍ ໂຫຕິ ເຕສໍ ອວິປາກຘມ຺ມຕ຺ຕາ.

ອຕ຺ຖິຣາຄສຸຕ຺ຕວຓ຺ຓນາ ນິຏ຺ຐິຕາ.