໙. ປຐມອປຸຕ຺ຕກສຸຕ຺ຕວຓ຺ຓນາ

໑໓໐. ທິວ-ສທ຺ໂທ ທິວາ-ສທ຺ໂທ ວິຍ ທິວສປຣິຍາໂຍ, ຕສ຺ມາ ວິເສສນຠາເວນ ວຸຈ຺ຈມາໂນ ທິວສທ຺ໂທ ອຕ຺ຖວິເສສໍ ທີເປຕີຕິ ອາຫ ‘‘ທິວສສ຺ສ ທິວາ’’ຕິອາທິ. ສໍ ວຸຈ຺ຈຕິ ຘນໍ, ຕສ຺ສ ປຕີຕິ ສມ຺ປຕິ, ຘນສາມິໂກ, ຕສ຺ສ ຫິຕາວຫຕ຺ຕາ ສາປເຕຍ຺ຍນ຺ຕິ ອາຫ ‘‘ສາປເຕຍ຺ຍນ຺ຕິ ຘນ’’ນ຺ຕິ. ຕສ຺ສ ເຄເຫ ກຕາກຕຠຓ຺ຑສ຺ສ ອຕິພຫຸຠາວໂຕ ວິມ຺ຫຍປ຺ປຕ຺ໂຕ ຣາຊາ ‘‘ໂກ ປນ ວາໂທ’’ຕິ ອາຫ. ກາຬໂລຫໍ ນາມ ອໂຍຜລໍ. ກຈ຺ຉປາທິຣູເປຫິປິ ໂສວຓ຺ຓາທີນິ ຐເປນ຺ຕິ. ສກຸຓ຺ຑກຠຕ຺ຕນ຺ຕິ ສກຸຓ຺ເຑຫິ ວາ ສຖຸເສຫິ ວາ ປກ຺ກຠຕ຺ຕໍ. ພິລງ຺ຄໍ ວຸຈ຺ຈຕິ ຘຎ຺ຎພິລງ຺ຄໍ, ອາຣນາລນ຺ຕິປິ ວຸຈ຺ຈຕິ, ຕໍ ທຸຕິຍໍ ອສ຺ສາຕິ ພິລງ຺ຄທຸຕິຍໍ. ຕຎ຺ຫິ ກຎ຺ຊິໂຕ ນິພ຺ພຕ຺ຕຕ຺ຕາ ກຎ຺ຊິກໍ ນາມ. ຕີຫິ ປກ຺ເຂຫິ ວຕ຺ຖຂຓ຺ເຑຫິ ກຕນິວາສນໍ ຕິປກ຺ຂວສນໍ. ເຕນາຫ ‘‘ຕີຓິ…ເປ… ນິວາສນ’’ນ຺ຕິ.

ອສນ຺ໂຕ ນີໂຈ ປຸຣິໂສຕິ ອສປ຺ປຸຣິໂສຕິ ອາຫ ‘‘ລາມກປຸຣິໂສ’’ຕິ. ກມ຺ມສ຺ສ ນິພ຺ພຕ຺ຕຠາເວນ ໂອຕຣຓຕາຍ ຜລໍ ອຄ຺ຄໍ ນາມ, ອຸປຣິຠູມິຄຕຕ຺ຕາ ອຸທ຺ຘໍ ອຄ຺ຄໍ ອສ຺ສາຕິ ອຸທ຺ຘຄ຺ຄິກໍ. ທກ຺ຂິຓນ຺ຕິ ທານມາຫ. ສຄ຺ໂຄ ນາມ ກາມຠວູປປຕ຺ຕິຠໂວ, ຕສ຺ສ ນິພ຺ພຕ຺ຕນໂຕ ‘‘ສຄ຺ຄສ຺ສ ຫິຕາ’’ຕິ ວຸຕ຺ຕໍ. ຕຕ຺ຣຸປປຕ຺ຕິຊນນໂຕຕິ ຕຕ຺ຣ ອຸປປຕ຺ຕິຍາ ຊນນໂຕ, ອຸປ຺ປາທນໂຕຕິ ອຕ຺ໂຖ.

ເສຕໍ ອຸທກໍ ເອຕິສ຺ສາຕິ ເສໂຕທກາ. ໂສ ເຍນ ຠາເວນ ຍຕ຺ຖ ປາກຏຕໂຣ ຫຸຕ຺ວາ ທິສ຺ສຕິ, ຕໍ ທສ຺ເສຕຸໍ ‘‘ວີຈີນໍ ຠິນ຺ນຏ຺ຐາເນ’’ຕິ ອາຫ. ສຸໂຂຕຣຓຏ຺ຐານຕາຍ ກທ຺ທມາທິໂທສວິຣຫໂຕ ຈ ສຸນ຺ທຣຕິຕ຺ຖາ. ຕໍ ອເປຍ຺ຍມານນ຺ຕິ ຕໍ ອຸທກໍ ເກນຈິ ອປຣິຠຸຎ຺ຊິຍມານໍ. ອຕ຺ຕນາ ກຕ຺ຕພ຺ພກິຈ຺ຈກໂຣຕິ ອຕ຺ຕນາ ກາຕພ຺ພກມ຺ມສງ຺ຂາຕກິຈ຺ຈກໂຣ, ປຣິໂຠຄວເສນ ເຈວ ສງ຺ຄເຫຕພ຺ພສງ຺ຄຓ຺ຫນວເສນ ຈ ນິໂຍຊໂກຕິ ອຕ຺ໂຖ. ກຸສລກິຈ຺ຈກໂຣຕິ ອຕ຺ຕນາ ກາຕພ຺ພປຸຎ຺ຎກໂຣ.

ປຐມອປຸຕ຺ຕກສຸຕ຺ຕວຓ຺ຓນາ ນິຏ຺ຐິຕາ.