໑໐. ທຸຕິຍອປຸຕ຺ຕກສຸຕ຺ຕວຓ຺ຓນາ

໑໓໑. ປິຓ຺ຑປາເຕນາຕິ ສຫໂຍເຄ ກຣຓວຈນໍ. ປຏິປາທນໍ ເຕນ ສຫ ໂຍຊນນ຺ຕິ ອາຫ ‘‘ປິຓ຺ຑປາເຕນ ສທ຺ຘິໍ ສໍໂຍເຊສິ, ປິຓ຺ຑປາຕໍ ອທາສີຕິ ອຕ຺ໂຖ’’ຕິ. ‘‘ປຓີຕໂຠຊນໍ ຠຸຎ຺ຊິຕ຺ວາ’’ຕິ ວຸຕ຺ຕໍ, ປາຬິຍໍ ປນ ‘‘ກຓາຊກໍ ຠຸຎ຺ຊຕິ ພິລງ຺ຄທຸຕິຍ’’ນ຺ຕິ. ຕໍ ຕໍ ປວຕ຺ຕິຕໍ ເຍຠຸຍ຺ຍວເສນ ວຸຕ຺ຕນ຺ຕິ ທຏ຺ຐພ຺ພໍ. ອິທານິ ‘‘ອິມສ຺ສ ເສຏ຺ຐິສ຺ສ ກສ຺ສຈິ ສມຓສ຺ສ ວາ ພ຺ຣາຫ຺ມຓສ຺ສ ວາ ເທຖາ’’ຕິ ວຈນໍ ນ ສຸຕປຸພ຺ພໍ, ຍສ຺ມາ ປຈ຺ເຈກພຸທ຺ຘາ ນາມ ອຕ຺ຕໂນ ຄຸຓານຸຠາເວຫິ ໂລເກ ປາກຏາ ສຎ຺ຊາຕາ ເອວ ໂຫນ຺ຕິ, ຕສ຺ມາ ເສຏ຺ຐິຠຣິຍາຍ ‘‘ນ ຍສ຺ສ ວາ ຕສ຺ສ ວາ’’ຕິອາທິ ຈິນ຺ຕິຕໍ. ຕຖາ ຫິ ເຕສໍ ເທນ຺ຕາປິ ສກ຺ກຈ຺ຈໍ ເຍຠຸຍ຺ເຍນ ປຓີຕເມວ ເທນ຺ຕິ. ນາສາປຸຏໍ ປຫຣິ ອຕ຺ຕໂນ ອານຸຠາເວນ. ໂສ ລຸທ຺ຘຕາຍ ‘‘ພຫຸ ວຕ ຘຎ຺ຎໍ ມມສ຺ສາ’’ຕິ ຈິຕ຺ຕໍ ສໍຍເມຕຸໍ ສນ຺ຘາເຣຕຸໍ ອສກ຺ໂກນ຺ໂຕ.

ວິປ຺ປຏິສາຣຸປ຺ປນ຺ນາກາຣໍ ທສ຺ເສຕຸໍ ‘‘ວຣເມຕ’’ນ຺ຕິອາທິ ວຸຕ຺ຕໍ. ‘‘ອິມສ຺ສ ສມຓສ຺ສ ປິຓ຺ຑປາຕໍ ເທຫີ’’ຕິ ວທໂຕ ນ ເອກາຍ ເອວ ຊວນວີຖິຍາ ວເສນ ອຕ຺ຖສິທ຺ຘິ. ອຖ ໂຂ ຕຕ຺ຖ ອາທິໂຕ ປວຕ຺ຕຊວນວາໂຣປິ ອຕ຺ຖິ ມຊ຺ເຌ ປວຕ຺ຕຊວນວາໂຣປິ, ຕໍ ສນ຺ຘາຍາຫ ‘‘ປຸພ຺ພປຈ຺ຉິມເຈຕນາວເສນາ’’ຕິ. ເອກາ ເຈຕນາ ທ຺ເວ ປຏິສນ຺ຘິໂຍ ນ ເທຕີຕິ ເອຕ຺ຖ ສາເກຕປຎ຺ຫວເສນ ນິຈ຺ຉໂຍ ເວທິຕພ຺ໂພ. ຈຸທ຺ທສນ຺ນໍ ເຈຕນານໍ ປຸພ຺ເພ ປຸເຣຕຣໍ ກຕຕ຺ຕາ ປຸຣາຓໍ.

ປຣິຄຍ຺ຫຕີຕິ ປຣິຄ຺ຄໂຫຕິ ອາຫ ‘‘ປຣິຄ຺ຄຫິຕໍ ວຕ຺ຖຸ’’ນ຺ຕິ. ອນ຺ວາຍ ອຸປນິສ຺ສາຍ ຊີວນ຺ຕີຕິ ອນຸຊີວິໂນ. ສພ຺ພເມຕນ຺ຕິ ຘນຘຎ຺ຎາທິສພ຺ພໍ ເອຕໍ ຍຖາວຸຕ຺ຕປຣິຄ຺ຄຫວຕ຺ຖຸໍ. ນິກ຺ຂິປ຺ປຄາມິນນ຺ຕິ ນິກ຺ຂິປິຕພ຺ພຕາຄາມິນໍ. ນິກ຺ຂິປິຕພ຺ພສຠາວໍ ໂຫຕີຕິ ອາຫ ‘‘ນິກ຺ຂິປ຺ປສຠາວ’’ນ຺ຕິ. ປຫາຍ ຄມນີຍນ຺ຕິ ອຍເມຕ຺ຖ ອຕ຺ໂຖຕິ ອາຫ ‘‘ປຣິຈ຺ຈຊິຕພ຺ພສຠາວເມວາ’’ຕິ.

ທຸຕິຍອປຸຕ຺ຕກສຸຕ຺ຕວຓ຺ຓນາ ນິຏ຺ຐິຕາ.

ທຸຕິຍວຄ຺ຄວຓ຺ຓນາ ນິຏ຺ຐິຕາ.