໘. ກລ຺ຍາຓມິຕ຺ຕສຸຕ຺ຕວຓ຺ຓນາ

໑໒໙. ສີລາທິຄຸຓສມນ຺ນາຄໂຕ ກລ຺ຍາໂຓ ຠທ຺ທໂກ ມິຕ຺ໂຕ ເອຕສ຺ສາຕິ ກລ຺ຍາຓມິຕ຺ໂຕ, ຕສ຺ສ ຘມ຺ໂມ ກລ຺ຍາຓມິຕ຺ຕສ຺ເສວ ສ຺ວາຂາໂຕ ນາມ ໂຫຕິ ສຸຕ຺ວາ ກຕ຺ຕພ຺ພກິຈ຺ຈສ຺ສ ສາຘນໂຕ. ເຕນາຫ ‘‘ອຕ຺ຖໍ ປູເຣຕີ’’ຕິ. ອິຕຣສ຺ສາຕິ ປາປມິຕ຺ຕສ຺ສ. ເຕນາຕິ ອຕ຺ຖປູຣເຓນ. ເອຕນ຺ຕິ ‘‘ໂສ ຈ ໂຂ ກລ຺ຍາຓມິຕ຺ຕສ຺ສາ’’ຕິ ເອຕໍ ວຈນໍ. ເທສນາຘມ຺ໂມຕິ ປຣິຍຕ຺ຕິຘມ຺ໂມ. ໂສ ຫິ ກລ຺ຍາຓມິຕ຺ຕໂຕ ປຈ຺ຈກ຺ຂໂຕ ລທ຺ຘພ຺ໂພ, ອິຕເຣ ຕທຸປນິສ຺ສຍາ ປຈ຺ຈຕ຺ຕປຸຣິສກາເຣຫິ, ເຕນ ລທ຺ຘພ຺ໂພ ກລ຺ຍາຓມິຕ຺ໂຕຕິ ເອວມຕ຺ໂຖ ຄເຫຕພ຺ໂພ. ສາວກໂພຘິສຕ຺ຕວເສນ ເຫສາ ເທສນາ ອາຄຕາ. ນ ຫິ ເສສໂພຘິສຕ຺ຕານໍ ປໂຣປເທເສນ ປໂຍຊນໍ ອຕ຺ຖິ.

ອຸປຑ຺ຒໍ ກລ຺ຍາຓມິຕ຺ຕໂຕຕິ ພ຺ຣຫ຺ມຈຣິຍໍ ຈຣນ຺ຕສ຺ສ ອຸປຑ຺ຒຄຸໂຓ ກລ຺ຍາຓມິຕ຺ຕໂຕ ລທ຺ຘພ຺ໂພ. ອຸປຑ຺ຒໍ ປຈ຺ຈຕ຺ຕປຸຣິສກາຣໂຕຕິ ອິຕຣໍ ອຸປຑ຺ຒໍ ຎາຓໍ ປຏິປຊ຺ຊນ຺ຕສ຺ສ ອຕ຺ຕໂນ ປຸຣິສກາຣໂຕ. ໂລເກປິ ປາກໂຏຍມຕ຺ໂຖ ‘‘ອາຈຣິຍໂຕ ອຸປຑ຺ຒໍ, ປຈ຺ຈຕ຺ຕປຸຣິສກາຣໂຕ ອຸປຑ຺ຒໍ ລທ຺ຘພ຺ພາ ເຕວິຊ຺ຊຕາ’’ຕິ, ຕສ຺ມາ ເຖໂຣ ຕຖາ ຈິນ຺ເຕສິ. ນິປ຺ປເທສນ຺ຕິ ອນວເສສໂຕ. ຕໂຕຕິ ກລ຺ຍາຓມິຕ຺ຕໂຕ. ອຸປຑ຺ຒໍ ອາຄຈ຺ຉຕີຕິ ອຸປຑ຺ຒຄຸໂຓ ປຏິປຊ຺ຊນ຺ຕໍ ອຸປຄຈ຺ຉຕິ. ພຫູຫິ ປຸຣິເສຫິ. ວິນິພ຺ໂຠໂຄ ວິເວຈນໍ ນຕ຺ຖິ ເອກຊ຺ຌໍ ອຕ຺ຖສ຺ສ ວິເວເຈຕຸໍ ອສກ຺ກຸເຓຍ຺ຍຕ຺ຕາ. ເອສາຕິ ປຣໂຕໂຆສປຈ຺ຈຕ຺ຕປຸຣິສກາຣໂຕ ຈ ສິຊ຺ຌມາໂນ ອຕ຺ໂຖ. ເອຕ຺ຕກນ຺ຕິ ເອຕ຺ຕໂກ ຠາໂຄ. ຍທິ ນ ສກ຺ກາ ລທ຺ຘຸໍ, ອຖ ກສ຺ມາ ອຸປຑ຺ຒນ຺ຕິ ວຸຕ຺ຕນ຺ຕິ ອາຫ ‘‘ກລ຺ຍາຓມິຕ຺ຕຕາຍາ’’ຕິອາທິ. ສມ຺ມາທິຏ຺ຐິອາທີສຸ ນ ສກ຺ກາ ລທ຺ຘຸໍ. ອສກ຺ກຸເຓຍ຺ເຍ ສກລມ຺ປິ ນ ສມ຺ຠວຕິ ປຣໂຕໂຆສມຕ຺ເຕນ ເຕສໍ ອສິຊ຺ຌນໂຕ, ປຘານເຫຕຸຠາວທີປນຕ຺ຖໍ ປນ ‘‘ສກລເມວາ’’ຕິ ວຸຕ຺ຕໍ. ປຸພ຺ພຠາຄປຏິລາຠງ຺ຄນ຺ຕິ ປຸພ຺ພຠາເຄ ປຏິລທ຺ຘພ຺ພກາຣຓໍ ກລ຺ຍາຓມິຕ຺ຕສ຺ສ ອຸປເທເສນ ວິນາ ເຕນ ອຸຕ຺ຕຣິ ວິເສສໂຕ ອລທ຺ຘພ຺ພໂຕ. ອຕ຺ຖໂຕຕິ ປຣມຕ຺ຖໂຕ. ‘‘ກລ຺ຍາຓມິຕ຺ຕໍ…ເປ… ຈຕ຺ຕາໂຣ ຂນ຺ຘາ’’ຕິ ວຕ຺ວາ ສຸຕ຺ວາຕິ ອຕ຺ໂຖ. ເຕ ປນ ສີລາທໂຍ ສງ຺ຂາຣກ຺ຂນ຺ຘປຣິຍາປນ຺ນາຕິ ອາຫ ‘‘ສງ຺ຂາຣກ຺ຂນ຺ໂຘຕິປິ ວທນ຺ຕິເຍວາ’’ຕິ.

ມາເຫວນ຺ຕິ ມາ ອຫ ເອວນ຺ຕິ ເຉໂທ, ອຫາຕິ ນິປາຕມຕ຺ຕໍ, ມາຕິ ປຏິເສເຘ ນິປາໂຕ. ເຕນາຫ ‘‘ມາ ເອວໍ ອຠຓີ’’ຕິ. ‘‘ມາເຫວໍ ອານນ຺ທາ’’ຕິ ວທໂຕ ຠຄວໂຕ ອິມສ຺ມິໍ ຐາເນ ຕາທິສສ຺ສ ນາມ ເຕ, ອານນ຺ທ, ກລ຺ຍາຓມິຕ຺ຕຄຸເຓ ເສວໂຕ ວຕ຺ຕຸໍ ຍຸຕ຺ຕໍ ອຍາຖາວໂຕຕິ ຘມ຺ມຠຓ຺ຑາຄາຣິກສ຺ສ ຍຖາຠູຕຄຸຓກິຕ຺ຕນມຸເຂນ ປຏິກ຺ເຂໂປ ຍຸຕ຺ໂຕຕິ ທສ຺ເສນ຺ໂຕ ‘‘ພຫຸສ຺ສຸໂຕ’’ຕິອາທິມາຫ. ອິທນ຺ຕິ ອິທໍ ວຈນໍ ຠຄວາ ອາຫາຕິ ສມ຺ພນ຺ໂຘ. ສກລເມວ ຫີຕິ ເອຕ຺ຖ ຫິ-ສທ຺ໂທ ເຫຕຸອຕ຺ໂຖ. ເຕນ ‘‘ມາເຫວ’’ນ຺ຕິ ຕສ຺ສ ປຏິກ຺ເຂປສ຺ສ ກາຣຓໍ ໂຊຕິຕໍ, ນ ສຣູປໂຕ ວຸຕ຺ຕໍ. ‘‘ກລ຺ຍາຓມິຕ຺ຕສ຺ເສຕ’’ນ຺ຕິອາທິນາ ປນ ຕໍ ສຣູປໂຕ ທສ຺ສິຕນ຺ຕິ ອາຫ ‘‘ອິທານິ…ເປ… ອາທິມາຫາ’’ຕິ. ປາຏິກງ຺ຂິຕພ຺ພນ຺ຕິ ອິຈ຺ຉນຏ຺ເຐນ ປາຏິກງ຺ຂິຕພ຺ພໍ, ນ ປຏິກງ຺ຂານິມິຕ຺ເຕນາຕິ ອາຫ ‘‘ອວສ຺ສໍຠາວີຕິ ອຕ຺ໂຖ’’ຕິ.

ອິຘາຕິ ອນ຺ໂຕຄຘາວຘາຣຓປທໍ, ອິເຘວາຕິ ອຕ຺ໂຖ. ອິມສ຺ມິໍເຍວ ຫິ ສາສເນ ອຣິຍມຄ຺ຄຠາວນາ, ນ ອຎ຺ຎຕ຺ຖ. ອາທິປທານໍເຍວາຕິ ຕສ຺ມິໍ ຕສ຺ມິໍ ວາກ຺ເຍ ອາທິໂຕ ເອວ ວຸຕ຺ຕສມ຺ມາທິຏ຺ຐິອາທິປທານໍເຍວ. ສມ຺ມາທສ຺ສນລກ຺ຂຓາຕິ ຈຕຸນ຺ນໍ ອຣິຍສຈ຺ຈານໍ ປຣິຎ຺ຎາຠິສມຍາທິວເສນ ສມ຺ມເທວ ທສ຺ສນສຠາວາ. ສມ຺ມາອຠິໂຣປນລກ຺ຂໂຓຕິ ນິພ຺ພານສງ຺ຂາເຕ ອາຣມ຺ມເຓ ສມ຺ປຍຸຕ຺ຕຘມ຺ເມ ສມ຺ມເທວ ອາໂຣປນສຠາໂວ. ສມ຺ມາປຣິຄ຺ຄຫຓລກ຺ຂຓາຕິ ມຸສາວາທາທີນໍ ວິສໍວາທນາທິກິຈ຺ຈຕາຍ ລູຂານໍ ອປຣິຄ຺ຄາຫການໍ ປຏິປກ຺ຂຠາວໂຕ ປຣິຄ຺ຄາຫກສຠາວາ ສມ຺ມາວາຈາ ສິນິທ຺ຘຠາເວນ ສມ຺ປຍຸຕ຺ຕຘມ຺ເມ ສມ຺ມາວາຈາປຈ຺ຈຍໍ ສຸຠາສິຕໂສຕາຣຎ຺ຈ ປຸຄ຺ຄລໍ ປຣິຄ຺ຄຓ຺ຫາຕີຕິ ສມ຺ມາປຣິຄ຺ຄຫຓລກ຺ຂຓາ. ຍຖາ ກາຍິກກິຣິຍາ ກິຎ຺ຈິ ກຕ຺ຕພ຺ພໍ ສມຸຏ຺ຐາເປຕິ, ສຍຎ຺ຈ ສມຸຏ຺ຐຫນໍ ຆຏນໍ ໂຫຕິ, ຕຖາ ສມ຺ມາກມ຺ມນ຺ຕ ສງ຺ຂາຕາ ວິຣຕິປີຕິ ສມຸຏ຺ຐາປນລກ຺ຂຓາ ທຏ຺ຐພ຺ພາ, ສມ຺ປຍຸຕ຺ຕຘມ຺ມານໍ ວາ ອຸກ຺ຂິປນໍ ສມຸຏ຺ຐາປນໍ ກາຍິກກິຣິຍາຍ ຠາຣຸກ຺ຂິປນໍ ວິຍ. ຊີວມານສ຺ສ ສຕ຺ຕສ຺ສ, ສມ຺ປຍຸຕ຺ຕຘມ຺ມານໍ ວາ, ຊີວິຕປ຺ປວຕ຺ຕິຍາ ອາຊີວສ຺ເສວ ວາ ສຸທ຺ຘິ ໂວທານໍ. ຍຖາ ອຸປ຺ປນ຺ນຸປ຺ປນ຺ນານໍ ວຊ຺ຊານໍ ຘມ຺ເມນ ປຫານານຸປ຺ປາທອຕ຺ຖລາຠາທິປຣິວຸຑ຺ຒິ ໂຫຕິ, ເອວໍ ສມ຺ປຍຸຕ຺ຕານໍ ປຄ຺ຄຫຓສຠາໂວຕິ ສມ຺ມາປຄ຺ຄຫລກ຺ຂໂຓ ສມ຺ມາວາຍາໂມ. ກາຍເວທນາຈິຕ຺ຕຘມ຺ເມສຸ ສຸຠສຸຂນິຈ຺ຈອຕ຺ຕຄາຫານຎ຺ຈ ວິຘມນວເສນ ສມ຺ມາປຕິຏ຺ຐານສຠາວາຕິ ສມ຺ມາອຸປຏ຺ຐານລກ຺ຂຓາ ສມ຺ມາສຕິ. ສມ຺ປຍຸຕ຺ຕຘມ຺ມານໍ ສມ຺ມາ ສມາທຫນໍ ເອກຄ຺ຄຕາກຣຓໍ ສຠາໂວ ເອຕສ຺ສາຕິ ສມ຺ມາສມາຘານລກ຺ຂໂຓ ສມ຺ມາສມາຘິ. ຕີຓິ ກິຈ຺ຈານິ ໂຫນ຺ຕິ ປຏິປກ຺ຂຘມ຺ເມສຸ, ອາຣມ຺ມຓຘມ຺ເມສຸ, ສມ຺ປຍຸຕ຺ຕຘມ຺ເມສຸ ຈ ເອກສ຺ມິໍເຍວ ຂເຓ ປວຕ຺ຕິວິເສສຠູຕານິ. ອິທານິ ຕານິ ສຣູປໂຕ ທສ຺ເສຕຸໍ ‘‘ເສຍ຺ຍຖິທ’’ນ຺ຕິອາທິ ວຸຕ຺ຕໍ. ສທ຺ຘິນ຺ຕິ ອິມິນາ ‘‘ອຎ຺ເຎຫີ’’ຕິ ວຸຕ຺ຕກິເລສາ ມິຈ຺ຉາທິຏ຺ຐິຍາ ສຫ ເອກຏ຺ຐາ ວາ ອເນກຏ຺ຐາ ວາຕິ ທສ຺ເສຕິ. ປຊຫຕິ ປຫາຍ ນໍ ປຏິວິຊ຺ຌຕິ. ນິໂຣຘນ຺ຕິ ນິພ຺ພານໍ ອາຣມ຺ມຓໍ ກໂຣຕິ ສຈ຺ຉິກິຣິຍາປຏິເວເຘນ ປຏິວິຊ຺ຌຕິ.

ນ ເກວລໍ ມຄ຺ຄຘມ຺ມາ ວຸຕ຺ຕນເຍເນວ, ອຖ ໂຂ ອປເຣນປິ ນເຍນ ເວທິຕພ຺ພາຕິ ທສ຺ເສນ຺ໂຕ ‘‘ອປິຈາ’’ຕິອາທິມາຫ. ນານາຂຓາ ປຸນປ຺ປຸນໍ ອຸປ຺ປຊ຺ຊນໂຕ. ນານາຣມ຺ມຓາ ອນິຈ຺ຈານຸປສ຺ສນາທິຠາວໂຕ. ເອກກ຺ຂຓາ ສກິເທວ ອຸປ຺ປຊ຺ຊນໂຕ. ເອກາຣມ຺ມຓາ ນິພ຺ພານວິສຍຕ຺ຕາ. ຈຕ຺ຕາຣິ ນາມານິ ລຠຕິ ປຣິຎ຺ຎາຠິສມຍາທິວເສນ ປວຕ຺ຕິຍາ. ຕີຓິ ນາມານິ ລຠຕິ ກາມສງ຺ກປ຺ປາທີນໍ ປຫານວເສນ ປວຕ຺ຕິຍາ. ປຏິປກ຺ຂປຫານວເສນ ຫິສ຺ສ ນາມຕ຺ຕຍລາໂຠ. ເອສ ນໂຍ ເສເສສຸປິ. ວິຣຕິໂຍປິ ໂຫນ຺ຕິ ເຈຕນາໂຍປິ ປຸພ຺ພຠາເຄປິ ວິກ຺ຂມ຺ຠນວເສນ ປວຕ຺ຕນໂຕ. ມຄ຺ຄກ຺ຂເຓ ປນ ວິຣຕິໂຍວ ປຏິປກ຺ຂສມຸຈ຺ຉິນ຺ທນສ຺ສ ມຄ຺ຄກິຈ຺ຈຕ຺ຕາ. ນ ຫິ ເຈຕນາ ມຄ຺ຄສຠາວາ. ສມ຺ມປ຺ປຘານສຕິປຏ຺ຐານວເສນາຕິ ຈຕຸພ຺ພິຘສມ຺ມປ຺ປຘານຈຕຸພ຺ພິຘສຕິປຏ຺ຐານວເສນ ຈຕ຺ຕາຣິ ນາມານິ ລຠຕິ ອນຸປ຺ປນ຺ນາກຸສລານຸປ຺ປາທນາທີນໍ ກຸສລານຎ຺ຈ ວຑ຺ຒນໂຕ. ປຸພ຺ພຠາເຄປິ ມຄ຺ຄກ຺ຂເຓປີຕິ ຍຖາ ປຸພ຺ພຠາເຄ ປຐມຊ຺ຌານາທິວເສນ ນານາ. ເອວໍ ມຄ຺ຄກ຺ຂເຓປິ. ນ ຫິ ເອໂກປິ ຈ ມຄ຺ຄສມາຘິ ປຐມຊ຺ຌານສມາຘິອາທິນາມານິ ລຠຕິ ສມ຺ມາທິຏ຺ຐິອາທີນໍ ວິຍ ກິຈ຺ຈວເສນ ເຠທາຠາວໂຕ. ເຕນາຫ ‘‘ມຄ຺ຄກ຺ຂເຓປິ ສມ຺ມາສມາຘິເຍວາ’’ຕິ.

ຎຕ຺ວາ ຎາຕພ຺ພາຕິ ສມ຺ພນ຺ໂຘ. ວຸທ຺ຘິ ນາມ ເວປຸລ຺ລໍ ຠິຍ຺ໂຍຠາໂວ ປຸນປ຺ປຸນໍ ອຸປ຺ປາໂທ ເອວາຕິ ອາຫ ‘‘ປຸນປ຺ປຸນໍ ຊເນຕີ’’ຕິ. ອຠິນິພ຺ພຕ຺ເຕຕີຕິ ອຠິວຑ຺ຒໍ ປາເປນ຺ໂຕ ນິພ຺ພຕ຺ເຕຕິ. ວິວິຕ຺ຕຕາຕິ ວິວິຕ຺ຕຠາໂວ. ໂສ ຫິ ວິເວຈນີຍໂຕ ວິວິຈ຺ຈຕິ, ຍໍ ວິວິຈ຺ຈິຕ຺ວາ ຐິຕໍ, ຕທຸຠຍມ຺ປິ ອິຘ ວິວິຕ຺ຕຠາວສາມຎ຺ເຎນ ‘‘ວິວິຕ຺ຕຕາ’’ຕິ ວຸຕ຺ຕໍ. ເຕສຸ ປຸຣິໂມ ວິເວຈນີຍໂຕ ວິວິຈ຺ຈມານຕາຍ ວິວິຈ຺ຈນກິຣິຍາຍ ສມງ຺ຄີ ຘມ຺ມສມູໂຫ ຕາຍ ເອວ ວິວິຈ຺ຈນກິຣິຍາຍ ວເສນ ວິເວໂກຕິ ຄຫິໂຕ. ອິຕໂຣ ສພ຺ພໂສ ຕໂຕ ວິວິຕ຺ຕສຠາວຕາຍ. ຕຕ຺ຖ ຍສ຺ມິໍ ຘມ຺ມປຸຎ຺ເຊ ສມ຺ມາທິຏ຺ຐິ ປວຕ຺ຕຕິ, ຕໍ ຍຖາວຸຕ຺ຕາຍ ວິວິຈ຺ຈມານຕາຍ ວິເວກສງ຺ຂາຕໍ ນິສ຺ສາເຍວ ປວຕ຺ຕຕິ, ອິຕຣໍ ປນ ຕໍນິນ຺ນຕາຕໍອາຣມ຺ມຓຕາຫີຕິ ວຸຕ຺ຕໍ ‘‘ວິເວກໍ ນິສ຺ສິຕໍ, ວິເວເກ ວາ ນິສ຺ສິຕ’’ນ຺ຕິ.

ຍຖາ ວາ ວິເວກວເສນ ປວຕ຺ຕໍ ຌານໍ ‘‘ວິເວກຊ’’ນ຺ຕິ ວຸຕ຺ຕໍ, ເອວໍ ວິເວກວເສນ ປວຕ຺ຕາ ສມ຺ມາທິຏ຺ຐິ ‘‘ວິເວກນິສ຺ສິຕາ’’ຕິ ທຏ຺ຐພ຺ພາ. ນິສ຺ສໂຍ ຈ ວິປສ຺ສນາມຄ຺ຄານໍ ວເສນ ມຄ຺ຄຜລານໍ ເວທິຕພ຺ໂພ. ອສຕິປິ ຕາສໍ ປຸພ຺ພາປຣຠາເວ ‘‘ປຏິຈ຺ຈສມຸປ຺ປາໂທ’’ຕິ ເອຕ຺ຖ ປຈ຺ຈຍານໍ ສມຸປ຺ປາທນໍ ວິຍ ອຠິນ຺ນຘມ຺ມາຘາຣາ ນິສ຺ສຍຠາວນາ ສມ຺ຠວນ຺ຕິ. ຕສ຺ສ ຕທງ຺ຄ-ສມຸຈ຺ເຉທນິສ຺ສຣຓວິເວກນິສ຺ສິຕຕໍ ວຕ຺ວາ ປຏິປ຺ປສ຺ສທ຺ຘິວິເວກນິສ຺ສິຕຕາຍ ອວຈນໍ ອຣິຍມຄ຺ຄຠາວນາຍ ວຸຈ຺ຈມານຕ຺ຕາ. ຠາວິຕມຄ຺ຄສ຺ສ ຫິ ເຍ ສຈ຺ຉິກາຕພ຺ພາ ຘມ຺ມາ. ເຕສໍ ກິຈ຺ຈໍ ປຏິປ຺ປສ຺ສທ຺ຘິວິເວໂກ. ອຊ຺ຌາສຍໂຕຕິ ‘‘ນິພ຺ພານໍ ສຈ຺ຉິກຣິສ຺ສາມີ’’ຕິ ມຫນ຺ຕອຊ຺ຌາສຍໂຕ. ຍທິປິ ຫິ ວິປສ຺ສນາກ຺ຂເຓ ສງ຺ຂາຣາຣມ຺ມຓໍ ຈິຕ຺ຕໍ, ສງ຺ຂາເຣສຸ ປນ ອາທີນວໍ ສຸຏ຺ຐຸ, ທິສ຺ວາ ຕປ຺ປຏິປກ຺ເຂ ນິພ຺ພາເນ ນິນ຺ນຕາຍ ອຊ຺ຌາສຍໂຕ ນິສ຺ສຣຓວິເວກນິສ຺ສິໂຕ ໂຫຕິ, ອຸຓ຺ຫາຠິຠູຕສ຺ສ ປຸຄ຺ຄລສ຺ສ ສີຕນິນ຺ນຈິຕ຺ຕຕາ ວິຍ. ເກຈິ ປນ ‘‘ຍຖາ ສຠາວໂຕ, ຍຖາ ອຊ຺ຌາສຍໂຕ ນິສ຺ສຣຓວິເວກນິສ຺ສິຕຕາ, ເອວໍ ປຏິປ຺ປສ຺ສທ຺ຘິວິເວກນິສ຺ສິຕຕາປິ ສິຍາ’’ຕິ ວທນ຺ຕິ. ຍທຄ຺ເຄນ ຫິ ນິພ຺ພານນິນ຺ນຕາ ສິຍາ, ຕທຄ຺ເຄນ ຜລນິນ຺ນຕາປິ ສິຍາ ‘‘ກຸທາສ຺ສຸ ນາມາຫໍ ຕທາຍຕນໍ ອຸປສມ຺ປຊ຺ຊ ວິຫເຣຍ຺ຍ’’ນ຺ຕິ ອຊ຺ຌາສຍສມ຺ປຕ຺ຕິຍາ ຠາວໂຕ. ຍສ຺ມາ ປຫານວິນໂຍ ວິຍ ຣາຄນິໂຣໂຘປິ ອິຘາຘິປ຺ເປຕວິເວເກນ ອຕ຺ຖໂຕ ນິພ຺ພິສິຏ຺ໂຐ, ຕສ຺ມາ ວຸຕ຺ຕໍ ເອສ ນໂຍ ວິຣາຄນິສ຺ສິຕາທີສູຕິ. ເຕນາຫ ‘‘ວິເວກຕ຺ຖາ ເອວ ຫິ ວິຣາຄາທໂຍ’’ຕິ.

ໂວສ຺ສຄ຺ຄສທ຺ໂທ ປຣິຈ຺ຈາຄຕ຺ໂຖ ປກ຺ຂນ຺ທນຕ຺ໂຖ ຈາຕິ ໂວສ຺ສຄ຺ຄສ຺ສ ທຸວິຘຕາ ວຸຕ຺ຕາ. ໂວສ຺ສຊ຺ຊນຎ຺ຫິ ປຫານໍ, ວິສ຺ສຏ຺ຐຠາເວນ ນິຣາສງ຺ກປວຕ຺ຕິ ຈ, ຕສ຺ມາ ວິປສ຺ສນາກ຺ຂເຓ ຕທງ຺ຄວເສນ, ມຄ຺ຄກ຺ຂເຓ ສມຸຈ຺ເຉທວເສນ ປຏິປກ຺ຂສ຺ສ ປຫານໍ ໂວສ຺ສຄ຺ໂຄ, ຕຖາ ວິປສ຺ສນາກ຺ຂເຓ ຕໍນິນ຺ນຠາເວນ, ມຄ຺ຄກ຺ຂເຓ ອາຣມ຺ມຓກຣເຓນ ວິສ຺ສຏ຺ຐສຠາວຕາ ໂວສ຺ສຄ຺ໂຄຕິ ເວທິຕພ຺ພໍ. ເຕເນວາຫ ‘‘ຕຕ຺ຖ ປຣິຈ຺ຈາຄໂວສ຺ສຄ຺ໂຄ’’ຕິອາທິ. ອຍໍ ສມ຺ມາທິຏ຺ຐີຕິ ອຍໍ ມິສ຺ສກວເສນ ວຸຕ຺ຕາ ສມ຺ມາທິຏ຺ຐິ. ຍຖາວຸຕ຺ເຕນ ປກາເຣນາຕິ ຕທງ຺ຄປ຺ປຫານສມຸຈ຺ເຉທປ຺ປຫານປກາເຣນ ຕໍນິນ຺ນຕທາຣມ຺ມຓກຣຓປ຺ປກາເຣນ ຈ.

ປຸພ຺ເພ ໂວສ຺ສຄ຺ຄວຈນສ຺ເສວ ອຕ຺ຖສ຺ສ ວຸຕ຺ຕຕ຺ຕາ ອາຫ ‘‘ສກເລນ ວຈເນນາ’’ຕິ. ປຣິຓມນ຺ຕໍ ວິປສ຺ສນາກ຺ຂເຓ, ປຣິຓຕໍ ມຄ຺ຄກ຺ຂເຓ. ປຣິຓາໂມ ນາມ ອິຘ ປຣິປາໂກຕິ ອາຫ ‘‘ປຣິປຈ຺ຈນ຺ຕໍ ປຣິປກ຺ກຎ຺ຈາ’’ຕິ. ປຣິປາໂກ ຈ ອາເສວນລາເຠນ ລທ຺ຘສາມຕ຺ຖິຍສ຺ສ ກິເລເສ ປຣິຈ຺ຈຊິຕຸໍ ນິພ຺ພານໍ ປກ຺ຂນ຺ທິຕຸໍ ຕິກ຺ຂວິສທຠາໂວ. ເຕນາຫ ‘‘ອຍ’’ນ຺ຕິອາທິ. ເອສ ນໂຍຕິ ຍ຺ວາຍໍ ນໂຍ ‘‘ວິເວກນິສ຺ສິຕ’’ນ຺ຕິອາທິນາ ສມ຺ມາທິຏ຺ຐິຍໍ ວຸຕ຺ໂຕ, ເສເສສຸ ສມ຺ມາສງ຺ກປ຺ປາທີສຸປິ ເອເສວ ນໂຍ, ເອວໍ ຕຕ຺ຖ ເນຕພ຺ພນ຺ຕິ ອຕ຺ໂຖ. ປຏິຈ຺ຈາຕິ ນິສ຺ສາຍ. ຊາຕິສຠາວາຕິ ຊາຍນສຠາວາ. ສກໂລຕິ ອນວເສໂສ, ສພ຺ໂພຕິ ອຕ຺ໂຖ. ນ ໂກຈິ ມຄ຺ໂຄ ສາວເສໂສ ຫຸຕ຺ວາ ສມ຺ຠວຕິ. ເຫຏ຺ຐິເມ ມຄ຺ເຄ ອຸປ຺ປນ຺ເນ ອຸປຣິໂມ ອຸປ຺ປນ຺ໂນ ເອວ ນາມ ອນນ຺ຕຣາເຍນ ອຸປ຺ປຊ຺ຊນໂຕ. ວວສ຺ສຄ຺ຄຕ຺ເຖຕິ ວຈສາຍຕ຺ເຖ. ວຓ຺ຓຍນ຺ຕີຕິ ຄຸຓວຓ຺ຓນວເສນ ວິຕ຺ຖາເຣນ຺ຕິ.

ກລ຺ຍາຓມິຕ຺ຕສຸຕ຺ຕວຓ຺ຓນາ ນິຏ຺ຐິຕາ.