໗. ອປ຺ປມາທສຸຕ຺ຕວຓ຺ຓນາ

໑໒໘. ສມຘິຄ຺ຄຍ຺ຫາຕິ ສມ຺ມາ ອຕິວິຍ ຄເຫຕ຺ວາ, ຎາເຍນ ວິເສສໂຕ ຄຓ຺ຫິຕ຺ວາ. ກາຣາປກອປ຺ປມາໂທຕິ ຕິຓ຺ຓໍ ປຸຎ຺ຎກິຣິຍວຕ຺ຖູນໍ ປວຕ຺ຕກອປ຺ປມາໂທ. ສມວຘານນ຺ຕິ ສມວໂຣຘໍ ອນ຺ໂຕຄຘໍ. ອຸປກ຺ເຂປນ຺ຕິ ພຫິ ອຫຸຕ຺ວາ ປກ຺ຂິປິຕພ຺ພຕໍ. ເສສປທຊາຕານິ ວິຍ ອວ…ເປ… ຘມ຺ມາ ສປ຺ປເທສຕ຺ຕາ. ອປ຺ປມາເທ ສໂມຘານໍ ຄຈ຺ຉນ຺ຕິ ຕສ຺ສ ນິປ຺ປເທສຕ຺ຕາ. ອຄ຺ຄໍ ເສຏ຺ຐໍ ມຫນ຺ຕໍ ເສສຘມ຺ມານໍ ອປ຺ປມາໂທ. ປຏິລາຠກຏ຺ເຐນາຕິ ອຘິຄມເຫຕຸຕາຍ. ໂລກິໂຍປິ ສມາໂນຕິ ກາມາວຈໂຣປິ ສມາໂນ. ມຫຄ຺ຄຕານຸຕ຺ຕຣານໍ ປຸພ຺ພຠາເຄ ປວຕ຺ຕອປ຺ປມາໂທ ຫິ ອິຘາຘິປ຺ເປໂຕ.

ປສໍສນ຺ຕິ ປຓ຺ຑິຕາຕິ ໂຍຊນາ. ອປ຺ປມາທສ຺ສ ປາສໍສຠາເວ ເອກນ຺ຕໂຕ ກຕ຺ຕພ຺ພຕາຍ ປນ ‘‘ເອຕານີ’’ຕິອາທິນາ ກາຣຓໍ ອາຫ. ອິມິສ຺ສາ ໂຍຊນາຍ ‘‘ປຸຎ຺ຎກິຣິຍາສູ’’ຕິ ປທສ຺ສ ‘‘ອປ຺ປມຕ຺ໂຕ’’ຕິ ອິມິນາ ສມ຺ພນ຺ໂຘ. ຍສ຺ມາ ປຓ຺ຑິຕາ ອປ຺ປມາທໍ ປສໍສນ຺ຕິ, ຍສ຺ມາ ຈ ປຸຎ຺ຎກິຣິຍາສຸ ອປ຺ປມຕ຺ໂຕ ອຸໂຠ ອຕ຺ເຖ ອຘິຄ຺ຄຓ຺ຫາຕິ, ຕສ຺ມາ ອາຍຸອາທີນິ ປຕ຺ຖຍນ຺ເຕນ ອປ຺ປມາໂທວ ກາຕພ຺ໂພຕິ. ທຸຕິຍໂຍຊນາຍ ປນ ປຓ຺ຑິຕາ ອປ຺ປມາທໍ ປສໍສນ຺ຕິ. ກຕ຺ຖ? ປຸຎ຺ຎກິຣິຍາສຸ. ກສ຺ມາຕິ ເຈ? ອປ຺ປມຕ຺ໂຕຕິອາທິ. ເຕນາຫ ‘‘ຍສ຺ມາ…ເປ… ອຕ຺ໂຖ’’ຕິ. ອຕ຺ຖປຏິລາຠາຕິ ທິຏ຺ຐຘມ຺ມິກາທິຫິຕປຏິລາຠາ.

ອປ຺ປມາທສຸຕ຺ຕວຓ຺ຓນາ ນິຏ຺ຐິຕາ.