໒. ປຎ຺ຈຣາຊສຸຕ຺ຕວຓ຺ຓນາ

໑໒໓. ຣູປາຕິ ຣູປສງ຺ຂາຕາ ກາມຄຸຓາ. ເຕ ປນ ນີລາທິວເສນ ອເນກເຠທຠິນ຺ນາປິ ຣູປາຍຕນຕ຺ຕາ ຈກ຺ຂຸວິຎ຺ເຎຍ຺ຍຕໍ ນາຕິວຕ຺ຕນ຺ຕີຕິ ອາຫ ‘‘ນີລປີຕາທິເຠທໍ ຣູປາຣມ຺ມຓ’’ນ຺ຕິ. ໂຕ-ສທ຺ໂທປິ ທາ-ສທ຺ໂທ ວິຍ ກາລຕ຺ໂຖ ໂຫຕີຕິ ອາຫ ‘‘ຍໂຕຕິ ຍທາ’’ຕິ. ມນໍ ອາປຍຕິ ວຑ຺ເຒຕີຕິ ມນາປໍ, ມໂນຣມໍ. ມນາປນິປ຺ຜຕ຺ຕິຕນ຺ຕິ ຕສ຺ສ ປຸຄ຺ຄລສ຺ສ ມນສາ ປິຍາຍິຕໍ, ຕສ຺ສ ອຄ຺ຄຠາເວນ ປຣິຍນ຺ຕໍ ປຣມໍ ໂກຏິໍ ກຕ຺ວາ ປວຕ຺ຕິຕນ຺ຕິ ອຕ຺ໂຖ. ປຸຄ຺ຄລມນາປນ຺ຕິ ອາຣມ຺ມຓສຠາວໍ ອຈິນ຺ເຕຕ຺ວາ ປຸຄ຺ຄລສ຺ສ ວເສນ ມນາປຠາເວເນວ ອິຏ຺ຐຕາຍ ອິຏ຺ຐນ຺ຕິ. ສມ຺ມຸຕີຕິ ສມຎ຺ຎາ. ປຸຄ຺ຄລມນາປໍ ນາມ ສຎ຺ຎາວິປລ຺ລາສວເສນ ວິປຣີຕມ຺ປິ ຄຓ຺ຫາຕິ ອິຕຣສຠາວໂຕຕິ ອາຫ ‘‘ຍໍ ເອກສ຺ສ…ເປ… ອິຏ຺ຐໍ ກນ຺ຕ’’ນ຺ຕິ. ອິທານິ ຕໍ ຊິວ຺ຫາວິຎ຺ເຎຍ຺ຍວເສນ ໂຍເຊຕ຺ວາ ທສ຺ເສນ຺ໂຕ ‘‘ປຈ຺ຈນ຺ຕວາສີນ’’ນ຺ຕິອາທິມາຫ. ອິທໍ ປຸຄ຺ຄລມນາປນ຺ຕິ ອິທໍ ຍຖາວຸຕ຺ຕໍ ຊິວ຺ຫາວິຎ຺ເຎຍ຺ຍໍ ວິຍ ອຎ຺ຎມ຺ປິ ເອວໍຊາຕິກໍ ເຕນ ເຕນ ປຸຄ຺ຄເລນ ມນາປນ຺ຕິ ຄເຫຕພ຺ພາຣມ຺ມຓໍ ປຸຄ຺ຄລມນາປໍ ນາມ.

ໂລເກ ປຏິວິຠຕ຺ຕໍ ນຕ຺ຖິ, ວິຠຊິຕ຺ວາ ທສ຺ສເນນ ໂລເກນ ມຘຸຣຊາເຕນປິ ປຏິວິຠຕ຺ຕໍ ກຕ຺ວາ ຄເຫຕຸໍ ນ ສກ຺ກຸເຓຍ຺ຍາຕິ ອຘິປ຺ປາໂຍ. ເຕນາຫ ‘‘ວິຠຊິຕ຺ວາ ປນ ທສ຺ເສຕພ຺ພ’’ນ຺ຕິ. ທິພ຺ພກປ຺ປມ຺ປີຕິ ເທວໂລກປຣິຍາປນ຺ນສທິສມ຺ປິ ອມນາປໍ ອຸປຏ຺ຐາຕິ ອຸຬາຣປຓີຕາຣມ຺ມຓປຣິຈຍໂຕ. ມຊ຺ຌິມານໍ ປນ…ເປ… ວິຠຊິຕພ຺ພໍ ເຕສໍ ມນາປສ຺ສ ມນາປໂຕ, ອມນາປສ຺ສ ອມນາປໂຕ ອຸປຏ຺ຐານໂຕ. ຕຕ຺ຖປິ ອິຏ຺ຐານິຏ຺ຐປຣິຈ຺ເຉໂທ ນິປ຺ປຣິຍາຍໂຕ ເອວໍ ເວທິຕພ຺ໂພຕິ ທສ຺ເສນ຺ໂຕ ອາຫ ‘‘ຕຎ຺ຈ ປເນຕ’’ນ຺ຕິອາທິ. ຕຎ຺ຈ ປເນຕໍ ອິຏ຺ຐານິຏ຺ຐຠູຕໍ ອາຣມ຺ມຓໍ ກາມາວຈຣຊວເນສຸ ອກຸສລສ຺ສ ວເສນ ເຍຠຸຍ຺ເຍນ ປວຕ຺ຕຕີຕິ ກຕ຺ວາ ຕຕ຺ຖ ‘‘ຣຊ຺ຊຕິ ທຸສ຺ສຕີ’’ຕິ ອກຸສລສ຺ເສວ ປວຕ຺ຕິ ທສ຺ສິຕາ. ເສສກາມາວຈຣສ຺ສປິ ວເສນ ປວຕ຺ຕິ ລພ຺ຠເຕວ. ຕຖາ ຫິ ຕໍ ອປ຺ປຏິກູເລປິ ປຏິກູລາກາຣໂຕ, ປຏິກູເລປິ ອປ຺ປຏິກູລາກາຣໂຕ ປວຕ຺ຕຕີຕິ. ວິປາກຈິຕ຺ຕໍ ອິຏ຺ຐານິຏ຺ຐໍ ປຣິຈ຺ຉິນ຺ທຕິ, ນ ສກ຺ກາ ວິປາກໍ ວຎ຺ເຈຕຸນ຺ຕິ. ກຸສລກມ຺ມໍ ຫິ ເອກນ຺ຕໂຕ ອິຏ຺ຐເມວ, ອກຸສລກມ຺ມຎ຺ຈ ອນິຏ຺ຐເມວ, ຕສ຺ມາ ຕຕ຺ຖ ອຸປ຺ປຊ຺ຊມານໍ ວິປາກຈິຕ຺ຕໍ ຍຖາສຠາວໂຕ ປວຕ຺ຕຕີຕິ.

ຍໍ ປນ ສມ຺ໂມຫວິໂນທນິຍໍ ‘‘ກຸສລກມ຺ມຊໍ ອນິຏ຺ຐໍ ນາມ ນຕ຺ຖີ’’ຕິ ເອຕ຺ຕກເມວ ວຸຕ຺ຕໍ, ຕໍ ປນ ນິທສ຺ສນມຕ຺ຕໍ ທຏ຺ຐພ຺ພໍ. ເຕນ ໂສຠນໍ ອກຸສລກມ຺ມຊມ຺ປິ ເອກຈ຺ຈານໍ ສຕ຺ຕານໍ ອິຏ຺ຐນ຺ຕິ ອນຸຎ຺ຎາຕໍ ສິຍາ. ກຸສລກມ຺ມຊໍ ປນ ສພ຺ເພສໍ ອິຏ຺ຐເມວາຕິ ວທນ຺ຕິ. ຕິຣຈ຺ຉານຄຕານໍ ເກສຎ຺ຈິ ມນຸສ຺ສຣູປໍ ອມນາປໍ, ຍໂຕ ເຕ ທິສ຺ວາວ ປລາຍນ຺ຕິ. ມນຸສ຺ສາ ຈ ເທວຕານໍ ຣູປໍ ທິສ຺ວາ ຠາຍນ຺ຕິ, ເຕສມ຺ປິ ວິປາກວິຎ຺ຎາຓໍ ຕໍ ຣູປໍ ອາຣພ຺ຠ ກຸສລວິປາກເມວ ອຸປ຺ປຊ຺ຊຕິ, ຕາທິສສ຺ສ ປນ ປຸຎ຺ຎສ຺ສ ອຠາວາ ນ ເຕສໍ ຕຕ຺ຖ ອຠິຣຕິ ໂຫຕີຕິ ທຏ຺ຐພ຺ພໍ. ກຸສລກມ຺ມຊສ຺ສ ປນ ອນິຏ຺ຐສ຺ສ ອຠາໂວ ວິຍ ອກຸສລກມ຺ມຊສ຺ສ ໂສຠນສ຺ສ ອິຏ຺ຐສ຺ສ ອຠາໂວ ວຕ຺ຕພ຺ໂພ. ຫຕ຺ຖິອາທີນມ຺ປິ ຫິ ອກຸສລກມ຺ມຊໍ ມນຸສ຺ສານໍ ອກຸສລວິປາກສ຺ເສວ ອາຣມ຺ມຓໍ, ກຸສລກມ຺ມຊໍ ປນ ປວຕ຺ເຕ ສມຸຏ຺ຐິຕໍ ກຸສລວິປາກສ຺ສ, ອິຏ຺ຐາຣມ຺ມເຓນ ໂວມິສ຺ສກຕ຺ຕາ ອປ຺ປກໍ ອກຸສລກມ຺ມຊໍ ພຫຸລໍ ອກຸສລວິປາກຸປ຺ປຕ຺ຕິຍາ ກາຣຓໍ ນ ຠວິສ຺ສຕີຕິ ສກ຺ກາ ວຕ຺ຕຸໍ. ອິທານິ ຕເມວ ວິປາກວເສນ ອິຏ຺ຐານິຏ຺ຐາຣມ຺ມຓວວຕ຺ຖານໍ ວິຠາເວຕຸໍ ‘‘ກິຎ຺ຈາປິ ຫີ’’ຕິອາທິ ວຸຕ຺ຕໍ. ຕຍິທໍ ສມ຺ມຸຕິມນາປສໍວິຠາຄຕ຺ຖໍ ວຸຕ຺ຕໍ, ອິຘ ປນ ນ ຕຖາ ວິຠຕ຺ຕນ຺ຕິ ອາຫ ‘‘ຠຄວາ ປນາ’’ຕິອາທິ.

ໂສ ອຸປາສໂກ ຈນ຺ທນງ຺ຄລຄາເມ ຊາຕຕ຺ຕາ ‘‘ຈນ຺ທນງ຺ຄລິໂກ’’ຕິ ປຎ຺ຎາຍຕິ, ‘‘ຈນ຺ທນວິລາໂສ’’ຕິ ເກຈິ. ຕສ຺ສ ອຸປາສກສ຺ສ ປຏິຠານໍ ອຸທປາທີຕິ ໂຍຊນາ. ເຕ ຣາຊາໂນ ຫຕປ຺ປເຠ ຫຕໂສເຠ ທິສ຺ວາຕິ ສມ຺ພນ຺ໂຘ. ອຸທກາຠິສິຕ຺ເຕຕິ ອຸທເກນ ອຠິສິຎ຺ຈິເຕ. ອງ຺ຄາເຣ ວິຍາຕິ ອງ຺ຄາຣກ຺ຂເຓ ວິຍ.

ກາລສ຺ເສວາຕິ ປເຄວ. ອວິຄຕຄນ຺ຘໍ ຕງ຺ຂຓວິກສິຕຕາຍ. ອີທິສໍ ວຈນນ຺ຕິ ‘‘ອຈ຺ຉາເທສີ’’ຕິ ເອວຣູປໍ ວຈນນ຺ຕິ.

ປຎ຺ຈຣາຊສຸຕ຺ຕວຓ຺ຓນາ ນິຏ຺ຐິຕາ.