໓. ໂທຓປາກສຸຕ຺ຕວຓ຺ຓນາ

໑໒໔. ‘‘ໂທຓປາກກຸຣ’’ນ຺ຕິ ເອຕ຺ຖ ວິຠຕ຺ຕິໂລປໍ ກຕ຺ວາ ນິທ຺ເທໂສຕິ ອາຫ ‘‘ໂທຓປາກໍ ກຸຣ’’ນ຺ຕິ. ໂທຓສ຺ສາຕິ ຈຕຸນ຺ນໍ ອາຬ຺ຫການໍ, ໂສຬສນາຬີນນ຺ຕິ ອຕ຺ໂຖ. ຕທຸປິຍນ຺ຕິ ຕທນຸຣູປໍ, ຕສ຺ສ ວຸຕ຺ຕປຣິມາຓສ຺ສ ອນຸຈ຺ຉວິກນ຺ຕິ ອຕ຺ໂຖ. ປຸພ຺ເພຕິ ຕໍທິວສໂຕ ປຸຣິມຕຣທິວເສສຸ. ພລວາຕິ ມຫາ. ຠຕ຺ຕປຣິຬາໂຫຕິ ຠຕ຺ຕສມ຺ມທເຫຕຸໂກ. ອສ຺ສ ຣຎ຺ໂຎ ອຸໂຠສຸ ປສ຺ເສສຸ ຄຫິຕຕາລວຓ຺ຏາ ພີຊນ຺ຕິ ຍມກຕາລວຓ຺ເຏຫິ. ຜາສຸວິຫາຣນ຺ຕິ ໂຠຊເນ ມຕ຺ຕຎ຺ຎຸຕາຍ ລທ຺ຘພ຺ພສຸຂວິຫາຣໍ. ໂຠຊນມຕ຺ຕຎ຺ຎູ ຫິ ສຸຂວິຫາໂຣ ໂຫຕິ. ເຕນາຫ ‘‘ຕນຸກສ຺ສ ຠວນ຺ຕິ ເວທນາ, ສຓິກໍ ຊີຣຕິ ອາຍຸ ປາລຍ’’ນ຺ຕິ.

ຕນຸກສ຺ສາຕິ ຕນຸກາ ອສ຺ສ ປຸຄ຺ຄລສ຺ສ, ຠຸຕ຺ຕປຈ຺ຈຍາ ວິສຠາຄເວທນາ ນ ໂຫນ຺ຕີຕິ ອຕ຺ໂຖ. ສຓິກນ຺ຕິ ມນ຺ທໍ ມຸທຸກໍ, ອປຣິສ຺ສຍເມວາຕິ ອຕ຺ໂຖ. ຊີຣຕີຕິ ປຣິຠຸຕ຺ຕາຫາໂຣ ປຈ຺ຈຕິ. ອາຍຸປາລຍນ຺ຕິ ນິໂຣໂຘ ອເວທໂນ ຊີວິຕໍ ຣກ຺ຂນ຺ໂຕ. ອຖ ວາ ສຓິກໍ ຊີຣຕີຕິ ໂສ ໂຠຊເນ ມຕ຺ຕຎ຺ຎູ ປຸຄ຺ຄໂລ ປຣິມິຕາຫາຣຕາຍ ສຓິກໍ ຈິເຣນ ຊີຣຕິ ຊຣໍ ປາປຸຓາຕິ ຊີວິຕໍ ປາເລນ຺ໂຕ.

ປຣິຍາປຸຓິຕ຺ວາຕິ ເອຕ຺ຖ ຍຖາ ສພ຺ພໍ ໂສ ປຣິຍາປຸຓິ, ຕໂຕ ປຣຎ຺ຈ ຍຖາ ປຏິປຊ຺ຊິ, ຕໍ ທສ຺ເສຕຸໍ ‘‘ຣຎ຺ຎາ ສທ຺ຘິ’’ນ຺ຕິອາທິ ວຸຕ຺ຕໍ. ຕາວຕເກ ຕຓ຺ຑຸເລ ຫາເຣຍ຺ຍາສິ ຕທຸປິຍຎ຺ຈ ພ຺ຍຎ຺ຊນນ຺ຕິ ອາເນຕ຺ວາ ສມ຺ພນ຺ໂຘ.

ປຸຣິສຠາໂຄ ເອສາຕິ ມຊ຺ຌິເມນ ປຸຣິເສນ ຠຸຎ຺ຊິຕພ຺ພຠາໂຄ ເອໂສ, ຍທິທໍ ນາຬິໂກທນມຕ຺ຕໍ. ສລ຺ລິຂິຕສຣີຣຕາຕິ ຠມໍ ອາໂຣເປຕ຺ວາ ອຸລ຺ລິຂິຕສ຺ສ ວິຍ ສພ຺ພປຣິຬາຫວູປສມສ຺ສ ປຸຖຸລຕາປຄຕສຣີຣສ຺ສ. ສີລໍ ສມ຺ປຣາຍິກຕ຺ໂຖຕິ ວຸຕ຺ຕໍ, ກຸໂຕ ປເນຕ຺ຖ ສີລນ຺ຕິ ອາຫ ‘‘ໂຠຊເນ’’ຕິອາທິ. ສີລງ຺ຄໍ ນາມ ໂຫຕີຕິ ຈຕຸປາຣິສຸທ຺ຘິສີລສ຺ສ ອວຍໂວ ເອໂກ ຠາໂຄ ໂຫຕິ.

ໂທຓປາກສຸຕ຺ຕວຓ຺ຓນາ ນິຏ຺ຐິຕາ.