໑. ສຕ຺ຕຊຏິລສຸຕ຺ຕວຓ຺ຓນາ

໑໒໒. ປຸພ຺ພາຣາມສງ຺ຂາເຕຕິ ສາວຕ຺ຖິນຄຣສ຺ສ ປຸພ຺ພທິສາຍ ກຕຕ຺ຕາ ປຸພ຺ພາຣາເມຕິ ສງ຺ຂໍ ຄເຕ. ຕຕ຺ຣາຕິ ‘‘ມິຄາຣມາຕຸຍາ ປາສາເທ’’ຕິ ຕສ຺ມິໍ ສໍຂິຕ຺ຕວຈເນ. ອຍໍ ອິທານິ ວຸຈ຺ຈມານາ ອນຸປຸພ຺ພິກຖາ ອາທິໂຕ ປຏ຺ຐາຍ ອນຸກ຺ກມກຖາ. ປຕ຺ຖນໍ ອກາສິ ຕສ຺ສ ຠຄວໂຕ ອຄ຺ຄຸປຏ຺ຐາຍິກໍ ເອກໍ ອຸປາສິກໍ ທິສ຺ວາ ຕໍ ຐານນ຺ຕຣໍ ອາກງ຺ຂນ຺ຕີ. ເມຓ຺ຑກປຸຕ຺ຕສ຺ສາຕິ ເມຓ຺ຑກເສຏ຺ຐິປຸຕ຺ຕສ຺ສ. ມາຕິຏ຺ຐາເນ ຐເປສິ ຕສ຺ສາ ອຸປກາຣໍ ຄຣຸຠາວຎ຺ຈ ທິສ຺ວາ. ຕາຍ ກາຣິເຕ ປາສາເທຕິ ຕາຍ ມຫາອຸປາສິກາຍ ມຫາລຕາປສາຘນໍ ວິສ຺ສຊ຺ເຊຕ຺ວາ ນວຫິ ໂກຏີຫິ ກຣີສມຕ຺ເຕ ຠູມິຠາເຄ ກາຣິເຕ ສຫສ຺ສຄພ຺ຠປຏິມຓ຺ຑິເຕ ປາສາເທ.

ປຣູຬ຺ຫກຈ຺ຉາຕິ ປຣູຬ຺ຫກຈ຺ຉໂລມາ. ກມຓ຺ຑລຸຆຏິກາທິໍ ປພ຺ພຊິຕປຣິກ຺ຂາຣໍ. ນຄ຺ຄໂຠຄ຺ຄນິສ຺ສິຣິການນ຺ຕິ ນຄ຺ຄານຎ຺ເຈວ ໂຠຄ຺ຄານຎ຺ຈ ນິສ຺ສິຣິການຎ຺ຈ. ເຕ ຫິ ອນິວຕ຺ຖວຕ຺ຖຕາຍ ນຄ຺ຄາ ເຈວ, ອເຈລກວຕາທິນາ ໂຠຄ຺ຄສຣີຣຕາຍ ໂຠຄ຺ຄາ, ໂສຠາຣຫິຕຕາຍ ນິສ຺ສິຣິກາ ຈ. ອຕ຺ຕນາ ທິຏ຺ຐສຸຕໍ ປຏິຈ຺ຉາເທຕ຺ວາ ນ ກເຖຍ຺ຍຸນ຺ຕິ ອກາຣຓເມຕໍ ເຕສໍ ຣຎ຺ຎາ ປຍຸຕ຺ຕຈຣປຸຣິສຠາວໂຕ. ເອວໍ ກເຕ ປນ ເຕ ‘‘ອຎ຺ເຎປິ ປພ຺ພຊິຕາ ອຕ຺ຖີຕິ ອຍໍ ຊານາຕີ’’ຕິ ມຎ຺ເຎຍ຺ຍຸນ຺ຕິ ໂກຫຎ຺ຎຈິຕ຺ໂຕ ເອວໍ ອກາສີຕິ ສກ຺ກາ ວິຎ຺ຎາຕຸໍ. ຕຖາ ຫິ ເຕນຕ຺ເຖນ ອປຣິໂຕສມາໂນ ‘‘ອປິຈາ’’ຕິອາທິມາຫ.

ກາສິກຈນ຺ທນນ຺ຕິ ອຸຊ຺ຊລຈນ຺ທນໍ. ຕໍ ກິຣ ວຓ຺ຓວເສນ ສມຸຊ຺ຊລໍ ໂຫຕິ ປຠສ຺ສຣໍ, ຕທຕ຺ຖເມວ ນໍ ສຓ຺ຫຕຣໍ ກໂຣນ຺ຕິ. ເຕນາຫ ‘‘ກາສິກຈນ຺ທນນ຺ຕິ ສຓ຺ຫຈນ຺ທນ’’ນ຺ຕິ. ວຓ຺ຓຄນ຺ຘຕ຺ຖາຍາຕິ ວຓ຺ຓໂສຠຕ຺ຖຎ຺ເຈວ ສຸຄນ຺ຘຠາວຕ຺ຖຎ຺ຈ. ວຓ຺ຓຄນ຺ຘຕ຺ຖາຍາຕິ ຉວິຣາຄກຣຓຕ຺ຖຎ຺ເຈວ ສຸຄນ຺ຘຕ຺ຖາຍ ຈ. ‘‘ຄິຫິນາ’’ຕິອາທີຫິ ປເທຫິ ເອວໍ ປມາທວິຫາຣິນາ ຕຍາ ອຣຫນ຺ໂຕ ທຸວິຎ຺ເຎຍ຺ຍາຕິ ທສ຺ເສຕິ.

ສໍວາໂສ ນາມ ອິຘ ກາເລນ ອຸປສງ຺ກມນນ຺ຕິ ທສ຺ເສນ຺ໂຕ ‘‘ອຸປສງ຺ກມນ຺ເຕນາ’’ຕິ ອາຫ. ກາຍວາຈາຫິ ອສໍຍເຕນປິ ສໍຍຕາກາໂຣ, ອສໍວຸຕິນ຺ທ຺ຣິເຍນປິ ສໍວຸຕິນ຺ທ຺ຣິຍາກາໂຣ. ປຣິຄ຺ຄເຫສ຺ສາມີຕິ ວີມໍສິສ຺ສາມິ ‘‘ປຣິສຸທ຺ຘໍ ນຸ ໂຂ, ໂນ’’ຕິ. ສປ຺ປຎ຺ເຎນາຕິ ສີລປຣິຄ຺ຄຓ຺ຫນປຎ຺ຎາຍ ສປ຺ປຎ຺ເຎນ. ຊານິຕຸໍ ນ ສກ຺ໂກຕິ ສຠາວສ຺ສ ສໂຕ ສີລສ຺ສ ອນຸປຘາຣຓໂຕ.

ກຖເນນາຕິ ອປຣາປຣໍ ກຖເນນ. ຕຖາ ຫິ ວກ຺ຂຕິ ‘‘ເອກຈ຺ຈສ຺ສ ຫີ’’ຕິອາທິ. ອຣິຍໂວຫາໂຣຕິ ທິຏ຺ຐາທິລກ຺ຂເຓນ ໂວຫຣິໂຕ ‘‘ທິຏ຺ຐໍ ອທິຏ຺ຐ’’ນ຺ຕິອາທິນາ ປວຸຕ຺ຕສທ຺ທໂວຫາໂຣ. ຕສ຺ສ ປນ ກາຣຓເມວ ຄຓ຺ຫນ຺ໂຕ ‘‘ເອຕ຺ຖ ເຈຕນາ’’ຕິ ອາຫ. ເອສ ນໂຍ ອນຣິຍໂວຫາເຣປິ. ປຣມຕ຺ຖໂຕ ຫິ ສຈ຺ຈວາຈາທໂຍ ມຸສາວາທາທໂຍ ເຈຕນາລກ຺ຂຓາຕິ. ປຎ຺ຎຕ຺ຕິໂວຫາໂຣ ຕຖາ ຕຖາ ໂວຫຣິຕພ຺ພໂຕ ເອວມາຫ ‘‘ສໍໂວຫາເຣນ ໂຂ, ມຫາຣາຊ, ໂສເຈຍ຺ຍໍ ເວທິຕພ຺ພ’’ນ຺ຕິ.

ຎາຓຖາໂມຕິ ຎາຓຄຸຓພລໍ, ເຍນ ຐານຸປ຺ປຕ຺ຕິກປຏິຠານາທິນາ ອຈ຺ຈາຍິກກິຈ຺ຈກຣຓີຍານິ ນິຏ຺ຐາເປຕິ. ສໍກຖາຍາຕິ ອຕ຺ຖວີມໍສນວເສນ ປວຕ຺ຕາຍ ສມ຺ມາກຖາຍ. ອຸປ຺ປິລວຕິ ລຫຸກຠາວໂຕ. ເຫຏ຺ຐາຈຣກາຕິ ອວຈຣກາ. ເຍ ອນຸປວິສິຕ຺ວາ ປເຣສໍ ຣຫສ຺ສວີມໍສນວເສນ ປວຕ຺ຕາ, ເຕສຸ ໂອຈຣກໂວຫາໂຣຕິ ວຸຕ຺ຕໍ ‘‘ຈຣາ ຫີ’’ຕິອາທິ.

ວຓ຺ຓສຓ຺ຐາເນນາຕິ ວຓ຺ເຓນ ວາ ສຓ຺ຐາເນນ ວາ ວຓ຺ຓໂປກ຺ຂຣຕາຍ ວາ ສຓ຺ຐານສມ຺ປຕ຺ຕິຍາ ວາ. ສຸຊາໂນ ເປສໂລ ວິສ຺ສເສຕິ ໂຍຊນາ. ລຫຸກທສ຺ສເນນາຕິ ປຣິຕ຺ຕທສ຺ສເນນ ວິຊ຺ຊຸເກນ ວິຍ. ປຣິກ຺ຂາຣຠຓ຺ຑເກນາຕິ ປພ຺ພຊິຕປຣິກ຺ຂາຣຠູເຕນ ຠຓ຺ຑເກນ. ໂລຫຑ຺ຒມາໂສຕິ ໂລຫມໂຍ ອຸປຑ຺ຒຄ຺ຆນກມາໂສ.

ສຕ຺ຕຊຏິລສຸຕ຺ຕວຓ຺ຓນາ ນິຏ຺ຐິຕາ.