ອຘິກຣຓເຠທໍ

ອຸກ຺ໂກຏນເຠທາທິວຓ຺ຓນາ

໓໔໐. ອຘິກຣຓເຠເທ ເອວມຕ຺ໂຖ ເວທິຕພ຺ໂພຕິ ໂຍຊນາ. ທສ຺ເສຕຸໍ ອາຫາຕິ ສມ຺ພນ຺ໂຘ. ທ຺ເວ ສມເຖຕິ ເອຕ຺ຖ ທ຺ວິນ຺ນໍ ສມຖານໍ ສຣູປໍ ທສ຺ເສນ຺ໂຕ ອາຫ ‘‘ສມ຺ມຸຂາວິນຍຎ຺ຈ ເຍຠຸຍ຺ຍສິກຎ຺ຈາ’’ຕິ. ‘‘ປຏິເສເຘຕີ’’ຕິ ອິມິນາ ອຸກ຺ໂກເຏຕີຕິ ເອຕ຺ຖ ກຸຏຘາຕຸຍາ ເຉທນຕ຺ຖໍ ອຕ຺ຖໂຕ ທສ຺ເສຕິ. ເຉທນໍ ນາມ ອຕ຺ຖໂຕ ສມຖປຏິເສຘນນ຺ຕິ ອຕ຺ໂຖ.

໓໔໑. ທ຺ວາທສສຸ ອຸກ຺ໂກເຏສູຕິ ນິທ຺ຘາຣເຓ ຠຸມ຺ມໍ. ອກຕໍ ກມ຺ມນ຺ຕິອາທໂຍຕິ ເອຕ຺ຖ ອາທິສທ຺ເທນ ‘‘ທຸກ຺ກຏໍ ກມ຺ມໍ, ປຸນ ກາຕພ຺ພໍ ກມ຺ມ’’ນ຺ຕິ ທ຺ເວ ອຸກ຺ໂກຏາ ສງ຺ຄເຫຕພ຺ພາ. ອນິຫຕໍ ກມ຺ມນ຺ຕິອາທໂຍຕິ ເອຕ຺ຖ ອາທິສທ຺ເທນ ‘‘ທຸນ຺ນິຫຕໍ, ປຸນ ນິຫນິຕພ຺ພ’’ນ຺ຕິ ທ຺ເວ ອຸກ຺ໂກຏາ ສງ຺ຄເຫຕພ຺ພາ. ອວິນິຈ຺ຉິຕນ຺ຕິອາທໂຍຕິ ເອຕ຺ຖ ອາທິສທ຺ເທນ ‘‘ທຸວິນິຈ຺ຉິຕໍ, ປຸນ ວິນິຈ຺ຉິຕພ຺ພ’’ນ຺ຕິ ທ຺ເວ ອຸກ຺ໂກຏາ ສງ຺ຄເຫຕພ຺ພາ. ອວູປສນ຺ຕນ຺ຕິອາທໂຍຕິ ເອຕ຺ຖ ອາທິສທ຺ເທນ ‘‘ທຸວູປສນ຺ຕໍ, ປຸນ ວູປສເມຕພ຺ພ’’ນ຺ຕິ ທ຺ເວ ອຸກ຺ໂກຏາ ສງ຺ຄເຫຕພ຺ພາ. ອປິຈາຕິ ສາມຎ຺ຎໂຕ ປນ.

ຕຕ຺ຖ ຊາຕກນ຺ຕິ ເອຕ຺ຖ ຕສທ຺ທສ຺ສ ວິສຍໍ ທສ຺ເສນ຺ໂຕ ອາຫ ‘‘ຍສ຺ມິໍວິຫາເຣ’’ຕິ. ຍສ຺ມິໍວິຫາເຣ ອຸປ຺ປນ຺ນໍ ໂຫຕີຕິ ສມ຺ພນ຺ໂຘ. ອຎ຺ຎມຎ຺ຎສ຺ສ ອຕ຺ເຕສຸ, ອຕ຺ຕານໍ ວາ ປຏິປກ຺ຂໍ ອຕ຺ຖຍນ຺ຕິ ອິຈ຺ຉນ຺ຕີຕິ ອຕ຺ຕປຈ຺ຈຕ຺ຖິກາ. ປາຬິມຸຕ຺ຕກວິນິຈ຺ຉເຍເນວາຕິ ປາຬິຍໍ ອາຄເຕຫິ ສມເຖຫິ ມຸຕ຺ຕເກນ ຘມ຺ມເທສນາມຕ຺ຕວິນິຈ຺ຉເຍເນວ. ອິທນ຺ຕິ ອຘິກຣຓໍ. ເຍນາປິ ວິນິຈ຺ຉເຍນາຕິ ປາຬິມຸຕ຺ຕເກນ ເຍນາປິ ວິນິຈ຺ຉເຍນ.

ອຎ຺ໂຎຕິ ເນວາສິເກຫິ ອຎ຺ໂຎ ວິນຍຘໂຣ ປຸຈ຺ຉຕີຕິ ສມ຺ພນ຺ໂຘ. ເຕຫິ ຈາຕິ ເນວາສິເກຫິ ຈ.

ເອຕສ຺ສາຕິ ວິນຍຘຣສ຺ສ. ອຍນ຺ຕິ ວິນຍຘໂຣ. ຕຕ຺ຖາຕິ ຕໍ ຄາມໍ. ອຎ຺ຎມຎ຺ຎໍ ວາ ສຎ຺ຎາເປນ຺ຕີຕິ ອຕ຺ຕປຈ຺ຈຕ຺ຖິກາ ອຎ຺ຎມຎ຺ຎໍ ວາ ສຎ຺ຎາເປນ຺ຕິ. ເຕ ຠິກ຺ຂູຕິ ເຕ ອຕ຺ຕປຈ຺ຈຕ຺ຖິກາ ຠິກ຺ຂູ. ນິຊ຺ຌາເປນ຺ຕີຕິ ສຎ຺ຎາເປນ຺ຕິ. ອຸກ຺ໂກເຏຕິ ໂຍຕິ ໂຍ ອຸກ຺ໂກເຏຕິ. ເອເຕຕິ ອຕ຺ຕປຈ຺ຈຕ຺ຖິເກ ຠິກ຺ຂູ, ທິສ຺ວາຕິ ສມ຺ພນ຺ໂຘ. ຕຕ຺ຖາຕິ ຄາມໍ. ຕຕ຺ເຖວາຕິ ອນ຺ຕຣາມຄ຺ເຄ ເອວ.

ຕຕ຺ເຖວາຕິ ຄາມເມວ. ຕຕ຺ເຖວາຕິ ຕສ຺ມິໍເຍວ ຐາເນ. ຕຕ຺ຖ ຄຕນ຺ຕິ ຕໍ ຄາມໍ ຄຕໍ.

‘‘ເອເສວ ນໂຍ’’ຕິ ອິມິນາ ປາຈິຕ຺ຕິຍເມວ ອຕິທິສຕິ.

ສງ຺ເຆນ…ເປ… ອຘິກຣເຓ ວທນ຺ໂຕປີຕິ ສມ຺ພນ຺ໂຘ. ຍໍ ປເນຕໍ ອາປຕ຺ຕິວຸຏ຺ຐານໍ ນາມ ໂຫຕີຕິ ໂຍຊນາ. ເອຕນ຺ຕິ ອາປຕ຺ຕິວຸຏ຺ຐານໍ. ວທນ຺ໂຕປີຕິ ປິສທ຺ໂທ ນ ເກວລໍ ຕິຓວຕ຺ຖາຣກໍ ອຸກ຺ໂກເຏນ຺ໂຕເຍວ ອຸກ຺ໂກເຏຕິ ນາມ, ອຖ ໂຂ ວທນ຺ໂຕປີຕິ ທສ຺ເສຕິ.

ຉນ຺ທາຄຕິໍ ຄຈ຺ຉນ຺ໂຕຕິອາທີສຸ ອຄຕິຄມນາກາຣໍ ທສ຺ເສນ຺ໂຕ ອາຫ ‘‘ວິນຍຘໂຣ ຫຸຕ຺ວາ’’ຕິອາທິ. ອຕ຺ຖາຍ ອຸກ຺ໂກເຏນ຺ໂຕຕິ ສມ຺ພນ຺ໂຘ. ຕສ຺ສາຕິ ອນຕ຺ຖໍ ຈຣນ຺ຕສ຺ສ. ມນ຺ໂທ ປນ ອຸກ຺ໂກເຏຕິ ນາມາຕິ ສມ຺ພນ຺ໂຘ. ເອໂກ ພລວນິສ຺ສິໂຕ ຈ ໂຫຕີຕິ ສມ຺ພນ຺ໂຘ. ຄຫນມິຈ຺ຉາທິຏ຺ຐິນ຺ຕິ ຄຫນສທິສໍ ມິຈ຺ຉາທິຏ຺ຐິໍ ປວນສທິສໍ ມິຈ຺ຉາທິຏ຺ຐິນ຺ຕິ ອຕ຺ໂຖ. ພລວນ຺ເຕ ຈາຕິ ເອຕ຺ຖ ຈສທ຺ໂທ ສພ຺ພກມ຺ເມສຸ ໂຍເຊຕພ຺ໂພ. ນິສ຺ສິຕຕ຺ຕາຕິ ເອກສ຺ສ ນິສ຺ສິຕຕ຺ຕາ. ພລວນິສ຺ສິໂຕ ຈາຕິ ເອຕ຺ຖາປິ ຈ ສທ຺ໂທ ສພ຺ພກຕ຺ຕູສຸ ໂຍເຊຕພ຺ໂພ. ຕສ຺ສາຕິ ວິສມາທິນິສ຺ສິຕສ຺ສ.

ໂສຕິ ສາມເຓໂຣ. ມງ຺ກຸຠູຕາຕ຺ຖາຕິ ມງ຺ກູ ຫຸຕ຺ວາ ຠູຕາ, ມງ຺ກຸໍ ວາ ປຕ຺ຕາ ອຕ຺ຖ ຠວຖາຕິ ອຕ຺ໂຖ. ເຕຕິ ປຣາຊຍຠິກ຺ຂູ. ຕສ຺ສາຕິ ສາມເຓຣສ຺ສ. ໂສຕິ ສາມເຓໂຣ. ເຕຕິ ປຣາຊຍຠິກ຺ຂູ. ຕນ຺ຕິ ສາມເຓຣໍ. ໂສຕິ ທຫໂຣ. ຕໂຕຕິ ສນ຺ນິປາຕກາຣຓາ. ຫິຍ຺ໂຍຕິ ອນນ຺ຕຣາຕີຕາເຫ. ອິຕີຕິ ເອວໍ ວເທຕິ. ໂສຕິ ທຫໂຣ. ອິທໍ ສິກ຺ຂາປທໍ ປຎ຺ຎຕ຺ຕນ຺ຕິ ໂຍຊນາ. ຄຈ຺ຉາຕິ ຄຈ຺ຉາຫິ. ອິຕີຕິ ເອວໍ ວຕ຺ຕພ຺ໂພຕິ ໂຍຊນາ.

ສງ຺ເຆນ ສທ຺ຘິໍ ອຘິກຣຓໍ ວິນິຈ຺ຉິນິຕ຺ວາ ປຣິເວຓຄຕໍ ເອກໍ ຠິກ຺ຂຸນ຺ຕິ ໂຍຊນາ. ກິສ຺ສາຕິ ເກນ ກາຣເຓນ. ເອວໍ ອິມິນາກາເຣນ ວິນິຈ຺ຉິຕພ຺ພໍ ນນູຕິ ໂຍຊນາ. ໂສຕິ ວິນິຈ຺ຉຍກາຣໂກ ຠິກ຺ຂຸ. ຉນ຺ທທາຍໂກ ສຸວິຎ຺ເຎຍ຺ໂຍເຍວ.

ອຘິກຣຓນິທານາທິວຓ຺ຓນາ

໓໔໒. ກິໍນິທານນ຺ຕິອາທີສຸ ຉສຸ ປເທສຸ ສມາສຠາວໍ ທສ຺ເສນ຺ໂຕ ອາຫ ‘‘ກິໍນິທານມສ຺ສາ’’ຕິອາທິ. ອສ຺ສາຕິ ວິວາທາຘິກຣຓສ຺ສ. ‘‘ກິໍນິທານ’’ນ຺ຕິ ປທານໍ ສຕິປິ ສມາສຠາເວ ພ຺ຍຎ຺ຊນນ຺ຕປກຕິກຕ຺ຕາ ‘‘ກິ’’ນ຺ຕິ ນິຄ຺ຄຫິຕນ຺ຕຠາເວນ ອຸຈ຺ຈາຣຓໍ ກາຕພ຺ພໍ. ສພ຺ພາເນຕານີຕິ ສພ຺ພານິ ນິທານນ຺ຕິອາທີນິ ເອຕານິ ປທານິ. ເວວຈນານີຕິ ເອກສ຺ມິໍເຍວ ‘‘ກາຣຓ’’ນ຺ຕິ ອຕ຺ເຖ ວິວິຘານິ ວຈນານິ ວິວຈນານິ, ຕານິເຍວ ເວວຈນານິ. ອຖ ວາ ວິວິຘໍ ວຈນເມຕສ຺ສຕ຺ຖສ຺ສາຕິ ວິວຈນໍ, ກາຣຓສງ຺ຂາໂຕ ອຕ຺ໂຖ, ອຠິເຘຍ຺ຍອຠິຘານຠາເວນ ສມ຺ພນ຺ຘຕ຺ຕາ ວິວຈນສ຺ສ ເອຕານິ ເວວຈນານິ, ປທານິ.

‘‘ອຏ຺ຐາຣສເຠທກຣວຕ຺ຖຸສງ຺ຂາໂຕ’’ຕິ ອິມິນາ ວິວາທສຣູປໍ ທສ຺ເສຕິ. ວິວາທນ຺ຕິ ອຏ຺ຐາຣສເຠທກຣວຕ຺ຖຸສງ຺ຂາຕໍ ວິວາທໍ. ເອຕນ຺ຕິ ‘‘ວິວາທນິທານ’’ນ຺ຕິ ເອຕໍ ວຈນໍ. ອສ຺ສາຕິ ອນຸວາທາຘິກຣຓສ຺ສ. ອິທມ຺ປີຕິ ‘‘ອນຸວາທນິທານ’’ນ຺ຕິ ວຈນມ຺ປິ. ອສ຺ສາຕິ ອາປຕ຺ຕາຘິກຣຓສ຺ສ. ເອຕນ຺ຕິ ‘‘ອາປຕ຺ຕິນິທານ’’ນ຺ຕິ ວຈນໍ. ກິຈ຺ຈເມວ ພ຺ຍຎ຺ຊນວຑ຺ຒນວເສນ ກິຈ຺ຈຍນ຺ຕິ ວຸຕ຺ຕໍ. ອສ຺ສາຕິ ກິຈ຺ຈາຘິກຣຓສ຺ສ. ສມນຸຠາສນາທີນໍ ອຸປ຺ປຊ຺ຊນກກິຈ຺ຈານນ຺ຕິ ສມ຺ພນ຺ໂຘ. ເອຕນ຺ຕິ ‘‘ກິຈ຺ຈຍນິທານ’’ນ຺ຕິ ວຈນໍ. ເອກປທໂຍຊນາຕິ ເອເກນ ‘‘ນິທານ’’ນ຺ຕິ ປເທນ ໂຍຊນາ. ສພ຺ພປທານີຕິ ສພ຺ພານິ ສມຸທຍາທີນິ ປທານິ.

ນວນ຺ນນ຺ຕິ ຊາຕິວເສນ ຉນ຺ນໍ ເຫຕູນໍ ນວສຸ ອນ຺ໂຕຄຘຕ຺ຕາ ຕິກວເສເນຕໍ ວຸຕ຺ຕໍ. ພ຺ຍຎ຺ຊນມຕ຺ຕນ຺ຕິ ເຫຕຸປຈ຺ຈຍວເສນ ພ຺ຍຎ຺ຊນເມວ. ຫີຕິ ສຈ຺ຈໍ, ຍສ຺ມາ ວາ. ເອຕ຺ຖາຕິ ຕຕິຍປຸຈ຺ຉາວິສ຺ສຊ຺ຊເນ.

໓໔໓. ທ຺ວາທສ ມູລານີຕິ ເອຕ຺ຖ ທ຺ວາທສນ຺ນໍ ມູລານໍ ສຣູປໍ ທສ຺ເສນ຺ໂຕ ອາຫ ‘‘ໂກຘອຸປນາຫຍຸຄຬກາທີນີ’’ຕິອາທິ. ເອຕ຺ຖ (ວິຠ. ໘໓໓, ໙໔໔) ອາທິສທ຺ເທນ ມກ຺ຂປຬາສຍຸຄຬ ອິສ຺ສາມຈ຺ຉຣິຍຍຸຄຬ ມາຍາສາເຐຍ຺ຍຍຸຄຬ ປາປິຈ຺ຉມິຈ຺ຉາທິຏ຺ຐິຍຸຄຬ ສນ຺ທິຏ຺ຐິປຣາມາສິອາຘານຄ຺ຄາຫິທຸປ຺ປຏິນິສ຺ສຄ຺ຄິຍຸຄຬວເສນ ປຎ຺ຈ ຍຸຄຬານິ ສງ຺ຄຓ຺ຫາຕິ. ອຊ຺ຌຕ຺ຕສນ຺ຕານປ຺ປວຕ຺ຕານີຕິ ນິຍກຊ຺ຌຕ຺ຕສນ຺ຕາເນ ປວຕ຺ຕານິ.

ອຏ຺ຐາຣສເຠທກຣວຕ຺ຖູນໍ ສມຸຏ຺ຐານຠາວໍ ນິພ຺ພຈເນນ ປກາເສນ຺ໂຕ ອາຫ ‘‘ຕໍ ຫີ’’ຕິອາທິ. ຕນ຺ຕິ ອນຸວາທາຘິກຣຓໍ, ສມຸຏ຺ຐາຕີຕິ ສມ຺ພນ຺ໂຘ. ເອຕ຺ຖ ຈ ‘‘ເອເຕສູ’’ຕິ ອິມິນາ ອຘິກຣຓຠາວໍ ທສ຺ເສຕິ. ‘‘ເອເຕຫີ’’ຕິ ອິມິນາ ກຣຓຠາວໍ ທສ຺ເສຕິ. ເຕນາຕິ ກາຣເຓນ. ອສ຺ສາຕິ ວິວາທາຘິກຣຓສ຺ສ. ເອຕານີຕິ ອຏ຺ຐາຣສເຠທກຣວຕ຺ຖູນິ. ສພ຺ພຕ຺ຖາຕິ ສພ຺ເພສໍ ອຘິກຣຓານໍ ສພ຺ເພສຸ ສມຸຏ຺ຐາເນສຸ.

໓໔໔. ເອເກນ ອຘິກຣເຓນ ກິຈ຺ຈາຘິກຣເຓນາຕິ ອິທໍ ວຸຕ຺ຕນ຺ຕິ ສມ຺ພນ຺ໂຘ. ເອຕານີຕິ ອຘິກຣຓານິ. ເອກໍສໂຕຕິ ເອກໍເສນ, ເອກໂກຏ຺ຐາເສນາຕິ ອຕ຺ໂຖ. ຫີຕິ ສຈ຺ຈໍ, ຍສ຺ມາ ວາ.

ສາວເສສາປຕ຺ຕິ ສມ຺ມຕິ ວິຍ ອນວເສສາປຕ຺ຕິ ນ ສມ຺ມຕີຕິ ໂຍຊນາ. ກສ຺ມາ ນ ສມ຺ມຕີຕິ ອາຫ ‘‘ນ ຫີ’’ຕິອາທິ. ຫີຕິ ຍສ຺ມາ. ສາຕິ ອນວເສສາ ອາປຕ຺ຕິ. ຕໂຕຕິ ອນວເສສາປຕ຺ຕິໂຕ. ເອຕ຺ຖ ຈ ‘‘ນ ສກ຺ກາ ເທເສຕຸ’’ນ຺ຕິ ອິມິນາ ເທສນາຄາມິນິຍາ ອຠາວໍ ທີເປຕິ. ‘‘ນ ສກ຺ກາ…ເປ… ປຕິຏ຺ຐາຕຸ’’ນ຺ຕິ ອິມິນາ ວຸຏ຺ຐານຄາມິນິຍາ ອຠາວໍ ທີເປຕິ.

໓໔໙. ຕໂຕຕິ ນຍໂຕ. ຍຕ຺ຖ ສຕິວິນໂຍຕິອາທິກາ ຉ ຍມກປຸຈ຺ຉາຕິ ສມ຺ພນ຺ໂຘ. ຕາສນ຺ຕິ ປຸຈ຺ຉານໍ. ປກາສິໂຕຕິ ປາກໂຏ.

໓໕໑. ທ຺ວິນ຺ນມ຺ປິ ສມຖານນ຺ຕິ ສມ຺ມຸຂາວິນຍສຕິວິນຍວເສນ ທ຺ວິນ຺ນມ຺ປິ ສມຖານໍ. ຍສ຺ມາຕິ ເຍນ ກາຣເຓນ ນ ສກ຺ກາຕິ ສມ຺ພນ຺ໂຘ. ປຕ຺ຕວຏ຺ຏີນໍ ນານາກຣຓນ຺ຕິ ສມ຺ພນ຺ໂຘ. ເຕສນ຺ຕິ ສມ຺ມຸຂາວິນຍສຕິວິນຍານໍ ນານາກຣຓນ຺ຕິ ສມ຺ພນ຺ໂຘ. ອຍໍ ປເນຕ຺ຖ ໂຍຊນາ – ຍສ຺ມາ ກທລິກ຺ຂນ຺ເຘ ປຕ຺ຕວຏ຺ຏີນໍ ນານາກຣຓໍ ວິນິພ຺ຠຸຊ຺ຊິຕ຺ວາ ທສ຺ເສຕຸໍ ນ ສກ຺ກາ ວິຍ ເຕສໍ ນານາກຣຓໍ ວິນິພ຺ຠຸຊ຺ຊິຕ຺ວາ ທສ຺ເສຕຸໍ ນ ສກ຺ກາຕິ. ເຕນາຕິ ກາຣເຓນ. ສພ຺ພຕ຺ຖາຕິ ສພ຺ເພສຸ ວິສ຺ສຊ຺ຊເນສຸ.

ສຕ຺ຕສມຖນິທານວຓ຺ຓນາ

໓໕໒. ອສ຺ສາຕິ ສມ຺ມຸຂາວິນຍສ຺ສ. ຕຕ຺ຖາຕິ ‘‘ນິທານນິທາໂນ’’ຕິ ປາເຐ. ອິທນ຺ຕິ ສມ຺ມຸຂາຈຕຸກ຺ກໍ. ລທ຺ຘຸປວາໂທຕິ ລທ຺ໂຘ ປເຣສໍ ອຸປວາໂທ ເຍນາຕິ ລທ຺ຘຸປວາໂທ, ຂີຓາສໂວ. ຍສ຺ສ ຈາຕິ ຍສ຺ສ ຈ ສນ຺ຕິເກຕິ ສມ຺ພນ຺ໂຘ. ອຸຠິນ຺ນນ຺ຕິ ເທສກປຏິຄ຺ຄາຫການໍ ທ຺ວິນ຺ນໍ.

໓໕໓. ນນຸ ປຸຈ຺ຉາຍໍ ‘‘ສຕ຺ຕນ຺ນໍ ສມຖານ’’ນ຺ຕິ ວຸຕ຺ຕໍ, ກສ຺ມາ ປນ ວິສ຺ສຊ຺ຊນາຍໍ ສມ຺ມຸຂາວິນຍສ຺ສ ສມຸຏ຺ຐານໍ ນ ວຸຕ຺ຕນ຺ຕິ ອາຫ ‘‘ກິຎ຺ຈາປີ’’ຕິອາທິ. ຕຕ຺ຖ ກິຎ຺ຈາປິ ວຸຕ຺ຕນ຺ຕິ ໂຍຊນາ. ເອຕ຺ຖ ກິຎ຺ຈາປິສທ຺ໂທ ສມ຺ຠາວນຕ຺ໂຖ, ປນສທ຺ໂທ ຄຣຫຕ຺ໂຖ. ຕຖາ ວຸຕ຺ຕມ຺ປີຕິ ໂຍຊນາ. ກມ຺ມສງ຺ຄຫາຠາເວນາຕິ ກມ຺ເມ ສງ຺ຄຫສ຺ສ ອຠາເວນ. ຕຕ຺ຖາຕິ ຕສ຺ມິໍ ‘‘ກມ຺ມສ຺ສ ກິຣິຍາ’’ຕິອາທິປາເຐ. ກມ຺ມໍ ກຣີຍຕິ ອິມາຍາຕິ ກິຣິຍາ, ຎຕ຺ຕິ. ເຕນ ວຸຕ຺ຕໍ ‘‘ກມ຺ມສ຺ສ ກິຣິຍາຕິ ຎຕ຺ຕິ ເວທິຕພ຺ພາ’’ຕິ. ກຣິຍເຕ ຐປິຍເຕ ກຣຓໍ. ສຍໍ ອຸປຄມິຍເຕ ອຸປຄມນໍ. ອຊ຺ເຌສເນນ ປຣໍ ອຸປຄມາປິຍເຕ ອຊ຺ຌຸປຄມນໍ. ອຘິວາສິຍເຕ ອຘິວາສນາ. ອປ຺ປຏິກ຺ໂກສິຍເຕ ອປຏິກ຺ໂກສນາ. ອິຕິ ອິມມຕ຺ຖໍ ທສ຺ເສນ຺ໂຕ ອາຫ ‘‘ກຣຓນ຺ຕິ ຕສ຺ສາເຍວາ’’ຕິອາທິ. ເອຕນ຺ຕິ ກມ຺ມໍ. ເມຕິ ມຍ຺ຫໍ. ຂມຸຘາຕຸປໂຍເຄ ສມ຺ປທານຕ຺ເຖ ສມ຺ປທານວຈນໍ. ອຖ ວາ ເມຕິ ມຍາ. ກຕ຺ວຕ຺ເຖ ກຣຓວຈນໍ, ສາມິວຈນໍ ວາ. ຂມຕີຕິ ກຕ຺ຕຸຣູປສທິສໍ ກມ຺ມຣູປໍ. ຣູປຎ຺ຫິ ກຕ຺ຕຸຣູປສທິສໍ ກມ຺ມຣູປໍ ‘‘ຂມຕິ ສງ຺ຆສ຺ສາ’’ຕິອາທີສຸ (ມຫາວ. ໑໒໗) ວິຍ. ກມ຺ມຣູປສທິສໍ ກຕ຺ຕຸຣູປໍ ‘‘ອຸປາສໂກ ສີລໍ ສມາທິຍຕີ’’ຕິອາທີສຸ (ປຏ຺ຐາ. ໑.໑.໔໒໓) ວິຍ. ເອຕ຺ຖ ກມ຺ມຕ຺ເຖ ປວຕ຺ໂຕ ຍປຈ຺ຈໂຍ ໂລໂປຕິ ທຏ຺ຐພ຺ພໍ.

ສຕ຺ຕສມຖນານາຕ຺ຖາທິວຓ຺ຓນາ

໓໕໔. ມາຕາປຸຕ຺ຕາທີນໍ ອຍໍ ວິວາໂທຕິ ໂຍຊນາ. ‘‘ວິຣຸທ຺ຘວາທຕ຺ຕາ’’ຕິ ອິມິນາ ວທນໍ ວາໂທ, ວິຣຸທ຺ໂຘ ວາໂທ ວິວາໂທຕິ ນິພ຺ພຈນໍ ທສ຺ເສຕິ. ອຘິກຣຓີຍຕາຍາຕິ ວູປສມິຕຕາຍ. ອິມິນາ ອຘິກຣິຍຕິ ສມເຖຫິ ວູປສມິຍຕີຕິ ອຘິກຣຓນ຺ຕິ ວຈນຕ຺ຖໍ ທສ຺ເສຕິ. ສພ຺ພຕ຺ຖາຕິ ສພ຺ເພສຸ ອຘິກຣຓເຠເທສຸ.

ອິຕິ ອຘິກຣຓເຠທວຓ຺ຓນາຍ ໂຍຊນາ ສມຕ຺ຕາ.