ທຸຕິຍຄາຖາສງ຺ຄຓິກໍ

ໂຈທນາທິປຸຈ຺ຉາວິສ຺ສຊ຺ຊນາວຓ຺ຓນາ

໓໕໙. ທຸຕິຍຄາຖາສງ຺ຄຓິຍໍ ໂຈທນາ ນາມ ກິໍ ທສ຺ເສຕ຺ວາ ໂຈທນາຕິ ອາຫ ‘‘ວຕ຺ຖຸຎ຺ຈ ອາປຕ຺ຕິຎ຺ຈ ທສ຺ເສຕ຺ວາ ໂຈທນາ’’ຕິ. ໂທສໍ ສຣາເປຕີຕິ ໂທສສາຣຓາ. ສງ຺ຆສນ຺ນິປາໂຕຕິ ສງ຺ຆສ຺ສ ສນ຺ນິປຕນໍ. ອິມິນາ ສງ຺ໂຆຕິ ເອຕ຺ຖ ອຸຕ຺ຕຣປທໂລປໍ ທສ຺ເສຕິ. ມຕິກມ຺ມນ຺ຕິ ເອຕ຺ຖ ມຕິສທ຺ໂທ ອິຈ຺ຉຕ຺ໂຖຕິ ອາຫ ‘‘ວຸຈ຺ຈຕິ ມນ຺ຕຄ຺ຄຫຓ’’ນ຺ຕິ. ຕນ຺ຕິ ມຕິກມ຺ມໍ.

‘‘ເຕນ ຈຸທິຕກປຸຄ຺ຄເລນາ’’ຕິ ປທໍ ‘‘ສາຣຓຕ຺ຖາຍາ’’ຕິ ປເທ ກາຣິຕກມ຺ມໍ. ຕສ຺ສ ປຸຄ຺ຄລສ຺ສາຕິ ຕສ຺ສ ຈຸທິຕກສ຺ສ ປຸຄ຺ຄລສ຺ສ, ອິມິນາ ‘‘ນິຄ຺ຄຫຕ຺ຖາຍາ’’ຕິ ປທສ຺ສ ກມ຺ມໍ ທສ຺ເສຕິ. ຕຕ຺ຖາຕິ ຕສ຺ມິໍ ອຘິກຣຓວິນິຈ຺ຉຍຏ຺ຐາເນ. ປຣິຄ຺ຄຫຓຕ຺ຖາຍາຕິ ປຣິ ວີມໍສິຕ຺ວາ ຄຫຓຕ຺ຖາຍ. ຘມ຺ມາ-ຘມ຺ມນ຺ຕິ ຠູຕາຠູຕໍ. ‘‘ວິນິຈ຺ຉຍສນ຺ນິຏ຺ຐາປນຕ຺ຖ’’ນ຺ຕິ ອິມິນາ ປາຬິຍໍ ປາຐເສສໍ ທສ຺ເສຕິ.

ມາ ໂຂ ປຏິຆນ຺ຕິ ເອຕ຺ຖ ປຏິຆສທ຺ໂທ ໂກປປຣິຍາໂຍຕິ ອາຫ ‘‘ໂກປໍ ມາ ຊນຍີ’’ຕິ. ‘‘ຈຸທິຕເກ ວາ ໂຈທເກ ວາ’’ຕິ ອິມິນາ ‘‘ສງ຺ເຆ’’ຕິ ອາຘາຣໍ ປຏິກ຺ຂິປຕິ. ສເຈ ອນຸວິຊ຺ຊໂກ ຕຸວນ຺ຕິ ເອຕ຺ຖ ອນຸວິຊ຺ຊກສທ຺ໂທ ວິນຍຘຣປຣິຍາໂຍຕິ ອາຫ ‘‘ວິນຍຘໂຣ’’ຕິ. ວິນຍຘໂຣ ຫິ ຍສ຺ມາ ໂຈທກຈຸທິຕການໍ ວຈນໍ ອນຸມິນິຕ຺ວາ ວຕ຺ຖຸອາປຕ຺ຕາທິວເສນ ວິທຕິ, ຕສ຺ມາ ອນຸວິຊ຺ຊໂກຕິ ວຸຈ຺ຈຕິ.

ວິຣຸທ຺ຘໍ ຄາຫໍ ສໍວຕ຺ເຕຕີຕິ ວິຄ຺ຄາຫິກໍ. ‘‘ນ ຕ຺ວ’’ນ຺ຕິອາທິນາ ຓິກປຈ຺ຈຍສ຺ສ ສຣູປໍ ທສ຺ເສຕິ. ຍາຍາຕິ ກຖາຍ. ສຸຕ຺ຕາທີນໍ ສຣູປໍ ທສ຺ເສນ຺ໂຕ ອາຫ ‘‘ສຸຕ຺ຕໍ ນາມາ’’ຕິອາທິ.

ອນຸຍຸຎ຺ຊນວຕ຺ຕນ຺ຕິ ອນຸຍຸຎ຺ຊນສ຺ສ, ອນຸຍຸຎ຺ຊເນ ວາ ວຕ຺ຕໍ. ກຸສເລນ ພຸທ຺ຘິມຕາຕິ ເອຕ຺ຖ ກຸສລສທ຺ໂທ ເຉກປຣິຍາໂຍ, ພຸທ຺ຘິມນ຺ຕຸສທ຺ໂທ ປຓ຺ຑິຕປຣິຍາໂຍຕິ ອາຫ ‘‘ເຉເກນ ປຓ຺ຑິເຕນາ’’ຕິ. ‘‘ຎາຓປາຣມິປ຺ປຕ຺ເຕນາ’’ຕິ ອິມິນາ ພຸທ຺ຘິມຕາຕິ ເອຕ຺ຖ ນ ເກວລໍ ຎາຓສາມຎ຺ຎໍ, ອຖ ໂຂ ສພ຺ພຎ຺ຎຸຕຎ຺ຎາຓນ຺ຕິ ທສ຺ເສຕິ. ອຍນ຺ຕິ ເອໂສ ຍຖາວຸຕ຺ໂຕ ອຕ຺ໂຖ. ອຍໍ ປນາຕິ ເອໂສ ວກ຺ຂມາໂນ ປນ. ເອຕ຺ຖາຕິ ອິມາສຸ ຄາຖາສຸ. ສເຈ ຕ຺ວໍ ອນຸວິຊ຺ຊໂກ ໂຫສີຕິ ໂຍຊນາ. ຍໍ ປນ ອນຸໂຍຄວຕ຺ຕໍ ກຕໍ ສຸປຎ຺ຎຕ຺ຕໍ ສພ຺ພສິກ຺ຂາປທານໍ ອນຸໂລມນ຺ຕິ ໂຍຊນາ. ຕນ຺ຕິ ອນຸໂຍຄວຕ຺ຕໍ. ອິຕີຕິ ອຍໍ ສາຘິປ຺ປາຍສງ຺ເຂປວຓ຺ຓນາ. ອຕ຺ຕໂນຕິ ອນຸວິຊ຺ຊກສ຺ສ. ສມ຺ປຣາເຍຕິ ປຣໂລເກ. ໂຍຕິ ອນຸວິຊ຺ຊໂກ. ຕນ຺ຕິ ອນຸໂຍຄວຕ຺ຕໍ. ຄຕິນ຺ຕິ ສຸຄຕິໍ. ຫິຕນ຺ຕິ ໂຈທກຈຸທິຕການໍ ຫິຕໍ. ຄເວສນ຺ໂຕຕິ ຎາເຓນ ເອສນ຺ໂຕ. ອິມິນາ ຫິຕໍ ເອສນ຺ໂຕຕິ ຫິເຕສີຕິ ວຈນຕ຺ຖໍ ທສ຺ເສຕິ. ເມຕ຺ຕຎ຺ຈາຕິ ອປ຺ປນາປຕ຺ຕໍ ເມຕ຺ຕຎ຺ຈ. ເມຕ຺ຕາປຸພ຺ພຠາຄຎ຺ຈາຕິ ອປ຺ປນາເມຕ຺ຕາຍ ປຸພ຺ພຠາເຄ ປວຕ຺ຕໍ ປຣິກມ຺ມອຸປຈາຣເມຕ຺ຕຎ຺ຈ. ຕວ ຠາເຣ ສງ຺ເຆນ ກເຕ ເອວາຕິ ໂຍຊນາ.

ໂຍຕິ ອນຸວິຊ຺ຊໂກ. ເອເຕສນ຺ຕິ ໂຈທກຈຸທິຕການໍ. ‘‘ຠາສິຕ’’ນ຺ຕິ ອິມິນາ ໂວຫາຣສທ຺ໂທ ຠາສິຕປຣິຍາໂຍຕິ ທສ຺ເສຕິ. ຕນ຺ຕິ ສຫສາ ໂວຫາຣໍ.

ອນຸສນ຺ຘິຕນ຺ຕິ ເອຕ຺ຖ ວິນິຈ຺ຉຍານຸສນ຺ຘິໍ ປຏິກ຺ຂິປນ຺ໂຕ ອາຫ ‘‘ກຖານຸສນ຺ຘິ ວຸຈ຺ຈຕີ’’ຕິ. ກຖາຍ ອນຸຣູປໍ ສນ຺ທຫນໍ ກຖານຸສນ຺ຘິ. ປຏິຎ຺ຎານຸສນ຺ຘິເຕນາຕິ ເອຕ຺ຖ ປຏິຎ຺ຎາສທ຺ທອນຸສນ຺ຘິສທ຺ທານໍ ຕຸລ຺ຍາຘິກຣຓໂຕ ອຎ຺ຎໍ ຠິນ຺ນາຘິກຣຓໍ ທສ຺ເສນ຺ໂຕ ອາຫ ‘‘ອຖວາ’’ຕິອາທິ. ລຊ຺ຊິໍ ປຸຄ຺ຄລນ຺ຕິ ສມ຺ພນ຺ໂຘ. ຕຕ຺ຖາຕິ ຄາຖາຍໍ. ວຕ຺ຕານຸສນ຺ຘິນາຕິ ອາຈາຣສງ຺ຂາເຕນ ວຕ຺ເຕນ ອນຸສນ຺ຘິນາ ອສ຺ສ ອລຊ຺ຊີສ຺ສ ວຕ຺ເຕນ ສທ຺ຘິໍ ຍາ ປຏິຎ຺ຎາ ສນ຺ຘິຍຕີຕິ ໂຍຊນາ.

ຊານນ຺ໂຕ ອາປຊ຺ຊຕີຕິ ຊານນ຺ໂຕ ຫຸຕ຺ວາ ອາປຊ຺ຊຕິ. ອິມິນາ ສຎ຺ຈິຈ຺ຈາຕິ ປທສ຺ສ ສຎ຺ເຈເຕຕ຺ວາຕິ ອຕ຺ຖໍ ທສ຺ເສຕິ. ວີຕິກ຺ກມເຈຕນາຍ ສທ຺ຘິໍ ເຈເຕຕ຺ວາຕິ ອຕ຺ໂຖ. ‘‘ນ ເທເສຕິ ນ ວຸຏ຺ຐາຕີ’’ຕິ ອິມິນາ ປຣິຄູຫຕີຕິ ເອຕ຺ຖ ປຣິຄູຫນໍ ນາມ ອຕ຺ຖໂຕ ນ ເທສນໍ ນ ວຸຏ຺ຐານນ຺ຕິ ທສ຺ເສຕິ.

ຍນ຺ຕິ ‘‘ສຎ຺ຈິຈ຺ຈ ອາປຕ຺ຕິໍ ອາປຊ຺ຊຕີ’’ຕິ ວຈນໍ. ຕຸມ຺ເຫຫີຕິ ປຣິຫາຣກາຣເກຫິ. ສຈ຺ຈນ຺ຕິ ຕຖໍ ອວິຕຖໍ. ອຫມ຺ປີຕິ ໂຈທໂກປິ. ປິສທ຺ເທນ ປຣິຫາຣກໍ ສມ຺ປິຓ຺ເຑຕິ. ນນ຺ຕິ ‘‘ສຎ຺ຈິຈ຺ຈາ’’ຕິອາທິວຈນໍ. ຕນ຺ຕິ ຕຸວໍ, ຕ຺ວໍ ວາ.

ປຸພ຺ພາປຣນ຺ຕິ ເອຕ຺ຖ ປຸພ຺ເພ ກເຖຕພ຺ພໍ ປຸພ຺ພໍ, ອປຣມ຺ຫິ ກເຖຕພ຺ພໍ ອປຣໍ, ປຸພ຺ພຎ຺ຈ ອປຣຎ຺ຈ ປຸພ຺ພາປຣນ຺ຕິ ທສ຺ເສນ຺ໂຕ ອາຫ ‘‘ປຸເຣ’’ຕິອາທິ. ‘‘ຕສ຺ມິໍ ປຸພ຺ພາປເຣ’’ຕິ ອິມິນາ ປາຬິຍໍ ປຸພ຺ພປຣສ຺ສາຕິ ເອຕ຺ຖ ຠຸມ຺ມຕ຺ເຖ ສາມິວຈນນ຺ຕິ ທສ຺ເສຕິ.

ທ຺ວີຫີຕິ ປາຣາຊິກສງ຺ຆາທິເສສວເສນ ທ຺ວີຫິ. ປຎ຺ຈຫີຕິ ຖຸລ຺ລຈ຺ຈຍາທິວເສນ ປຎ຺ຈຫິ. ມິຈ຺ຉາທິຏ຺ຐິຍາຕິ ‘‘ນຕ຺ຖິ ທິນ຺ນ’’ນ຺ຕິອາທິນາ (ຘ. ສ. ໑໒໒໑) ທສວຕ຺ຖຸກາຍ ມິຈ຺ຉາທິຏ຺ຐິຍາ. ອນ຺ຕຄ຺ຄາຫິກທິຏ຺ຐິຍາຕິ ‘‘ສສ຺ສໂຕ ໂລໂກ’’ຕິອາທິນາ (ທີ. ນິ. ໑.໓໑; ມ. ນິ. ໑.໒໖໙) ທສວຕ຺ຖຸກາຍ ອນ຺ຕຄ຺ຄາຫິກທິຏ຺ຐິຍາ. ສພ຺ພຕ຺ຖາຕິ ສພ຺ເພສຸ ທຸຕິຍຄາຖາສງ຺ຄຓິເກສຸ.

ອິຕິ ທຸຕິຍຄາຖາສງ຺ຄຓິກວຓ຺ຓນາຍ ໂຍຊນາ ສມຕ຺ຕາ.