ໂຈທນາກຓ຺ຑໍ

ອນຸວິຊ຺ຊກກິຈ຺ຈວຓ຺ຓນາ

໓໖໐-໑. ອິທານິ ອາຣທ຺ຘນ຺ຕິ ສມ຺ພນ຺ໂຘ. ເອໂກ ຠິກ຺ຂຸ ເອເກນ ມາຕຸຄາເມນາຕິ ໂຍຊນາ. ໂສຕິ ປສ຺ສນ຺ໂຕ ຠິກ຺ຂຸ. ຕນ຺ຕິ ນິກ຺ຂມນ຺ຕໍ ປວິສນ຺ຕໍ ວາ ຠິກ຺ຂຸໍ. ອິຕໂຣຕິ ຈຸທິຕໂກ. ຕສ຺ສາຕິ ໂຈທກສ຺ສ. ນ ອຸເປຕີຕິ ນ ອຸປຄຈ຺ຉຕິ. ນ ປຏິຊານາຕີຕິ ນ ປຏິສ຺ສວໍ ກໂຣຕິ. ເອຕ຺ຖາຕິ ມາຕຸຄາເມນ ນິກ຺ຂມນ຺ຕປວິສນ຺ຕຏ຺ຐາເນ. ຍນ຺ຕິ ກມ຺ມໍ. ເຕນາຕິ ໂຈທເກນ. ຕສ຺ສາຕິ ໂຈທກສ຺ສ ວຈເນນາຕິ ສມ຺ພນ຺ໂຘ. ອິຕໂຣຕິ ຈຸທິຕໂກ. ອສຸທ຺ຘປຣິສງ຺ກິໂຕຕິ ອສຸທ຺ຘາຍ ອຏ຺ຐາເນ ອຸປ຺ປນ຺ນາຍ ປຣິສງ຺ກາຍ ປຣິສງ຺ກິໂຕ. ຕທຕ຺ຖໍ ທສ຺ເສຕິ ‘‘ອມູລກປຣິສງ຺ກິໂຕ’’ຕິ ອິມິນາ. ຕສ຺ສ ປຸຄ຺ຄລສ຺ສາຕິ ຈຸທິຕກສ຺ສ ປຏິຎ຺ຎາຍາຕິ ສມ຺ພນ຺ໂຘ. ສພ຺ພຕ຺ຖາຕິ ສພ຺ເພສຸ ອນຸວິຊ຺ຊກກິຈ຺ເຈສຸ.

ອິຕິ ອນຸວິຊ຺ຊກກິຈ຺ຈວຓ຺ຓນາຍ ໂຍຊນາ ສມຕ຺ຕາ.

ໂຈທກປຸຈ຺ຉາວິສ຺ສຊ຺ຊນາ

໓໖໒-໓. ສຈ຺ເຈ ຈ ອກຸປ຺ເປ ຈາຕິ ປຘານໍ ສມ຺ພນ຺ຘຏ຺ຐານໍ ທສ຺ເສນ຺ໂຕ ອາຫ ‘‘ປຕິຏ຺ຐາຕພ຺ພ’’ນ຺ຕິ. ‘‘ຍ’’ນ຺ຕິອາທິນາ ສຈ຺ເຈ ປຕິຏ຺ຐາຕພ຺ພຠາວໍ ທສ຺ເສຕິ. ຍນ຺ຕິ ກມ຺ມໍ. ‘‘ນ ຈາ’’ຕິອາທິນາ ອກຸປ຺ເປ ປຕິຏ຺ຐາຕພ຺ພຠາວໍ ທສ຺ເສຕິ. ໂອຕິຓ຺ຓຎ຺ຈາຕິ ວິນິຈ຺ຉຍໍ ໂອຕິຓ຺ຓຎ຺ຈ. ‘‘ວຈນ’’ນ຺ຕິ ອິມິນາ ໂອຕິຓ຺ຓາໂນຕິຓ຺ຓສຣູປໍ ທສ຺ເສຕິ. ຕຕ຺ຣາຕິ ປຸຣິມວຈນາເປກ຺ຂໍ. ‘‘ໂອຕິຓ຺ຓາໂນຕິຓ຺ຓໍ ຊານິຕພ຺ພ’’ນ຺ຕິ ວຈເນຕິ ຫິ ອຕ຺ໂຖ. ໂຈທກສ຺ສ ປມາຓນ຺ຕິ ‘‘ຘມ຺ໂມ’’ຕິ ວາ ‘‘ອຘມ຺ໂມ’’ຕິ ວາ ‘‘ພາໂລ’’ຕິ ວາ ‘‘ປຓ຺ຑິໂຕ’’ຕິ ວາ ໂຈທກສ຺ສ ປມາຓໍ. ຈຸທິຕກສ຺ສ ປມາຓນ຺ຕິ ຘມ຺ມຈຸທິຕໂກ ນຸ ໂຂ, ໂນຕິ ຈຸທິຕກສ຺ສ ປມາຓໍ. ອນຸວິຊ຺ຊກສ຺ສ ປມາຓນ຺ຕິ ສກ຺ກາ ນຸ ໂຂ ວິນິຈ຺ຉິຕຸໍ, ໂນຕິ ອນຸວິຊ຺ຊກສ຺ສ ປມາຓໍ. ອນຸວິຊ຺ຊໂກ ວຕ຺ຕພ຺ໂພຕິ ສມ຺ພນ຺ໂຘ. ເຍນ ຘມ຺ເມນາຕິອາທີສຸ ຘມ຺ມາທີນໍ ສຣູປໍ ທສ຺ເສນ຺ໂຕ ອາຫ ‘‘ຘມ຺ໂມຕິ ຠູຕໍ ວຕ຺ຖູ’’ຕິອາທິ. ເອເຕນ ຘມ຺ເມນ ຈ ເອເຕນ ວິນເຍນ ຈ ເອເຕນ ສຕ຺ຖຸສາສເນນ ຈາຕິ ໂຍຊນາ. ຕສ຺ມາ ອນຸວິຊ຺ຊເກນ ວູປສເມຕພ຺ພນ຺ຕິ ສມ຺ພນ຺ໂຘ. ເອຕ຺ຖາຕິ ອນຸວິຊ຺ຊກສ຺ສ ປຏິປຊ຺ຊິຕພ຺ພຏ຺ຐາເນ.

ອວຎ຺ຎນ຺ຕິ ອວຊານນໍ. ອິເມຕິ ເຖຣາ. ‘‘ຂຕຕ຺ຕາ’’ຕິ ອິມິນາ ອຕ຺ຕນາວ ອຕ຺ຕາ ຂຎ຺ຎຕີຕິ ຂໂຕຕິ ວຈນຕ຺ຖໍ ທສ຺ເສຕິ. ອຸປຫນິຍນ຺ຕີຕິ ອຸປຫຕານິ, ອຸປຫຕານິ ອິນ຺ທ຺ຣິຍານິ ອເນນາຕິ ອຸປຫຕິນ຺ທ຺ຣິໂຍ. ‘‘ປຎ຺ຎາຍ ອຠາວໂຕ’’ຕິ ອິມິນາ ທຸມ຺ເມໂຘຕິ ເອຕ຺ຖ ທຸສທ຺ໂທ ອຠາວຕ຺ໂຖ, ເມຘາສທ຺ໂທ ປຎ຺ຎາປຣິຍາໂຍຕິ ທສ຺ເສຕິ. ນຕ຺ຖິ ເມຘາ ເອຕສ຺ສາຕິ ທຸມ຺ເມໂຘຕິ ນິພ຺ພຈນໍ ກາຕພ຺ພໍ. ຂໂຕ…ເປ… ທຸມ຺ເມໂຘ ໂສ ອນຸວິຊ຺ຊໂກ ອຸປຄຈ຺ຉຕີຕິ ໂຍຊນາ. ຕສ຺ມາຕິ ຍສ຺ມາ ອຸປຄຈ຺ຉຕິ, ຕສ຺ມາ ວຸຕ຺ຕນ຺ຕິ ສມ຺ພນ຺ໂຘ. ຕສ຺ສາຕິ ປາຐສ຺ສ, ຄາຖາຍ ວາ. ວິຕ຺ຖາຣໍ ທສ຺ເສນ຺ໂຕ ອາຫ ‘‘ຈຸທິຕກໂຈທເກສຸ ຫີ’’ຕິອາທິ. ອຸໂຠເປເຕຕິ ອຸໂຠປິ ເອເຕ ອາມິສປຸຄ຺ຄລນິສ຺ສເຍ. ຘມ຺ໂມຕິ ສາສນຘມ຺ໂມ. ອິຕີຕິ ອຍມຕ຺ໂຖ.

ອຸປກຓ຺ຓກໍ ຊປ຺ປຕີຕິ ເອຕ຺ຖ ກຓ຺ຓສ຺ສ ສມີປໍ ອຸປກຓ຺ຓໍ, ຕເທວ ອຸປກຓ຺ຓກນ຺ຕິ ທສ຺ເສນ຺ໂຕ ອາຫ ‘‘ເອວໍ ກເຖຫີ’’ຕິອາທິ. ‘‘ກຓ຺ຓມູເລ’’ຕິ ອິມິນາ ອຸປກຓ຺ຓກນ຺ຕິ ເອຕ຺ຖ ອຸປສທ຺ທສ຺ສ ສມີປຕ຺ຖໍ ທສ຺ເສຕິ. ມນ຺ເຕຕີຕິ ກເຖຕິ. ອິມິນາ ຊປ຺ປຘາຕຸຍາ ກຖນຕ຺ຖໍ ທສ຺ເສຕິ. ຊິມ຺ຫໍ ເປກ຺ຂຕີຕິ ເອຕ຺ຖ ຊິມ຺ຫສທ຺ໂທ ກຸຏິລວາຈໂກ, ກຸຏິລໍ ນາມ ອຕ຺ຖໂຕ ອິຘ ໂທໂສຕິ ອາຫ ‘‘ໂທສເມວາ’’ຕິ.

ກຖານຸສນ຺ຘີຕິ ຈຸທິຕກອນຸວິຊ຺ຊການໍ ກຖາຍ ອນຸສນ຺ຘິ. ວິນິຈ຺ຉຍານຸສນ຺ຘີຕິ ອນຸວິຊ຺ຊເກນ ກຕສ຺ສ ອາປຕ຺ຕານາປຕ຺ຕິວິນິຈ຺ຉຍສ຺ສ ອນຸສນ຺ຘິ. ສພ຺ພຕ຺ຖາຕິ ໂຈທນາກຓ຺ເຑ.

ອິຕິ ໂຈທນາກຓ຺ຑວຓ຺ຓນາຍ ໂຍຊນາ ສມຕ຺ຕາ.