ອຸໂປສຖາທິປຸຈ຺ຉາວິສ຺ສຊ຺ຊນາ

໓໓໒. ວິສ຺ສຊ຺ຊເນ ເອວມຕ຺ໂຖ ເວທິຕພ຺ໂພຕິ ໂຍຊນາ. ກາຍສາມຄ຺ຄີ ອາທິ ນາມາຕິ ໂຍຊນາ. ໂອສາຣຓກິຣິຍາຕິ ກຖນກິຣິຍາ. ຉນ຺ທປວາຣຓໍ ອາຫຣິຕ຺ວາຕິ ຉນ຺ທຎ຺ຈ ປວາຣຓຎ຺ຈ ອາຫຣິຕ຺ວາ. ປວາຣຓາກຖາຕິ ‘‘ສງ຺ຆໍ ຠນ຺ເຕ ປວາເຣມີ’’ຕິອາທິກາ (ມຫາວ. ໒໑໐) ປວາຣຓາກຖາ. ຕຊ຺ຊນີຍກມ຺ມາທີສຸ ວຕ຺ຖຸ ນາມ ກິໍ? ປຸຄ຺ຄໂລ ນາມ ໂກຕິ ອາຫ ‘‘ວຕ຺ຖຸ ນາມາ’’ຕິອາທິ. ຕຕ຺ຖ ເຍນ ວຕ຺ຖຸນາຕິ ຠຓ຺ຑນກາຣກາທິນາ ເຍນ ວຕ຺ຖຸນາ ກຣຓຠູເຕນ, ເຫຕຸຠູເຕນ ວາ. ເຍນາຕິ ປຸຄ຺ຄເລນ ກຕ຺ຕຸຠູເຕນ, ກຕນ຺ຕິ ສມ຺ພນ຺ໂຘ. ‘‘ຕສ຺ສາ ຕສ຺ສາ ກມ຺ມວາຈາຍາ’’ຕິ ປທໍ ‘‘ອວສານວຈນ’’ນ຺ຕິ ປເທ ອວຍວິສມ຺ພນ຺ໂຘ. ສພ຺ພຕ຺ຖາຕິ ສພ຺ເພສຸ ວິສ຺ສຊ຺ຊເນສຸ.

ອິຕິ ອຸໂປສຖາທິປຸຈ຺ຉາວິສ຺ສຊ຺ຊນວຓ຺ຓນາຍ ໂຍຊນາ

ສມຕ຺ຕາ.

ອຕ຺ຖວສປກຣຓວຓ຺ຓນາ

໓໓໔. ອຕ຺ຖວສປກຣເຓຕິ ອວຍວິອາຘາໂຣ. ທສ ອຕ຺ຖວເສຕິອາທີສູຕິ ອວຍວາຘາໂຣ. ຍນ຺ຕິ ວຈນໍ. ອຸປຣິມໍ ອຸປຣິມໍ ປທນ຺ຕິ ‘‘ສງ຺ຆຜາສຸຕາຍາ’’ຕິອາທິກໍ ອຸຕ຺ຕຣຸຕ຺ຕຣິ ວຸຕ຺ຕໍ ປທໍ. ເຫຏ຺ຐິມສ຺ສ ເຫຏ຺ຐິມສ຺ສ ປທສ຺ສາຕິ ‘‘ສງ຺ຆສຸຏ຺ຐຸຕາຍາ’’ຕິອາທິກສ຺ສ ອໂຘ ອໂຘ ວຸຕ຺ຕສ຺ສ ປທສ຺ສ.

ຍເທຕໍ ປທສຕໍ ວຸຕ຺ຕນ຺ຕິ ໂຍຊນາ. ຕຕ຺ຖາຕິ ຕສ຺ມິໍ ປທສເຕ, ນິທ຺ຘາຣເຓ ຠຸມ຺ມໍ, ອຕ຺ຖສຕນ຺ຕິ ອຠິເຘຍ຺ຍສຕໍ. ຘມ຺ມສຕນ຺ຕິອຠິຘານສຕໍ, ປາຬິສຕນ຺ຕິ ອຕ຺ໂຖ. ‘‘ອຕ຺ຖສຕໍ ຘມ຺ມສຕ’’ນ຺ຕິ ປທານໍ ອຕ຺ຖນ຺ຕຣວິກປ຺ປໍ ທສ຺ເສນ຺ໂຕ ອາຫ ‘‘ອຖ ວາ’’ຕິອາທິ. ຕຕ຺ຖ ເຍ ທສ ອຕ຺ຖວເສ ປຏິຈ຺ຈ ປຎ຺ຎຕ຺ຕໍ, ເຕສໍ ທສອຕ຺ຖວສານນ຺ຕິ ໂຍຊນາ, ເຍ ທສ ອຕ຺ຖວເສ ປຸພ຺ເພ ວຓ຺ຓິຕາ, ເຕສໍ ທສອຕ຺ຖວສານນ຺ຕິ ໂຍຊນາ. ປຐມປາຣາຊິກວຓ຺ຓນາຍໍ (ປາຣາ. ອຏ຺ຐ. ໑.໓໙) ວຓ຺ຓິຕາຕິ ສມ຺ພນ຺ໂຘ. ຕຕ຺ຖາຕິ ‘‘ສງ຺ຆສຸຏ຺ຐຸຕາຍາ’’ຕິອາທິປາເຐ. ສຸຏ຺ຐຸ ເທວາຕິ ສຸຏ຺ຐຸ ມຫາຣາຊ. ຫິ ຍສ຺ມາ ອາຓາພລໂຠຄພລອິສ຺ສຣິຍພເລຫິ ທິພ຺ພຕິ, ຕສ຺ມາ ເທໂວຕິ ວຸຈ຺ຈຕິ. ໂຍ ຈາຕິ ຄຫຏ຺ໂຐ ວາ ປພ຺ພຊິໂຕ ວາ, ສມ຺ປຏິຈ຺ຉຕີຕິ ສມ຺ພນ຺ໂຘ. ຕສ຺ມາຕິ ຍສ຺ມາ ຫິຕາຍ ສຸຂາຍ ໂຫຕິ, ຕສ຺ມາ. ອານິສໍສໍ ທສ຺ເສຕ຺ວາ ປຎ຺ຎເປສ຺ສາມີຕິ ສມ຺ພນ຺ໂຘ. ອຠິຠວິຕ຺ວາ ນ ປຎ຺ຎເປສ຺ສາມີຕິ ໂຍຊນາ. ອິຘາຕິ ອຕ຺ຖວສປກຣເຓ. ຕທຕ຺ຖໂຊຕການນ຺ຕິ ໂສເຍວ ອຕ຺ໂຖ ຕທຕ຺ໂຖ, ຕສ຺ສ ໂຊຕກາ ຕທຕ຺ຖໂຊຕກາ, ເຕສໍ. ອິທານິ ເວທິຕພ຺ພານີຕິ ສມ຺ພນ຺ໂຘ. ອຕ຺ຖໍ ໂຊເຕນ຺ຕີຕິ ອຕ຺ຖໂຊຕກາ, ສທ຺ທາ. ນີຫຣິຕ຺ວາ, ນິຍເມຕ຺ວາ ວາ ອຕ຺ໂຖ ວຸຈ຺ຈເຕ ອິມາຫິ ສທ຺ທປຎ຺ຎຕ຺ຕີຫີຕິ ນິຣຸຕ຺ຕິໂຍ.

ອຕ຺ຖສຕນ຺ຕິ ຄາຖາຍໍ ອຕ຺ຖວເສ ປກຣເຓ ອຕ຺ຖສຕໍ ເວທິຕພ຺ພນ຺ຕິອາທິນາ ໂຍຊນາ ກາຕພ຺ພາ. ອິຕິ ຫີຕິ ອິຕິ ເອວ. ຫິສທ຺ໂທ ຫິ ເອວສທ຺ທຕ຺ໂຖ. ອິທນ຺ຕິ ‘‘ອຕ຺ຖສຕ’’ນ຺ຕິອາທິວຈນໍ, ວຸຕ຺ຕນ຺ຕິ ສມ຺ພນ຺ໂຘ. ເອຕນ຺ຕິ ຍຖາວຸຕ຺ຕໍ ອຕ຺ຖໍ ປຏິຈ຺ຈາຕິ ສມ຺ພນ຺ໂຘ.

ອິຕິ ສມນ຺ຕປາສາທິກາຍ ວິນຍສໍວຓ຺ຓນາຍ

ມຫາວຄ຺ຄວຓ຺ຓນາຍ

ໂຍຊນາ ສມຕ຺ຕາ.