ອປຣທຸຕິຍຄາຖາສງ຺ຄຓິກໍ

(໑) ກາຍິກາທິອາປຕ຺ຕິວຓ຺ຓນາ

໔໗໔. ຉ ອາປຕ຺ຕິໂຍ ກາຍິກາຕິ ເອຕ຺ຖ ຉ ອາປຕ຺ຕິໂຍ ນາມ ກາຕິ ອາຫ ‘‘ອນ຺ຕຣເປຍ຺ຍາເລ’’ຕິອາທິ. ອນ຺ຕຣເປຍ຺ຍາເລ ວຸຕ຺ຕາຕິ ສມ຺ພນ຺ໂຘ. ‘‘ກາຍທ຺ວາເຣ ສມຸຏ຺ຐິຕຕ຺ຕາ’’ຕິ ອິມິນາ ກາເຍ ສມຸຏ຺ຐນ຺ຕີຕິ ກາຍິກາຕິ ວຈນຕ຺ຖໍ ທສ຺ເສຕິ. ຕສ຺ມິໍເຍວ ອນ຺ຕຣເປຍ຺ຍາເລ ວຸຕ຺ຕາຕິ ສມ຺ພນ຺ໂຘ. ‘‘ວຊ຺ຊປຏິຈ຺ຉາທິກາຍາ’’ຕິອາທິນາ ຉາເທນ຺ຕສ຺ສ ຕິສ຺ໂສຕິ ເອຕ຺ຖ ຕິຓ຺ຓໍ ສຣູປໍ ທສ຺ເສຕິ. ‘‘ຠິກ຺ຂຸນິຍາ’’ຕິອາທິນາ ປຎ຺ຈ ສໍສຄ຺ຄປຈ຺ຈຍາຕິ ເອຕ຺ຖ ປຎ຺ຈນ຺ນໍ ສຣູປໍ ທສ຺ເສຕິ.

‘‘ເອກຣຕ຺ຕ’’ອິຕິອາທິນາ ອຣຸຓຸຄ຺ເຄ ຕິສ຺ໂສຕິ ເອຕ຺ຖ ຕິຓ຺ຓໍ ສຣູປໍ ທສ຺ເສຕິ. ທ຺ເວ ຍາວຕຕິຍກາຕິ ສໍວຓ຺ເຓຕພ຺ເພນ ‘‘ເອກາທສ ຍາວຕຕິຍກາ ນາມາ’’ຕິ ສໍວຓ຺ຓນາຍ ວິຣຸທ຺ຘຠາວໍ ປຏິກ຺ຂິປນ຺ໂຕ ອາຫ ‘‘ປຎ຺ຎຕ຺ຕິວເສນ ປນາ’’ຕິອາທິ. ‘‘ອິມສ຺ມິໍ ສາສເນ’’ຕິ ອິມິນາ ເອຕ຺ຖສທ຺ທສ຺ສ ວິສຍໍ ທສ຺ເສຕິ. ເອເກນ ສພ຺ພສງ຺ຄໂຫຕິ ເອຕ຺ຖ ເອໂກ ນາມ ໂກ, ສພ຺ພານິ ນາມ ການີຕິ ອາຫ ‘‘ຍສ຺ສ ສິຍາ’’ຕິອາທິ. ‘‘ນິທານຸທ຺ເທເສນາ’’ຕິ ອິມິນາ ເອກສ຺ສ ສຣູປໍ ທສ຺ເສຕິ. ‘‘ສິກ຺ຂາປທານຎ຺ຈ ປາຕິໂມກ຺ຂຸທ຺ເທສານຎ຺ຈາ’’ຕິ ອິເມຫິ ປເທຫິ ສພ຺ພສຣູປໍ ທສ຺ເສຕິ. ສງ຺ຄຫ ສທ຺ເທນ ກມ຺ມຉຏ຺ຐີສມາໂສ.

‘‘ວຊ຺ຊປຏິຈ຺ຉາທິກາຍາ’’ຕິອາທິນາ ທ຺ເວ ທຸຏ຺ຐຸລ຺ລຈ຺ຉາທນາຕິ ເອຕ຺ຖ ທ຺ວິນ຺ນໍ ສຣູປໍ ທສ຺ເສຕິ.

‘‘ຠິກ຺ຂຸ ຠິກ຺ຂຸນິຍາ’’ຕິອາທິນາ ຄາມນ຺ຕເຣ ຈຕສ຺ໂສຕິ ເອຕ຺ຖ ຈຕສ຺ສນ຺ນໍ ສຣູປໍ ທສ຺ເສຕິ. ປຸນ ‘‘ຠິກ຺ຂຸ ຠິກ຺ຂຸນິຍາ’’ຕິອາທິນາ ເຈຕສ຺ສາ ນທິປາຣປຈ຺ຈຍາຕິ ເອຕ຺ຖ ຈຕສ຺ສນ຺ນເມວ ສຣູປໍ ທສ຺ເສຕິ. ‘‘ຈີວຣທາເນ ປາຈິຕ຺ຕິຍ’’ນ຺ຕິ ອິມິນາ ປາຈິຕ຺ຕິຍຠາເວນ ສທິສຕ຺ຕາ ສງ຺ຂ຺ຍາວິເສໂສ ນ ກາຕພ຺ໂພຕິ ທສ຺ເສຕິ.

(໒) ເທສນາຄາມິນິຍາທິວຓ຺ຓນາ

໔໗໕. ເອເກຕ຺ຖາຕິ ເອຕ຺ຖສທ຺ໂທ ສາສນວິສໂຍ.

ເອກສິກ຺ຂາປທມ຺ປິ ນຕ຺ຖີຕິ ປິສທ຺ໂທ ພຫຸສິກ຺ຂາປທານິ ປນ ປເຄວາຕິ ຈ ອາປຕ຺ຕິ ປນ ປເຄວາຕິ ຈ ອາປຕ຺ຕີປິ ນຕ຺ຖີຕິ ຈ ອຕ຺ຖໍ ທສ຺ເສຕິ.

‘‘ສກເລປິ ວິນເຍ’’ຕິ ອິມິນາ ທ຺ເວຕ຺ຖາຕິ ປາເຐ ເອຕ຺ຖສທ຺ທສ຺ສ ວິສຍໍ ທສ຺ເສຕິ. ອຸຠິນ຺ນນ຺ຕິ ຠິກ຺ຂຸຠິກ຺ຂຸນີນໍ. ອຎ຺ຎຖາ ປນ ກິຕ຺ຕກາ ປຐມາປຕ຺ຕິກາຕິ ອາຫ ‘‘ອິຕຣຖາ ປນາ’’ຕິອາທິ. ຕຕ຺ຖ ອິຕຣຖາຕິ ປຎ຺ຎຕ຺ຕິໂຕ ອຎ຺ເຎນ ປກາເຣນ. ກມ຺ມຎ຺ຈາຕິ ກມ຺ມຎຕ຺ຕິ ຈ. ກມ຺ມປາທິກາ ຈາຕິ ກມ຺ມປາທຎຕ຺ຕິ ຈ. ນວສຸ ຐາເນສູຕິ ໂອສາຣຓາທີສຸ ນວສຸ ຐາເນສຸ. ທ຺ວີສູຕິ ຎຕ຺ຕິທຸຕິຍ, ຎຕ຺ຕິຈຕຸຕ຺ຖກມ຺ເມສຸ.

ວຊ຺ຊປຏິຈ຺ຉາທິກາຍ ປາຣາຊິກໍ, ອຸກ຺ຂິຕ຺ຕານຸວຕ຺ຕິກາຍ ປາຣາຊິກໍ, ອຏ຺ຐວຕ຺ຖຸກາຍ ປາຣາຊິກນ຺ຕິ ອິຕິ ອິເມ ຕໂຍຕິ ໂຍຊນາ. ກາຣຓຠູເຕນາຕິ ເຫຕຸຠູເຕນ, ‘‘ກຣຓຠູເຕນາ’’ຕິປິ ປາໂຐ, ສາຘກຕມສຕ຺ຕິຠູເຕນາຕິ ອຕ຺ໂຖ.

ເຕສນ຺ຕິ ອທ຺ຘານຫີນາທີນໍ. ເອຕ຺ຖາຕິ ‘‘ຕໂຍ ປຸຄ຺ຄລາ ນ ອຸປສມ຺ປາເທຕພ຺ພາ’’ຕິ ປາເຐ, ເອເຕສຸ ອງ຺ຄຫີນາທີສຸ ວາ. ໂຍຕິ ປຸຄ຺ຄໂລ. ອປຣິປູໂຣ ນ ຍາຈຕີຕິ ສມ຺ພນ຺ໂຘ. ມາຕຸຆາຕກາທໂຍ ກຣຓທຸກ຺ກຏກາ ຈາຕິ ໂຍຊນາ. ຕຕ຺ຖາຕິ ເຕສຸ ຎຕ຺ຕິກປ຺ປນາທີສຸ. ຎຕ຺ຕິກປ຺ປນາຕິ ຎຕ຺ຕິວິຘິ. ວິປ຺ປກຕປຈ຺ຈຕ຺ຕນ຺ຕິ ວິປ຺ປກຕໍ ປຈ຺ຈຕ຺ຕໍ. ອຕີຕກຣຓນ຺ຕິ ອຕີຕສ຺ສ ກຣຓໍ. ວິຕ຺ຖາເຣນ຺ໂຕ ອາຫ ‘‘ວຕ຺ຖຸສມ຺ປນ຺ນໍ ຫີ’’ຕິອາທິ. ຕໂຍ ກມ຺ມານ ສງ຺ຄຫາຕິ ເອຕ຺ຖ ຉນ຺ທເຠທຣກ຺ຂນຕ຺ຖາຍ ນກາເຣ ນິຄ຺ຄຫິຕໂລໂປ. ນາສິຕກາຕິ ນາເສຕພ຺ພາ ປຸຄ຺ຄລາ, ນາສິຕພ຺ພາຕິ ນາສິຕາ, ນາສິຕາ ເອວ ນາສິຕກາ. ຕິຓ຺ຓໍ ຊນານນ຺ຕິ ຕິຓ຺ຓໍ ອຸປສມ຺ປທາເປກ຺ຂຊນານໍ ເອກູປຊ຺ຌາເຍນ ນານາຈຣິເຍນ ຫຸຕ຺ວາຕິ ໂຍຊນາ. ເອການຸສ຺ສາວນາຕິ ເອກໂຕ ອນຸສ຺ສາວນາ.

ປາໂທ ນາມ ກຫາປຓສ຺ສ ຈຕຸຕ຺ຖຠາໂຄ. ມາສໂກ ນາມ ປາທສ຺ສ ປຎ຺ຈມຠາໂຄ. ປາຣາຊິກນ຺ຕິ ວນປ຺ປຕິໍ ຉິນ຺ທນ຺ຕສ຺ສ ທຸຕິຍປາຣາຊິກໍ (ປາຣາ. ໑໑໐). ອໂນທິສ຺ສາຕິ ‘‘ມນຸສ຺ໂສ ມຣຕູ’’ຕິອາທິນາ ນ ອຸທ຺ທິສິຕ຺ວາ. ເຕນາຕິ ວິເສນ.

ຠິກ຺ຂຸໂນວາທກວຄ຺ຄສ຺ມິນ຺ຕິ ສາມຎ຺ຎາຘາໂຣ. ທສສຸ ສິກ຺ຂາປເທສູຕິ ວິເສສາຘາໂຣ. ປຐມສິກ຺ຂາປທມ຺ຫິເຍວາຕິ ທສສຸ ສິກ຺ຂາປເທສຸ ປຐມສິກ຺ຂາປທມ຺ຫິເຍວ. ອຸປສມ຺ປນ຺ນາຍ ຠິກ຺ຂຸນິຍາຕິ ສມ຺ພນ຺ໂຘ. ‘‘ອາປຕ຺ຕິ ໂຫຕີ’’ຕິ ອິມິນາ ‘‘ຈີວເຣນາ’’ຕິ ປທສ຺ສ ສມ຺ພນ຺ຘຏ຺ຐານໍ ທສ຺ເສຕິ.

‘‘ຈຕສ຺ໂສ ເອວາ’’ຕິ ອິມິນາ ຕຕ຺ຕິກາຕິ ເອຕ຺ຖ ຕສທ຺ທສ຺ສ ວິສຍໍ ທສ຺ເສຕິ. ຕາ ຈຕສ຺ໂສ ປຣິມາຓາ ຍາສໍ ອາປຕ຺ຕີນນ຺ຕິ ຕຕ຺ຕິກາ. ນິປນ຺ນສ຺ສາປິ ຕຕ຺ຕິກາຕິ ເອຕ຺ຖາປິ ເອເສວ ນໂຍ. ສາຕິ ຠິກ຺ຂຸນີ.

(໓) ປາຈິຕ຺ຕິຍວຓ຺ຓນາ

໔໗໖. ປຎ຺ຈ ເຠສຊ຺ຊານີຕິ ສພ຺ພິອາທີນິ ປຎ຺ຈ ເຠສຊ຺ຊານິ. ອິມໍ ອາປຕ຺ຕິນ຺ຕິ ສມ຺ພນ຺ໂຘ. ປຈ຺ຉາ ອາປນ຺ໂນຕິ ໂຍຊນາ.

ເອກໍ ກພຬນ຺ຕິ ເອກໍ ອາໂລປໍ, ຕຸມ຺ຫມູເລຕິ ຕຸມ຺ຫໍ ສນ຺ຕິເກ.

ຍຖາວຕ຺ຖຸກນ຺ຕິ ວຕ຺ຖຸອນຸໂລມໍ, ອາປຕ຺ຕິໂຍ ເທສິຕາວ ໂຫນ຺ຕີຕິ ໂຍຊນາ.

ໂກກາລິກາທີນນ຺ຕິອາທິສທ຺ເທນ ກຏໂມທກຕິສ຺ສກາທໂຍ (ປາຣາ. ໔໑໗) ສງ຺ຄຓ຺ຫາຕິ. ປາປິກາຍ ທິຏ຺ຐິຍາ ອປ຺ປຏິນິສ຺ສຄ຺ເຄ ປາຈິຕ຺ຕິຍຎ຺ຈ ຈຓ຺ຑກາຬິກາຍ ຠິກ຺ຂຸນິຍາ ປາຈິຕ຺ຕິຍຎ຺ຈາຕິ ໂຍຊນາ. ປຍຸຕ຺ຕວາຈາປຈ຺ຈຍາຕິ ວິຎ຺ຎຕ຺ຕິນິມິຕ຺ຕາທີຫິ ປກາເຣນ ຍຸຕ຺ຕາຍ ວາຈາຍ ປຈ຺ຈຍາ. ອາປຕ຺ຕິ ປາຣາຊິກສ຺ສາຕິ ປາຣາຊິກສ຺ສ ອາປຊ຺ຊນໍ. ອຖວາ ປາຣາຊິກສ຺ສາຕິ ອສ຺ສ ຠິກ຺ຂຸສ຺ສ ປາຣາຊິກາ ອາປຕ຺ຕິ ໂຫຕີຕິ ວາ ປາຣາຊິກາ ອາປຕ຺ຕິ ອສ຺ສ ຠວຕີຕິ ວາ ໂຍຊນາ ກາຕພ຺ພາ. ອິຕີຕິ ອິມາ ຉ ອາປຕ຺ຕິໂຍ ອາປຊ຺ຊຕີຕິ ໂຍຊນາ.

ໂຠຊນໍ ຄເຫຕ຺ວາ ອຊ຺ໂຌຫຣມານາຕິ ສມ຺ພນ຺ໂຘ. ຕເຖວາຕິ ຍຖາ ຂາທເນ, ຕເຖວ ມໍສໍ ລສຸຓໍ ອຊ຺ໂຌຫຣມານາຕິ ໂຍຊນາ. ‘‘ປຓີຕໂຠຊນານີ’’ຕິ ຈ ‘‘ອກປ຺ປິຍມໍສ’’ນ຺ຕິ ຈ ປທານິ ‘‘ອຊ຺ໂຌຫຣມານາ’’ຕິ ປເທນ ສມ຺ພນ຺ຘິຕພ຺ພານິ.

ປຎ຺ຈ ຐານານີຕິ ປຎ຺ຈ ອາປຕ຺ຕິສງ຺ຂາຕານິ ຐານານິ. ຕຕ຺ຖາຕິ ປຎ຺ຈສຸ ສຫຘມ຺ມິເກສຸ. ທ຺ວິນ຺ນນ຺ຕິ ຠິກ຺ຂຸຠິກ຺ຂຸນີນໍ. ເຕສນ຺ຕິ ສິກ຺ຂມານາທີນໍ. ປຎ຺ຈນ຺ນເມວາຕິ ສຫຘມ຺ມິການໍເຍວ. ວິນິຈ຺ຉຍໂວຫາໂຣຕິ ວິນິຈ຺ຉຍວຈນໍ. ອິມິນາ ຈຕ຺ຕາຣິ ອຘິກຣຓານິ ປຏິກ຺ຂິປຕິ. ອຑ຺ຑກມ຺ມໍ ນາມາຕິ ອຠິຍຸຎ຺ຊນ຺ຕານໍ ກມ຺ມໍ ນາມ.

‘‘ສຫຘມ຺ມິການ’’ນ຺ຕິ ອິມິນາ ປຎ຺ຊນ຺ນໍ ວິນິຈ຺ຉໂຍຕິ ເອຕ຺ຖ ປຎ຺ຈສຣູປໍ ທສ຺ເສຕິ. ໂສຠຓຠາວໍ ວິຕ຺ຖາເຣນ຺ໂຕ ອາຫ ‘‘ກຕວີຕິກ຺ກໂມ ຫີ’’ຕິອາທິ. ອພ຺ຠຸຓ຺ຫສີໂລຕິ ອຠິນວຸປ຺ປນ຺ນສີໂລ. ອພ຺ຠຸຓ຺ຫສີໂລ ນາມ ອຕ຺ຖໂຕ ປາກຕິກສີໂລຕິ ອາຫ ‘‘ປາກຕິໂກ’’ຕິ, ປກຕິສີເລນ ນິຍຸຕ຺ໂຕຕິ ອຕ຺ໂຖ.

‘‘ກາຍທ຺ວາຣສມ຺ຠວາ’’ຕິ ອິມິນາ ກາຍິກາຕິ ປທສ຺ສ ຕທ຺ຘິຕຠາວໍ ທສ຺ເສຕິ. ມຸຂໍ ໂອໂລເກຕພ຺ພນ຺ຕິ ເອຕ຺ຖ ວຸຕ຺ຕາຕິ ສມ຺ພນ຺ໂຘ.

ຈຕຸນ຺ນໍ ເທສນາຍ ຈາຕິ ເອຕ຺ຖ ‘‘ເທສນາຍາ’’ຕິ ປທໍ ອາທິປທໂລປນ຺ຕິ ອາຫ ‘‘ອຈ຺ຈຍເທສນາຍາ’’ຕິ. ສາຕິ ອຈ຺ຈຍເທສນາ. ອຠິນິລີຍິຕ຺ວາ ຘນຸນາ ມາເຣນ຺ຕີຕິ ອຠິມາຣາ.

ເຉຊ຺ຊໍ ໂຫຕີຕິ ເອຕ຺ຖ ເຉຊ຺ຊໍ ນາມ ປາຣາຊິກາປຊ຺ຊນເມວາຕິ ອາຫ ‘‘ເທວທຕ຺ໂຕ ວິຍ ປາຣາຊິກໍ ອາປຊ຺ຊຕີ’’ຕິ. ອິມາ ປນ ອາປຕ຺ຕິໂຍຕິ ປາຣາຊິກຖຸລ຺ລຈ຺ຈຍາປຕ຺ຕິໂຍ.

(໔) ອວນ຺ທນີຍປຸຄ຺ຄລາທິວຓ຺ຓນາ

໔໗໗. ເຕສນ຺ຕິ ທສນ຺ນໍ ປຸຄ຺ຄລານໍ. ‘‘ສທ຺ຘິ’’ນ຺ຕິ ອິມິນາ ສາມີເຈນາຕິ ເອຕ຺ຖ ສຫຕ຺ເຖ ກຣຓວຈນນ຺ຕິ ທສ຺ເສຕິ. ສາມີເຈນາຕິ ຈ ສາມີຈິນາ ກຕ຺ຕພ຺ພໍ ສາມີຈໍ ກມ຺ມໍ, ເຕນ ສາມີເຈນ. ທສ ຈີວຣຘາຣຓາຕິ ປທສ຺ສ ສມາສຠາວໍ ປຏິກ຺ຂິປນ຺ໂຕ ອາຫ ‘‘ທສ ທິວສານິ ອຕິເຣກຈີວຣສ຺ສ ຘາຣຓາ’’ຕິ.

ກຕິສຕນ຺ຕິອາທີສຸ ທ຺ວີສຸ ຄາຖາປາເທສຸ ຈຕູສຸ ວິຠຕ຺ຍນ຺ຕປເທສຸ ປຸຣິມໍ ປຸຣິເມນ, ປຈ຺ຉິມຎ຺ຈ ປຈ຺ຉິເມນ ຍຖາກ຺ກມໍ ໂຍເຊຕພ຺ພນ຺ຕິ ທສ຺ເສນ຺ໂຕ ອາຫ ‘‘ກຕິສຕໍ ອາປຕ຺ຕິໂຍ ຣຕ຺ຕິສຕໍ ຉາທຍິຕ຺ວານາ’’ຕິ. ປຈ຺ຉິມຄາຖາຍ ປຸພ຺ພຑ຺ເຒປິ ເອເສວ ນໂຍ. ອຍໍ ຫີຕິ ອຍໍ ເອວ ວກ຺ຂມາໂນ. ເອຕ຺ຖາຕິ ຄາຖາຍໍ. ໂຍຕິ ຠິກ຺ຂຸ, ປຏິຈ຺ຉາເທຕີຕິ ສມ຺ພນ຺ໂຘ. ອິຕີຕິ ອຍໍ ສງ຺ເຂປຕ຺ໂຖ.

ເຫຏ຺ຐາ ວຸຕ຺ເຕສຸ ຈຕູສຸ ຈຕຸກ຺ເກສຸ ຘມ຺ເມນ ສມຄ຺ຄໍ ອປເນຕ຺ວາ ທ຺ວາທສ ກມ຺ມໂທສາ ວຸຕ຺ຕາຕິ ທຏ຺ຐພ຺ພໍ. ອຘມ຺ເມນ ວຄ຺ຄກມ຺ມໍ, ອຘມ຺ເມນ ສມຄ຺ຄກມ຺ມນ຺ຕິ ໂຍເຊຕພ຺ພໍ.

ເອຕ຺ຖາຕິ ຉສຸ ກມ຺ເມສຸ. ເອຕເທວາຕິ ຘມ຺ເມນ ສມຄ຺ຄກມ຺ມເມວ.

ຍໍ ເທສິຕາຕິ ເອຕ຺ຖ ຍໍສທ຺ໂທ ວຈນວິປລ຺ລາໂສຕິ ອາຫ ‘‘ຍານິ ເທສິຕານີ’’ຕິ. ‘‘ເທສິຕານີ’’ຕິ ອິມິນາ ເທສິຕາຕິ ເອຕ຺ຖ ນິກາຣສ຺ສ ອາກາຣາເທສຠາວໍ ທສ຺ເສຕິ. ‘‘ປຣິຍນ຺ຕປຣິຈ຺ເຉທຠາວຣຫິຕຕ຺ຕາ’’ຕິ ອິມິນາ ນຕ຺ຖິ ອນ຺ຕໍ ປຣິຍນ຺ຕເມຕສ຺ສາຕິ ອນນ຺ຕນ຺ຕິ ວຈນຕ຺ຖໍ ທສ຺ເສຕິ. ຕນ຺ຕິ ນິພ຺ພານໍ, ຊິຕນ຺ຕິ ສມ຺ພນ຺ໂຘ. ເກນ ກໍ ກິນ຺ຕິ ກຕ຺ວາ ຊິຕນ຺ຕິ ອາຫ ‘‘ຠຄວຕາ ກິເລສຄຓໍ ອຠິມທ຺ທິຕ຺ວາ’’ຕິ. ເກນ ກໍ ກິນ຺ຕິ ກຕ຺ວາ ກິໍ ຊິຕໍ ວິຍາຕິ ອາຫ ‘‘ຣຎ຺ຎາ ສປຕ຺ຕຄຓໍ ອຠິມທ຺ທິຕ຺ວາ ຣຊ຺ຊໍ ວິຍາ’’ຕິ. ຕຕ຺ຖ ‘‘ຣຎ຺ຎາ’’ຕິ ອິມິນາ ‘‘ເກນາ’’ຕິ ປຸຈ຺ຉໍ ວິສ຺ສຊ຺ເຊສິ. ‘‘ສປຕ຺ຕຄຓ’’ນ຺ຕິ ອິມິນາ ‘‘ກ’’ນ຺ຕິ ປຸຈ຺ຉໍ ວິສ຺ສຊ຺ເຊສິ. ‘‘ອຠິມທ຺ທິຕ຺ວາ’’ຕິ ອິມິນາ ‘‘ກິນ຺ຕິ ກຕ຺ວາ’’ຕິ ປຸຈ຺ຉໍ ວິສ຺ສຊ຺ເຊສິ. ‘‘ຣຊ຺ຊ’’ນ຺ຕິ ອິມິນາ ‘‘ກິ’’ນ຺ຕິ ປຸຈ຺ຉໍ ວິສ຺ສຊ຺ເຊສິ. ສປຕ຺ຕຄຓນ຺ຕິ ເວຣິຄຓໍ. ອຍໍ ປເນຕ຺ຖ ໂຍຊນາ – ຣຎ຺ຎາ ສປຕ຺ຕຄຓໍ ອຠິມທ຺ທິຕ຺ວາ ຣຊ຺ຊໍ ຣາຊຠາວໍ ຊິຕໍ ວິຍ, ຠຄວຕາ ກິເລສຄຓໍ ອຠິມທ຺ທິຕ຺ວາ ນິພ຺ພານໍ ຊິຕນ຺ຕິ. ສ຺ເວວາຕິ ຠຄວາ ເອວ. ‘‘ນິພ຺ພິກາຣຕາຍາ’’ຕິ ອິມິນາ ຕາທິສທ຺ໂທ ນິພ຺ພິກາຣຕ຺ຖວາຈໂກ ອນິປ຺ຜນ຺ນປາຏິປທິໂກຕິ ທສ຺ເສຕິ. ‘‘ວິເວກປຎ຺ຈກ’’ນ຺ຕິ ອິມິນາ ກາຍຈິຕ຺ຕອຸປຘິວເສນ ວິເວກຕ຺ຕຍມ຺ປິ ຄເຫຕພ຺ພໍ ວິເວກຠາເວນ ສມານຕ຺ຕາ. ເຕນ ຠຄວຕາຕິ ສມ຺ພນ຺ໂຘ. ‘‘ຍານິ ສຕ຺ຕ ອາປຕ຺ຕິກ຺ຂນ຺ຘານີ’’ຕິ ອິມິນາ ເອເກຕ຺ຖາຕິ ເອຕ຺ຖ ເອກສທ຺ທສ຺ສ ວິສຍໍ ທສ຺ເສຕິ. ຕຕ຺ຖາຕິ ສຕ຺ຕສຸ ອາປຕ຺ຕິກ຺ຂນ຺ເຘສຸ. ເອຕ຺ຖ ປນາຕິ ສມເຖສຸ ປນ. ຫີຕິ ສຈ຺ຈໍ. ຕສ຺ສາຕິ ສມ຺ມຸຂາວິນຍສ຺ສ. ອຏ຺ຐກຖາສູຕິ ສພ຺ພອຏ຺ຐກຖາສຸ. ມຍໍ ປນາຕິ ສງ຺ຄຫກາຣກາ ອມ຺ເຫ ປນ, ພຸທ຺ຘໂຆສນາມກາ ມຍໍ ປນາຕິ ອຕ຺ໂຖ, ໂຣຈຍາມາຕິ ສມ຺ພນ຺ໂຘ. ກສ຺ສ ກິມຕ຺ຖໍ ຄເຫຕ຺ວາ ໂຣເຈສີຕິ ອາຫ ‘‘ວິນາຕິ ນິປາຕສ຺ສ ປຏິເສຘນມຕ຺ຖມຕ຺ຕ’’ນ຺ຕິ. ‘‘ວິນາຕິ ນິປາຕສ຺ສາ’’ຕິ ປທໍ ‘‘ອຕ຺ຖມຕ຺ຕ’’ນ຺ຕິ ປເທ ວາຈກສມ຺ພນ຺ໂຘ. ອຕ຺ຕໂນ ສາຘ຺ຍວຈນໍ ພຸທ຺ຘວຈນສງ຺ຂາເຕນ ສາຘກວຈເນນ ສາເຘນ຺ໂຕ ອາຫ ‘‘ວຸຕ຺ຕມ຺ປິ ເຈຕ’’ນ຺ຕິອາທິ.

ອຏ຺ຐາຣສ ອຏ຺ຐການີຕິ ອຘມ຺ມທິຏ຺ຐິເຠທ, ຘມ຺ມທິຏ຺ຐິເຠທ, ເວມຕິກເຠເທສຸ ຕີສຸ ເອກເມກໍ ມູລໍ ກຕ຺ວາ ຕໂຍ ຕໂຍ ມູລິໍ ກຕ຺ວາ ນວ ໂຫນ຺ຕິ, ເຕສຸ ຘມ຺ມທິຏ຺ຐິເຠເທສຸ ຘມ຺ມທິຏ຺ຐິເຠທໍ ອປເນຕ຺ວາ ອຏ຺ຐ ໂຫນ຺ຕິ, ຕານິ ອຏ຺ຐາຣສ ເຠທກຣວຕ຺ຖູສຸ ໂຍເຊຕ຺ວາ ອຏ຺ຐາຣສ ອຏ຺ຐການິ ໂຫນ຺ຕີຕິ ທຏ຺ຐພ຺ພໍ. ຉອູນທິຍຑ຺ຒສຕນ຺ຕິ ຈຕຸຈຕ຺ຕາລີສາຘິກໍ ສຕນ຺ຕິ ວຸຕ຺ຕໍ ໂຫຕິ.

ເອເກກວຕ຺ຖຸສ຺ມິນ຺ຕິ ອຏ຺ຐາຣສສຸ ເຠທກຣວຕ຺ຖູສຸ ເອເກກສ຺ມິໍ ວຕ຺ຖຸສ຺ມິໍ.

ອິຕິ ຄາຖາສງ຺ຄຓິກວຓ຺ຓນາຍ ໂຍຊນາ ສມຕ຺ຕາ.