໙. ປາຕິໂມກ຺ຂຏ຺ຐປນກ຺ຂນ຺ຘກໍ

໑. ປາຕິໂມກ຺ຂຸທ຺ເທສຍາຈນກຖາ

໓໘໓. ປາຕິໂມກ຺ຂຏ຺ຐປນກ຺ຂນ຺ຘເກ ນນ຺ທິມຸຂິຍາ ຣຕ຺ຕິຍາຕິ ເອຕ຺ຖ ນນ຺ທິຍຕິ ຕຸສິຍຕີຕິ ນນ຺ທິ, ອິກາຣນ຺ໂຕຍໍ ນປຸໍສກລິງ຺ໂຄ. ‘‘ນນ຺ທິເສໂນ (ຊາ. ອຏ຺ຐ. ໓.໔.໑) ນນ຺ທິວິສາໂລ’’ຕິອາທີສຸ ອິກາຣນ຺ໂຕຍໍ ປຸລ຺ລິງ຺ໂຄ ໂຫຕິ, ອິຘ ປນ ມຸຂໍ ອເປກ຺ຂິຕ຺ວາ ອິກາຣນ຺ໂຕ ນປຸໍສກລິງ຺ໂຄ ໂຫຕິ. ອຣຸຓຸຏ຺ຐິຕກາເລ ໂອທາຕທິສາມຸຂຕາຍ ນນ຺ທິ ມຸຂໍ ເອຕິສ຺ສໍ ຣຕ຺ຕິຍນ຺ຕິ ນນ຺ທິມຸຂີ, ຣຕ຺ຕິ, ຕາຍ ນນ຺ທິມຸຂິຍາ ຣຕ຺ຕິຍາ, ເຕນ ວຸຕ຺ຕໍ ‘‘ອຣຸຓຸຏ຺ຐິຕກາເລປິ ຫິ ນນ຺ທີມຸຂາ ວິຍ ຣຕ຺ຕິ ຂາຍຕີ’’ຕິ. ອນ຺ໂຕປູຕິນ຺ຕິ ເອຕ຺ຖ ກາຍສ຺ສ ອນ຺ໂຕ ກຸຓປປູຕິນ຺ຕິ ອຕ຺ຖໍ ປຏິປກ຺ຂິປນ຺ໂຕ ອາຫ ‘‘ອຕ຺ຕຈິຕ຺ຕສນ຺ຕາເນ’’ຕິອາທິ. ‘‘ກິເລສວສ຺ສນວເສນາ’’ຕິ ອິມິນາ ອຸທກວສ຺ສນວເສນາຕິ ອຕ຺ຖໍ ປຏິກ຺ຂິປຕິ. ອວສ຺ສຸຕນ຺ຕິ ຕິນ຺ຕໍ, ກິລິນ຺ນນ຺ຕິ ອຕ຺ໂຖ. ກສມ຺ພຸຊາຕນ຺ຕິ ເອຕ຺ຖ ກສມ຺ພູຕິ ສງ຺ກາໂຣ. ໂສ ຫິ ສມ຺ມຸຎ຺ຈນິຍາ ກສິຍມາເນ ວິເລຂິຍມາເນ ສມ຺ພຕິ ສທ຺ທໍ ກໂຣຕີຕິ ກສມ຺ພຸ, ຕໍ ວິຍ ຊາຕນ຺ຕິ ກສມ຺ພຸຊາຕນ຺ຕິ ອຕ຺ໂຖ ທຏ຺ຐພ຺ໂພ. ອຏ຺ຐກຖາຍໍ ປນ ອຘິປ຺ປາຍວເສນ ‘‘ອາກິລິຏ຺ຐຊາຕ’’ນ຺ຕິ ວຸຕ຺ຕໍ, ອຕິວິຍ ກິລິຏ຺ຐຊາຕນ຺ຕິ ອຕ຺ໂຖ. ‘‘ອາກິຓ຺ຓໂທສຕາຍ ກິລິຏ຺ຐຊາຕ’’ນ຺ຕິປິ ປາໂຐ. ‘‘ຍາວ ພາຫາຄຫຓາປິ ນາມາ’’ຕິ ອິມິນາ ປາເຐນ ທສ຺ເສຕີຕິ ສມ຺ພນ຺ໂຘ. ຫີຕິ ປທປູຣຓມຕ຺ຕໍ. ເຕນາຕິ ໂມຆປຸຣິເສນ. ‘‘ຍາວາ’’ຕິ ນິປາຕປໂຍຄຕ຺ຕາ ‘‘ພາຫາຄຫຓາປີ’’ຕິ ເອຕ຺ຖ ປຎ຺ຈມີວິຠຕ຺ຕິ ອວຘິອຕ຺ເຖ ໂຫຕິ. ນາມ-ສທ຺ໂທ ຄຣຫຕ຺ຖໂຊຕໂກ, ຕສ຺ສ ປໂຍຄຕ຺ຕາ ‘‘ອາຄເມສ຺ສຕີ’’ຕິ ເອຕ຺ຖ ອຕີຕຕ຺ເຖ ອນາຄຕວຈນໍ (ສທ຺ທນີຕິສຸຕ຺ຕມາລາຍ ໘໙໓ ສຸຕ຺ເຕ). ອາຄເມສ຺ສຕິ ນາມາຕິ ໂຍຊນາ. ອາຄເມສ຺ສຕີຕິ ອີສໍ ອຘິວາເສສ຺ສຕິ. ‘‘ອາໂຕ ຄມຸອີສມຘິວາສເນ’’ຕິ ຫິ ຘາຕຸປາເຐສຸ (ສທ຺ທນີຕິຘາຕຸມາລາຍໍ ໑໘ ມກາຣນ຺ຕຘາຕຸ) ວຸຕ຺ຕໍ.

໓໘໔. ນ ອາຍຕເກເນວ ປປາໂຕຕິ ເອຕ຺ຖ ທີເຆເນວ ປປາໂຕຕິ ທສ຺ເສນ຺ໂຕ ອາຫ ‘‘ນ ປຐມເມວ ຄມ຺ຠີໂຣ’’ຕິ. ອາຍຕສທ຺ໂທ ຫິ ທີຆປຣິຍາໂຍ. ‘‘ນ ອາຍຕເກນ ຄີຕສ຺ສເຣນ ຘມ຺ໂມ ຄາຍິຕພ຺ໂພ’’ຕິອາທີສຸ (ຈູຬວ. ໒໔໙) ວິຍ ປປາໂຕ ທີເຆນ ຕີຣສ຺ສ ອາທິມ຺ຫິ ນ ໂຫຕີຕິ ວຸຕ຺ຕໍ ໂຫຕິ. ປຐມເມວາຕິ ຕີຣສ຺ສ ອາທິມ຺ຫິເຍວ. ‘‘ອນຸປຸພ຺ເພນ ຄມ຺ຠີໂຣ’’ຕິ ອິມິນາ ‘‘ນ ປຐມເມວ ຄມ຺ຠີໂຣ’’ຕິ ວຈນສ຺ສ ອຘິປ຺ປາຍຕ຺ຖໍ ທສ຺ເສຕິ. ຐິຕຘມ຺ໂມຕິ ຕີຣສ຺ສ ອນ຺ໂຕເຍວ ຐິຕສຠາໂວ. ເວລໍ ນາຕິວຕ຺ຕຕີຕິ ເອຕ຺ຖ ເວລາສທ຺ທສ຺ສ ຕີຣມຣິຍາທຕ຺ເຖສຸ ປວຕ຺ຕຠາວໍ ທສ຺ເສນ຺ໂຕ ອາຫ ‘‘ໂອສກ຺ກນກນ຺ທຣໍ ມຣິຍາທເວລ’’ນ຺ຕິ. ຕຕ຺ຖ ‘‘ໂອສກ຺ກນກນ຺ທຣ’’ອິຕິ ປເທນ ຕີຣຕ຺ຖໍ ທສ຺ເສຕິ, ‘‘ມຣິຍາທ’’ ອິຕິ ປເທນ ມຣິຍາທຕ຺ຖໍ. ເກນ ອຸທເກນ ທຣິຕພ຺ໂພຕິ ກນ຺ທໂຣ, ອຸທເກນ ໂອສກ຺ກໂນ ກນ຺ທໂຣ ເອຕ຺ຖາຕິ ໂອສກ຺ກນກນ຺ທຣໍ, ຕີຣໍ. ໂອສກ຺ກນກນ຺ທຣຠູຕຎ຺ຈ ມຣິຍາທຠູຕຎ຺ຈ ເວລໍ ຕີຣໍ ນາຕິກ຺ກມຕີຕິ ອຕ຺ໂຖ. ຕີຣໍ ວາເຫຕີຕິ ເອຕ຺ຖ ວຫຘາຕຸຍາ ປາປຸຓນຕ຺ຖໍ ທສ຺ເສນ຺ໂຕ ອາຫ ‘‘ຕີຣໍ ອປ຺ເປຕີ’’ຕິ. ຕຕ຺ຖ ອປ຺ເປຕີຕິ ປາປຸຓາເປຕິ. ‘‘ອຸສ຺ສາເຣຕີ’’ຕິ ອິມິນາ ປາຬິຍໍ ‘‘ຖລໍ ອຸສ຺ສາເຣຕີ’’ຕິ ປເທນ ‘‘ຕີຣໍ ວາເຫຕີ’’ຕິ ປທສ຺ສ ອຕ຺ຖໍ ທສ຺ເສຕີຕິ ອຕ຺ໂຖ ທສ຺ສິໂຕ. ອຸສ຺ສາເຣຕີຕິ ອຸທ຺ຘຣິຕ຺ວາ ຄມາເປຕິ. ອຎ຺ຎາປຏິເວໂຘຕິ ເອຕ຺ຖ ອາຊານາຕິ, ອາຊານິຕ຺ຖາຕິ ວາ ອຎ຺ຎໍ ອຣຫຕ຺ຕມຄ຺ໂຄ ວາ ອຣຫຕ຺ຕຜລໍ ວາ, ຕສ຺ສ ປຏິວິຊ຺ຌນໍ ອຎ຺ຎາປຏິເວໂຘ, ສຸຂຸຈ຺ຈາຣຓຕ຺ຖໍ ມຊ຺ເຌ ທີໂຆ, ອຎ຺ຎາປຏິເວໂຘ ນາມ ອຣຫຕ຺ຕຸປ຺ປຕ຺ຕິເຍວ ໂຫຕິ. ເຕນ ວຸຕ຺ຕໍ ‘‘ອຣຫຕ຺ຕຸປ຺ປຕ຺ຕີ’’ຕິ.

໓໘໕. ຉນ຺ນມຕິວສ຺ສຕີຕິ ອຸທານປາຬິຍາ ສນ຺ຘາຍຠາສິຕປາຬິຠາວໍ ທສ຺ເສນ຺ໂຕ ອາຫ ‘‘ອາປຕ຺ຕິ’’ນ຺ຕິອາທິ. ຕຕ຺ຖ ອິທນ຺ຕິ ‘‘ຉນ຺ນມຕິວສ຺ສຕີ’’ຕິ ວຈນໍ ວຸຕ຺ຕນ຺ຕິ ສມ຺ພນ຺ໂຘ. ເອຕນ຺ຕິ ນວາປຕ຺ຕິອາປຊ຺ຊນໍ ສນ຺ຘາຍາຕິ ສມ຺ພນ຺ໂຘ.

໔. ປາຕິໂມກ຺ຂສວນາຣຫກຖາ

໓໘໖. ປຸເຣ ວາ ປຈ຺ຉາ ວາຕິ ຎຕ຺ຕິໂຕ ປຸເຣ ວາ ປຈ຺ຉາ ວາ. ເຂຕ຺ເຕຕິ ປາຕິໂມກ຺ຂຏ຺ຐປນສ຺ສ ເຂຕ຺ເຕ. ເຂຕ຺ຕໍ ທສ຺ເສນ຺ໂຕ ອາຫ ‘‘ຕສ຺ມາ’’ຕິອາທິ. ເຣກາຣໍ ຠຓຕີຕິ ຉຕ຺ຕິໍສຕ຺ຍກ຺ຂເຣສຸ ເຣ-ກາຣໍ ຎຕ຺ຕິຏ຺ຐປນໂກ ຠຓຕິ. ອິທນ຺ຕິ ປຎ຺ຈຕິໍສຕ຺ຍກ຺ຂຣານໍ ອຸຈ຺ຈາຣຓຏ຺ຐານໍ. ວຸຕ຺ເຕຕິ ຎຕ຺ຕິຏ຺ຐປນເກນ ວຸຕ຺ເຕ. ‘‘ສຸຓາຕຸ ເມ’’ຕິ ວຈເນ ອນາຣທ຺ເຘເຍວາຕິ ໂຍຊນາ.

໕. ຘມ຺ມິກາຘມ຺ມິກປາຕິໂມກ຺ຂຏ຺ຐປນກຖາ

໓໘໗. ເຕນ ປຸຄ຺ຄເລນາຕິ ເຕນ ຈຸທິຕເກນ ປຸຄ຺ຄເລນ. ສາ ວິປຕ຺ຕີຕິ ສີລວິປຕ຺ຕິອາທິສງ຺ຂາຕາ ສາ ວິປຕ຺ຕິ. ສຎ຺ຎາອມູລິກວເສນາຕິ ‘‘ກຕາ’’ ອິຕິ ສຎ຺ຎາຍ ອມູລິກວເສນ. ກຕຎ຺ຈາຕິ ເອກນ຺ເຕນ ກຕຎ຺ຈ. ອກຕຎ຺ຈາຕິ ເອກນ຺ເຕນ ອກຕຎ຺ຈ.

ໂກເປຕຸກາມຕາຍ ເນວ ອາຄຈ຺ຉຕີຕິ ສມ຺ພນ຺ໂຘ. ເຕນາຕິ ອນາຄມນາທິກາຣເຓນ. ອາປຊ຺ຊຕີຕິ ປາຕິໂມກ຺ຂຏ຺ຐປນໂກ ອາປຊ຺ຊຕິ. ອິຈ຺ຈສ຺ສາປີຕິ ອິຕິ ເອວໍ ອສ຺ສ ປາຕິໂມກ຺ຂຏ຺ຐປນກສ຺ສາປິ. ປຈ຺ຈາທິຍຕີຕິ ປຕິ ອາທິຍຕິ, ‘‘ອກຕໍ ກມ຺ມໍ, ປຸນ ກາຕພ຺ພໍ ກມ຺ມ’’ນ຺ຕິອາທິນາ ປຸນ ອາທີຍຕິ, ປຸນ ອາຣຠຕີຕິ ອຕ຺ໂຖ.

໖. ຘມ຺ມິກປາຕິໂມກ຺ຂຏ຺ຐປນກຖາ

໓໘໘. ມຄ຺ຄປຏິປາທນາທີສູຕິ ມຄ຺ຄສ຺ມິໍ ປຏິປາທນາທີສຸ. ອາທິສທ຺ເທນ ເຖຍ຺ຍຈິຕ຺ເຕນ ອວຫາຣາທໂຍ ສງ຺ຄຓ຺ຫາຕິ. ອາກາຣາທິສຎ຺ຎາຕິ ອາກາຣສຎ຺ຎາ ລິງ຺ຄສຎ຺ຎາ ນິມິຕ຺ຕສຎ຺ຎາ. ຕນ຺ຕິ ປຣິສງ຺ກໍ ສນ຺ຘາຍາຕິ ສມ຺ພນ຺ໂຘ.

໗. ອຕ຺ຕາທານອງ຺ຄກຖາ

໓໙໘. ອຕ຺ຕາທານໍ ອາທາຕຸກາເມນາຕິ ເອຕ຺ຖ ກິໍ ອຕ຺ຕາທານນ຺ຕິ ອາຫ ‘‘ສາສນໍ ໂສເຘຕຸກາໂມ’’ຕິອາທິ. ອິມິນາ ປຣໍ ໂຈເທຕຸໍ ອຕ຺ຕນາ ອາທາຕພ຺ພໍ ອຘິກຣຓໍ ອຕ຺ຕາທານນ຺ຕິ ວຸຈ຺ຈຕີຕິ ທສ຺ເສຕິ. ອກາໂລ ອິມໍ ອຕ຺ຕາທານໍ ອາທາຕຸນ຺ຕິ ເອຕ຺ຖ ອກາລໍ ທສ຺ເສນ຺ໂຕ ອາຫ ‘‘ຣາຊຠຍ’’ນ຺ຕິອາທິ. ຕຕ຺ຖ ວສ຺ສາຣຕ຺ໂຕຕິ ວສ຺ສກາໂລ. ໂສ ຫິ ວສ຺ໂສ ອຕິວິຍ ຣຎ຺ຊຕິ ເອຕ຺ຖ ກາເລຕິ ວສ຺ສາຣຕ຺ໂຕຕິ ວຸຈ຺ຈຕິ. ວສ຺ສາຣຕ຺ໂຕປິ ອຘິກຣຓວູປສມຕ຺ຖໍ ລຊ຺ຊິປຣິສາຍ ທູຣໂຕ ອານຍນສ຺ສ ທຸກ຺ກຣຕ຺ຕາ ອກາໂລ ນາມ. ອິຕີຕິ ອຍໍ ຣາຊຠຍາທິກາໂລຕິ ອຕ຺ໂຖ. ວິປຣີໂຕຕິ ຣາຊຠຍາທີນໍ ອຠາວກາໂລ.

ອຠູຕໍ ອິທໍ ອຕ຺ຕາທານນ຺ຕິ ເອຕ຺ຖ ອຠູຕສທ຺ໂທ ອວິຊ຺ຊມານປຣິຍາໂຍຕິ ອາຫ ‘‘ອສນ຺ຕມິທ’’ນ຺ຕິ, ອິທໍ ອຕ຺ຕາທານໍ ອວິຊ຺ຊມານນ຺ຕິ ອຕ຺ໂຖ. ມຍາ ຄຫິໂຕຕິ ສມ຺ພນ຺ໂຘ. ສີລວາ ປຸຄ຺ຄໂລຕິ ໂຍຊນາ. ຍນ຺ຕິ ອຕ຺ຕາທານໍ ສໍວຕ຺ຕຕີຕິ ສມ຺ພນ຺ໂຘ. ອິທນ຺ຕິ ອຕ຺ຕາທານໍ.

ນ ລຠິສ຺ສາມິ ສນ຺ທິຏ຺ເຐ, ລຠິສ຺ສາມິ ສນ຺ທິຏ຺ເຐຕິ ເອຕ຺ຖ ‘‘ນ ລຠິສ຺ສາມິ, ລຠິສ຺ສາມີ’’ຕິ ອິທໍ ກິໍ ສນ຺ຘາຍ ວຸຕ຺ຕນ຺ຕິ ອາຫ ‘‘ອປ຺ເປກທາ ຫີ’’ຕິອາທິ. ຕຕ຺ຖ ອປ຺ເປກທາຕິ ອປິ ເອກທາ. ຫິສທ຺ໂທ ວິຕ຺ຖາຣໂຊຕໂກ. ເອວຣູປາຕິ ສນ຺ທິຏ຺ຐສມ຺ຠຕ຺ຕສຠາວາ. ຕນ຺ຕິ ອຸປຕ຺ຖມ຺ຠກຠິກ຺ຂຸລຠນໍ ສນ຺ຘາຍາຕິ ສມ຺ພນ຺ໂຘ. ‘‘ນ ລຠິສ຺ສາມີ’’ຕິ ອິທໍ ວຈນໍ ວຸຕ຺ຕນ຺ຕິ ສມ຺ພນ຺ໂຘ.

ໂກສມ຺ພການໍ ຠຓ຺ຑນາທິ ຠວຕິ ວິຍ ຠຓ຺ຑນາທິ ຠວິສ຺ສຕີຕິ ໂຍຊນາ. ປຈ຺ຉາປິ ອວິປ຺ປຏິສາຣກຣໍ ຠວິສ຺ສຕີຕິ ເອຕ຺ຖ ເກສໍ ອວິປ຺ປຏິສາຣກຣໍ ຠວຕິ ວິຍ ປຎ຺ຈງ຺ຄສມ຺ປນ຺ນາຄຕໍ ອຕ຺ຕາທານໍ ອາທິຍໂຕ ປຈ຺ຉາປິ ອວິປ຺ປຏິສາຣກຣໍ ຠວຕີຕິ ອາຫ ‘‘ສຸຠທ຺ທໍ ວຸຑ຺ຒປພ຺ພຊິຕ’’ນ຺ຕິອາທິ. ຕຕ຺ຖ ປຎ຺ຈສຕິກສງ຺ຄີຕິນ຺ຕິ ປຎ຺ຈສເຕຫິ ມຫາກສ຺ສປາທີຫິ ກຕ຺ຕພ຺ພໍ ສງ຺ຄີຕິໍ. ມຫາກສ຺ສປຕ຺ເຖຣສ຺ສ ປຈ຺ຉາ ສມນຸສ຺ສຣຓກຣໍ ໂຫຕິ ອິວ ໂຫຕີຕິ ໂຍຊນາ. ເອເສວ ນໂຍ ເສເສສຸປິ. ສມນຸສ຺ສຣຓກຣນ຺ຕິ ສມ຺ໂມທວເສນ ປຸນປ຺ປຸນໍ ອນຸສ຺ສຣຓສ຺ສ ກຣໍ. ອິມິນາ ‘‘ອວິປ຺ປຏິສາຣກຣ’’ນ຺ຕິ ປທສ຺ສ ອຕ຺ຖໍ ທສ຺ເສຕິ. ປຈ຺ຉາປີຕິ ເອຕ຺ຖ ປິສທ຺ທສ຺ສ ອວຸຕ຺ຕສມ຺ປິຓ຺ຑນຕ຺ຖໍ ທສ຺ເສນ຺ໂຕ ອາຫ ‘‘ສາສນສ຺ສ ຈາ’’ຕິອາທິ. ຕຕ຺ຖ ສາສນສ຺ສ ຈ ສສ຺ສິຣິກຕາຍາຕິ ສມ຺ພນ຺ໂຘ. ວິຄຕອຸປກ຺ກິເລສຈນ຺ທິມສູຣິຍານໍ ວິຍ ສາສນສ຺ສ ຈ ສສ຺ສິຣິກຕາຍ ສໍວຕ຺ຕຕີຕິ ອຘິປ຺ປາໂຍ.

໘. ໂຈທເກນ ປຈ຺ຈເວກ຺ຂິຕພ຺ພຘມ຺ມກຖາ

໓໙໙. ‘‘ອຈ຺ຉິທ຺ເທນ ອປ຺ປຏິມໍເສນາ’’ຕິອາທີສຸ ເອວມຕ຺ໂຖ ເວທິຕພ຺ໂພຕິ ໂຍຊນາ. ຉິທ຺ທສປ຺ປຏິມໍສໍ ປຐມໍ ທສ຺ເສຕ຺ວາ ວິປຣີຕວເສນ ອຈ຺ຉິທ຺ທອປ຺ປຏິມໍສໍ ທສ຺ເສນ຺ໂຕ ອາຫ ‘‘ເຍນາ’’ຕິອາທິ. ຕຕ຺ຖ ເຍນ ກຕານີຕິ ສມ຺ພນ຺ໂຘ. ຉິຊ຺ຊຕີຕິ ຉິທ຺ໂທ, ປຏິ ປຸນປ຺ປຸນໍ ມສິຍຕິ ອາມສິຍຕີຕິ ປຏິມໍໂສ, ນິຄ຺ຄຫິຕາຄໂມ, ຠາວປ຺ປຘາໂນຍໍ ກມ຺ມນິທ຺ເທໂສ. ສຫ ປຏິມໍເສນາຕິ ສປ຺ປຏິມໍໂສ, ກາຍສມາຈາໂຣ. ວິປຣີໂຕຕິ ວິປຣິວຕ຺ຕວເສນ ອິໂຕ ປວຕ຺ໂຕ, ກາຍສມາຈາໂຣຕິ ອຕ຺ໂຖ. ອມູລການຸທ຺ຘໍສນາທີຫີຕິ ອາທິສທ຺ເທນ ທຸຏ຺ຐຸລ຺ລວາຈາທໂຍ ສງ຺ຄຓ຺ຫາຕິ.

ເມຕ຺ຕໍ ນຸ ໂຂ ເມ ຈິຕ຺ຕນ຺ຕິ ເອຕ຺ຖ ອປ຺ປນາຠາວປ຺ປຕ຺ຕໍ ເມຕ຺ຕຈິຕ຺ຕເມວາຘິປ຺ເປຕນ຺ຕິ ທສ຺ເສນ຺ໂຕ ອາຫ ‘‘ປລິໂພເຘ ຉິນ຺ທິຕ຺ວາ’’ຕິອາທິ. ຕຕ຺ຖ ປລິໂພເຘຕິ ອາວາສປລິໂພຘາທິເກ ປລິໂພເຘ. ‘‘ວິກ຺ຂມ຺ຠນວເສນ ວິຫຕາຆາຕ’’ນ຺ຕິ ອິມິນາ ອປ຺ປນາຠາວປ຺ປຕ຺ຕໍ ເມຕ຺ຕຈິຕ຺ຕເມວ ທສ຺ເສຕິ. ອິທໍ ປນາວຸໂສ ກຕ຺ຖ ວຸຕ຺ຕໍ ຠຄວຕາຕິ ເອຕ຺ຖ ອິທໍສທ຺ທກິໍສທ຺ທານໍ ວິສຍໍ ທສ຺ເສນ຺ໂຕ ອາຫ ‘‘ອິທໍ ສິກ຺ຂາປທໍ ກຕຣສ຺ມິໍ ນຄເຣ’’ຕິ.

໙. ໂຈທເກນ ອຸປຏ຺ຐາເປຕພ຺ພກຖາ

໔໐໐. ‘‘ກາເລນ ວກ຺ຂາມີ’’ຕິອາທີສຸ ໂຈທນາຍ ກາລອກາລາທິໍ ທສ຺ເສນ຺ໂຕ ອາຫ ‘‘ເອໂກ ເອກ’’ນ຺ຕິອາທິ. ຕຕ຺ຖ ເອໂກຕິ ເອກໂກ ໂຈທໂກ. ເອກນ຺ຕິ ເອກກໍ ຈຸທິຕກໍ. ສງ຺ຆມຊ຺ຌ…ເປ… ອສນສາລາທີສຸ ວາ ປຣິວາຣິຕກ຺ຂເຓ ວາຕິ ໂຍຊນາ. ຕຕ຺ຖ ‘‘ສງ຺ຆມຊ຺ຌ…ເປ… ອສນສາລາທີສູ’’ຕິ ອິມິນາ ຐານາຠາວໍ ທສ຺ເສຕິ, ‘‘ອຸປຏ຺ຐາເກຫິ ປຣິວາຣິຕກ຺ຂເຓ’’ຕິ ອິມິນາ ກາລາຠາວໍ ທສ຺ເສຕິ. ອິເມຫິ ປເທຫິ ຐານມ຺ປິ ກາເລນ ສງ຺ຄເຫຕ຺ວາ ‘‘ກາເລນ ວກ຺ຂາມີ’’ຕິ ວຸຕ຺ຕນ຺ຕິ ທສ຺ເສຕິ. ຕຈ຺ເຉນາຕິ ສຈ຺ເຈນ. ຫມ຺ໂຠຕິ ນິປາໂຕ ປຈ຺ຉິມປເທສຸ ປຈ຺ເຈກໍ ໂຍເຊຕພ຺ໂພ. ຫມ຺ໂຠ ມຫລ຺ລກ, ຫມ຺ໂຠ ປຣິສາວຈຣ, ຫມ຺ໂຠ ປໍສຸກູລິກ, ຫມ຺ໂຠ ຘມ຺ມກຖິກາຕິ ຫິ ອຕ຺ໂຖ. ອິທນ຺ຕິ ກມ຺ມໍ. ກາຣຓນິສ຺ສິຕນ຺ຕິ ມຫລ຺ລກຠາວກາຣຓາທີສຸ ນິສ຺ສິຕໍ. ‘‘ຠນ຺ເຕ’’ຕິ ນິປາໂຕປິ ປຈ຺ເຈກໍ ໂຍເຊຕພ຺ໂພ. ເອຕ຺ຖ ຈ ‘‘ຫມ຺ໂຠ’’ຕິ ນິປາເຕນ ໂລກໂວຫາຣວເສນ ອນາທຣສ຺ສ ປກາສກຕ຺ຕາ ຜຣຸເສນ ວທຕິ ນາມ, ‘‘ຠນ຺ເຕ’’ຕິ ນິປາເຕນ ສາທຣສ຺ສ ປກາສກຕ຺ຕາ ສຓ຺ເຫນ ວທຕິ ນາມ. ກາຣຓນິສ຺ສິຕໍ ກຕ຺ວາຕິ ອິມສ຺ມິໍ ວີຕິກ຺ກເມ ອຍໍ ນາມ ໂທໂສຕິ ກາຣຓນິສ຺ສິຕໍ ກຕ຺ວາ. ‘‘ເມຕ຺ຕຈິຕ຺ຕໍ ອຸປຏ຺ຐເປຕ຺ວາ’’ຕິ ອິມິນາ ເມຕ຺ຕຈິຕ຺ໂຕຕິ ປທສ຺ສ ‘‘ວກ຺ຂາມີ’’ຕິ ປເທ ກິຣິຍາວິເສສນຠາວໍ ທສ຺ເສຕິ. ໂນ ໂທສນ຺ຕໂຣຕິ ເອຕ຺ຖ ອນ຺ຕຣສທ຺ທສ຺ສ ຈິຕ຺ຕວາຈກຠາວໍ ທສ຺ເສນ຺ໂຕ ອາຫ ‘‘ນ ທຸຏ຺ຐຈິຕ຺ໂຕ’’ຕິ. ‘‘ຫຸຕ຺ວາ’’ຕິ ອິມິນາ ກິຣິຍາວິເສສນຠາວໍ ທສ຺ເສຕິ.

໑໐. ໂຈທກຈຸທິຕກປຏິສໍຍຸຕ຺ຕກຖາ

໔໐໑. ອຊ຺ຌຕ຺ຕນ຺ຕິ ເອຕ຺ຖ ອຕ຺ຕສທ຺ທສ຺ສ ຈິຕ຺ຕວາຈກຠາວຎ຺ຈ ສຕ຺ຕມີວິຠຕ຺ຕິຍາປິ ອມາເທສຠາວຎ຺ຈ ທສ຺ເສນ຺ໂຕ ອາຫ ‘‘ອຕ຺ຕໂນ ຈິຕ຺ເຕ’’ຕິ. ອຸປ຺ປາເທຕ຺ວາຕິ ອິມິນາ ‘‘ມນສິກຣິຕ຺ວາ’’ຕິ ປທສ຺ສ ອຘິປ຺ປາຍຕ຺ຖໍ ທສ຺ເສຕິ. ກາຣຸຎ຺ຎຕາຕິ ເອຕ຺ຖ ທ຺ວີສຸ ຓ຺ຍປຈ຺ຈຍຕາປຈ຺ຈເຍສຸ ເອກສ຺ເສວ ຠາວວາຈກຕ຺ຕາ ເອໂກ ສ຺ວຕ຺ໂຖຕິ ທສ຺ເສນ຺ໂຕ ອາຫ ‘‘ກຣຸຓຠາໂວ’’ຕິ. ຕຕ຺ຖ ກຣຸຓສ຺ສ ປຸຄ຺ຄລສ຺ສ ຠາໂວ ກາຣຸຎ຺ຎໍ, ຕເທວ ກາຣຸຎ຺ຎຕາ. ອຖ ວາ ກຣຸໂຓ ເອວ ປຸຄ຺ຄໂລ ກາຣຸຎ຺ຎໍ, ຕສ຺ສ ຠາໂວ ກາຣຸຎ຺ຎຕາຕິ ວຈນຕ຺ໂຖ ກາຕພ຺ໂພ. ອິມິນາຕິ ‘‘ກາຣຸຎ຺ຎຕາ’’ຕິ ປເທນ. ກຣຸຓຎ຺ຈາຕິ ອປ຺ປນາປຕ຺ຕໍ ກຣຸຓຎ຺ຈ. ກຣຸຓາປຸພ຺ພຠາຄຎ຺ຈາຕິ ອປ຺ປນາປຕ຺ຕາຍ ກຣຸຓາຍ ປຸພ຺ພຠາເຄ ປຣິກມ຺ມູປຈາຣວເສນ ປວຕ຺ຕໍ ກາມາວຈຣກຣຸຓຎ຺ຈ. ທ຺ວີຫິປີຕິ ‘‘ຫິເຕສິຕາ, ອນຸກມ຺ປິຕາ’’ຕິ ທ຺ວີຫິປິ ປເທຫິ. ເມຕ຺ຕຎ຺ຈາຕິ ອປ຺ປນາປຕ຺ຕເມຕ຺ຕຎ຺ຈ. ເມຕ຺ຕາປຸພ຺ພຠາຄຎ຺ຈາຕິ ອປ຺ປນາປຕ຺ຕາຍ ເມຕ຺ຕາຍ ປຸພ຺ພຠາເຄ ປຣິກມ຺ມູປຈາຣວເສນ ປວຕ຺ຕໍ ກາມາວຈຣເມຕ຺ຕຎ຺ຈ. ສຸທ຺ຘນ຺ເຕຕິ ສຸທ຺ເຘ ໂກຏ຺ຐາເສ. ປຏິຎ຺ຎໍ ອາໂຣເປຕ຺ວາຕິ ຈຸທິຕກໍ ປຏິຎ຺ຎໍ ອາໂຣເປຕ຺ວາ. ເຍ ເອເຕຕິ ‘‘ກາຣຸຎ຺ຎຕາ’’ຕິອາທິນາ ນເຍນ ເຍ ເອເຕ ປຎ຺ຈ ຘມ຺ມາ ວຸຕ຺ຕາຕິ ໂຍຊນາ. ອິມິນາ ອິເມ ປຎ຺ຈ ຘມ຺ເມຕິ ເອຕ຺ຖ ອິມສທ຺ທສ຺ສ ອນິຍມນິທ຺ເທສຠາວໍ ທສ຺ເສຕິ.

ສຈ຺ເຈ ຈ ອກຸປ຺ເປ ຈາຕິ ເອຕ຺ຖ ສຈ຺ຈສທ຺ທສ຺ສ ວິຣຕິສຈ຺ຈປຣມຕ຺ຖສຈ຺ຈານິ ປຏິກ຺ຂິປນ຺ໂຕ ອາຫ ‘‘ວຈີສຈ຺ເຈ ຈາ’’ຕິ. ‘‘ອກຸປ຺ປນຕາຍາ’’ຕິ ອິມິນາ ນກຸປສ຺ສ ຠາໂວ ອກຸປ຺ປນ຺ຕິ ກຕ຺ວາ ຓ຺ຍປຈ຺ຈຍສ຺ສ ຠາວຕ຺ຖໍ ທສ຺ເສຕິ. ຫີຕິ ສຈ຺ຈໍ, ວິຕ຺ຖາໂຣ ວາ. ນ ປໂຣ ຆຏ຺ເຏຕພ຺ໂພຕິ ນ ປໂຣ ກຸຊ຺ຌາເປຕພ຺ໂພ. ສພ຺ພຕ຺ຖາຕິ ສພ຺ພສ຺ມິໍ ປາຕິໂມກ຺ຂຏ຺ຐປນກ຺ຂນ຺ຘເກ.

ອິຕິ ປາຕິໂມກ຺ຂຏ຺ຐປນກ຺ຂນ຺ຘກວຓ຺ຓນາຍ ໂຍຊນາ ສມຕ຺ຕາ.