໘. ວຕ຺ຕກ຺ຂນ຺ຘກໍ

໑. ອາຄນ຺ຕຸກວຕ຺ຕກຖາ

໓໕໗. ວຕ຺ຕກ຺ຂນ຺ຘເກ ອາຣາມນ຺ຕິ ອຸປຈາຣສີມໍ ສນ຺ຘາຍ ວຸຕ຺ຕນ຺ຕິ ອາຫ ‘‘ອຸປຈາຣສີມສມີປ’’ນ຺ຕິ. ‘‘ຄເຫຕ຺ວາ’’ຕິ ປທສ຺ສ ‘‘ອຸປາຫນາ’’ຕິ ກມ຺ມໍ ປາກຏໍ, ກຣຓໍ ປນ ອປາກຏໍ. ຕສ຺ມາ ກຣຓໍ ທສ຺ເສນ຺ໂຕ ອາຫ ‘‘ອຸປາຫນທຓ຺ຑເກນ ຄເຫຕ຺ວາ’’ຕິ. ອິມິນາ ‘‘ຫຕ຺ເຖນາ’’ຕິ ກຣຓໍ ນິວຕ຺ເຕຕິ. ປຏິກ຺ກມນ຺ຕີຕິ ເອຕ຺ຖ ປວິສນ຺ຕີຕິ ຈ ອປກ຺ກມນ຺ຕີຕິ ຈ ອຕ຺ຖໍ ປຏິກ຺ຂິປນ຺ໂຕ ອາຫ ‘‘ສນ຺ນິປຕນ຺ຕີ’’ຕິ. ອຸປາຫນາ…ເປ… ປຸຈ຺ຉິຕພ຺ພາຕິ ເອຕ຺ຖ ‘‘ປຸຈ຺ຉິຕພ຺ພາ’’ຕິ ປທສ຺ສ ສຫ ກມ຺ເມນ ປຸຈ຺ຉິຕພ຺ພາກາຣໍ ທສ຺ເສນ຺ໂຕ ອາຫ ‘‘ກຕຣສ຺ມິໍ ຐາເນ’’ຕິອາທິ. ຕຕ຺ຖ ‘‘ກຕຣສ຺ມິໍ…ເປ… ໂຈຬກ’’ນ຺ຕິ ອິມິນາ ປຸຈ຺ຉິຕພ຺ພາກາຣໍ ທສ຺ເສຕິ. ‘‘ອາວາສິກາ ຠິກ຺ຂູ’’ຕິ ອິມິນາ ກມ຺ມໍ ທສ຺ເສຕິ. ‘‘ປຕ຺ຖຣິຕພ຺ພ’’ນ຺ຕິ ອິມິນາ ວິສ຺ສຊ຺ເຊຕພ຺ພນ຺ຕິ ເອຕ຺ຖ ສຊຘາຕຸຍາ ຈຊນຕ຺ຖໍ ປຏິກ຺ຂິປຕິ. ໂຄຈໂຣ ປຸຈ຺ຉິຕພ຺ໂພຕິ ເອຕ຺ຖ ໂຄຈຣສທ຺ໂທ ຠິກ຺ຂາຈາຣສທ຺ເທນ ອຕ຺ຖໂຕ ເອກນ຺ຕິ ທສ຺ເສນ຺ໂຕ ອາຫ ‘‘ຠິກ຺ຂາຈາໂຣ ປຸຈ຺ຉິຕພ຺ໂພ’’ຕິ. ຠິກ຺ຂາຍ ຈຣນ຺ຕິ ເອຕ຺ຖາຕິ ຠິກ຺ຂາຈາໂຣ, ໂຄຈຣຄາໂມ. ຍຕ຺ຖາຕິ ຍສ຺ມິໍ ຄາເມ. ‘‘ກິ’’ນ຺ຕິອາທິນາ ປານີຍໍ ປຸຈ຺ຉິຕພ຺ພນ຺ຕິອາທີສຸ ປຸຈ຺ຉິຕພ຺ພາກາຣໍ ທສ຺ເສຕິ. ກໍ ກາລນ຺ຕິ ກສ຺ມິໍ ກາເລ.

ພຫິ ນິກ຺ຂມນ຺ຕສ຺ສາຕິ ວິຫາຣໂຕ ພຫິ ນິກ຺ຂມນ຺ຕສ຺ສ. ນິລ຺ໂລເກຕພ຺ໂພຕິ ໂອໂລເກຕພ຺ໂພ. ‘‘ຍທິ ສກ຺ໂກຕີ’’ຕິ ອິມິນາ ສເຈ ອຸສ຺ສຫຕີຕິ ເອຕ຺ຖ ສເຈສທ຺ໂທ ຍທິປຣິຍາໂຍ, ອຸສ຺ສຫຕິສທ຺ໂທ ສກ຺ໂກຕິ ປຣິຍາໂຍຕິ ທສ຺ເສຕິ. ສກ຺ໂກນ຺ຕສ຺ສ ວິຫາຣໂສຘນວຕ຺ເຕຕິ ສມ຺ພນ຺ໂຘ.

໒. ອາວາສິກວຕ຺ຕກຖາ

໓໕໙. ອາວາສິກວຕ຺ເຕ ເອວໍ ວິນິຈ຺ຉໂຍ ເວທິຕພ຺ໂພຕິ ໂຍຊນາ. ສພ຺ພໍ ກາຕພ຺ພນ຺ຕິ ສມ຺ພນ຺ໂຘ. ຕສ຺ສາຕິ ວຸຑ຺ຒຕຣສ຺ສ ອາຄນ຺ຕຸກສ຺ສ. ‘‘ປຓ຺ຑິໂຕ’’ຕິອາທິນາ ສເຈ ພາໂລ ‘‘ສມ຺ມຊ຺ຊາຫິ ຕາວ ເຈຕິຍງ຺ຄຓ’’ນ຺ຕິ ນ ວທຕິ, ສມ຺ມຊ຺ຊນິໍ ນິກ຺ຂິປິຕ຺ວາ ຕສ຺ສ ວຕ຺ຕເມວ ກາຕພ຺ພນ຺ຕິ ທສ຺ເສຕິ. ເຠສຊ຺ຊເມວ ກາຕພ຺ພນ຺ຕິ ສຫາວຘາຣເຓນ ວຸຕ຺ຕຕ຺ຕາ ພາໂລ ‘‘ກໂຣຫິ ຕາວ ເຠສຊ຺ຊ’’ນ຺ຕິ ອວທນ຺ໂຕປິ ເຠສຊ຺ຊເມວ ກາຕພ຺ພໍ. ‘‘ປຓ຺ຑິໂຕ ຫີ’’ຕິອາທິນາ ປນ ອາຄນ຺ຕຸກສ຺ສ ວຕ຺ຕພ຺ພຠາວມຕ຺ຕເມວ ທສ຺ເສຕິ. ປາຬິມຸຕ຺ຕກວຕ຺ຕໍ ທສ຺ເສນ຺ໂຕ ອາຫ ‘‘ອປິຈາ’’ຕິອາທິ. ພີຊເນນາຕິ ພີຊນິຍາ. ‘‘ພີຊນ’’ນ຺ຕິ ຫິ ນປຸໍສກລິງ຺ໂຄ, ‘‘ພີຊນີ’’ຕິ ອິຕ຺ຖິລິງ຺ໂຄ. ‘‘ພີຊິຕພ຺ໂພ’’ຕິ ຈ ‘‘ພີຊິຕພ຺ພ’’ນ຺ຕິ ຈ ອິມິນາ ອຏ຺ຐກຖາວຈເນນ ພີຊິຍຕິ ອເນນາຕິ ພີຊນໍ, ພີຊິຍຕິ ເອຕາຍາຕິ ພີຊນີຕິ ວຈນຕ຺ໂຖ ກາຕພ຺ໂພ. ອສ຺ສາຕິ ວຸຑ຺ຒຕຣອາຄນ຺ຕຸກສ຺ສ. ມກ຺ເຂຕພ຺ພາຕິ ອຎ຺ເຊຕພ຺ພາ. ຫີຕິ ສຈ຺ຈໍ. ເອຕ຺ຖາຕິ ອຸປາຫນປຸຎ຺ຉເນ. ກຕ຺ຖາຕິ ກສ຺ມິໍ ວິຫາເຣ. ປຸຈ຺ຉິເຕນ ອາວາສິເກນາຕິ ສມ຺ພນ຺ໂຘ.

‘‘ອຕ຺ຕໂນ ສນ຺ຕິກໍ…ເປ… ນ ລຠຕີ’’ຕິ ອິມິນາ ອຕ຺ຕານໍ ສນ຺ຘາຍ ອນາຄຈ຺ຉນ຺ໂຕປິ ອຕ຺ຕໂນ ສນ຺ຕິກໍ ສມ຺ປຕ຺ຕສ຺ສ ອາຄນ຺ຕຸກສ຺ສ ວຕ຺ຕໍ ອກາຕຸໍ ນ ລຠຕີຕິ ທສ຺ເສຕິ.

໓. ຄມິກວຕ຺ຕກຖາ

໓໖໐. ຄມິກວຕ຺ເຕ ເອວໍ ວິນິຈ຺ຉໂຍ ເວທິຕພ຺ໂພຕິ ໂຍຊນາ. ຕຕ຺ຖາຕິ ເສນາສນກ຺ຂນ຺ຘເກ. ຕໍ ສພ຺ພໍ ປຏິສາເມຕ຺ວາຕິ ສມ຺ພນ຺ໂຘ. ຍຕ຺ຖ ເຍສຸ ປາສາຓປິຏ຺ຐິປາສາຓຕ຺ຖມ຺ເຠສຸ ອຸປຈິກາ ນາໂຣຫນ຺ຕິ, ຕສ຺ສໍ ປາສາຓປິຏ຺ຐິຍໍ ວາ ເຕສຸ ປາສາຓຕ຺ຖມ຺ເຠສຸ ວາ ຍໍ ກຕເສນາສນໍ ອຕ຺ຖິ, ຕໍ ອນາປຸຈ຺ຉນ຺ຕສ຺ສາປິ ອນາປຕ຺ຕີຕິ ໂຍຊນາ. ຈຕູສຸ ປາສາເຓສູຕິອາທິ ວຸຕ຺ຕນ຺ຕິ ສມ຺ພນ຺ໂຘ, ອຸປຈິການໍ ອຸປ຺ປຕ຺ຕິຏ຺ຐາເນ ກເຕຕິ ສມ຺ພນ຺ໂຘ. ອຍນ຺ຕິ ອານິສໍໂສ. ໂອວສ຺ສກເຄເຫ ປນ ຐປິຕານໍ ມຎ຺ຈປີຐານນ຺ຕິ ສມ຺ພນ຺ໂຘ.

໔. ອນຸໂມທນວຕ຺ຕກຖາ

໓໖໒. ອິທ຺ຘໍ ອໂຫສີຕິ ເອຕ຺ຖ ອິຘຘາຕຸຍາ ວຑ຺ຒນຕ຺ຖໍ ປຏິກ຺ຂິປນ຺ໂຕ ອາຫ ‘‘ສມ຺ປນ຺ນໍ ອໂຫສີ’’ຕິ. ສງ຺ຆຕ຺ເຖເຣ ນິສິນ຺ເນຕິ ສມ຺ພນ຺ໂຘ. ອນຸເຖເຣ ອນຸໂມທນຕ຺ຖາຍ ນິສິນ຺ເນຕິ ໂຍຊນາ. ສງ຺ຆຕ຺ເຖເຣນ ອຊ຺ຌິຏ຺ເຐປີຕິ ສມ຺ພນ຺ໂຘ. ອນຸໂມທໂກ ວທຕີຕິ ສມ຺ພນ຺ໂຘ. ອນຸ ປຸນປ຺ປຸນໍ, ປຈ຺ຉາ ວາ ທາຍເກ ຘມ຺ມກຖາຍ ໂມເທຕີຕິ ອນຸໂມທໂກ. ‘‘ຄຈ຺ຉຖາ’’ຕິ ສເຈ ວທຕິ ອນຸໂມທໂກຕິ ໂຍຊນາ. ຕສ຺ສາຕິ ອນຸໂມທກສ຺ສ. ມນຸສ຺ສາ ກາເຣນ຺ຕີຕິ ສມ຺ພນ຺ໂຘ. ‘‘ເອເກນາ’’ຕິ ປທໍ ‘‘ກາເຣນ຺ຕີ’’ຕິ ປເທ ກາຣິຕກມ຺ມໍ. ຕສ຺ສາຕິ ກາຣິຕຠິກ຺ຂຸສ຺ສ. ອນຸໂມທນໂຕຕິ ອນຸໂມທນກາຣຓາ. ອຸປນິສິນ຺ນກຖາຕິ ອຸປສມີເປ ນິສິນ຺ນານໍ ກຖິຍຕິ ເອຕາຍາຕິ ອຸປນິສິນ຺ນກຖາ. ອນຸໂມທນາຍາຕິ ອນຸໂມທນຕ຺ຖາຍ. ອຊ຺ຌິຏ຺ໂຐວາຕິ ສຍໍ ອຊ຺ຌິຏ຺ໂຐ ເອວ. ເອຕ຺ຖາຕິ ອນຸໂມທນວຕ຺ຖຸສ຺ມິໍ. ‘‘ສຎ຺ຊາຕວຈ຺ໂຈ’’ຕິ ອິມິນາ ວຈ຺ໂຈ ສຎ຺ຊາໂຕ ອິມສ຺ສາຕິ ວຈ຺ຈິໂຕຕິ ກຕ຺ວາ ສຎ຺ຊາຕຕ຺ເຖ ອິຕ ປຈ຺ຈໂຍຕິ ທສ຺ເສຕິ.

໕. ຠຕ຺ຕຄ຺ຄວຕ຺ຕກຖາ

໓໖໔. ຠຕ຺ຕຄ຺ຄວຕ຺ເຕຕິ ຠຕ຺ຕໍ ຄຓ຺ຫນ຺ຕິ ເອຕ຺ຖາຕິ ຠຕ຺ຕຄ຺ຄໍ, ປຣິວິສນຏ຺ຐານໍ. ຕສ຺ມິໍ ກຕ຺ຕພ຺ພໍ ວຕ຺ຕໍ ຠຕ຺ຕຄ຺ຄວຕ຺ຕໍ, ຕສ຺ມິໍ ຠຕ຺ຕຄ຺ຄວຕ຺ເຕ ເອວໍ ວິນິຈ຺ຉໂຍ ເວທິຕພ຺ໂພຕິ ໂຍຊນາ. ມນຸສ຺ສານໍ ປຣິວິສນຏ຺ຐານໍ ນາມ ຍຕ຺ຖ ມນຸສ຺ສາ ສປຸຕ຺ຕທາຣາ ອາວສິຕ຺ວາ ຠິກ຺ຂູໂຠເຊນ຺ຕິ. ‘‘ອຕິອລ຺ລີຍິຕ຺ວາ’’ຕິ ອິມິນາ ອນຸປຂຊ຺ຊາຕິ ເອຕ຺ຖ ຂທຘາຕຸສ຺ສ ຫິໍສນໍ ນາມ ອຕິອລ຺ລີຍນນ຺ຕິ ທສ຺ເສຕິ. ອາສເນສຸ ສຕີຕິ ອາສເນສຸ ສນ຺ເຕສຸ. ນິສີທນ຺ຕສ຺ສ ນວກສ຺ສາຕິ ສມ຺ພນ຺ໂຘ. ອາປຊ຺ຊຕີຕິ ອາປຕ຺ຕິໍ ອາປຊ຺ຊຕິ. ອາປຸຈ຺ຉິເຕ ອນນຸຊານນ຺ໂຕ ເຖໂຣ ອາປຊ຺ຊຕີຕິ ໂຍຊນາ. ສງ຺ຆາຏິນ຺ຕິ ປາຣຸຕສງ຺ຆາຏິໍ.

ປຕ຺ຕໂຘວນອຸທກນ຺ຕິ ຠຸຎ຺ຊນຕ຺ຖາຍ ປຕ຺ຕານໍ ໂຘວນອຸທກໍ. ຄເຫຕພ຺ພນ຺ຕິ ຫຕ຺ເຖນ ຄເຫຕພ຺ພໍ.

ຍຖາ ຄຓ຺ຫິຍມາເນຕິ ໂຍຊນາ. ມຕ຺ຕາຍາຕິ ປມາຓາຍ. ສພ຺ພິອາທີສຸ ເອວາຕິ ເອວສທ຺ໂທ ອຊ຺ຌາຫຣິຕພ຺ໂພ. ສພ຺ພິອາທີສູຕິ ສພ຺ພິເຕລອຸຕ຺ຕຣິຠງ຺ເຄສຸ, ນິທ຺ຘາຣເຓ ຠຸມ຺ມໍ. ຍນ຺ຕິ ສພ຺ພິອາທິກໍ. ອປ຺ປໂຫຕີຕິ ສພ຺ເພສໍ ຠິກ຺ຂູນໍ ນປ຺ປໂຫຕິ. ຕນ຺ຕິ ສພ຺ພິອາທິກໍ, ສມ຺ປາເທຫີຕິ ສມ຺ພນ຺ໂຘ. ຕາທິສໍ ສພ຺ພິອາທິກນ຺ຕິ ສມ຺ພນ຺ໂຘ.

ຍໍ ຠຕ຺ຕຄ຺ຄນ຺ຕິ ໂຍຊນາ. ຫຕ຺ຖໂຘວນອຸທກນ຺ຕິ ຠຸຕ຺ຕາວີນໍ ຫຕ຺ຖສ຺ສ ໂຘວນອຸທກໍ. ອນ຺ຕຣາຕິ ໂຠຊນສ຺ສ ມຊ຺ເຌ. ປິປາສິເຕນາຕິ ປິວິຕຸໍ ອິຈ຺ຉນ຺ເຕນ. ຄເລຕິ ກຓ຺ເຐ.

ນິວຕ຺ຕນ຺ເຕນາຕິ ເອຕ຺ຖ ກສ຺ມາ ຐານາ ນິວຕ຺ຕນ຺ເຕນາຕິ ອາຫ ‘‘ຠຕ຺ຕຄ຺ຄໂຕ’’ຕິ. ກຖໍ ເກນາກາເຣນ ນິວຕ຺ຕິຕພ຺ພນ຺ຕິ ໂຍຊນາ. ກສ຺ມາ ນວເກຫິ ຠິກ຺ຂູຫິ ປຐມຕຣໍ ນິວຕ຺ຕິຕພ຺ພນ຺ຕິ ອາຫ ‘‘ສມ຺ພາເຘສຸ ຫີ’’ຕິອາທິ. ນິກ຺ຂມໂນກາໂສຕິ ປຐມຕຣໍ ນິກ຺ຂນ຺ໂຕກາໂສ. ປຏິປາຏິຍາຕິ ວຸຑ຺ຒປຏິປາຏິຍາ. ຘຸເຣຕິ ເຄຫທ຺ວາຣສ຺ສ ສມີເປ. ຘຸຣສທ຺ໂທ ຫິ ອິຘ ສມີປວາຈໂກ. ນວກາ ອນ຺ໂຕເຄເຫ ເຈ ນິສິນ຺ນາ ໂຫນ຺ຕີຕິ ໂຍຊນາ. ອນ຺ຕເຣນາຕິ ຠິກ຺ຂູນໍ ວິວເຣນ, ມຊ຺ເຌນ ວາ. ວິຣຬາຍາຕິ ຕນຸກາຍ.

໖. ປິຓ຺ຑຈາຣິກວຕ຺ຕກຖາ

໓໖໖. ປິຓ຺ຑຈາຣິກວຕ຺ເຕ ເອວໍ ວິນິຈ຺ຉໂຍ ເວທິຕພ຺ໂພຕິ ໂຍຊນາ. ກປ຺ປາສໍ ວາ ຄເຫຕ຺ວາຕິ ສມ຺ພນ຺ໂຘ. ຍຎ຺ຈາຕິ ຍຎ຺ຈ ກິຎ຺ຈິ ວຕ຺ຖຸໍ, ຄເຫຕ຺ວາຕິ ສມ຺ພນ຺ໂຘ. ກໂຣນ຺ຕີ ຐິຕາ ວາຕິ ກໂຣນ຺ຕີ ຫຸຕ຺ວາ ຐິຕາ ວາ. ຕນ຺ຕິ ກມ຺ມໍ. ນ ຈ ຠິກ຺ຂາທາຍິກາຍາຕິ ອິຕ຺ຖິລິງ຺ຄວເສນ ວຸຕ຺ຕຕ຺ຕາ ອິຕ຺ຖິຍາ ເອວ ມຸຂໍ ນ ອຸລ຺ໂລເກຕພ຺ພນ຺ຕິ ອຕ຺ຖໍ ປຏິກ຺ຂິປນ຺ໂຕ ອາຫ ‘‘ອິຕ຺ຖີ ວາ ໂຫຕູ’’ຕິອາທິ. ‘‘ຠິກ຺ຂາທານສມເຍ’’ຕິ ອິມິນາ ອຎ຺ຎສ຺ມິໍ ສມເຍ ໂອໂລເກນ຺ໂຕປິ ນຕ຺ຖິ ໂທໂສຕິ ທສ຺ເສຕິ. ເອກສ຺ມິໍ ກາເລ ຠິກ຺ຂາຍ ທທມານາຍ ສພ຺ພກາລມ຺ປິ ນ ໂອໂລເກຕພ຺ພນ຺ຕິ ອນິຈ຺ຉິຕຕ຺ຖໍ ປຏິກ຺ຂິປຕິ.

໗. ອາຣຎ຺ຎິກວຕ຺ຕກຖາ

໓໖໘. ອາຣຎ຺ຎິກວຕ຺ເຕ ເອວໍ ວິນິຈ຺ຉໂຍ ເວທິຕພ຺ໂພຕິ ໂຍຊນາ. ເສນາສນາ ໂອຕຣິຕພ຺ພນ຺ຕິ ເອຕ຺ຖ ອຣຎ຺ເຎ ຣຸກ຺ຂມູລາທີສຸ ນິສິນ຺ນສ຺ສ ວິຫາຣາຠາວໂຕ ເສນາສນໍ ນາມ ວສນຏ຺ຐານໍ ສນ຺ຘາຍ ວຸຕ຺ຕນ຺ຕິ ອາຫ ‘‘ວສນຏ຺ຐານໂຕ ນິກ຺ຂມິຕພ຺ພ’’ນ຺ຕິ.

ປຕ຺ຕໍ ຖວິກາຍ ປກ຺ຂິປິຕ຺ວາຕິ ເອຕ຺ຖ ກຖໍ ປຕ຺ໂຕ ຖວິກາຍ ປກ຺ຂິປິຕພ຺ໂພຕິ ອາຫ ‘‘ສເຈ ພຫີ’’ຕິອາທິ. ຕຕ຺ຖ ປຕ຺ໂຕ ປກ຺ຂິປິຕພ຺ໂພຕິ ສມ຺ພນ຺ໂຘ. ໂຘວິຕ຺ວາ ກຕ຺ວາຕິ ປເທສຸ ‘‘ປຕ຺ຕໍ ໂວທກ’’ນ຺ຕິ ວິຠຕ຺ຕິປຣິຓາມໍ ກຕ຺ວາ ສມ຺ພນ຺ຘິຕພ຺ພໍ. ຕມ຺ປີຕິ ເວຬຸນາຬິກມ຺ປິ. ສມີເປຕິ ອາຣຎ຺ຎກສ຺ສ ເສນາສນສ຺ສ ສມີເປ. ຍຖາ ຈ ອາຣຎ຺ຎກສ຺ສ ອຣຓິສຫິຕໍ ອິຈ຺ຉິຕພ຺ພໍ, ເອວໍ ກນ຺ຕາຣໍ ປຏິປນ຺ນສ຺ສາປິ ອຣຓິສຫິຕໍ ອິຈ຺ຉິຕພ຺ພນ຺ຕິ ໂຍຊນາ. ຄຓວາສິໂນຕິ ຄເຓນ ສຫ ວາສິໂນ, ອາຣຎ຺ຎກສ຺ສາຕິ ສມ຺ພນ຺ໂຘ. ເຕນາຕິ ອຣຓິສຫິເຕນ. ‘‘ນກ຺ຂຕ຺ຕາເນວ ນກ຺ຂຕ຺ຕປທານີ’’ຕິ ອິມິນາ ອສ຺ສຍຸຊາທິນກ຺ຂຕ຺ຕາເນວ (ອຠິຘານປ຺ປທີປິກາຍໍ ໕໘-໖໐ ຄາຖາສຸ) ທິສາຠາຄຊານນສ຺ສ, ຈ ສມຍຊານນສ຺ສ ຈ ກາຣຓຕ຺ຕາ ນກ຺ຂຕ຺ຕປທານິ ນາມາຕິ ທສ຺ເສຕິ.

໘. ເສນາສນວຕ຺ຕກຖາ

໓໖໙. ເສນາສນວຕ຺ເຕ ເອວໍ ວິນິຈ຺ຉໂຍ ເວທິຕພ຺ໂພຕິ ໂຍຊນາ. ທ຺ວາຣໍ ນາມາຕິ ມຫາທ຺ວາຣໍ. ມຫາວຬຎ຺ຊນ຺ຕິ ມຫນ຺ເຕຫິ ຊເນຫິ ປຣິຠຸຎ຺ຊິຕພ຺ພໍ. ຕຕ຺ຖາຕິ ທ຺ວາເຣ. ອາປຸຈ຺ຉິຕ຺ວາວາຕິ ວຸຑ຺ຒໍ ອາປຸຈ຺ຉິຕ຺ວາວ, ສຠາຄສ຺ສ ວຸຑ຺ຒຕຣສ຺ສາຕິ ສມ຺ພນ຺ໂຘ. ວຏ຺ຏຕິເຍວາຕິ ຍຖາສຸຂໍ ວິຫຣິຕຸໍ ວຏ຺ຏຕິເຍວ. ປຣິວຕ຺ຕິຕພ຺ພນ຺ຕິ ປຣິມຸຂໍ ວຕ຺ຕິຕພ຺ພໍ.

໙. ຊນ຺ຕາຆຣວຕ຺ຕາທິກຖາ

໓໗໑. ຊນ຺ຕາຆຣວຕ຺ເຕ ເອວໍ ວິນິຈ຺ຉໂຍ ເວທິຕພ຺ໂພຕິ ໂຍຊນາ. ພຫິຊຄຕີຕິ ພຫິອາລິນ຺ໂທ.

໓໗໓. ອາຈມນວຕ຺ຖຸສ຺ມິໍ ເອວມຕ຺ໂຖ ເວທິຕພ຺ໂພຕິ ໂຍຊນາ. ນີຫຣິຕ຺ວາຕິ ອຸທກໍ ນີຫຣິຕ຺ວາ. ອາຈມິຕພ຺ພນ຺ຕິ ໂຘວິຕພ຺ພໍ. ‘‘ອາປຸພ຺ໂພ ຈມຸ ໂຘວເນ’’ຕິ ຫິ ຘາຕຸປາເຐສຸ ວຸຕ຺ຕໍ. ອິທໍ ອຕິວິວຏນ຺ຕິ ອິທໍ ຐານໍ ອຕິວິວຏໍ, ນ ເກນຈິ ປຏິຈ຺ຉນ຺ນນ຺ຕິ ອຕ຺ໂຖ. ອຸທກໍ ອລຠນ຺ຕສ຺ເສວາຕິ ອຸທກໍ ອລຠນ຺ເຕເຍວ.

໓໗໔. ວຈ຺ຈກຸຏິວຕ຺ເຕ ເອວໍ ວິນິຈ຺ຉໂຍ ເວທິຕພ຺ໂພຕິ ໂຍຊນາ. ອຍນ຺ຕິ ທນ຺ຕກຏ຺ຐໍ ຂາທໂຕ ວຈ຺ຈກຣຓໍ. ສພ຺ພຕ຺ເຖວາຕິ ສພ຺ພສ຺ມິໍ ເອວ ຐາເນ. ‘‘ນ ຜຣຸເສນ ກຏ຺ເຐນາ’’ຕິ ເອຕ຺ຖ ນ ເກວລໍ ຂຣກຏ຺ຐເມວ, ຜາລິຕກຏ຺ຐາທໂຍປິ ຉວິອວເລຂນກຏ຺ຐາ ຜຣຸສາເຍວ ນາມາຕິ ທສ຺ເສນ຺ໂຕ ອາຫ ‘‘ຜາລິຕກຏ຺ເຐນ ວາ’’ຕິອາທິ. ປວິຏ຺ຐສ຺ສາຕິ ວຈ຺ຈກຸຏິໍ ປວິຏ຺ຐສ຺ສ.

ສພ຺ພສາຘາຣຓຏ຺ຐານນ຺ຕິ ສພ຺ເພສໍ ຠິກ຺ຂູນໍ, ສພ຺ເພຫິ ວາ ສາຘາຣຓໍ ວຈ຺ຈກຸຏິສງ຺ຂາຕໍ ຐານໍ. ຕຕ຺ຣາຕິ ຕສ຺ມິໍ ສພ຺ພສາຘາຣເຓ ຐາເນ. ນິພທ຺ຘຄມນຕ຺ຖາຍາຕິ ອຕ຺ຕໂນ ນິພທ຺ຘຄມນຕ຺ຖາຍ ກຕໍ ຍໍ ຐານໍ ວາ ຍໍ ປຸຄ຺ຄລິກຏ຺ຐານໍ ວາ ໂຫຕີຕິ ໂຍຊນາ.

ອຸຫຕາຕິ ເອຕ຺ຖ ອຸປຸພ຺ໂພ ຫທຘາຕູຕິ ທສ຺ເສນ຺ໂຕ ອາຫ ‘‘ອຸຫທິຕາ’’ຕິ. ‘‘ຫທ ກຣີໂສສ຺ສຄ຺ເຄ’’ຕິ ຘາຕຸປາເຐສຸ (ປາຓິນີ ໙໗໗ ຘາຕຸປາເຐ; ສທ຺ທນີຕິຘາຕຸມາລາຍໍ ໑໕ ທກາຣນ຺ຕຘາຕຸ) ວຸຕ຺ຕຕ຺ຕາ ວຈ຺ຈກູປໂຕ ພຫິ ກຣີສສ຺ສ ໂອສ຺ສຊ຺ຊນນ຺ຕິ ອາຫ ‘‘ພຫິ ວຈ຺ຈມກ຺ຂິຕາ’’ຕິ. ໂຘວິຕພ຺ພາຕິ ອຸທເກນ ໂຘວິຕພ຺ພາ. ເອຕມ຺ປີຕິ ອຸທກສ຺ສ ອວິຊ຺ຊມານມ຺ປິ. ສພ຺ພຕ຺ຖາຕິ ສພ຺ພສ຺ມິໍ ວຕ຺ຕກ຺ຂນ຺ຘເກ.

ອິຕິ ວຕ຺ຕກ຺ຂນ຺ຘກວຓ຺ຓນາຍ ໂຍຊນາ ສມຕ຺ຕາ.