໑໒. ສຕ຺ຕສຕິກກ຺ຂນ຺ຘກໍ

ທສວຕ຺ຖຸກຖາ

໔໔໗. ສຕ຺ຕສຕິກກ຺ຂນ຺ຘເກ ວຑ຺ເຒນ຺ຕິ ກຏສິນ຺ຕິ ເອຕ຺ຖ ກຏສີສທ຺ໂທ ສຸສານຠູມິວາຈໂກຕິ ທສ຺ເສນ຺ໂຕ ອາຫ ‘‘ປຸນປ຺ປຸນໍ ກເຬວຣໍ ນິກ຺ຂິປມານາ ຠູມິໍ ວຑ຺ເຒນ຺ຕີ’’ຕິ. ຕຕ຺ຖ ກເຬວຣນ຺ຕິ ເທຫໍ. ຕຎ຺ຫິ ກເຬ ອງ຺ຄປຈ຺ຈງ຺ຄານໍ ອວຍເວ ສມ຺ປິຓ຺ເຑຕ຺ວາ ວຣິຍຕິ ອິຈ຺ຉິຍຕີຕິ ກເຬວຣນ຺ຕິ ວຸຈ຺ຈຕິ. ເອວໍ ໂຆຣໍ ກຏສິໍ ວຑ຺ເຒນ຺ຕາວ ປຸນພ຺ຠວໍ ອາທິຍນ຺ຕີຕິ ໂຍຊນາ.

໔໕໔. ປາປກໍ ໂນ ອາວຸໂສ ກຕນ຺ຕິ ເອຕ຺ຖ ໂນສທ຺ໂທ ອມ຺ຫສທ຺ທກາຣິໂຍ, ຉຏ຺ຐີກຕ຺ຕາ ຈ ໂຫຕີຕິ ທສ຺ເສນ຺ໂຕ ອາຫ ‘‘ອາວຸໂສ ອມ຺ເຫຫິ ປາປກໍ ກຕ’’ນ຺ຕິ.

໔໕໕. ‘‘ປິຍວຈນ’’ນ຺ຕິ ອິມິນາ ກຕເມນ ຕ຺ວໍ ຠູມິ-ວິຫາເຣນາຕິ ເອຕ຺ຖ ຠູມິສທ຺ໂທ ປິຍວາຈໂກ ຣຸຬ຺ຫີສທ຺ໂທຕິ ທສ຺ເສຕິ. ‘‘ອາມນ຺ເຕຕີ’’ຕິ ອິມິນາ ອາລປນປທນ຺ຕິ ທສ຺ເສຕິ. ອາວຸໂສ ຠູມີຕິ ອຕ຺ໂຖ. ກຸລ຺ລວິຫາໂຣ ນາມ ເມຕ຺ຕາວິຫາໂຣ, ໂສ ຈ ເຫຏ຺ຐິມຌານຕ຺ຕເຍ ຍຸຕ຺ຕຕ຺ຕາ ອຸຕ຺ຕານວິຫາໂຣຕິ ອາຫ ‘‘ອຸຕ຺ຕານວິຫາເຣນາ’’ຕິ.

໔໕໗. ສາວຕ຺ຖິຍາຕິ ສາວຕ຺ຖິນຄເຣ. ສຸຕ຺ຕວິຠງ຺ເຄຕິ ປທຠາຊນີເຍ. ປຏິກ຺ຂິຕ຺ຕຠາວໍ ວິຕ຺ຖາເຣນ຺ໂຕ ອາຫ ‘‘ຕຕ຺ຣ ຫີ’’ຕິອາທິ. ຕຕ຺ຣາຕິ ສຸຕ຺ຕວິຠງ຺ເຄ, ປຏິກ຺ຂິຕ຺ຕໍ ໂຫຕີຕິ ສມ຺ພນ຺ໂຘ. ຕຕ຺ຣາຕິ ‘‘ສນ຺ນິຘິກາຣເກ ອສນ຺ນິຘິກາຣກສຎ຺ຎີ’’ຕິອາທິວຈເນ. ເອເກ ອາຈຣິຍາ ເອວໍ ມຎ຺ຎນ຺ຕີຕິ ໂຍຊນາ. ກິນ຺ຕິ ມຎ຺ຎນ຺ຕີຕິ ອາຫ ‘‘ໂຍ ປນ ຠິກ຺ຂູ’’ຕິອາທິ. ອໂລຓກໍ ຍມ຺ປິ ອາມິສນ຺ຕິ ໂຍຊນາ. ເຕນາຕິ ປຸເຣປຣິຄ຺ຄຫິຕໂລເຓນ. ຕນ຺ຕິ ອາມິສໍ. ຕທຫຸປຏິຄ຺ຄຫິຕເມວາຕິ ຕສ຺ມິໍ ອຫນິ ປຏິຄ຺ຄຫິຕເມວ. ຕສ຺ມາຕິ ຍສ຺ມາ ຕທຫຸປຏິຄ຺ຄຫິຕເມວ, ຕສ຺ມາ. ວທໂຕຕິ ວທນ຺ຕສ຺ສ, ຠຄວໂຕ ວຈເນນາຕິ ສມ຺ພນ຺ໂຘ. ເອຕ຺ຖາຕິ ອໂລຓກາມິສປຣິຠຸຎ຺ຊເນ, ທຸກ຺ກເຏນ ຠວິຕພ຺ພໍ ອິຕິ ມຎ຺ຎນ຺ຕີຕິ ໂຍຊນາ. ເຕຕິ ເອເກ ອາຈຣິຍາ. ທຸກ຺ກເຏນປີຕິ ປິສທ຺ເທນ ປເຄວ ປາຈິຕ຺ຕິເຍນາຕິ ທສ຺ເສຕິ. ຫີຕິ ສຈ຺ຈໍ, ຍສ຺ມາ ວາ. ເອຕ຺ຖາຕິ ຍາວຊີວິກຍາວກາລິເກສຸ. ຍາວຊີວິກໍ ນ ຕທຫຸປຏິຄ຺ຄຫິຕໍ, ຍາວກາລິກເມວ ຕທຫຸປຏິຄ຺ຄຫິຕນ຺ຕິ ໂຍຊນາ. ຕທຫຸປຏິຄ຺ຄຫິຕຎ຺ຈ ຍາວກາລິກນ຺ຕິ ສມ຺ພນ຺ໂຘ. ຕໍ ທຸກ຺ກຏໍ ຕຸມ຺ເຫ ຍທິ ມຎ຺ຎຖາຕິ ໂຍຊນາ. ຍາວຊີວິກມິສ຺ສນ຺ຕິ ໂລຓສງ຺ຂາເຕນ ຍາວຊີວິເກນ ສໍສຏ຺ຐໍ. ພ຺ຍຎ຺ຊນມຕ຺ຕນ຺ຕິ ວິກາເລ ນ ກປ຺ປຕີຕິ ພ຺ຍຎ຺ຊນມຕ຺ຕໍ.

ເອຕ຺ຖາຕິ ‘‘ຍາວກາລິເກນ ຠິກ຺ຂເວ’’ຕິອາທິວຈເນ (ມຫາວ. ໓໐໕) ຕທຫຸປຏິຄ຺ຄຫິຕໍ ຍາວຊີວິກນ຺ຕິ ໂຍຊນາ. ຍາວກາລິກສ຺ສ ຄຕິ ວິຍ ຄຕິ ເອຕສ຺ສາຕິ ຍາວກາລິກຄຕິກໍ. ຕສ຺ມາ ທຸກ຺ກຏໍ ນ ໂຫຕີຕິ ສມ຺ພນ຺ໂຘ. ເອຕ຺ຖາຕິ ປຸເຣປຏິຄ຺ຄຫິຕໂລເຓນ ອາມິສປຣິຠຸຎ຺ຊເນ. ຕທຫຸປຏິຄ຺ຄຫິຕໍ ຍາວກາລິເກນ ສມ຺ຠິນ຺ນຣສໍ ຍາວຊີວິກນ຺ຕິ ໂຍຊນາ. ຕນ຺ຕິ ຍຖາວຸຕ຺ຕໍ ຍາວຊີວິກໍ, ວິກາລໂຠຊນປາຈິຕ຺ຕິຍາ ເອວ ກາຣຓໍ ໂຫຕີຕິ ໂຍຊນາ. ເອວນ຺ຕິ ຕຖາ, ອຊ຺ຊ ປຏິຄ຺ຄຫິຕມ຺ປິ ຍາວຊີວິກນ຺ຕິ ສມ຺ພນ຺ໂຘ. ອປຣຊ຺ຊຸ ປຏິຄ຺ຄຫິເຕນ ຍາວກາລິເກນາຕິ ໂຍຊນາ. ຕນ຺ຕິ ຍາວຊີວິເກນ ສມ຺ມິສ຺ສໍ ຍາວກາລິກໍ, ອຊານນ຺ໂຕປີຕິ ສມ຺ພນ຺ໂຘ. ອິທນ຺ຕິ ຍຖາວຸຕ຺ຕໍ ຍາວກາລິກໍ. ຕໂຕຕິ ສນ຺ນິຘິໂຠຊນປາຈິຕ຺ຕິຍໂຕ. ຫີຕິ ສຈ຺ຈໍ. ‘‘ສາວຕ຺ຖິຍາ ສຸຕ຺ຕວິຠງ຺ເຄ’’ຕິ ອິທໍ ພ຺ຍາກຣຓໍ ປຣິສຸທ຺ຘນ຺ຕິ ໂຍຊນາ.

‘‘ຣາຊຄເຫ ອຸໂປສຖສໍຍຸຕ຺ເຕ’’ຕິ ອິທໍ ວຈນໍ ວຸຕ຺ຕນ຺ຕິ ສມ຺ພນ຺ໂຘ. ອຸໂປສຖສໍຍຸຕ຺ເຕຕິ ອຸໂປສເຖນ ສມ຺ພນ຺ເຘ ອຸໂປສຖກ຺ຂນ຺ຘເກ. ກິໍ ສນ຺ຘາຍ ວຸຕ຺ຕນ຺ຕິ ອາຫ ‘‘ນ ຠິກ຺ຂເວ…ເປ… ທຸກ຺ກຏສ຺ສາຕິ (ມຫາວ. ໑໔໑) ເອຕໍ ສນ຺ຘາຍາ’’ຕິ. ອຕິສາເຣຕິ ອຕິກ຺ກມິຕ຺ວາ ສຣເຓ ຄມເນ ປວຕ຺ຕເນຕິ ອຕ຺ໂຖ. ນິມິຕ຺ຕຕ຺ເຖ ເຈຕໍ ຠຸມ຺ມໍ. ‘‘ຈມ຺ເປຍ຺ຍເກ ວິນຍວຕ຺ຖຸສ຺ມິ’’ນ຺ຕິ ອິທໍ ວຸຕ຺ຕນ຺ຕິ ສມ຺ພນ຺ໂຘ. ‘‘ຈມ຺ເປຍ຺ຍກ຺ຂນ຺ຘເກ ອາຄຕ’’ນ຺ຕິ ອິມິນາ ຈມ຺ເປຍ຺ເຍ ອາຄຕໍ ຈມ຺ເປຍ຺ຍກນ຺ຕິ ວຈນຕ຺ຖໍ ທສ຺ເສຕິ.

ຘມ຺ມິກນ຺ຕິ ຠູເຕນ ປວຕ຺ຕໍ. ສຸຕ຺ຕວິຠງ຺ເຄ ຫິ ຍສ຺ມາ ອາຄຕນ຺ຕິ ສມ຺ພນ຺ໂຘ. ທສາເຍວາຕິ ທສາຍເມວ, ອາຘາເຣ ເຈຕໍ ຠຸມ຺ມໍ. ວິທຕ຺ຖິມຕ຺ຕາຕິ ວິທຕ຺ຖິປມາຓາ. ທສາຍ ວິນາຕິ ທສໍ ວຊ຺ເຊຕ຺ວາ. ຕໍ ປມາຓນ຺ຕິ ວິທຕ຺ຖິຕ຺ຕຍສງ຺ຂາຕໍ ຕໍ ປມາຓໍ ກໂຣນ຺ຕສ຺ສ ວຸຕ຺ຕປາຈິຕ຺ຕິຍໍ ອາປຊ຺ຊຕີຕິ ສມ຺ພນ຺ໂຘ. ‘‘ຕໍ ອຕິກ຺ກາມຍໂຕ ເຉທນກໍ ປາຈິຕ຺ຕິຍ’’ນ຺ຕິ (ປາຈິ. ໕໓໓) ອິທໍ ວຈນໍ ອາຄຕເມວ ໂຫຕີຕິ ໂຍຊນາ. ສພ຺ພຕ຺ຖາຕິ ສພ຺ພສ຺ມິໍ ສຕ຺ຕສຕິກກ຺ຂນ຺ຘເກ.

ອິຕິ ສມນ຺ຕປາສາທິກາຍ ວິນຍສໍວຓ຺ຓນາຍ

ສຕ຺ຕສຕິກກ຺ຂນ຺ຘກວຓ຺ຓນາຍ

ໂຍຊນາ ສມຕ຺ຕາ.

ທ຺ວິວຄ຺ຄສງ຺ຄຫາຕິ ມຫາວຄ຺ຄຈູຬວຄ຺ຄວເສນ ທ຺ວີຫິ ວຄ຺ເຄຫິ ສງ຺ຄຫິຕາ. ທ຺ວາວີສຕິປເຠທນາຕິ ມຫາວຄ຺ເຄ ທສ, ຈູຬວຄ຺ເຄ ທ຺ວາທສາຕິ ເອວໍ ທ຺ວາວີສຕິປກາຣາ. ປຎ຺ຈກ຺ຂນ຺ຘທຸກ຺ຂປ຺ປຫາຍິໂນຕິ ປຎ຺ຈກ຺ຂນ຺ຘສງ຺ຂາຕໍ ທຸກ຺ຂໍ ປຊຫນສີລສ຺ສ, ຠຄວໂຕຕິ ສມ຺ພນ຺ໂຘ. ອາສາປີຕິ ອິຈ຺ຉາປິ. ອຍໍ ປເນຕ຺ຖ ໂຍຊນາ-ປຎ຺ຈກ຺ຂນ຺ຘທຸກ຺ຂປ຺ປຫາຍິໂນ ຠຄວໂຕ ສາສເນ ທ຺ວິວຄ຺ຄສງ຺ຄຫາ ທ຺ວາວີສຕິປເຠທນາ ເຍ ຂນ຺ຘກາ ຠຄວຕາ ວຸຕ຺ຕາ, ເຕສໍ ຂນ຺ຘການໍ ເອສາ ວຓ຺ຓນາ ອນ຺ຕຣາຍໍ ວິນາ ຍຖາ ສິທ຺ຘາ, ເອວໍ ຕຖາ ປາຓີນໍ ກລ຺ຍາຓາ ອາສາປິ ສິຊ຺ຌນ຺ຕູຕິ.

ອິຕິ ສມນ຺ຕປາສາທິກາຍ ວິນຍສໍວຓ຺ຓນາຍ

ຈູຬວຄ຺ຄສໍວຓ຺ຓນາຍ

ໂຍຊນາ ສມຕ຺ຕາ.

ຊາທິລຎ຺ຉິຕນາເມນ, ເນການໍ ວາຈິໂຕ ມຍາ;

ຈູຬວຄ຺ຄຂນ຺ຘກສ຺ສ, ສມຕ຺ໂຕ ໂຍຊນານໂຍຕິ.

ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

ປາຈິຕ຺ຍາທິໂຍຊນາ