໑໑. ປຎ຺ຈສຕິກກ຺ຂນ຺ຘກໍ

໑. ຂຸທ຺ທານຸຂຸທ຺ທກສິກ຺ຂາປທກຖາ

໔໔໑. ປຎ຺ຈສຕິກກ຺ຂນ຺ຘເກ ‘‘ຈຕ຺ຕາຣິ…ເປ… ຂຸທ຺ທການີ’’ຕິ ເອວມາທິ ວຸຕ຺ຕນ຺ຕິ ສມ຺ພນ຺ໂຘ. ປຣິຍາເຍນາຕິ ກາຣເຓນ. ຘູມກາລິກນ຺ຕິ ເອຕ຺ຖ ຘູມສ຺ສ ກາໂລ ຘູມກາໂລ, ຘູມສ຺ສ ອຸຏ຺ຐິຕກາໂລຕິ ອຕ຺ໂຖ. ໂສ ເອຕສ຺ສຕ຺ຖີຕິ ຘູມກາລິກໍ, ສິກ຺ຂາປທປຎ຺ຎຕ຺ຕໍ. ອິຕິ ອິມມຕ຺ຖໍ ທສ຺ເສນ຺ໂຕ ອາຫ ‘‘ຍາວາ’’ຕິອາທິ.

໔໔໓. ອິທນ຺ຕິ ‘‘ກຕມານິ ປນ ຠນ຺ເຕ ຂຸທ຺ທານຸຂຸທ຺ທການິ ສິກ຺ຂາປທານີ’’ຕິ ອປຸຈ຺ຉນໍ. ‘‘ຕຍາ’’ຕິ ອິມິນາ ອິທໍ ເຕຕິ ເອຕ຺ຖ ເຕສທ຺ທສ຺ສ ‘‘ຕຸຍ຺ຫໍ, ຕວາ’’ຕິ ອຕ຺ເຖ ປຏິກ຺ຂິປຕິ. ອາປຕ຺ຕິນ຺ຕິ ທຸກ຺ກຏາປຕ຺ຕິໍ. ຫີຕິ ສຈ຺ຈໍ, ຍສ຺ມາ ວາ. ເຕຕິ ເຖຣາ. ‘‘ສງ຺ໂຆ…ເປ… ນ ສມຸຈ຺ຉິນ຺ທຕີ’’ຕິ ເອຕໍ ວຈນໍ ອນຸສ຺ສາວິຕນ຺ຕິ ໂຍຊນາ. ‘‘ເທເສຫິ ຕໍ ອາວຸໂສ ທຸກ຺ກຏ’’ນ຺ຕິ ອິທມ຺ປິ ຈ ວຸຕ຺ຕນ຺ຕິ ສມ຺ພນ຺ໂຘ. ເຖໂຣ ປນາຕິ ອານນ຺ທຕ຺ເຖໂຣ ປນ ອາຫາຕິ ສມ຺ພນ຺ໂຘ. ຕຕ຺ຖາຕິ ອປຸຈ຺ຉເນ. ຍຖາຕິ ເຍນາກາເຣນ. ຈຕູສຸ ຐາເນສູຕິ ‘‘ຠຄວໂຕ ວສ຺ສິກສາຏິກໍ ອກ຺ກມິຕ຺ວາ ສິພ຺ເພສີ’’ຕິອາທີສຸ ຈຕູສຸ ຐາເນສຸ. ເອຕ຺ຖາຕິ ປຎ຺ຈສຕິກກ຺ຂນ຺ຘເກ.

ອິຕິ ປຎ຺ຈສຕິກກ຺ຂນ຺ຘກວຓ຺ຓນາຍ ໂຍຊນາ ສມຕ຺ຕາ.