໑໘໘. ອາທາຍສຕ຺ຕກກຖາ

໓໑໑. ນ ປຈ຺ເຈສ຺ສນ຺ຕິ ເອຕ຺ຖ ປຕີຕ຺ຍູປສຄ຺ຄສ຺ສ ປຸນຕ຺ຖໍ, ອິຘາຕຸຍາ ຈ ຄຕ຺ຍຕ຺ຖໍ ທສ຺ເສນ຺ໂຕ ອາຫ ‘‘ນ ປຸນ ອາຄມິສ຺ສ’’ນ຺ຕິ. ເອວໍ ປກ຺ກມໂຕ ຉິຊ຺ຊຕີຕິ ສມ຺ພນ຺ໂຘ.

ເອຕຎ຺ຈາຕິ ປກ຺ກມນນ຺ຕິກໍ, ກຖິນຸທ຺ຘາຣຎ຺ຈ. ຕາຫນ຺ຕິ ເຕ ອຫໍ. ເຕຕິ ຕຸຍ຺ຫໍ.

ອຎ຺ຎນ຺ຕິ ອຕ຺ຕໂນ ວິຫາຣໂຕ ອຎ຺ຎໍ. ເອວໍ ໂຫຕີຕິ ເອໂສ ປຣິວິຕກ຺ໂກ ໂຫຕິ. ໂສຕິ ອາວາສປລິໂພໂຘ. ອາທິຈ຺ຈພນ຺ຘຸນາ ວຸຕ຺ໂຕຕິ ໂຍຊນາ.

ທ຺ເວ ປລິໂພຘາ ເອກໂຕ ຉິຊ຺ຊນ຺ຕີຕິ ສມ຺ພນ຺ໂຘ. ອປຸພ຺ພໍ ອຈຣິມນ຺ຕິ ເອກປຫາເຣເນວ. ໂສ ປລິໂພຘູປຈ຺ເຉໂທ ກສ຺ມາ ວິຕ຺ຖາຣໂຕ ນ ວຸຕ຺ໂຕຕິ ອາຫ ‘‘ໂສ ປນາ’’ຕິອາທິ. ໂສ ປນາຕິ ປລິໂພຘູປຈ຺ເຉໂທ ປນ. ນ ວຸຕ຺ໂຕຕິ ສມ຺ພນ຺ໂຘ. ເອຕ຺ຖາຕິ ອິມສ຺ມິໍ ກຖິນຸພ຺ຠາເຣ. ກສ຺ມາ ອຍໍ ກຖິນຸທ຺ຘາໂຣ ‘‘ນາສນນ຺ຕິໂກ’’ຕິ ວຸຕ຺ໂຕຕິ ອາຫ ‘‘ຍສ຺ມາ’’ຕິອາທິ. ຕສ຺ສາຕິ ຠິກ຺ຂຸໂນ.

ອາສາວຈ຺ເຉທິເກ ຉິຊ຺ຊຕີຕິ ສມ຺ພນ຺ໂຘ. ອຍໍ ປນາຕິ ອາສາວຈ຺ເຉທິໂກ ກຖິນຸທ຺ຘາໂຣ ປນ. ອເນກປເຠໂທ ໂຫຕີຕິ ສມ຺ພນ຺ໂຘ. ຕສ຺ສາຕິ ຠິກ຺ຂຸສ຺ສ. ວຸຕ຺ໂຕຕິ ອຍໍ ອາສາວຈ຺ເຉທິໂກ ກຖິນຸທ຺ຘາໂຣ ວຸຕ຺ໂຕຕິ ໂຍຊນາ. ເອຕ຺ຖ ປນາຕິ ອິມສ຺ມິໍ ປນ ຐາເນ. ຕຕ຺ຖາຕິ ສີມາຕິກ຺ກນ຺ຕິເກ.

໓໑໒-໓໒໕. ເອວນ຺ຕິອາທິ ນິຄມນໍ. ສຕ຺ຕເກຕິ ອຏ຺ຐສຸ ມາຕິກາສຸ ອາສາວຈ຺ເຉທໂຕ ເສເສ ສຕ຺ຕປມາເຓ, ສຕ຺ຕສມູເຫ ວາ. ເຕເຍວາຕິ ສຕ຺ຕເກ ເອວ. ຕໂຕຕິ ວາຣໂຕ. ເຍ ເຍຕິ ກຖິນຸທ຺ຘາຣາ. ອິຕເຣຫີຕິ ອາສາວຈ຺ເຉທໂຕ ອຎ຺ເຎຫິ. ເຍ ປລິໂພຘາ ວຸຕ຺ຕາຕິ ສມ຺ພນ຺ໂຘ. ອາວາໂສ ຈຊີຍຕິ ອເນນາຕິ ຈຕ຺ຕນ຺ຕິ ວຈນຕ຺ຖໍ ທສ຺ເສນ຺ໂຕ ອາຫ ‘‘ເຍນ ຈິຕ຺ເຕນາ’’ຕິອາທິ. ຕນ຺ຕິ ຈິຕ຺ຕໍ. ‘‘ເອເສວ ນໂຍ’’ຕິ ອິມິນາ ອາວາໂສ ວມີຍຕິ ອເນນາຕິ ວນ຺ຕໍ. ອາວາສໂຕ ມຸຈ຺ຈຕິ ອເນນາຕິ ມຸຕ຺ຕນ຺ຕິ ວຈນຕ຺ຖໍ ອຕິທິສຕິ. ສພ຺ພຕ຺ຖາຕິ ສພ຺ພສ຺ມິໍ ກຖິນກ຺ຂນ຺ຘເກ.

ອິຕິ ກຖິນກ຺ຂນ຺ຘກວຓ຺ຓນາຍ ໂຍຊນາ ສມຕ຺ຕາ.