໑໘໓. ໂຣຊມລ຺ລາທິວຕ຺ຖຸກຖາ

໓໐໑. ສງ຺ກຣມກໍສູຕິ ເອຕ຺ຖ ສງ຺ກຣສທ຺ທສ຺ສ ຍຸທ຺ຘຕ຺ຖາທີສຸ ປວຕ຺ຕນໂຕ ອິຘ ປຏິຎ຺ຎາຕຕ຺ເຖຕິ ທສ຺ເສນ຺ໂຕ ອາຫ ‘‘ກຕິກມກໍສູ’’ຕິ. ກຕິກນ຺ຕິ ປຏິຎ຺ຎາຕສງ຺ຂາຕໍ ກຕິກໍ. ອຸຬາຣໍ ໂຂຕິ ເອຕ຺ຖ ອຸຬາຣສທ຺ໂທ ເສຏ຺ຐວາຈໂກ. ເສຏ຺ຐນ຺ຕິ ຈ ສຸນ຺ທຣເມວາຕິ ອາຫ ‘‘ສຸນ຺ທຣໍ ໂຂ ເຕ ອິທ’’ນ຺ຕິ. ເຕຕິ ຕຸຍ຺ຫໍ. ‘‘ພຫຸກໂຕ’’ຕິ ປທສ຺ສ ກຕພຫຸມາໂນຕິ ອຕ຺ຖໍ ທສ຺ເສນ຺ໂຕ ອາຫ ‘‘ປສາທພຫຸມາເນນາ’’ຕິ. ‘‘ປິຏ຺ຐມຍໍຂາທນີຍ’’ນ຺ຕິ ອິມິນາ ປິຏ຺ຐຂາທນີຍນ຺ຕິ ເອຕ຺ຖ ມຍສທ຺ທໂລປໍ ທສ຺ເສຕິ.

໓໐໓. ປຏິຠາເນຍ຺ຍກາຕິ ເອຕ຺ຖ ປຏິຠາເນ ນິຍຸຕ຺ຕາ ປຏິຠາເນຍ຺ຍກາຕິ ທສ຺ເສນ຺ໂຕ ອາຫ ‘‘ປຏິຠານສມ຺ປນ຺ນາ’’ຕິ. ‘‘ນິທ຺ໂທສສິປ຺ປາ’’ຕິ ອິມິນາ ປຣິໂຍທາຕສິປ຺ປາຕິ ເອຕ຺ຖ ປຣິສມນ຺ຕໂຕ ໂອທາຕໍ ສິປ຺ປໍ ເອເຕສນ຺ຕິ ປຣິໂຍທາຕສິປ຺ປາຕິ ອຕ຺ຖໍ ທສ຺ເສຕິ. ສິປ຺ປຕ຺ຖິເກຫິ ສິຍຕິ ເສວິຍຕີຕິ ສິປ຺ປໍ, ສິປ຺ປິການໍ ຫິຕາຍ ເສຕິ ປວຕ຺ຕຕີຕິ ວາ ສິປ຺ປໍ, ໂອຏ຺ຐໂຊ ປຐມກ຺ຂໂຣ. ນາຬິຍາວາປເກນາຕິ ປທສ຺ສ ທ຺ວນ຺ທຠາວໍ ທສ຺ເສນ຺ໂຕ ອາຫ ‘‘ນາຬິຍາ ເຈວ ອາວາປເກນ ຈາ’’ຕິ. ອິມິນາ ຍກາໂຣ ປທສນ຺ຘິມຕ຺ໂຕຕິ ທສ຺ເສຕິ. ‘‘ນາຬິຍາ ວາ ປສິພ຺ພເກນາ’’ຕິປິ ປາໂຐ, ໂສ ອປາໂຐເຍວ. ໂກ ອາວາປໂກ ນາມາຕິ ອາຫ ‘‘ອາວາປໂກ ນາມ ຍຕ຺ຖາ’’ຕິອາທິ. ຕຕ຺ຖ ຍຕ຺ຖາຕິ ຍສ຺ມິໍ ຖວິເກ. ອິມິນາ ອາຫຣິຕ຺ວາ ຍຖາລທ຺ຘໍ ວປນ຺ຕິ ປກ຺ຂິປນ຺ຕິ ເອຕ຺ຖາຕິ ອາວາປໂກຕິ ວຈນຕ຺ຖໍ ທສ຺ເສຕິ. ວປ ພີຊນິກ຺ເຂເປຕິ ຘາຕຸປາເຐສຸ (ສທ຺ທນີຕິຘາຕຸມາລາຍໍ ໑໕ ປກາຣນ຺ຕຘາຕຸ) ວຸຕ຺ຕໍ. ອິຘ ປນ ປກ຺ຂິປເນຕິ ທຏ຺ຐພ຺ໂພ. ເຕນ ວຸຕ຺ຕໍ ‘‘ປກ຺ຂິປນ຺ຕີ’’ຕິ. ປຣິຫຣິຕຸເມວາຕິ ປຣິຄ຺ຄເຫຕ຺ວາ ຫຣິຕຸເມວ. ເວຕນນ຺ຕິ ຠຕິໍ. ໂຍຕິ ຠິກ຺ຂຸ. ຕໍ ວາຕິ ປຣິຫຣິຕຂຸຣຠຓ຺ຑໍ ວາ. ອຎ຺ຎໍ ວາຕິ ອຎ຺ຎສ຺ສ ສນ຺ຕກໍ ວາ.

໓໐໔. ອິທນ຺ຕິ ທສມຠາຄທານໍ. ທສ ໂກຏ຺ຐາເສຕິ ທສ ປຏິວີເສ.