໑໘໐. ເມຓ຺ຑກຄຫປຕິວຕ຺ຖຸກຖາ

໒໙໖. ‘‘ພຫິທ຺ວາເຣ’’ຕິ ເອຕ຺ຖ ກສ຺ສ ພຫິທ຺ວາເຣຕິ ອາຫ ‘‘ຘຎ຺ຎາຄາຣສ຺ສ ພຫິທ຺ວາເຣ’’ຕິ. ອາຬກຖາລິກນ຺ຕິ ເອຕ຺ຖ ອາຬກຕຓ຺ຑຸລປຈນກໍ ຄຓ຺ຫກຖາລິ ອາຬກຖາລິ, ຕາຍ ປຈິຕໍ ຠຕ຺ຕໍ ອາຬກຖາລິກນ຺ຕິ ວຈນຕ຺ຖໍ ທສ຺ເສນ຺ໂຕ ອາຫ ‘‘ອາຬກຕຓ຺ຑຸລປຈນກຖາລິກ’’ນ຺ຕິ. ພ຺ຍຎ຺ຊນຠຓ຺ຑິກນ຺ຕິ ພ຺ຍຎ຺ຊນປຣິກ຺ຂາຣິກໍ, ພ຺ຍຎ຺ຊນປຣິວາຣກນ຺ຕິ ອຕ຺ໂຖ. ອິມິນາ ສູປຠິຎ຺ຊນກນ຺ຕິ ເອຕ຺ຖ ສູປສທ຺ໂທ ພ຺ຍຎ຺ຊນວາຈໂກ, ຠິຎ຺ຊນກສທ຺ໂທ ຠຓ຺ຑິກປຣິຍາໂຍຕິ ທສ຺ເສຕິ. ທາສກມ຺ມກຣໂປຣິສນ຺ຕິ ເອຕ຺ຖ ທາສໂປຣິສາ ຈ ກມ຺ມກຣໂປຣິສາ ຈ ທາສກມ຺ມກຣໂປຣິສໍ, ສມາຫາຣທ຺ວນ຺ໂທ ປຸພ຺ພປເທ ອຸຕ຺ຕຣໂລໂປ, ອິຕິ ອິມມຕ຺ຖໍ ທສ຺ເສນ຺ໂຕ ອາຫ ‘‘ທາສປຸຣິເສ ຈ ກມ຺ມກຣປຸຣິເສ ຈາ’’ຕິ. ໂປຣິສສທ຺ໂທປິ ປຸຣິສສທ຺ເທນ ສມາໂນ ‘‘ປຸຣິໂສ ເອວ ໂປຣິໂສ’’ຕິ ອຕ຺ເຖນ. ຘຸວຠຕ຺ເຕນາຕິ ເອຕ຺ຖ ຘຸວສທ຺ໂທ ນິຈ຺ຈປຣິຍາໂຍຕິ ອາຫ ‘‘ນິຈ຺ຈກາລ’’ນ຺ຕິ. ທຸຍ຺ເຫນ ຂີເຣນາຕິ ສມ຺ພນ຺ໂຘ. ‘‘ເມຓ຺ຑກວຕ຺ຖຸສ຺ມິໍ ປນາ’’ຕິ ປາຐໂຕ ປຏ຺ຐາຍ ຍາວ ‘‘ຂຓຎ຺ເຎວ ທຸຍ຺ເຫນາ’’ຕິ ປາຐາ ເກສຸຈິເຍວ ອຏ຺ຐກຖາໂປຕ຺ຖເກສຸ ອຕ຺ຖິ. ເອຕ຺ຖາຕິ ເມຓ຺ຑກວຕ຺ຖຸມ຺ຫິ. ໂຄຣເສຕິ ຄວເຍຫິ ນິພ຺ພຕ຺ເຕ ຂີຣທຘິຕກ຺ກນວນີຕສພ຺ພິສງ຺ຂາເຕ ຣເສ. ປາເຖຍ຺ຍນ຺ຕິ ປຖສ຺ສ ຫິຕໍ ປາເຖຍ຺ຍໍ. ຎຕ຺ວາຕິ ປາເຖຍ຺ຍມິຈ຺ຉຕີຕິ ຎຕ຺ວາ. ຠິກ຺ຂາຈາຣວຕ຺ເຕນ ວາຕິ ອຎ຺ຎາຕກອປວາຣິຕຏ຺ຐານໂຕ ຠິກ຺ຂາຈາຣວຕ຺ເຕນ ວາ. ຍາຈິຕ຺ວາປີຕິ ປິສທ຺ໂທ ປເຄວ ຠິກ຺ຂາຈາຣວຕ຺ເຕນາຕິ ທສ຺ເສຕິ. ຍຕ຺ຕເກນ ປາເຖຍ຺ເຍນາຕິ ສມ຺ພນ຺ໂຘ.