໑໑໕. ວຊາທີສຸ ວສ຺ສູປຄມນກຖາ

໒໐໓. ‘‘ໂຄປາລການໍ ນິວາສຏ຺ຐານ’’ນ຺ຕິ ອິມິນາ ໂຄປາລກາ ຄາໂວ ວິຍ ວເຊ ນິວສນ຺ຕີຕິ ທສ຺ເສຕິ.

ອຸປກຏ຺ຐສທ຺ໂທ ອາສນ຺ນປຣິຍາໂຍຕິ ອາຫ ‘‘ອາສນ຺ນາຍາ’’ຕິ. ຕຕ຺ຖາຕິ ກຸຏິກາຍໍ. ອິຘາຕິ ອິມິສ຺ສໍ ກຸຏິກາຍໍ. ອວິຫາຣຕ຺ຕາ ‘‘ອິຘາຕິ’’ສາມຎ຺ຎວເສນ ວຸຕ຺ຕໍ. ຕິກ຺ຂຕ຺ຕຸນ຺ຕິ ອິທໍ ອຸກ຺ກຏ຺ຐວເສນ ວຸຕ຺ຕໍ. ເຫຏ຺ຐາ ຫິ ‘‘ສກິໍ ວາ ທ຺ວິກ຺ຂຕ຺ຕຸໍ ວາ ຕິກ຺ຂຕ຺ຕຸໍ ວາ’’ຕິ (ມຫາວ. ອຏ຺ຐ. ໑໘໔) ວຸຕ຺ຕຕ຺ຕາ ສກິມ຺ປິ ວຏ຺ຏຕີຕິ ທຏ຺ຐພ຺ພໍ. ຕມ຺ປີຕິ ສາລາສງ຺ເຂເປນ ຐິຕສກຏມ຺ປິ. ‘‘ອາລໂຍ’’ຕິ ອິມິນາ ‘‘ອິຘ ວສ຺ສໍ ອຸເປມີ’’ຕິ ວຈີເຠໂທ ນ ກາຕພ຺ໂພຕິ ທສ຺ເສຕິ. ອາລໂຍຕິ ຈ ສຕ຺ເຖ ‘‘ອິຘ ວສ຺ສໍ ວສິສ຺ສາມີ’’ຕິ ຈິຕ຺ຕສ຺ສ ອລ຺ລີຍນໍ. ມຄ຺ຄປຏິປນ຺ເນເຍວ ສຕ຺ເຖຕິ ອນາທເຣ ຠຸມ຺ມວຈນໍ. ຕຕ຺ເຖວາຕິ ສຕ຺ເຖເຍວ. ສຕ຺ໂຖ ອຕິກ຺ກມຕີຕິ ສມ຺ພນ຺ໂຘ. ຕຕ຺ຖາຕິ ປຕ຺ຖິຕຏ຺ຐາເນ. ວິປ຺ປກິຣຕີຕິ ວິສຸໍ ວິສຸໍ ຄຈ຺ຉຕິ. ສເຈ ອຄາມເກ ຐາເນ ວິປ຺ປກິຣຕິ, ປຸຣິມໍ ຄາມໍ ສນ຺ນິວຕ຺ຕິຕພ຺ພໍ. ນ ອຎ຺ຎຄາມໍ ຄນ຺ຕພ຺ພໍ. ຕໂຕຕິ ຄາມໂຕ.

ອຸປຄນ຺ຕພ຺ພນ຺ຕິ ‘‘ອິຘ ວສ຺ສໍ ອຸເປມີ’’ຕິ ຕິກ຺ຂຕ຺ຕຸໍ ວຕ຺ວາ ອຸປຄນ຺ຕພ຺ພໍ. ຕຕ຺ເຖວາຕິ ສມຸທ຺ເທເຍວ. ກູລນ຺ຕິ ຕີຣໍ. ຕຎ຺ຫິ ກຸລຕິ ອຸທກໍ ອາວຣຕີຕິ ກູລນ຺ຕິ ວຸຈ຺ຈຕິ. ອຍຎ຺ຈາຕິ ນາວາຍໍ ວສ຺ສູປຄມນຠິກ຺ຂຸ. ອນຸຕີຣເມວາຕິ ອນຸກ຺ກເມນ, ອນຸສາເຣນ ວາ ຕີຣເມວ. ອຎ຺ຎຕ຺ຖາຕິ ປຐມລທ຺ຘຄາມໂຕ ອຎ຺ຎສ຺ມິໍ ຐາເນ. ຕຕ຺ເຖວາຕິ ປຐມລທ຺ຘຄາເມເຍວ.

ອິຕີຕິອາທິ ນິຄມນໍ. ປວາເຣຕຸຎ຺ຈ ລຠຕີຕິ ເອຕ຺ຖ ຈສທ຺ໂທ ວາກ຺ຍສມ຺ປິຓ຺ຑນຕ຺ໂຖ. ປຸຣິເມສຸ ຈ ປນາຕິ ເອຕ຺ຖ ຈສທ຺ໂທ ພ຺ຍຕິເຣກຕ຺ໂຖ, ປນສທ຺ໂທ ວິເສສຕ຺ຖໂຊຕໂກ. ອນາປຕ຺ຕິ ໂຫຕີຕິ ອນາປຕ຺ຕິມຕ຺ຕເມວ ໂຫຕິ.