໖໔. ຈຕ຺ຕາໂຣນິສ຺ສຍາທິກຖາ

໑໒໘. ອຸປສມ຺ປນ຺ນສມນນ຺ຕຣເມວາຕິ ອຸປສມ຺ປນ຺ໂນ ຫຸຕ຺ວາ ສມນນ຺ຕຣເມວ, ນ ກາລນ຺ຕເຣຕິ ອຕ຺ໂຖ. ເອກໂປຣິສາຕິ ເອຕ຺ຖ ໂປຣິສສທ຺ໂທ ອຸປຣິ ວິຕ຺ຖເຕ ຠຸຊປມາເຓ ຈ ໂປສປມາເຓ ຈ ວຕ຺ຕຕິ. ປຸຣິສສ຺ສ ປມາຓາ ໂປຣິສາ, ປມາຓຕ຺ເຖ ຓປຈ຺ຈໂຍ. ຉາຍາຕິ ອາຕປາຠາໂວ. ເມຕພ຺ພາຕິ ປເມຕພ຺ພາ. ‘‘ວສ຺ສາໂນ’’ຕິອາທິ ‘‘ອຸຕຸປມາຓໍ ອາຈິກ຺ຂິຕພ຺ພ’’ນ຺ຕິ ເອຕ຺ຖ ອາຈິກ຺ຂຓາກາຣທສ຺ສນໍ. ອຸຕຸໂນ ປມາຓນ຺ຕິ ອຕ຺ຖໍ ນິວາເຣນ຺ໂຕ ອາຫ ‘‘ເອຕ຺ຖ ຈາ’’ຕິອາທິ. ອຣຕິ ປຸນປ຺ປຸນໍ ຄຈ຺ຉຕີຕິ ອຸຕຸ, ປມິຍຕິ ສໍວຈ຺ຉໂຣ ປຣິຈ຺ຉິຊ຺ຊິຍຕິ ອເນນາຕິ ປມາຓໍ. ຍຕ຺ຕເກຫິ ທິວເສຫິ ອປຣິປຸຓ຺ໂຓຕິ ສມ຺ພນ຺ໂຘ. ຍສ຺ສາຕິ ທິວສຠາຄສ຺ສ. ໂຍ ອຸຕຸ ອປຣິປຸຓ຺ໂຓ, ຕສ຺ສ ອຸຕຸໂນຕິ ປາຐເສໂສ ໂຍເຊຕພ຺ໂພ. ‘‘ອຸຕຸປມາຓໍ ອາຈິກ຺ຂິຕພ຺ພໍ, ທິວສຠາໂຄ ອາຈິກ຺ຂິຕພ຺ໂພ’’ຕິ ປທານໍ ອປຣມ຺ປິ ອຕ຺ຖວິກປ຺ປໍ ທສ຺ເສນ຺ໂຕ ອາຫ ‘‘ອຖ ວາ’’ຕິອາທິ. ຕຕ຺ຖ ອຍໍ ນາມ ອຸຕູຕິ ອຍໍ ອຸຕຸ ວສ຺ສາໂນ ນາມາຕິ ວາ ເຫມນ຺ໂຕ ນາມາຕິ ວາ ຄິມ຺ໂຫ ນາມາຕິ ວາ. ປຸພ຺ພນ຺ໂຫຕິ ອຫສ຺ສ ປຸພ຺ໂພ ປຸພ຺ພນ຺ໂຫ. ຕຕ຺ຖ ປຈ຺ຉິມນໂຍວ ປາສໍສຕໂຣ. ກສ຺ມາ? ປຸຣິມນເຍ ອຸຕຸປຣິປຸຓ຺ເຓ ທິວສຠາຄາຈິກ຺ຂຓສ຺ສ ອຠາວາ, ປຈ຺ຉິມນເຍ ປນ ປຣິປຸຓ຺ຓໍ ວາ ອປຣິປຸຓ຺ຓໍ ວາ ອຸຕຸປມາຓໍ ອາຈິກ຺ຂິຕພ຺ພໍ. ອຸປສມ຺ປນ຺ນທິວສຠາໂຄວ ‘‘ປຸພ຺ພນ຺ໂຫ’’ຕິ ວາ ‘‘ສາຍນ຺ໂຫ’’ຕິ ວາ ອາຈິກ຺ຂິຕພ຺ໂພ. ສໍຄີຕີຕິ ເອຕ຺ຖ ສໍ ເອກໂຕ ກຕ຺ວາ ຄາຍິຕພ຺ພາ ກເຖຕພ຺ພາຕິ ສໍຄີຕີຕິ ວຈນຕ຺ຖໍ ທສ຺ເສນ຺ໂຕ ອາຫ ‘‘ອິທເມວ ສພ຺ພໍ ເອກໂຕ ກຕ຺ວາ’’ຕິອາທິ. ຕຕ຺ຖ ກິນ຺ຕິ ກິໍ ອຸຕຸໍ. ອິທໍ ນາມາຕິ ອິທໍ ນາມ ອຸຕຸໍ. ວເທຍ຺ຍາສີຕິ ອາຄນ຺ຕຸການໍ ວຸຑ຺ຒນວກຠາວາທິຎາປນຕ຺ຖໍ ກເຖຍ຺ຍາສິ.

໑໒໙. ທຸຕິຍນ຺ຕິ ສຫາຍໍ ຠິກ຺ຂຸໍ ວາ ສາມເຓຣໍ ວາ ປຸຣິສໍ ວາ. ອກຣຓີຍານີຕິ ອຸປສມ຺ປນ຺ເນຫິ ອກຕ຺ຕພ຺ພານິ. ປຓ຺ຑຸປລາໂສຕິ ເອຕ຺ຖ ປຓ຺ຑູຕິ ເສຕປີຕມິສ຺ໂສ ວຓ຺ໂຓ, ປລາສສທ຺ໂທ ປຓ຺ຓວາຈໂກ, ນ ຫຣິຕວາຈໂກ, ນາປິ ກິໍສຸກທຸມວາຈໂກຕິ ທສ຺ເສນ຺ໂຕ ອາຫ ‘‘ປຓ຺ຑຸວຓ຺ໂຓ ປຓ຺ໂຓ’’ຕິ. ປຓ຺ຑຸປລາໂສຕິ ສມາໂສປິ ພ຺ຍາໂສປິ ຍຸຕ຺ໂຕເຍວ. ສມາສກາເລ ປຓ຺ຑຸ ຍສ຺ສຕ຺ຖີຕິ ປຓ຺ຑຸ, ໂສເຍວ ປລາໂສ ປຓ຺ຑຸປລາໂສຕິ ກາຕພ຺ໂພ. ປຸປ຺ຜຜລາທິໍ ພນ຺ຘຕີຕິ ພນ຺ຘນນ຺ຕິ ວຈນຕ຺ເຖນ ພນ຺ຘນສທ຺ໂທ ວຓ຺ຏປຣິຍາໂຍຕິ ອາຫ ‘‘ວຓ຺ຏໂຕ’’ຕິ. ປຸຖຸສິລາຕິ (ມ. ນິ. ອຏ຺ຐ. ໓.໖໐) ເອຕ຺ຖ ປຸຖຸສທ຺ໂທ ມຫນ຺ຕປຣິຍາໂຍຕິ ອາຫ ‘‘ມຫາສິລາ’’ຕິ.

໑໓໐. ຕສ຺ສາຕິ ອຸກ຺ເຂປນີຍກມ຺ມາຣຫສ຺ສ ຠິກ຺ຂຸໂນ. ສາມຄ຺ຄີຕິ ສງ຺ຆສາມຄ຺ຄີ. ເຕນາຕິ ອຸກ຺ເຂປນີຍກມ຺ມາຣເຫນ ຠິກ຺ຂຸນາ. ສມ຺ໂຠເຄຕິ ອາມິເສນ ຈ ຘມ຺ເມນ ຈ ສມ຺ໂຠຄເຫຕຸ. ເອຕ຺ຖ ສຫເສຍ຺ຍາປິ ສງ຺ຄຫິຕາ ອາປຕ຺ຕິຠາວໂຕ. ອນາປຕ຺ຕີຕິ ອນຸກ຺ຂິຕ຺ຕກຠາວໂຕ ປາຈິຕ຺ຕິຍາປຕ຺ຕິຍາ ອນາປຕ຺ຕິ, ອລຊ຺ຊິລກ຺ຂຓາຠາວໂຕ ທຸກ຺ກເຏນ ອນາປຕ຺ຕີຕິ ທຏ຺ຐພ຺ພໍ.

ອິຕິ ສມນ຺ຕປາສາທິກາຍ ວິນຍສໍວຓ຺ຓນາຍ

ທ຺ວາສຕ຺ຕຕິອຘິກວຕ຺ຖຸສຕປຏິມຓ຺ຑິຕສ຺ສ ມຫາຂນ຺ຘກສ຺ສ

ອຕ຺ຖວຓ຺ຓນາຍ ໂຍຊນາ ສມຕ຺ຕາ.