໕໘. ອລຊ຺ຊີນິສ຺ສຍວຕ຺ຖຸກຖາ

໑໒໐. ‘‘ອລຊ຺ຊີນໍ ໂອວາທ’’ນ຺ຕິ ປາຐເສເສນ ໂຍຊິເຕ ສາມ຺ຍຕ຺ເຖ ສາມິວຈນມ຺ປິ ຍຸຊ຺ຊເຕວ. ຕໍ ນຍໍ ອທສ຺ເສຕ຺ວາ ‘‘ອຸປໂຍຄຕ຺ເຖ ສາມິວຈນ’’ນ຺ຕິ ວຸຕ຺ຕໍ. ‘‘ຠິກ຺ຂູຫິ ສຠາຄຕ’’ນ຺ຕິ ອິມິນາ ຠິກ຺ຂູຫິ ສມາໂນ ສີລາທິຄຸຓສງ຺ຂາໂຕ ຠາໂຄ ອິມສ຺ສາຕິ ຠິກ຺ຂຸສຠາໂຄ, ຕສ຺ສ ຠາໂວ ຠິກ຺ຂຸສຠາຄຕນ຺ຕິ ວຈນຕ຺ຖໍ ທສ຺ເສຕິ. ‘‘ລຊ຺ຊິຠາວ’’ນ຺ຕິ ອິມິນາ ຠາວປຈ຺ຈຍສ຺ສ ສຣູປໍ ທສ຺ເສຕິ. ນວຏ຺ຐານນ຺ຕິ ອຠິນວຏ຺ຐານໍ. ຄເຕນ ຠິກ຺ຂຸນາຕິ ສມ຺ພນ຺ໂຘ.

ເຖໂຣຕິ ນິສ຺ສຍທາຍໂກ ເຖໂຣ. ຄເຫຕຸກາໂມຕິ ນິສ຺ສຍໍ ຄເຫຕຸກາໂມ. ອາຈາຣນ຺ຕິ ນິສ຺ສຍປຏິປນ຺ນສ຺ສ ອາຈາຣໍ. ຕທເຫວາຕິ ຕສ຺ມິໍ ຄຕອຫນິ ເອວ. ອາໂຠຄສ຺ສ ກຕຕ຺ຕາ, ອຣຸຓຸຄ຺ຄມນສ຺ສ ຈ ອຊານນຕ຺ຕາ ວຸຕ຺ຕໍ ‘‘ອນາປຕ຺ຕີ’’ຕິ. ອຣຸຓຸຄ຺ຄມນໍ ອຊານນ຺ໂຕປິ ອາໂຠຄສ຺ສ ອກຕຕ຺ຕາ ວຸຕ຺ຕໍ ‘‘ອຣຸຓຸຄ຺ຄມເນ ທຸກ຺ກຏ’’ນ຺ຕິ. ‘‘ທ຺ເວ ຕີຓິ ທິວສານີ’’ຕິ ປເທນ ຈຕຸ ປຎ຺ຈ ຉ ທິວສານິປິ ຄເຫຕພ຺ພານິ ລກ຺ຂຓຫາຣນເຍນ ອນິສ຺ສິເຕນ ວສິຕພ຺ພຠາເວນ ສມານຜລຕ຺ຕາ. ເຕນາຫ ‘‘ສຕ຺ຕາຫໍ ວສິສ຺ສາມີ’’ຕິ. ລທ຺ຘປຣິຫາໂຣຕິ ລທ຺ໂຘ ປຣິຫາໂຣ ອາປຕ຺ຕິອປນຍນໍ ເຍນາຕິ ລທ຺ຘປຣິຫາໂຣ.