໕໙. ຄມິກາທິນິສ຺ສຍວຕ຺ຖຸກຖາ

໑໒໑. ‘‘ກຣຓີຍນິສ຺ສໂຍ’’ຕິ ອິມິນາ ນິສ຺ສຍຄຫຓໍ ນິສ຺ສໂຍ ອຸຕ຺ຕຣປທໂລປວເສນ, ໂສ ກຣຓີໂຍ ອິມສ຺ສາຕິ ນິສ຺ສຍກຣຓີໂຍຕິ ວິເສສນປຣນິປາຕຠາວໍ ທສ຺ເສຕິ. ນິສ຺ສຍໍ ອລຠມາເນນາຕິ ເອຕ຺ຖ ກິໍ ນິສ຺ສຍສ຺ສ ອລຠນໍ ນາມາຕິ ອາຫ ‘‘ອຕ຺ຕນາ’’ຕິອາທິ. ວຸຕ຺ຖປຸພ຺ພນ຺ຕິ ວສິຕປຸພ຺ພໍ. ເອກຣຕ຺ຕໍ ວສນ຺ເຕນາປີຕິ ປິສທ຺ໂທ ທ຺ວິຣຕ຺ຕາທິເກ ກາ ນາມ ກຖາຕິ ທສ຺ເສຕິ. ວິສ຺ສມນ຺ໂຕ ວາ ສຕ຺ຖໍ ປຣິເຍສນ຺ໂຕ ວາ ຫຸຕ຺ວາຕິ ໂຍຊນາ. ນາວາຍ ຄຈ຺ຉນ຺ຕສ຺ສາຕິ ນາວາຍ ອທ຺ຘານມຄ຺ຄໍ ປຏິປນ຺ນສ຺ສ.

ຍາຈິຍມາເນນາຕິ ເອຕ຺ຖ ພຫຸກຕ຺ຕຸປສງ຺ຄຕ຺ຕາ ວຸຕ຺ຕໍ ‘‘ເຕນ ຄິລາເນນາ’’ຕິ. ‘‘ມາເນນາ’’ຕິ ອິມິນາ ຍາຈິຕຸມສກ຺ກຸເຓຍ຺ຍຕາທີນິ ນິວຕ຺ເຕຕິ.

ຜາສຸ ໂຫຕີຕິ ເອຕ຺ຖ ອາວາສສປ຺ປາຍາທິວເສນ ຜາສຸ ໂຫຕີຕິ ອາສງ຺ກາ ຠເວຍ຺ຍາຕິ ອາຫ ‘‘ສມຖວິປສ຺ສນານໍ ປຏິລາຠວເສນາ’’ຕິ. ຫີຕິ ສຈ຺ຈໍ. ອິມໍ ປຣິຫາຣນ຺ຕິ ອິມໍ ຜາສຸວິຫາຣປຣິຫາຣໍ. ຖາມຄຕາຍ ວິປສ຺ສນາຍາຕິ ໂຍຊນາ. ສມໂຖ ວາ ຕຣຸໂຓ ໂຫຕີຕິ ໂຍຊນາ. ເອຕສ຺ເສວາຕິ ຕຣຸຓສມຖວິປສ຺ສນິກສ຺ເສວ ຠິກ຺ຂຸໂນ. ຕສ຺ສ ນິສ຺ສາຍາຕິ ເອຕ຺ຖ ຕສ຺ສ ໂອວາທໍ ນິສ຺ສາຍາຕິ ໂຍຊນາ. ອຖ ວາ ອຸປໂຍຄຕ຺ເຖ ສາມິວຈນໍ. ຕໍ ນິສ຺ສຍທາຍກໍ ນິສ຺ສາຍາຕິ ຫິ ອຕ຺ໂຖ. ຍຕ຺ຕໂກ ກາໂລ ອາສຬ຺ຫີປຸຓ຺ຓມາ ອຕ຺ຖິ, ຕຕ຺ຕກໍ ກາລນ຺ຕິ ໂຍຊນາ. ‘‘ອາສຬ຺ຫີປຸຓ຺ຓມາ’’ຕິ ເອຕ຺ຖ ‘‘ຍາວາ’’ຕິ ນິປາຕປໂຍຄຕ຺ຕາ ອຠິວິຘິອວຌຕ຺ເຖ ນິສ຺ສກ຺ກວຈນໍ ທຏ຺ຐພ຺ພໍ. ຍຕ຺ຖາຕິ ຍສ຺ມິໍ ຐາເນ.

໑໒໒. ປາຬິຍໍ ໂຄຕ຺ເຕນປີຕິ ເອຕ຺ຖ ປິສທ຺ເທນ ນ ເກວລໍ ນາເມເນວ, ອຖ ໂຂ ໂຄຕ຺ເຕນປິ ສາເວຕຸນ຺ຕິ ທສ຺ເສຕິ. ຕສ຺ມາ ‘‘ອາຍສ຺ມໂຕ ປິປ຺ປລິສ຺ສາ’’ຕິ ນາມໍ ສາເວຕ຺ວາຕິປິ ‘‘ອາຍສ຺ມໂຕ ມຫາກສ຺ສປສ຺ສາ’’ຕິ ໂຄຕ຺ຕໍ ສາເວຕ຺ວາປິ ອນຸສາເວຕພ຺ພໍ. ເຕນ ວຸຕ຺ຕໍ ‘‘ມຫາກສ຺ສປສ຺ສາ’’ຕິອາທິ. ອິມິນາ ‘‘ໂກນາໂມ ເຕ ອຸປຊ຺ຌາໂຍ? ອຸປຊ຺ຌາໂຍ ເມ ຠນ຺ເຕ ອາຍສ຺ມາ ມຫາກສ຺ສໂປ ນາມາ’’ຕິອາທີສຸ ໂຄຕ຺ຕມ຺ປິ ນາເມເນວ ສງ຺ຄຫິຕນ຺ຕິ ສິທ຺ຘໍ ໂຫຕິ.

໑໒໓. ເອການຸສາວເນຕິ ປທສ຺ສ ສມານາຘິກຣຓພາຫິຣຕ຺ຖສມາສຠາວໍ ນິວຕ຺ເຕນ຺ໂຕ ອາຫ ‘‘ເອກໂຕ ອນຸສາວເນ’’ຕິ. ຕຕ຺ຖ ເອກໂຕຕິ ເອກກ຺ຂເຓ, ເອກປຫາເຣນ ວາ. ວກ຺ຂຕິ ຫິ ‘‘ເອກກ຺ຂເຓ’’ຕິ ຈ ‘‘ເອກປຫາເຣເນວາ’’ຕິ ຈ. ອິມິນາ ເອກໂຕ ອນຸສາວນເມເຕສນ຺ຕິ ເອການຸສາວນາຕິ ອສມານາຘິກຣຓພາຫິຣຕ຺ຖສມາສໍ ທສ຺ເສຕິ. ເອເກນາຕິ ເອເກນ ອນຸສາວນາຈຣິເຍນ. ເອກສ຺ສາຕິ ເອກສ຺ສ ອຸປສມ຺ປທາເປກ຺ຂສ຺ສ. ‘‘ເອກກ຺ຂເຓ’’ຕິ ອິມິນາ ‘‘ເອກໂຕ’’ຕິ ປທສ຺ສ ອຕ຺ຖໍ ທສ຺ເສຕິ. ‘‘ອຸປສມ຺ປາເທຕຸ’’ນ຺ຕິ ທ຺ວິນ຺ນໍ ອຸປສມ຺ປທາເປກ຺ຂານໍ ອຸປສມ຺ປາເທຕຸໍ.

ປຸຣິມນເຍເນວາຕິ ‘‘ເອເກນ ເອກສ຺ສ, ອຎ຺ເຎນ ອິຕຣສ຺ສາ’’ຕິອາທິນາ ປຸພ຺ເພ ວຸຕ຺ຕນເຍເນວ. ເອກໂຕ ອນຸສາວເນ ກາຕຸນ຺ຕິ ‘‘ເອເກນ ເອກສ຺ສ, ອຎ຺ເຎນ ອຎ຺ຎສ຺ສ, ອິຕເຣນ ອິຕຣສ຺ສາ’’ຕິ ເອວໍ ຕີຫິ ອາຈຣິເຍຫິ ຕິຓ຺ຓໍ ອຸປສມ຺ປທາເປກ຺ຂານໍ ເອກກ຺ຂເຓ ອນຸສາວເນ ກາຕຸໍ. ຕຎ຺ຈ ໂຂຕິ ເອຕ຺ຖ ຕສທ຺ທສ຺ສ ‘‘ອນຸສາວເນ ກາຕຸ’’ນ຺ຕິ ປທສ຺ເສວ ອຕ຺ຖວິສຍຕໍ ທສ຺ເສຕຸໍ ວຸຕ຺ຕໍ ‘‘ອນຸສາວນກິຣິຍ’’ນ຺ຕິ. ທ຺ເວ ວາ ຕໂຍ ວາຕິ ເອຕ຺ຖ ວາສທ຺ໂທ ອນິຍມວິກປ຺ປຕ຺ໂຖ. ສເຈ ເອເກນາຈຣິເຍນ ທ຺ເວ ອນຸສາເວຕິ, ‘‘ອຍໍ ພຸທ຺ຘຣກ຺ຂິໂຕ ຈ ອຍໍ ຘມ຺ມຣກ຺ຂິໂຕ ຈາ’’ຕິ ອນຸສາເວຕພ຺ພາ. ສເຈ ຕໂຍ ອນຸສາເວຕິ, ‘‘ອຍໍ ພຸທ຺ຘຣກ຺ຂິໂຕ ຈ ອຍໍ ຘມ຺ມຣກ຺ຂິໂຕ ຈ ອຍໍ ສງ຺ຆຣກ຺ຂິໂຕ ຈາ’’ຕິ ອນຸສາເວຕພ຺ພາ. ຍຖາ ເອເກນາຈຣິເຍນ ທ຺ເວ ວາ ຕໂຍ ວາ ເອກໂຕ ອນຸສາເວຕພ຺ພາ, ເອວໍ ທ຺ວີຫິ ວາ ຕີຫິ ວາ ອາຈຣິເຍຫິ ເອໂກ ອນຸສາເວຕພ຺ໂພຕິປິ ວທນ຺ຕິ. ເອເກນ ອຸປຊ຺ຌາເຍນ ກຣຓຠູເຕນ, ເອໂກ ອຸປຊ຺ຌາໂຍ ຫຸຕ຺ວາຕິ ວາ ອຕ຺ໂຖ. ‘‘ເອກປຫາເຣເນວາ’’ຕິ ອິມິນາ ‘‘ເອກໂຕ’’ຕິ ປທສ຺ສ ອຕ຺ຖໍ ທສ຺ເສຕິ. ທ຺ເວ ຕິສ຺ໂສ ກມ຺ມວາຈາຕິ ທ຺ວີຫິ ອາຈຣິເຍຫິ ທ຺ເວ, ຕີຫິ ອາຈຣິເຍຫິ ຕິສ຺ໂສ ກມ຺ມວາຈາ. ເອເກນ ອຸປຊ຺ຌາເຍນ ອນຸສາວເນ ເອໂກ ວາ ທ຺ເວ ວາ ຕໂຍ ວາ ອາຈຣິຍາ ວຏ຺ຏນ຺ຕິ, ນານຸປຊ຺ຌາເຍນ ອນຸສາວເນ ປນ ນານາຈຣິຍາ ເອວ ວຏ຺ຏນ຺ຕີຕິ ທສ຺ເສນ຺ໂຕ ອາຫ ‘‘ສເຈ ປນາ’’ຕິອາທິ. ຕິສ຺ສຕ຺ເຖໂຣຕິ ກມ຺ມວາຈາຈຣິຍຠູໂຕ ຕິສ຺ສຕ຺ເຖໂຣ. ສຸມນຕ຺ເຖຣສ຺ສາຕິ ອຸປຊ຺ຌາຍຠູຕສ຺ສ ສຸມນຕ຺ເຖຣສ຺ສ. ອິທນ຺ຕິ ນານຸປຊ຺ຌາເຍນ ເອກສ຺ສາຈຣິຍສ຺ສານຸສາວນໍ. ເອສ ປຏິກ຺ເຂໂປຕິ ‘‘ນ ຕ຺ເວວ ນານຸປຊ຺ຌາເຍນາ’’ຕິ ເອໂສ ປຏິກ຺ເຂໂປ.