໕໗. ຫຕ຺ຖຈ຺ຉິນ຺ນາທິວຕ຺ຖຸກຖາ

໑໑໙. ຫຕ຺ຖຈ຺ຉິນ຺ນາທິວຕ຺ຖູສຸ ຫຕ຺ຖາ ຉິນ຺ນາ ຍສ຺ສາຕິ ຫຕ຺ຖຈ຺ຉິນ຺ໂນຕິອາທິວຈນຕ຺ຖໍ ທສ຺ເສນ຺ໂຕ ອາຫ ‘‘ຍສ຺ສາ’’ຕິອາທິ. ມຓິພນ຺ເຘຕິ ປໂກຏ຺ຐນ຺ເຕ. ໂສ ຫິ ຍສ຺ມາ ເອຕ຺ຖ ມຓິສງ຺ຂາຕໍ ອລງ຺ກາຣວິກຕິໍ ພນ຺ຘຕິ, ຕສ຺ມາ ມຓິພນ຺ໂຘຕິ ວຸຈ຺ຈຕິ. ກປ຺ປເຣຕິ ກໂປຓິຍໍ. ສາ ຫິ ປເຣສໍ ປິຏ຺ຐີສຸ ກປຕິ ຫິໍສຕິ ອເນນາຕິ ‘‘ກປ຺ປໂຣ’’ຕິ ວຸຈ຺ຈຕິ. ຍສ຺ສ ຫຕ຺ຖາ ຉິນ຺ນາ ໂຫນ຺ຕິ, ອຍໍ ຫຕ຺ຖຈ຺ຉິນ຺ໂນ ນາມາຕິ ໂຍຊນາ. ເອເສວ ນໂຍ ເສເສສຸປິ. ເອໂກ ວາ ປາໂທຕິ ໂຍຊນາ. ເຫຏ຺ຐາ ‘‘ເອໂກ ວາ ທ຺ເວ ວາ ຫຕ຺ຖາ’’ຕິ ເອຕ຺ຖາປິ ເອເສວ ນໂຍ. ຈຕູສຸ ຫຕ຺ຖປາເທສຸ ທ຺ເວ ວາຕິ ເອໂກ ຫຕ຺ໂຖ, ເອໂກ ປາໂທຕິ ທ຺ເວ ວາ. ກຓ຺ຓາຕິ ສທ຺ທຄ຺ຄຫາ. ເຕ ຫິ ກຓ຺ຓຕິ ສວຕິ ເອເຕຫີຕິ ກຓ຺ຓາຕິ ວຸຈ຺ຈນ຺ຕິ. ກຓ຺ຓາພທ຺ເຘຕິ ກຓ຺ຓຈ຺ຉິທ຺ທສ຺ສ ອາພທ຺ເຘ. ສງ຺ຆາເຏຕຸນ຺ຕິ ສງ຺ຆຏນໍ ກາຕຸໍ, ອາພນ຺ຘນໍ ກາຕຸນ຺ຕິ ອຕ຺ໂຖ. ອຊປທເກຕິ ອຊປທສຓ຺ຐາເນ ຐາເນ. ນາສາຕິ ຆານານິ. ຕານິ ຫິ ນາສຕິ ອພ຺ຍຕ຺ຕສທ຺ທໍ ກໂຣຕິ ເອຕາຫີຕິ ນາສາຕິ ວຸຈ຺ຈນ຺ຕິ. ນາສິກາຕິ ນາສາເຍວ. ສຓ຺ຐາເປຕຸນ຺ຕິ ສຸຏ຺ຐຸ ຐເປຕຸໍ, ປກຕິຍາ ຐເປຕຸນ຺ຕິ ອຕ຺ໂຖ. ນຂເສສນ຺ຕິ ນໂຂເຍວ ເສໂສ ຉິນ຺ນງ຺ຄຸລິໂຕຕິ ນຂເສໂສ, ຕໍ. ອຄ຺ເຄ ປຸເຣ ອຸຏ຺ຐຫຕີຕິ ອງ຺ຄຸຏ຺ໂຐ. ‘‘ວຸຕ຺ຕນເຍເນວາ’’ຕິ ອິມິນາ ‘‘ນຂເສສໍ ອທສ຺ເສຕ຺ວາ’’ຕິ ວຈນໍ ອຕິທິສຕິ. ກຓ຺ຑຣນາມກາຕິ ມຫາສິຣນາມກາ. ເຕ ຫິ ກໍ ສຣີຣໍ ຘາເຣນ຺ຕີຕິ ກຓ຺ຑຣາຕິ ວຸຈ຺ຈນ຺ຕິ ຘກາຣສ຺ສ ຑກາຣໍ ກຕ຺ວາ. ເຍສູຕິ ກຓ຺ຑເຣສຸ, ນິທ຺ຘາຣເຓ ຠຸມ຺ມໍ.

ຍສ຺ສ ວຄ຺ຄຸລິປກ຺ຂກາ ວິຍ ອງ຺ຄຸລິໂຍ ສມ຺ພນ຺ໂຘ ໂຫນ຺ຕິ, ອຍໍ ຜຓຫຕ຺ຖໂກ ນາມາຕິ ໂຍຊນາ. ເອຕນ຺ຕິ ຜຓຫຕ຺ຖກໍ. ຉຬງ຺ຄຸລາທໂຍປິ ຜຓຫຕ຺ຖເກເຍວ ສງ຺ຄເຫຕພ຺ພາຕິ ອາຫ ‘‘ຍສ຺ສປິ ຉ ອງ຺ຄຸລິໂຍ’’ຕິອາທິ. ຍສ຺ສປິ ຉ ອງ຺ຄຸລິໂຍ ໂຫນ຺ຕິ, ອຍມ຺ປິ ຜຓຫຕ຺ຖໂກ ນາມ ອຸປຈາເຣນ.

ຂຸຊ຺ໂຊຕິ ເອຕ຺ຖ ຂຸຊ຺ໂຊ ສຣີໂຣ ຍສ຺ສຕ຺ຖີຕິ ຂຸຊ຺ໂຊຕິ ວຈນຕ຺ຖໍ ທສ຺ເສນ຺ໂຕ ອາຫ ‘‘ຂຸຊ຺ຊສຣີໂຣ’’ຕິ. ກສ຺ມາ ຂຸຊ຺ໂຊຕິ ອາຫ ‘‘ອຸຣສ຺ສ ວາ’’ຕິອາທິ. ຍສ຺ສ ປນ ວງ຺ກໍ, ອຍມ຺ປິ ຂຸຊ຺ໂຊ ນາມາຕິ ໂຍຊນາ. ວງ຺ກນ຺ຕິ ຈ ກຸຏິລໍ. ຫີຕິ ສຈ຺ຈໍ, ຍສ຺ມາ ວາ. ພ຺ຣຫ຺ມຸຊຸຄຕ຺ໂຕຕິ ອຸຊຸໍ ຄຕ຺ຕໍ ອຸຊຸຄຕ຺ຕໍ, ພ຺ຣຫ຺ມຸໂນ ອຸຊຸຄຕ຺ຕໍ ວິຍ ອຸຊຸຄຕ຺ຕໍ ອິມສ຺ສ ມຫາປຸຣິສສ຺ສາຕິ ພ຺ຣຫ຺ມຸຊຸຄຕ຺ໂຕ, ມຫາປຸຣິໂສ.

ສໍເຂເປນ ວຸຕ຺ຕມຕ຺ຖໍ ວິຕ຺ຖາເຣນ ທສ຺ເສນ຺ໂຕ ອາຫ ‘‘ຊງ຺ຆວາມນສ຺ສ ຫີ’’ຕິອາທິ. ເຍສນ຺ຕິ ອຸຠິນ຺ນໍ ກາຍານໍ. ຠູຕານນ຺ຕິ ອມນຸສ຺ສານໍ ປິສາຈກເປຕານໍ. ອຕ຺ຕຠາໂວ ໂຫຕິ ວິຍາຕິ ໂຍຊນາ. ປຣິວຏຸໂມຕິ ປຣິສມນ຺ຕໂຕ ວຏ຺ຏຸລສຣີໂຣ.

ຄລຄຓ຺ຑີຕິ ເອຕ຺ຖ ຄເລ ຄຓ຺ໂຑ ຍສ຺ສຕ຺ຖີຕິ ຄລຄຓ຺ຑີຕິ ວຈນຕ຺ຖໍ ທສ຺ເສນ຺ໂຕ ອາຫ ‘‘ຍສ຺ສາ’’ຕິອາທິ. ເອຕນ຺ຕິ ‘‘ຄລຄຓ຺ຑີ’’ຕິ ເອຕໍ ວຈນໍ. ຕຕ຺ຖາຕິ ຄລຄຓ຺ຑິປພ຺ພາຊເນ. ຍນ຺ຕິ ວຈນໍ.

ສິປທີຕິ ເອຕ຺ຖ ສິຖິລໍ ປທໍ ອິມສ຺ສາຕິ ສິປທີຕິ ວຸຕ຺ເຕ ຠາຣປາໂທເຍວ ຄເຫຕພ຺ໂພຕິ ອາຫ ‘‘ຠາຣປາໂທ ວຸຈ຺ຈຕີ’’ຕິ. ຠາຣໍ ປາທໍ ຍສ຺ສາຕິ ຠາຣປາໂທ. ເອເຕ ທ຺ເວ ຖູລປາທໂຣຄີສຸ ວຕ຺ຕນ຺ຕີຕິ ທຏ຺ຐພ຺ພໍ. ສຎ຺ຊາຕປິຬໂກຕິ ສຎ຺ຊາຕໂຜໂຏ. ອຸປນາຫນ຺ຕິ ຠຸສໍ ພນ຺ຘນໍ. ອຸທກອາວາເຏຕິ ອຸທເກນ ປຸຓ຺ຓາຍໍ ກາສຸຍໍ. ອຸທກວາລິກາຍາຕິ ອຸທກຕິນ຺ເຕນ ມຣຸນາ. ຍຖາ ສິຣາ ປຎ຺ຎາຍນ຺ຕິ, ເອວໍ ມິລາເປຕຸນ຺ຕິ ໂຍຊນາ. ອີທິສນ຺ຕິ ສິຣາປຎ຺ຎາຍນຊງ຺ຆເຕລນາຬິກສຠາວໍ. ຕຖາຕິ ຍຖາ ປພ຺ພຊ຺ຊາກາເລ ກໂຣຕິ, ຕຖາ ກຕ຺ວາຕິ ອຕ຺ໂຖ.

ປາປໂຣຄີຕິ ເອຕ຺ຖ ປາປໂຣຄສ຺ສ ສຣູປໍ ທສ຺ເສນ຺ໂຕ ອາຫ ‘‘ອຣິສ’’ອິຕິອາທິ. ຕຕ຺ຖ ອຣິໂສ ຈ ຠຄນ຺ທໂຣ ຈ ປິຕ຺ຕຎ຺ຈ ເສມ຺ໂຫ ຈ ກາໂສ ຈ ໂສໂສ ຈາຕິ ທ຺ວນ຺ໂທ, ເຕ ອາທໂຍ ເຍສໍ ເຕຕິ ອຣິສ…ເປ… ໂສສາທໂຍ. ອາທິສທ຺ເທນ ເຫຏ຺ຐາ ວຸຕ຺ເຕ ອາພາເຘ ສງ຺ຄຓ຺ຫາຕິ. ຕຕ຺ຖ ປິຕ຺ຕເສມ຺ຫສທ຺ເທຫິ ຕໍສມຸຏ຺ຐາໂນ ໂຣໂຄ ຄເຫຕພ຺ໂພ. ‘‘ນິຈ຺ຈາຕຸໂຣ’’ຕິ ອິມິນາ ປາປໂຣຄີຕິ ເອຕ຺ຖ ມນ຺ຕຸຕ຺ເຖ ປວຕ຺ຕສ຺ສ ອີປຈ຺ຈຍສ຺ສ ນິຈ຺ຈໂຍຄຕ຺ຖໍ ທສ຺ເສຕິ.

ປຣິສທູສໂນຕິ ເອຕ຺ຖ ອິຕິສທ຺ໂທ ນາມປຣິຍາໂຍ, ປຣິສທູສໂນ ນາມາຕິ ຫິ ອຕ຺ໂຖ. ໂຍ ອຕ຺ຕໂນ ວິຣູປຕາຍ ປຣິສໍ ທູເສຕິ, ອຍໍ ປຣິສທູສໂນ ນາມາຕິ ໂຍຊນາ. ຉສຣີຣໂທສໍ ອາທິໍ ກຕ຺ວາ ປຣິສທູສນຠາວໍ ວິຕ຺ຖາເຣນ຺ໂຕ ອາຫ ‘‘ອຕິທີໂຆ ວາ’’ຕິອາທິ. ອຕິທີໂຆ ວາຕິ ເອຕ຺ຖ ນ ເກວລໍ ປເຣສໍ ທ຺ວງ຺ຄຸລາທິມຕ຺ຕທີໂຆ, ອຖ ໂຂ ທິຄຸຓາທິທີໂຆວາຘິປ຺ເປໂຕຕິ ອາຫ ‘‘ອຎ຺ເຎສ’’ນ຺ຕິອາທິ. ນາຠິປເທໂສຕິ ອຕ຺ຕໂນ ນາຠິປເທໂສ. ຍຖາ ຫິ ອຕິທີເຆ ປຣວຈເນນ ອຕິທີຆສ຺ສ ສຣູປໍ ເວທິຕພ຺ພໍ, ຕຖາ ອຕິຣສ຺ສາທີສຸປິ ອຕິຣສ຺ສສຣູປນ຺ຕິ ທຏ຺ຐພ຺ພໍ. ມໂຫທໂຣຕິ ມຫາອຸທໂຣ. ກປ຺ປສີໂສ ວາຕິ ຫຕ຺ຖິສີໂສ ວິຍ ຍຸຄສີໂສ ວາ. ກປ຺ປສທ຺ໂທ ເຫຕ຺ຖ ຍຸຄຕ຺ຖວາຈໂກ. ກຓ຺ຓິກເກໂສ ວາຕິ ກຓ຺ຓິກສທິເສຫິ ເກເສຫິ ສມນ຺ນາຄໂຕ. ‘‘ຊາຕິປລິເຕຫີ’’ຕິ ອິມິນາ ຊຣາວາເຕນ ປຫຕໍ ປລິຕໍ ນິວຕ຺ເຕຕິ. ປກຕິຕມ຺ພເກໂສຕິ ເອຕ຺ຖ ປກຕິສທ຺ເທນ ເກນຈິ ປໂຍເຄນ ຕມ຺ພເກສໍ ນິວຕ຺ເຕຕິ. ອາວຏ຺ຏສີໂສຕິ ປຸນປ຺ປຸນໍ ວຏ຺ຏຕີຕິ ອາວຏ຺ໂຏ, ເກສາວຏ຺ໂຏ, ໂສ ເອຕສ຺ສ ສີເສ ອຕ຺ຖີຕິ ອາວຏ຺ຏສີໂສ. ອຸທ຺ຘຄ຺ເຄຫີຕິ ອຸທ຺ຘໍ ໂກຏີຫິ. ຊາລພທ຺ເຘນ ວິຍາຕິ ຊາເລນ ພທ຺ເຘນ ອິວ.

ສມ຺ພທ຺ຘຠມຸໂກ ວາຕິ ອຎ຺ຎມຎ຺ຎສມ຺ພທ຺ຘຠມຸໂກ ວາ. ມກ຺ກຏຠມຸໂກຕິ ມກ຺ກຏສ຺ສ ຠມຸ ວິຍ ຠມຸ ເອຕສ຺ສາຕິ ມກ຺ກຏຠມຸໂກ. ວາສິໂກເຓນາຕິ ຕຈ຺ຉນີໂກຏິຍາ. ວິສມຈກ຺ກໂລຕິ ເອຕ຺ຖ ຈກ຺ກາກາເຣນ ລາຕິ ປວຕ຺ຕຕິ, ຈກ຺ກາກາຣໍ ວາ ລາຕິ ຄຓ຺ຫາຕີຕິ ຈກ຺ກໂລ. ເກກໂຣຕິ ວລິໂຣ. ໂສ ຫິ ກຸຈ຺ຉິຕໍ ກໂຣຕີຕິ ເກກໂຣຕິ ວຸຈ຺ຈຕິ. ກກ຺ກຏສ຺ເສວາຕິ ກກ຺ກຏສ຺ສ ອິວ. ມູສິກກຓ຺ໂຓຕິ ອາຂຸກຓ຺ໂຓ. ຊຏຸກກຓ຺ໂຓຕິ ວຄ຺ຄຸລິກຓ຺ໂຓ. ອວິທ຺ຘກຓ຺ໂຓຕິ ອຈ຺ຉິທ຺ທກຓ຺ໂຓ. ຫີຕິ ສຈ຺ຈໍ, ຍສ຺ມາ ວາ. ໂສຕິ ອວິທ຺ຘກຓ຺ໂຓ. ກຓ຺ເຓ ຠຄນ຺ທໂຣ ເອຕສ຺ສາຕິ ກຓ຺ຓຠຄນ຺ທໂຣ, ໂສເຍວ ກຓ຺ຓຠຄນ຺ທຣິໂກ. ຄຓ຺ໂຑ ກຓ຺ເຓ ເອຕສ຺ສາຕິ ຄຓ຺ຑກຓ຺ໂຓ. ປຄ຺ຆຣິຕປຸພ຺ເພນາຕິ ປຄ຺ຆຣິຕປູເຍນ. ຏງ຺ກິໂຕ ກຓ຺ໂຓ ຍສ຺ສາຕິ ຏງ຺ກິຕກຓ຺ໂຓ. ໂຄຠຕ຺ຕນາຬິກາຍາຕິ ຄຸນ຺ນໍ ຠຕ຺ຕປານຕ຺ຖໍ ກຕາຍ ນາຬິກາຍ. ພິຬາຣກ຺ຂິ ວິຍ ອຕິປິງ຺ຄລໍ ອກ຺ຂິ ເອຕສ຺ສາຕິ ອຕິປິງ຺ຄລກ຺ຂິ. ມຘຸວຓ຺ໂຓ ວິຍ ປິງ຺ຄລໍ ອກ຺ຂິ ເອຕສ຺ສາຕິ ມຘຸປິງ຺ຄລກ຺ຂິ. ນິປ຺ປຂຸມກ຺ຂີຕິ ເອຕ຺ຖ ປຂຸມໍ ວຸຈ຺ຈຕິ ອກ຺ຂມ຺ຫິ ຊາຕໍ ໂລມໍ. ຕຎ຺ຫິ ອກ຺ຂິໂນ ປກ຺ຂທ຺ວເຍ ຊາຕຕ຺ຕາ ປຂຸມນ຺ຕິ ວຸຈ຺ຈຕິ. ນຕ຺ຖິ ປຂຸມໍ ອກ຺ຂິມ຺ຫິ ເອຕສ຺ສາຕິ ນິປ຺ປຂຸມກ຺ຂິ. ອສ຺ສຸປຄ຺ຆຣຓໍ ອກ຺ຂິມ຺ຫາ ເອຕສ຺ສາຕິ ອສ຺ສຸປຄ຺ຆຣຓກ຺ຂິ. ປຸປ຺ຜໍ ສຎ຺ຊາຕໍ ຍສ຺ສ ອກ຺ຂິໂນຕິ ປຸປ຺ຜິຕໍ. ປຸປ຺ຜິຕໍ ອກ຺ຂິ ຍສ຺ສາຕິ ປຸປ຺ຜິຕກ຺ຂິ. ອກ຺ຂິປາເກນາຕິ ອກ຺ຂິໂນ ທລປຣິຍນ຺ເຕສຸ ປຈ຺ຈນເກນ ໂຣເຄນ.

ຈິປິຏນາສິໂກຕິ ອນຸນ຺ນຕນາສິໂກ. ສຸກຕຸຓ຺ຑສທິສາຍາຕິ ສຸວານໍ ມຸເຂນ ສທິສາຍ.

ປຏງ຺ຄມຓ຺ຑູກສ຺ເສວາຕິ ປຏງ຺ຄນາມກສ຺ສ ມຓ຺ຑູກສ຺ສ ມຸຂນິມິຕ຺ຕໍ ອິວ ມຸຂນິມິຕ຺ຕໍເຍວາຕິ ໂຍຊນາ. ອຸກ຺ຂລິມຸຂວຏ຺ຏິສທິເສຫີຕິ ອຸກ຺ຂລິຍາ ມຸຂວຏ຺ຏິນາ ສທິເສຫິ. ເຠຣິຈມ຺ມສທິເສຫີຕິ ເຠຣິຍາ ມຸເຂ ນຫິຕຈມ຺ເມນ ສທິເສຫິ. ເອຬມຸໂຂຕິ ເອຬາຍ ນິຈ຺ຈປຄ຺ຆຣິຕໍ ມຸຂເມຕສ຺ເສຕິ ເອຬມຸໂຂ. ອຸປ຺ປກ຺ກມຸໂຂຕິ ອຸປ຺ປກ຺ກໍ ກຸຖິກໍ ມຸຂເມຕສ຺ສາຕິ ອຸປ຺ປກ຺ກມຸໂຂ. ສງ຺ຂຕຸຓ຺ຑໂກຕິ ສງ຺ຂສ຺ສ ຕຸຓ຺ເຑນ ສທິໂສ ໂອຏ຺ໂຐ ເອຕສ຺ສາຕິ ສງ຺ຂຕຸຓ຺ຑໂກ.

ອຏ຺ຐກທນ຺ຕສທິເສຫີຕິ ອຏ຺ຐກນາມກສ຺ສ ນງ຺ຄລສ຺ສ ທນ຺ເຕຫິ ສທິເສຫິ. ທນ຺ເຕ ປິທຫິຕຸນ຺ຕິ ສມ຺ພນ຺ໂຘ. ທນ຺ຕນ຺ຕເຣຕິ ທນ຺ຕວິວເຣ, ທນ຺ຕມຊ຺ເຌ ວາ. ກລນ຺ທກທນ຺ໂຕ ວິຍາຕິ ກາຬການໍ ທນ຺ໂຕ ວິຍ.

ມຫາຫນຸໂກຕິ ມຫນ຺ໂຕ ຫນຸ ເອຕສ຺ສາຕິ ມຫາຫນຸໂກ. ຈິປິຏຫນຸໂກຕິ ອນຸນ຺ນຕຫນຸໂກ. ນິມ຺ມສ຺ສຸທາຐິໂກຕິ ນຕ຺ຖິ ມສ຺ສຸ ຈ ທາຐິ ຈ ເອຕສ຺ສາຕິ ນິມ຺ມສ຺ສຸທາຐິໂກ. ຠຏ຺ຐອໍສກູໂຏຕິ ຠຏ຺ໂຐ ປຕິໂຕ ອໍສກູໂຏ ອິມສ຺ສາຕິ ຠຏ຺ຐອໍສກູໂຏ. ໂຄຘາຄຕ຺ໂຕຕິ ໂຄຘາຍ ຄຕ຺ຕໍ ວິຍ ຄຕ຺ຕໍ ອິມສ຺ສາຕິ ໂຄຘາຄຕ຺ໂຕ. ສພ຺ພໍເປຕນ຺ຕິ ສພ຺ພມ຺ປິ ເອຕໍ ‘‘ກຈ຺ຉຸຄຕ຺ໂຕ’’ຕິອາທິວຈນໍ. ເອຕ຺ຖາຕິ ‘‘ກຈ຺ຉຸຄຕ຺ໂຕ’’ຕິອາທິວຈເນ. ວິນິຈ຺ຉໂຍ ເວທິຕພ຺ໂພຕິ ໂຍຊນາ.

ຠຏ຺ຐກຏິໂກຕິ ຠຏ຺ຐາ ປນ຺ນາ ກຏິ ເອຕສ຺ສາຕິ ຠຏ຺ຐກຏິໂກ. ອຈ຺ຈຸຄ຺ຄເຕຫິ ອານິສທມໍເສຫີຕິ ສມ຺ພນ຺ໂຘ. ວາຕຓ຺ຑິໂກຕິ ວາເຕນ ປູຣິໂຕ ອຓ຺ຑໂກໂສ ເອຕສ຺ສາຕິ ວາຕຓ຺ຑິໂກ. ສງ຺ຆຏ຺ຏນຊາຓຸໂກຕິ ອນ຺ໂຕ ນຕຕ຺ຕາ ອຎ຺ຎມຎ຺ຎໍ ສງ຺ຆຏ຺ຏນໍ ຊາຓຸ ເອຕສ຺ສາຕິ ສງ຺ຆຏ຺ຏນຊາຓຸໂກ. ວິກໂຏຕິ ຕິຣິຍຄມນປາໂທ. ອຸປຑ຺ຒປິຓ຺ຑິກສ຺ສ ອຕ຺ຖໍ ສຫ ເຠເທນ ທສ຺ເສນ຺ໂຕ ອາຫ ‘‘ໂສ ທຸວິໂຘ’’ຕິອາທິ. ຕຕ຺ຖ ທຸວິໂຘ ໂສ ອຸປຑ຺ຒປິຓ຺ຑິໂກ ສມນ຺ນາຄໂຕຕິ ໂຍຊນາ. ອຖ ວາ ໂສ ອຸປຑ຺ຒປິຓ຺ຑິໂກ ເຫຏ຺ຐາ ໂອຣູຬ຺ຫາຫິ ມຫນ຺ຕີຫິ ຊງ຺ຆປິຓ຺ຑິກາຫິ ສມນ຺ນາຄໂຕ ວາ ອຸປຣິ ອາຣູຬ຺ຫາຫິ ມຫນ຺ຕີຫິ ຊງ຺ຆປິຓ຺ຑິກາຫິ ສມນ຺ນາຄໂຕ ວາຕິ ທຸວິໂຘຕິ ໂຍຊນາ. ປິຏ຺ຐິກປາໂທຕິ ປິຏ຺ຐິຍໍ ອຸຏ຺ຐິໂຕ ປາໂທ ເອຕສ຺ສາຕິ ປິຏ຺ຐິກປາໂທ. ຄຓ຺ຑິກງ຺ຄຸລິ ວາຕິ ຄຓ຺ເຑນ ອຸຏ຺ຐິໂຕ ອງ຺ຄຸລິ ເອຕສ຺ສາຕິ ຄຓ຺ຑິກງ຺ຄຸລິ. ສພ຺ໂພເປສາຕິ ເອສ ສພ຺ໂພປິ ຊໂນ. ປຣິສໍ ທູເສຕີຕິ ປຣິສທູສໂນ.

ປຸພ຺ພາທີຫີຕິອາທິສທ຺ເທນ ຈກ຺ຂຸປສາທສ຺ສ ອນ຺ຕຣາຍກຣານິ ອຎ຺ຎານິປິ ວຕ຺ຖູນິ ຄເຫຕພ຺ພານິ. ທ຺ວີຫິ ວາ ອກ຺ຂີຫິ, ເອເກນ ວາ ອກ຺ຂິນາຕິ ໂຍຊນາ. ອຸຠຍມ຺ປີຕິ ທ຺ວິນ຺ນໍ ອຏ຺ຐກຖາຈຣິຍານໍ ອຸຠຍມ຺ປິ ວຈນໍ. ປາຬິຍໍ ‘‘ອນ຺ຘໍ ປພ຺ພາເຊນ຺ຕີ’’ຕິ ອວຕ຺ວາ ‘‘ກາຓໍ ປພ຺ພາເຊນ຺ຕີ’’ຕິ ວຸຕ຺ຕຕ຺ຕາ ‘‘ປຣິຍາເຍນາ’’ຕິ ວຸຕ຺ຕໍ. ມຫາອຏ຺ຐກຖາຍຎ຺ຫິ ‘‘ຊຈ຺ຈນ຺ໂຘ’’ຕິ ອິມິນາ ທ຺ເວອກ຺ຂິກາຓໍ ສນ຺ຘາຍ ວຸຕ຺ຕໍ. ກຸຓີຕິ ກຸຓນໍ ສໍໂກຈນໍ ກຸຓໍ, ຕເມຕສ຺ສຕ຺ຖີຕິ ກຸຓີ. ຂຎ຺ໂຊຕິ ຂຎ຺ຊຕິ ຄຕິເວກລ຺ລຠາເວນ ປວຕ຺ຕຕີຕິ ຂຎ຺ໂຊ. ກຸຓ຺ຑປາທໂກຕິ ເອຕ຺ຖ ກຸຓ຺ໂຑຕິ ຂຎ຺ຊສ຺ເສວ ນາມໍ. ຂຎ຺ໂຊ ຫິ ກຸຑຕິ ຄມນໍ ປຏິຫນຕີຕິ ກຸຓ຺ໂຑຕິ ວຸຈ຺ຈຕິ. ກສ຺ມາ ກຸຓ຺ຑປາທໂກ? ກສ຺ມາ ປິຏ຺ຐິປາທມຊ຺ເຌນ ຈງ຺ກມນ຺ໂຕຕິ ອາຫ ‘‘ມຊ຺ເຌ ສໍກຸຏິຕປາທຕ຺ຕາ’’ຕິ. ອິມິນາ ຫິ ກຸຓ຺ຑປາທສ຺ສ ຈ ປິຏ຺ຐິປາທມຊ຺ເຌນ ຈງ຺ກມນສ຺ສ ຈ ເຫຕຸໍ ທສ຺ເສຕິ. ເອເສວ ນໂຍ ອນນ຺ຕຣວາກ຺ເຍປິ. ສພ຺ໂພເປສາຕິ ເອສ ສພ຺ໂພປິ ຊໂນ.

ປກ຺ຂຫໂຕຕິ ເອຕ຺ຖ ເອໂກ ປກ຺ໂຂ ຫໂຕ ວິນາໂສ ເອຕສ຺ສາຕິ ປກ຺ຂຫໂຕຕິ ອຕ຺ຖໍ ທສ຺ເສນ຺ໂຕ ອາຫ ‘‘ເອໂກ ຫຕ຺ໂຖ ວາ’’ຕິອາທິ. ‘‘ປກ຺ຂປາໂຕ’’ຕິປິ ປາໂຐ, ໂສ ອປາໂຐເຍວ. ປກ຺ຂສທ຺ໂທ ຫິ ໂກຏ຺ຐາສວາຈໂກ, ນ ປງ຺ຄຸລປຣິຍາໂຍ, ປີຐສພ຺ພີ ວຸຈ຺ຈຕີຕິ ປີເຐນ ສພ຺ພຕິ ຄຈ຺ຉຕິ ສີເລນາຕິ ປີຐສພ຺ພີ ວຸຈ຺ຈຕິ. ‘‘ຊິຓ຺ຓຠາເວນ ທຸພ຺ພໂລ’’ຕິ ອິມິນາ ຊີຣຓໍ ຊຣາ, ຕາຍ ທຸພ຺ພໂລ ຊຣາທຸພ຺ພໂລຕິ ວຈນຕ຺ຖໍ ທສ຺ເສຕິ. ພລວາ ໂຫຕີຕິ ອາຄນ຺ຕຸກໂຣຄານມຠາເວນ ພລວາ ໂຫຕິ, ‘‘ວຈີເຠໂທ ນປ຺ປວຕ຺ຕຕີ’’ຕິ ອິມິນາ ມຸຂມຕ຺ຕເມວ ຄຈ຺ຉຕິ ປວຕ຺ຕຕິ, ນ ວຈີເຠໂທ ເອຕ຺ຖ ຊເນຕິ ມູໂຄຕິ ທສ຺ເສຕິ. ຍສ຺ສ ວຈີເຠໂທ ນ ປວຕ຺ຕຕິ, ອຍໍ ມູໂຄ ນາມາຕິ ໂຍຊນາ. ມມ຺ມນນ຺ຕິ ຂລິຕວຈນໍ. ໂຍ ເອກເມວ ອກ຺ຂຣໍ ຈຕຸປຎ຺ຈກ຺ຂຕ຺ຕຸໍ ວທຕິ, ຕສ຺ເສຕມຘິວຈນໍ.

ພຘີໂຣຕິ ສຸຕິຫີໂນ. ໂສ ຫິ ຫນນໍ ໂສຕປສາທສ຺ສ ນາສນໍ ວໂຘ, ຕໍ ອີຣຕິ ຄຈ຺ຉຕີຕິ ພຘີໂຣຕິ ວຸຈ຺ຈຕິ. ໂຍ ສພ຺ເພນ ສພ຺ພໍ ນ ສຸຓາຕິ, ອຍໍ ພຘີໂຣ ນາມາຕິ ໂຍຊນາ. ອິມິນາ ນຏ຺ຐປສາທຕໍ ທສ຺ເສຕິ. ອຸຠຍໂທສວເສນາຕິ ອຸປລກ຺ຂຓວເສນ ວຸຕ຺ຕໍ ອນ຺ຘມູຄພຘິຣປພ຺ພາຊເນ ຕິໂທສວເສນປິ ວຸຕ຺ຕຕ຺ຕາ. ເຕຕິ ຫຕ຺ຖຈ຺ຉິນ຺ນາທໂຍ ທ຺ວຕ຺ຕິໍສຊເນ. ໂອສາຣຓໍ ອປຕ຺ໂຕ ປຸຄ຺ຄໂລ ອຕ຺ຖິ, ຕໍ ປຸຄ຺ຄລໍ ສງ຺ໂຆ ໂອສາເຣຕິ ເຈຕິ ໂຍຊນາ. ໂອສາເຣຕີຕິ ສງ຺ເຆ ປເວເສຕິ.