໔໙. ຕິຣຈ຺ຉານຄຕວຕ຺ຖຸ

໑໑໑. ເທວສມ຺ປຕ຺ຕິສທິສໍ ອິສ຺ສຣິຍສມ຺ປຕ຺ຕິໍ ອນຸຠວນ຺ໂຕປິ ໂສ ນາໂຄ ກສ຺ມາ ນາຄໂຍນິຍາ ອຏ຺ຏີຍຕີຕິ ອາຫ ‘‘ກິຎ຺ຈາປີ’’ຕິອາທິ.

ຕຕ຺ຖ ກິຎ຺ຈາປິ ອນຸໂຠຕີຕິ ສມ຺ພນ຺ໂຘ. ກິຎ຺ຈາປິສທ຺ໂທ ເຫຕ຺ຖ ສມ຺ຠາວນາໂຊຕໂກ, ປນສທ຺ໂທ ຄຣຫຕ຺ຖໂຊຕໂກ. ກຸສລວິປາເກນາຕິ ອເຫຕຸກກຸສລວິປາເກນ. ຕສ຺ສາຕິ ນາຄສ຺ສ. ສຊາຕິຍາຕິ ສມານຊາຕິຍາ ນາຄິຍາ. ອຸທກສຎ຺ຈາຣິມຓ຺ຑູກຠກ຺ຂນ຺ຕິ ອຸທເກ ສຎ຺ຈຣຓສີລໍ ມຓ຺ຑູກສງ຺ຂາຕໍ ຠກ຺ຂໍ ປາຕຸຠວຕີຕິ ໂຍຊນາ. ໂສຕິ ນາໂຄ. ອຏ຺ຏີຍຕີຕິ ອຣມຓໍ ປີຬິຍຕິ. ຫຣາຍຕີຕິ ເອຕ຺ຖ ຫເຣຘາຕຸ ລຊ຺ຊນຕ຺ໂຖຕິ ອາຫ ‘‘ລຊ຺ຊຕີ’’ຕິ. ເອກາຣນ຺ໂຕ ຘາຕຸ ຠູວາທິຄຓິໂກ (ສທ຺ທນີຕິຘາຕຸມາລາຍໍ ໑໖ ຣກາຣນ຺ຕຘາຕຸ). ຊິຄຸຈ຺ຉຕີຕິ ເອຕ຺ຖ ຄຸປຘາຕຸຍາ ກມ຺ມໍ ທສ຺ເສນ຺ໂຕ ອາຫ ‘‘ອຕ຺ຕຠາວ’’ນ຺ຕິ. ‘‘ຕສ຺ສ ຠິກ຺ຂຸໂນ’’ຕິປທສ຺ສ ‘‘ນິກ຺ຂນ຺ເຕ’’ຕິປເທນ ໂຍຊິຕພ຺ພຕ຺ຕາ ຠຸມ຺ມຕ຺ເຖ ສາມິວຈນນ຺ຕິ ອາຫ ‘‘ຕສ຺ມິໍ ຠິກ຺ຂຸສ຺ມິ’’ນ຺ຕິ. ອຖ ວາ ຕສ຺ສ ຠິກ຺ຂຸໂນຕິ ສາມິໂຍຄຕ຺ຕາ ‘‘ນິກ຺ຂນ຺ເຕ’’ຕິ ເອຕ຺ຖ ຠາວຕ຺ເຖ ມານປຈ຺ຈໂຍຕິ ອາຫ ‘‘ນິກ຺ຂມເນ’’ຕິ. ອິມິນາ ນິກ຺ຂນ຺ເຕຕິ ເອຕ຺ຖ ນ ອນ຺ຕປຈ຺ຈໂຍ, ມານປຈ຺ຈຍສ຺ເສວ ອນ຺ຕຠາວໍ ກຕ຺ວາ ວຸຕ຺ໂຕຕິ ທສ຺ເສຕິ. ວິສ຺ສຏ຺ໂຐຕິ ສຕິວິສ຺ສຊ຺ຊິໂຕ. ຕສ຺ມິນ຺ຕິ ຠິກ຺ຂຸມ຺ຫິ. ກປິມິທ຺ຘວເສເນວາຕິ ກປິໂນ ມິທ຺ຘວເສນ ເອວ. ອຖ ວາ ກປິມິທ຺ຘວເສນ ນິທ຺ທາຍນ຺ໂຕ ອິວ ນິທ຺ທາຍນ຺ໂຕຕິ ໂຍຊນາ. ປຏິນິປຊ຺ຊີຕິ ປຸນ ນິປຊ຺ຊິ. ວິສ຺ສຣມກາສີຕິ ເອຕ຺ຖ ວິສທ຺ໂທ ວິຣູປຕ຺ຖໂຊຕໂກ, ສຣສທ຺ໂທ ສທ຺ທວາຈໂກຕິ ທສ຺ເສນ຺ໂຕ ອາຫ ‘‘ວິຣູປໍ ມຫາສທ຺ທມກາສີ’’ຕິ.

‘‘ອກາຣສ຺ສ ໂລປໍ ກຕ຺ວາ’’ຕິ ອິມິນາ ຕຸມ຺ເຫ ໂຂຕ຺ຖາຕິ ເອຕ຺ຖ ‘‘ຕຸມ຺ເຫ ໂຂ ອຕ຺ຖາ’’ຕິ ປທວິຠາຄໍ ກຕ຺ວາ ໂອກາຣໂຕ ປຣສ຺ສ ອກາຣສ຺ສ ໂລປໍ ທສ຺ເສຕິ. ‘‘ອກາຣສ຺ສາໂລປ’’ນ຺ຕິປິ ປາໂຐ. ເອວຎ຺ຫິ ສຕິ ອກາຣສ຺ສ ອໂລປໍ ກຕ຺ວາຕິ ອຕ຺ໂຖ ທຏ຺ຐພ຺ໂພ. ອິມິນາ ‘‘ຕຸມ຺ເຫ ໂຂ ອຕ຺ຖາ’’ຕິ ປທຈ຺ເຉທໍ ກຕ຺ວາ ອກາເຣ ປເຣ ໂອກາຣສ຺ສ ວກາຣໍ ກຕ຺ວາ ຕຸມ຺ເຫ ຂ຺ວຕ຺ຖາ’’ຕິ ປາໂຐ ທສ຺ສິໂຕ. ກສ຺ມາ ອິມສ຺ມິໍ ຘມ຺ມວິນເຍ ອວິຣູຬ຺ຫິຘມ຺ມາຕິ ອາຫ ‘‘ຌານ…ເປ… ອຠພ຺ພຕ຺ຕາ’’ຕິ. ‘‘ຠວຖາ’’ຕິ ອິມິນາ ອຕ຺ຖາຕິ ເອຕ຺ຖ ອສຘາຕຸ ສຕ຺ຕຕ຺ຖວາຈໂກ ຖວິຠຕ຺ຕີຕິ ທສ຺ເສຕິ. ສຊາຕິຍາຕິ ເອຕ຺ຖ ສມານາ ຊາຕິ ເອຕິສ຺ສາຕິ ສຊາຕີຕິ ວຸຕ຺ເຕ ນາຄີ ເອວາຕິ ອາຫ ‘‘ນາຄິຍາ ເອວາ’’ຕິ. ມນຸສ຺ສິຕ຺ຖິອາທີຕິ ເອຕ຺ຖ ອາທິສທ຺ເທນ ຕິຣຈ຺ຉານຄຕິຕ຺ຖີເປຕິຕ຺ຖີເທວິຕ຺ຖິໂຍ ສງ຺ຄຓ຺ຫາຕິ. ‘‘ທ຺ເວເມ ຠິກ຺ຂເວ ປຈ຺ຈຍາ’’ຕິ ເທສນາ ສາວເສສເທສນາຕິ ທສ຺ເສນ຺ໂຕ ອາຫ ‘‘ເອຕ຺ຖ ຈາ’’ຕິ. ເອຕ຺ຖາຕິ ຕິຣຈ຺ຉານຄຕວຕ຺ຖຸມ຺ຫິ. ອຠິຓ຺ຫນ຺ຕິ ອຠິກ຺ຂຓໍ ປຸນປ຺ປຸນນ຺ຕິ ອຕ຺ໂຖ.

ຕິຣຈ຺ຉານຄໂຕຕິ ເອຕ຺ຖ ກິໍ ອປາຍປຣິຍາປນ຺ໂນ ທຸຄ຺ຄຕິອເຫຕຸກປຏິສນ຺ຘິໂກວາຘິປ຺ເປໂຕຕິ ອາຫ ‘‘ນາໂຄ ວາ ໂຫຕູ’’ຕິອາທິ.