໔໘. ຕິຕ຺ຖິຍປກ຺ກນ຺ຕກກຖາ

໑໑໐. ປກ຺ກມຕີຕິ ປກ຺ກນ຺ໂຕ, ‘‘ປວິຏ຺ໂຐ’’ຕິ ອິມິນາ ກມຸຘາຕຸຍາ ປທວິກ຺ເຂປຕ຺ຖໍ ທສ຺ເສຕິ, ອິຈ຺ຉາກນ຺ຕິອຕ຺ເຖ ນິວຕ຺ເຕຕິ. ໂສຕິ ຕິຕ຺ຖິຍປກ຺ກນ຺ຕໂກ. ຕຕ຺ຣາຕິ ຕິຕ຺ຖິຍປກ຺ກນ຺ຕເກ. ອຸປສມ຺ປນ຺ໂນ ຠິກ຺ຂຸ ຄຈ຺ຉຕີຕິ ສມ຺ພນ຺ໂຘ. ເຕສນ຺ຕິ ຕິຕ຺ຖິຍານໍ. ‘‘ຕິຕ຺ຖິໂຍ ຠວິສ຺ສາມີ’’ຕິ ປຸພ຺ເພວ ລທ຺ຘິຄຫິຕຕ຺ຕາ ວຸຕ຺ຕໍ ‘‘ລິງ຺ເຄ ອາທິນ຺ນມຕ຺ເຕ’’ຕິ. ກຸສຈີຣາທີນີຕິ ເອຕ຺ຖ ກຸໂສ ວຸຈ຺ຈຕິ ສລາກາ. ຈີໂຣຕິ ປນ຺ຕິ, ອາວລີຕິ ອຕ຺ໂຖ. ກຸເສ ຣຊ຺ຊຸນາ ອາວຸນິຕ຺ວາ ກໂຕ ຈີໂຣ ກຸສຈີໂຣ, ໂສ ອາທິ ເຍສໍ ຕານີຕິ ກຸສຈີຣາທີນິ. ອາທິສທ຺ເທນ ຜລກຈີຣາທໂຍ ສງ຺ຄຓ຺ຫາຕິ. ກຸສຕິເຓຫິ ກໂຕ ຈີໂຣ ກຸສຈີໂຣຕິປິ ວທນ຺ຕິ. ນຄ຺ໂຄຕິ ອເຈລໂກ. ອາຊີວໂກຕິ ອເຈລກວຕມາທາຍ ຊີວຕີຕິ ອາຊີວໂກ. ເຕສນ຺ຕິ ອາຊີວການໍ. ໂອວທິໂຕ ຫຸຕ຺ວາຕິ ສມ຺ພນ຺ໂຘ.

ກິນ຺ຕິ ກິໍ ວຕໍ. ລຸຎ຺ຈາເປຕີຕິ ອປນຍາເປຕິ. ໂມຣປິຎ຺ຉາທີນີຕິ ເອຕ຺ຖ ປິຎ຺ຉໍ ວຸຈ຺ຈຕິ ປກ຺ໂຂ. ໂສ ຫິ ປິຎ຺ຉຕິ ອາກາເສ ຄຈ຺ຉຕິ ອເນນາຕິ ປິຎ຺ຉນ຺ຕິ ວຸຈ຺ຈຕິ. ປິຉິ ຄຕິຍນ຺ຕິ ຘາຕຸປາໂຐ. ໂມຣສ຺ສ ປິຎ຺ຉໍ ໂມຣປິຎ຺ຉໍ, ຕໍ ອາທິ ເຍສໍ ຕານີຕິ ໂມຣປິຎ຺ຉາທີນິ. ອາທິສທ຺ເທນ ອຸລູກປິຎ຺ຉາທໂຍ ສງ຺ຄຓ຺ຫາຕິ. ຍາວ ນ ສມ຺ປຏິຈ຺ຉຕີຕິ ຍາວ ລທ຺ຘິໍ ນ ສມ຺ປຏິຈ຺ຉຕິ. ນນ຺ຕິ ວີມໍສມານໍ ຠິກ຺ຂຸໍ. ລທ຺ຘີຕິ ຕິຕ຺ຖິຍລທ຺ຘິ. ຣກ຺ຂຕີຕິ ຕິຕ຺ຖິຍປກ຺ກນ຺ຕກໂຕ ຣກ຺ຂຕິ. ລທ຺ຘິຍາ ອຠາເວນ ຕິຕ຺ຖິຍປກ຺ກນ຺ຕໂກ ນ ໂຫຕີຕິ ອຘິປ຺ປາໂຍ. ອຈ຺ຉິທ຺ທຈີວໂຣຕິ ເອຕ຺ຖ ອາກາໂຣ ໂກຘຕ຺ໂຖ, ອຑ຺ຑຕ຺ໂຖ ວາ ໂຫຕິ, ຉິທ຺ທສທ຺ໂທ ທູສນຕ຺ໂຖ ໂຫຕິ. ຕສ຺ມາ ອາໂກເຘນ ອຑ຺ເຑນ ວາ ຉິທ຺ໂທ ທູສິໂຕຕິ ອຈ຺ຉິທ຺ໂທຕິ ອຕ຺ໂຖ ທຏ຺ຐພ຺ໂພ. ‘‘ອຈ຺ຉິນ຺ໂນ’’ຕິປິ ປາໂຐ. ອຈ຺ຉິທ຺ທໍ ຈີວຣເມຕສ຺ສາຕິ ອຈ຺ຉິທ຺ທຈີວໂຣ. ຕິຕ຺ຖາຍຕນນ຺ຕິ ຕິຕ຺ຖີນໍ ນິວາສຏ຺ຐານໍ, ຕິຕ຺ຖິຍານໍ ອຸປສ຺ສຍນ຺ຕິ ອຕ຺ໂຖ.