໔໘. ເຖຍ຺ຍສໍວາສກວຕ຺ຖຸກຖາ

໑໑໐. ປາຣິຊຎ຺ຎປຕ຺ຕສ຺ສາຕິ ປຣິຫາຍຕີຕິ ປຣິຊານິ, ອິສ຺ສຣິຍໂຠຄາທິ, ຕສ຺ສ ຠາໂວ ປາຣິຊຎ຺ຎໍ, ອິສ຺ສຣິຍໂຠຄາທິກ຺ຂໂຍ, ຕໍ ປຕ຺ໂຕຕິ ປາຣິຊຎ຺ຎປຕ຺ໂຕ, ຕສ຺ສ. ‘‘ປາຣິຊຸຎ຺ຎປຕ຺ຕສ຺ສາ’’ຕິປິ ອຸກາເຣນ ສຫ ປາໂຐ ອຕ຺ຖິ. ຂີຓໂກລຎ຺ໂຎຕິ ເອຕ຺ຖ ກຸເລ ຊາຕາ ໂກລຎ຺ຎາ, ຓ຺ຍປຈ຺ຈໂຍ, ນກາຣາຄໂມ. ຂີຓາ ໂກລຎ຺ຎາ ອສ຺ສາຕິ ຂີຓໂກລຎ຺ໂຎຕິ ວຈນຕ຺ຖໍ ທສ຺ເສນ຺ໂຕ ອາຫ ‘‘ມາຕິປກ຺ຂປິຕິປກ຺ຂໂຕ’’ຕິອາທິ. ຕຕ຺ຖ ມາຕິປກ຺ຂປິຕິປກ຺ຂໂຕຕິ ມາຕຸຍາ ປກ຺ໂຂ ມາຕິປກ຺ໂຂ, ປິຕຸໂນ ປກ຺ໂຂ ປິຕິປກ຺ໂຂ, ມາຕິປກ຺ໂຂ ຈ ປິຕິປກ຺ໂຂ ຈ ມາຕິປກ຺ຂປິຕິປກ຺ຂາ. ຜາຕິໍ ກາຕຸນ຺ຕິ ເອຕ຺ຖ ຜາ-ຘາຕຸ ວຑ຺ຒນຕ຺ໂຖຕິ ອາຫ ‘‘ວຑ຺ເຒຕຸ’’ນ຺ຕິ. ‘‘ປຸຈ຺ຉິຍມາໂນ’’ຕິ ອິມິນາ ອນຸຍຸຎ຺ຊິຍມາໂນຕິ ເອຕ຺ຖ ອນຸຕ຺ຍູປສຄ຺ຄວເສນ ຍຸຊສທ຺ໂທ ປຸຈ຺ຉນຕ຺ໂຖຕິ ທສ຺ເສຕິ.

ເຖຍ຺ຍສໍວາສໂກຕິ ເຖນນໍ ເຖຍ຺ຍໍ ນກາຣສ຺ສ ຍກາຣໍ ກຕ຺ວາ, ເຖຍ຺ຍາຍ ສໍວາສໂກ ອິມສ຺ສາຕິ ເຖຍ຺ຍສໍວາສໂກ. ເອຕ຺ຖ ຈ ນ ເກວລໍ ວສ຺ສຄຓນາທິໂກເຍວ ສໍວາໂສ ນາມ ໂຫຕິ, ອຖ ໂຂ ເຖຍ຺ຍາຍ ລິງ຺ຄຄຫຓມ຺ປິ ສໍວາໂສເຍວ ນາມ. ຕສ຺ມາ ຕສ຺ສ ຕິວິຘຠາວໍ ທສ຺ເສນ຺ໂຕ ອາຫ ‘‘ຕໂຍ’’ຕິອາທິ. ຕຕ຺ຖ ລິງ຺ຄໍ ເຖເນຕີຕິ ລິງ຺ຄເຖນໂກ, ເອເສວ ນໂຍ ອິຕເຣສຸປິ. ຕມຕ຺ຖໍ ວິຕ຺ຖາເຣນ຺ໂຕ ອາຫ ‘‘ຕຕ຺ຖາ’’ຕິອາທິ. ຕຕ຺ຖ ໂຍຕິ ເຖຍ຺ຍສໍວາສໂກ. ລິງ຺ຄມຕ຺ຕສ຺ເສວາຕິ ເອຕ຺ຖ ມຕ຺ຕສທ຺ເທນ ສໍວາສາທໂຍ ນິວຕ຺ເຕຕິ.

ວິເທສນ຺ຕິ ອຕ຺ຕໂນ ເທສໂຕ ວິໂຍຄໍ ເທສໍ. ວິສທ຺ໂທ ເຫຕ຺ຖ ວິໂຍຄຕ຺ຖວາຈໂກ. ອຖ ວາ ວິ ທູຣໍ ເທສໍ. ວິສທ຺ໂທ ເຫຕ຺ຖ ທູຣຕ຺ຖວາຈໂກ. ມຸສາຕິ ອຠູຕຕ຺ເຖ ທຸຕິຍນ຺ຕນິປາໂຕ, ອຠູຕໍ ວຈນນ຺ຕິ ອຕ຺ໂຖ. ປຏິພາຫຕີຕິ ອຎ຺ເຎ ນິວາເຣຕິ. ສໍວາສເຖນໂກ ນາມາຕິ ເອຕ຺ຖ ໂກ ສໍວາໂສ ນາມ, ນນຸ ເອກກມ຺ມາທິໂກຕິ ອາຫ ‘‘ຠິກ຺ຂຸວສ຺ສຄຓນາທິໂກ’’ຕິອາທິ. ຠິກ຺ຂຸວສ຺ສຄຓນາທິໂກຕິ ອາທິສທ຺ເທນ ຍຖາວຸຑ຺ຒໍ ວນ຺ທນສາທິຍນໍ ອາສນປຏິພາຫນໍ ອຸໂປສຖປວາຣຓາທີສຸ ສນ຺ທິສ຺ສນນ຺ຕິ ອິມານິ ສງ຺ຄຓ຺ຫາຕິ. ‘‘ກິຣິຍເຠໂທ’’ຕິ ອິມິນາ ສໍ ເອກໂຕ ວສິຍຕິ ອເນນາຕິ ສໍວາໂສຕິ ວຈນຕ຺ເຖນ ກິຣິຍເຠໂທ ສໍວາໂສ ນາມາຕິ ທສ຺ເສຕິ. ອິມສ຺ມິໍ ອຕ຺ເຖຕິ ອິມສ຺ມິໍ ວຕ຺ຖຸມ຺ຫິ, ອິມສ຺ມິໍ ຐາເນຕິ ອຕ຺ໂຖ. ອິມິນາ ປາຣາຊິກາທິຏ຺ຐາເນ ປນ ເອກກມ຺ມາທິໂກ ສໍວາໂສ ນາມາຕິ ທສ຺ເສຕິ.

‘‘ລິງ຺ຄສ຺ສ ເຈວ ສໍວາສສ຺ສ ຈາ’’ຕິ ອິມິນາ ອຸຠຍເຖນໂກຕິ ເອຕ຺ຖ ອຸຠຍສຣູປໍ ທສ຺ເສຕິ.

ເອຕ຺ຖາຕິ ເຖຍ຺ຍສໍວາສກຏ຺ຐາເນ. ຣາຊ…ເປ… ຠເຍຫິ ວາຕິ ເອຕ຺ຖ ຠຍສທ຺ໂທ ປຈ຺ເຈກໍ ໂຍເຊຕພ຺ໂພ. ຣາຊຠເຍນ ຈ ທຸພ຺ຠິກ຺ຂຠເຍນ ຈ ກນ຺ຕາຣຠເຍນ ຈ ໂຣຄຠເຍນ ຈ ເວຣິຠເຍນ ຈາຕິ ຫິ ອຕ຺ໂຖ. ຈີວຣຄຫຓຕ຺ຖນ຺ຕິ ຈີວຣາຫຣຓຕ຺ຖໍ, ອຍເມວ ວາ ປາໂຐ. ວາສທ຺ໂທ ເຫຕ຺ວຕ຺ຖໍ ວາ ສມ຺ປທານຕ຺ຖໍ ວາ ສມ຺ປິຓ຺ເຑຕິ. ອຍໍ ຄາຖາ ວິຠຕ຺ຕິຍາ ອຸປ຺ປຏິປາຏິຕ຺ຕາ ຠຄ຺ຄຣີຕິສງ຺ຂາຕາ ອລງ຺ກາຣໂທສາ ນ ມຸຕ຺ຕາ. ລິງ຺ຄນ຺ຕິ ສມຓລິງ຺ຄໍ. ອິຘາຕິ ອິມສ຺ມິໍ ສາສເນ.

ນາຘິວາເສຕີຕິ ນ ສມ຺ປຏິຈ຺ຉຕິ. ຍາວາຕິ ຍຕ຺ຕກໍ ກາລໍ, ອຍໍ ປເນຕ຺ຖ ໂຍຊນາ – ອິຘ ໂຍ ຣາຊ…ເປ… ຠເຍນ ວາ ຈີວຣຄຫຓຕ຺ຖໍ ວາ ລິງ຺ຄໍ ອາທິຍຕິ, ໂສ ສຸທ຺ຘມານໂສ ຫຸຕ຺ວາ ຍາວ ສໍວາສໍ ນາຘິວາເສຕິ, ຕາວ ເອໂສ ‘‘ເຖຍ຺ຍສໍວາສໂກ ນາມາ’’ຕິ ນ ວຸຈ຺ຈຕີຕິ.

ຕຕ຺ຣາຕິ ຕາສຸ ຄາຖາສຸ. ອິຘາຕິ ອິມສ຺ມິໍ ສາສເນ. ເອວນ຺ຕິ ລິງ຺ເຄ ຄຫິຍມາເນ. ຕສ຺ມິນ຺ຕິ ຊເນ. ອໂນສຣິຕ຺ວາວາຕິ ອໂນກ຺ກມິຕ຺ວາວ. ລິງ຺ຄໍ ອປເນຕ຺ວາຕິ ສຍໍ ຄຫິຕໍ ສມຓລິງ຺ຄໍ ວິນາເສຕ຺ວາ. ປພ຺ພຊິຕາລຍນ຺ຕິ ປພ຺ພຊິຕຉາຍໍ. ປຸພ຺ເພຕິ ສໍວາສເຖນເກ.

ສພ຺ພປາສຓ຺ຑິຍຠຕ຺ຕານີຕິ ສພ຺ພານິ ປາສຓ຺ຑໍ ອຸທ຺ທິສ຺ສ ທິນ຺ນານິ ຠຕ຺ຕານິ.

ສຕ຺ເຕ ວຫຕີຕິ ສຕ຺ຕວາໂຫ. ວິຣມິຕພ຺ພນ຺ຕິ ເວຣໍ, ຕໍ ປວຕ຺ເຕຕີຕິ ເວຣິໂກ. ກາເຍນ ປຣິຫຣິຕພ຺ພານີຕິ ກາຍປຣິຫາຣິຍານິ. ຕນ຺ຕິ ຕຸວໍ. ຫີນາຍາວຕ຺ຕຠາວນ຺ຕິ ຫີນາຍ ຄິຫິຠາວາຍ ອາວຕ຺ຕຠາວໍ.

ອຸປ຺ປພ຺ພຊິຕ຺ວາຕິ ປພ຺ພຊວິໂຍຄໍ ກຕ຺ວາ. ຕມຕ຺ຖນ຺ຕິ ອຸປ຺ປພ຺ພຊິຕສງ຺ຂາຕມຕ຺ຖໍ. ອສ຺ສາຕິ ມຫາສາມເຓຣສ຺ສ.

ມຫນ຺ໂຕ ວາຕິ ເອຕ຺ຖ ວາສທ຺ໂທ ຄຣຫຕ຺ໂຖ. ປເຄວ ທຫໂຣຕິ ທສ຺ເສຕິ. ອພ຺ຍຕ຺ໂຕ ໂຫຕີຕິ ໂຍຊນາ. ໂສຕິ ສາມເຓໂຣ.

ວຈ຺ຉໂຄຣກ຺ຂາທີນີຕິ ເອຕ຺ຖ ວຈ຺ໂຉຕິ ຕຣຸຓໂຄໂຓ. ໂສ ຫິ ມາຕຸສນ຺ຕິເກ ວສຕີຕິ ວຈ຺ໂຉ. ມາຕຸຍາ ວິໂຍຄກາເລ ວາ ວສ຺ສຕີຕິ ວຈ຺ໂຉຕິ ວຸຈ຺ຈຕິ. ອິມິນາ ທມ຺ມຄວຊຣຄ຺ຄວາປິ ສາມຎ຺ຎໂຕ ຄຫິຕາ. ໂຄ ວຸຈ຺ຈຕິ ເຂຕ຺ຕຠູມິ. ວຈ຺ໂຉ ຈ ໂຄ ຈ ວຈ຺ຉຄວາ, ເຕສໍ ຣກ຺ຂນໍ ວຈ຺ຉໂຄຣກ຺ໂຂ, ໂສ ອາທິ ເຍສໍ ກສິກມ຺ມາທີນນ຺ຕິ ວຈ຺ຉໂຄຣກ຺ຂາທີນິ. ‘‘ສູປສມ຺ປນ຺ໂນ’’ຕິ ອິມິນາ ຄຫຏ຺ຐມ຺ປິ ສເຈ ອຸປສມ຺ປາເທຕິ, ສູປສມ຺ປນ຺ໂນຕິ ທສ຺ເສຕິ. ອນຸປສມ຺ປນ຺ນກາເລເຍວາຕິ ສາມເຓຣກາເລເຍວ. ວິນຍວິນິຈ຺ຉເຍຕິ ວິນເຍ ວຸຕ຺ຕສ຺ສ ເຖຍ຺ຍສໍວາສກສ຺ສ ວິນິຈ຺ຉເຍ. ເຖຍ຺ຍສໍວາສໂກ ໂຫຕິ ລິງ຺ຄສ຺ສ ອປນີຕຕ຺ຕາ.

ເຖຍ຺ຍສໍວາສໂກ ນ ໂຫຕິ ສລິງ຺ເຄ ຐິຕຕ຺ຕາ. ອຍມ຺ປິ ເຖຍ຺ຍສໍວາສໂກ ນ ໂຫຕິ ກາສາເຍ ສອຸສ຺ສາຫຕ຺ຕາ. ເຖຍ຺ຍສໍວາສໂກ ໂຫຕິ ກາສາເຍ ຘຸຣສ຺ສ ນິກ຺ຂິຕ຺ຕຕ຺ຕາ.

ເຖຍ຺ຍສໍວາສໂກ ນ ໂຫຕິ ສລິງ຺ເຄ ຐິຕຕ຺ຕາ. ເນວ ເຖຍ຺ຍສໍວາສໂກ ໂຫຕິ ກາສາເຍ ສອຸສ຺ສາຫຕ຺ຕາ. ເມຖຸນເສວນາທີຫີຕິອາທິສທ຺ເທນ ປາຓາຕິປາຕາທໂຍ ສງ຺ຄຓ຺ຫາຕິ. ເຖຍ຺ຍສໍວາສໂກ ໂຫຕິ ກາສາເຍ ຘຸຣສ຺ສ ນິກ຺ຂິຕ຺ຕຕ຺ຕາ. ໂອວຏ຺ຏິກນ຺ຕິ ອໂຘວຏ຺ເຏນ ກຣຓໍ. ຣກ຺ຂຕິ ຕາວາຕິ ຕາວ ຣກ຺ຂຕິ ວີມໍສເນນ ນິວາສິຕຕ຺ຕາ. ລິງ຺ຄນ຺ຕິ ສມຓລິງ຺ຄໍ. ເຖຍ຺ຍສໍວາສໂກ ໂຫຕິ ຄິຫິລິງ຺ຄສ຺ສ ສມ຺ປຏິຈ຺ຉິຕຕ຺ຕາ.

ວີມໍສຕິ ວາ ສມ຺ປຏິຈ຺ຉຕິ ວາ ຣກ຺ຂຕິເຍວ ໂອທາຕວຕ຺ຖສ຺ສ ອນ຺ໂຕກາສາຍຠາວໂຕ. ‘‘ຠິກ຺ຂຸນິຍາປິ ເອເສວ ນໂຍ’’ຕິ ວຸຕ຺ຕເມວຕ຺ຖໍ ວິຠາເວນ຺ໂຕ ອາຫ ‘‘ສາປີ’’ຕິອາທິ.

ວຸຑ຺ຒປພ຺ພຊິໂຕ ສາມເຓໂຣຕິ ສມ຺ພນ຺ໂຘ. ປາຬິຍມ຺ປີຕິ ປນ຺ຕິຍມ຺ປິ. ເສໂນ ມໍສເປສິໍ ຄເຫຕ຺ວາ ຄຈ຺ຉຕິ ວິຍ ຠຕ຺ຕປິຓ຺ເຑ ປຕ຺ຕໍ ອຸປນາເມຕ຺ວາ ຄເຫຕ຺ວາ ຄຈ຺ຉຕິ. ເຖຍ຺ຍສໍວາສໂກ ນ ໂຫຕິ ວສ຺ສານໍ ອຄຓນຕ຺ຕາ.