໓໔. ທາສວຕ຺ຖຸກຖາ

໙໗. ທາສາຕິ ເຈຏກາ. ເຕ ຫິ ສາມິເກຫິ ທຸກ຺ເຂ ວາ ທຸຏ຺ຐກມ຺ເມ ວາ ອສີຍນ຺ຕິ ຂິປີຍນ຺ຕີຕິ ທາສາຕິ ວຸຈ຺ຈນ຺ຕິ. ຕຕ຺ຖາຕິ ຈຕູສຸ ທາເສສຸ. ‘‘ຆຣທາສິຍາ ປຸຕ຺ໂຕ’’ຕິ ອິມິນາ ອນ຺ໂຕເຄເຫ ຆຣທາສິຍາ ກຸຈ຺ຉິມ຺ຫິ ຊາໂຕ ອນ຺ໂຕຊາໂຕຕິ ວຈນຕ຺ຖໍ ທສ຺ເສຕິ. ຘນໍ ທຕ຺ວາ ກີໂຕ ຘນກ຺ກີໂຕຕິ ວຈນຕ຺ຖໍ ທສ຺ເສນ຺ໂຕ ອາຫ ‘‘ຘນກ຺ກີໂຕ ນາມາ’’ຕິອາທິ. ຘເນນ ກີໂຕ ຘນກ຺ກີໂຕຕິ ວຈນຕ຺ໂຖປິ ຍຸຕ຺ໂຕເຍວ. ທາສຈາຣິຕ຺ຕນ຺ຕິ ເທສກາລວເສນ ທາສານໍ ຈາຣິຕ຺ຕໍ. ຕຕ຺ຖ ຕຕ຺ຖາຕິ ຕສ຺ມິໍ ຕສ຺ມິໍ ເທເສ, ກາເລ ວາ.

ກຣມຣານີໂຕ ນາມາຕິ ເອຕ຺ຖ ກຣມໂຣຕິ ວນ຺ທິ. ໂສ ຫິ ສຕ຺ຕູນໍ ກເຣນ ຫຕ຺ເຖນ ມຣິຕພ຺ພຕ຺ຕາ ກຣມໂຣຕິ ວຸຈ຺ຈຕິ. ກຣມຣຠາເວນ ອານີໂຕ ກຣມຣານີໂຕ. ຕິໂຣຣຏ຺ຐາ ອາຫຣນ຺ຕີຕິ ສມ຺ພນ຺ໂຘ. ອຸປລາເປຕ຺ວາ ວາຕິ ປໂລເຠຕ຺ວາ ວາ. ຕໂຕຕິ ກສ຺ມາຈິ ຄາມໂຕ. ມນຸສ຺ສາ ເອວ ມານຸສ຺ສການິ. ອິຕ຺ຖິປຸຣິສານໍ ສາຘາຣຓຠາເວນ ສາມຎ຺ຎຠາວໂຕ ນປຸໍສກລິງ຺ຄວເສນ ວຸຕ຺ຕໍ. ປິສທ຺ເທນ ນ ເກວລໍ ຘນານິເຍວ ອາຫຣນ຺ຕິ, ອຖ ໂຂ ມານຸສ຺ສການິປີຕິ ສມ຺ປິຓ຺ເຑຕິ. ຕຕ຺ຖາຕິ ມານຸສ຺ສເກສຸ. ເອວຣູໂປ ກຣມຣານີໂຕ ທາໂສ ນ ປພ຺ພາເຊຕພ຺ໂພຕິ ໂຍຊນາ. ສພ຺ພສາຘາຣເຓນາຕິ ພນ຺ຘນາຄາຣໂສຘນກາເລ ສພ຺ເພສໍ ສາຘາຣເຓນ.

ທາສພ຺ຍນ຺ຕິ ທາສສ຺ສ ຠາໂວ ທາສພ຺ຍໍ, ຕໍ. ເຕນ ວຸຕ຺ຕໍ ‘‘ທາສຠາວ’’ນ຺ຕິ. ‘‘ສຍເມວາ’’ຕິ ອິມິນາ ສາມໍສທ຺ໂທ ສຍມຕ຺ເຖ ນິປາໂຕຕິ ທສ຺ເສຕິ. ຠຸຊິສ຺ສິຕ຺ຖິໂຍຕິ ຣຎ຺ໂຎ ຠຸຊິສ຺ສິຕ຺ຖິໂຍ. ວຓ຺ຓທາສີຫີຕິ ນຄຣໂສຠິນີຫິ. ຕາ ຫິ ວຓ຺ຓສມ຺ປນ຺ນທາສິຠາວໂຕ ວຓ຺ຓທາສີຕິ ວຸຈ຺ຈນ຺ຕິ. ຕາສນ຺ຕິ ຠຸຊິສ຺ສິຕ຺ຖີນໍ. ປຓ຺ຓນ຺ຕິ ທາສິປຓ຺ຓໍ. ຠຏິປຸຕ຺ຕກຄຓາທີນນ຺ຕິ ອາທິສທ຺ເທນ ມລ຺ລປຸຕ຺ຕຄຓາທໂຍ ສງ຺ຄຓ຺ຫາຕິ. ອິມິນາ ພຫຸສາມິກທາສໍ ທສ຺ເສຕິ. ເຕຫີຕິ ຠຏິປຸຕ຺ຕກຄຓາທີຫິ. ອທິນ຺ນາ ນ ປພ຺ພາເຊຕພ຺ພາຕິ ພຫູສຸ ສາມິເກສຸ ເອເກນປິ ອທິນ຺ນາ ນ ປພ຺ພາເຊຕພ຺ພາ. ເຕປີຕິ ອາຣາມິກທາເສປິ. ອິມສ຺ມິໍ ອາຣາມິກທາສປພ຺ພາຊເນ ອຏ຺ຐກຖາວາທໍ ທສ຺ເສນ຺ໂຕ ອາຫ ‘‘ມຫາປຈ຺ຈຣິຍ’’ນ຺ຕິອາທິ. ‘‘ຕກ຺ກ’’ນ຺ຕິ ປທໍ ‘‘ອາສິຕ຺ຕກ’’ອິຕິ ປເທ ກມ຺ມໍ. ‘‘ສີເສ’’ຕິ ປທໍ ‘‘ອາສິຕ຺ຕກ’’ອິຕິ ປເທ ອາຘາໂຣ. ເກສຸຈິ ຊນປເທສຸ ເທສຈາຣິຕ຺ຕວເສນ ສີເສ ຕກ຺ກສ຺ສ ອາສິຎ຺ຈນໍ ທາສານໍ ຠຸຊິສ຺ສກຣຓນ຺ຕິ ອຘິປ຺ປາໂຍ. ‘‘ອາຣາມິກໍ ເທມາ’’ຕິ ວຈນໍ ທາສານໍ ຠຸຊິສ຺ສວຈນນ຺ຕິ ວຸຕ຺ຕໍ ໂຫຕິ. ເຍນ ເກນຈິ ໂວຫາເຣນາຕິ ‘‘ອາຣາມິກໍ ເທມາ’’ຕິ ວາ ‘‘ອາຣາມິກທາສໍ ເທມາ’’ຕິ ວາ ‘‘ກປ຺ປິຍກາຣກໍ ເທມາ’’ຕິ ວາ ເຍນ ເກນຈິ ໂວຫາເຣນ. ທ຺ວີສຸ ອຏ຺ຐກຖາວາເທສຸ ກຸຣຸນ຺ທິວາທສ຺ສ ປຈ຺ຉາ ວຸຕ຺ຕຕ຺ຕາ ໂສເຍວ ປມາຓນ຺ຕິ ທຏ຺ຐພ຺ພໍ. ທຸຄ຺ຄຕມນຸສ຺ສາຕິ ທຸກ຺ຂໍ ຄຕມນຸສ຺ສາ. ເອເຕຕິ ທຸຄ຺ຄຕມນຸສ຺ເສ. ຕໍ ປພ຺ພາເຊຕຸໍ ນ ວຏ຺ຏຕີຕິ ມາຕາປິຕູນໍ ທາສຠາວໍ ອຸປຄຕກາເລ ຊາຕໍ ປຸຕ຺ຕໍ ສນ຺ຘາຍ ວຸຕ຺ຕໍ. ອຖ ປນ ມາຕາປິຕໂຣ ທາສຠາວໍ ອຸປຄຕາ, ນ ປຸຕ຺ໂຕ, ຕໍ ປພ຺ພາເຊຕຸໍ ວຏ຺ຏຕິ. ‘‘ຠິກ຺ຂຸສ຺ສາ’’ຕິປທໍ ‘‘ຎາຕກາ ວາ ອຸປຏ຺ຐາກາ ວາ’’ຕິປເທສຸ ສາມິສມ຺ພນ຺ໂຘ, ‘‘ເທນ຺ຕີ’’ຕິ ປເທ ສມ຺ປທານໍ. ອສ຺ສາຕິ ຠິກ຺ຂຸສ຺ສ. ອິມນ຺ຕິ ທາສໍ. ອຠິຣມິສ຺ສຕີຕິ ຠິກ຺ຂຸຠາເວ ອຠິຣມິສ຺ສຕິ. ວິພ຺ຠມິສ຺ສຕີຕິ ວິນິວຕ຺ເຕຕ຺ວາ ຄິຫິຠາວໍ ຠມິສ຺ສຕິ. ອິຕິ ວຕ຺ວາ ເທນ຺ຕີຕິ ສມ຺ພນ຺ໂຘ. ນິສ຺ສາມິກທາໂສຕິ ປຣິຄ຺ຄາຫກສາມິກວິຣຫິໂຕ ທາໂສ. ນິສ຺ສາມິກສ຺ສ ທາສສ຺ສ ຣາຊາ ສາມີ, ຕສ຺ມາ ຣຎ຺ຎາ ອປຣິຄ຺ຄຫິເຕ ອຕ຺ຕນາວ ອຕ຺ຕານໍ ຠຸຊິສ຺ສໍ ກາຕຸໍ ວຏ຺ຏຕິ. ປຣິຄ຺ຄຫິເຕ ຣາຊານໍ ກາຣາເປຕຸໍ ວຏ຺ຏຕິ. ອຊານນ຺ໂຕຕິ ອຕ຺ຕໂນ ທາສຠາວມຊານນ຺ໂຕ.

ອນຸຣາຘປຸຣາຕິ ອນຸຣາຘນຄຣໂຕ ນິກ຺ຂມິຕ຺ວາຕິ ສມ຺ພນ຺ໂຘ. ໂສຕິ ປຸຕ຺ໂຕ. ອິຘາຕິ ໂຣຫເຓ. ມາຕຣໍ ປຸຈ຺ຉິຕ຺ວາຕິ ສມ຺ພນ຺ໂຘ. ອາຄມ຺ມາຕິ ອາຄນ຺ຕ຺ວາ. ອຕິຈ຺ຉຖາຕິ ອຕິກ຺ກມິຕ຺ວາ ອິຈ຺ຉຖ, ອິຘ ກິຎ຺ຈິ ເທຍ຺ຍຘມ຺ມໍ ນຕ຺ຖິ, ອິທໍ ອຕິກ຺ກມິຕ຺ວາ ອຎ຺ຎຕ຺ຖ ຐາຕຸມິຈ຺ຉຖາຕິ ວຸຕ຺ຕໍ ໂຫຕິ. ເຕຕິ ຆຣສາມິກາ. ຈຕູຫິ ປຈ຺ຈເຍຫິ ປຏິຊຄ຺ຄນ຺ຕາ ວສາເປສຸນ຺ຕິ ໂຍຊນາ.