໓໕. ກມ຺ມາຣຠຓ຺ຑຸວຕ຺ຖຸອາທິກຖາ

໙໘. ຕຸລາຘາຣມຸຓ຺ຑໂກຕິ ມານຠຓ຺ຑຘາໂຣ ມຸຓ຺ຑໂກ. ອິມິນາ ກມ຺ມາຣຠຓ຺ຑູຕິ ເອຕ຺ຖ ກມ຺ມາຣສທ຺ໂທ ຕຸລາຘາຣປຣິຍາໂຍ, ຠຓ຺ຑຸສທ຺ໂທ ມຸຓ຺ຑກປຣິຍາໂຍຕິ ທສ຺ເສຕິ. ຕຸລາຘາໂຣ ຫິ ອລງ຺ກາຣວິກຕິກຣຓຕ຺ຖາຍ ກມ຺ມໍ ອຣຕິ ຊານາຕີຕິ ກມ຺ມາໂຣຕິ ວຸຈ຺ຈຕິ. ມຸຓ຺ຑໂກ ຠຓ຺ຑີຍຕິ ‘‘ມຸຓ຺ໂຑ’’ຕິ ປຣິຠາສີຍຕີຕິ ຠຓ຺ຑູຕິ ວຸຈ຺ຈຕິ. ‘‘ສຸວຓ຺ຓກາຣປຸຕ຺ໂຕ’’ຕິ ອິມິນາ ຕສ຺ສ ສຣູປໍ ທສ຺ເສຕິ. ອປໂລເກຕຸນ຺ຕິ ເອຕ຺ຖ ອປປຸພ຺ໂພ ໂລກສທ຺ໂທ ອາປຸຈ຺ຉນຕ຺ໂຖຕິ ອາຫ ‘‘ອາປຸຈ຺ຉິຕຸ’’ນ຺ຕິ. ‘‘ຠຓ຺ຑຸກມ຺ມຕ຺ຖາຍາ’’ຕິ ອິມິນາ ຠຓ຺ຑຸກມ຺ມາຍາຕິ ເອຕ຺ຖ ຕທຕ຺ເຖ ຈຕຸຕ຺ຖີຕິ ທສ຺ເສຕິ. ຕຕ຺ຣາຕິ ‘‘ສງ຺ຆໍ ອປໂລເກຕຸ’’ນ຺ຕິອາທິວຈເນ. ສີມາປຣິຍາປນ຺ເນຕິ ວິຫາຣສີມາຍ ວາ ອຸປຈາຣສີມາຍ ວາ ປຣິຍາປນ຺ເນ. ຕຕ຺ຖາຕິ ຠິກ຺ຂູນໍ ສນ຺ນິປາຕຏ຺ຐານໍ. ເອຕ຺ຖ ຈາຕິ ອາປຸຈ຺ຉເນ ຈ. ວຕ຺ຕຸໍ ວຏ຺ຏຕິເຍວາຕິ ປຎ຺ຈສຸ ວາກ຺ເຍສຸ ຍໍກິຎ຺ຈິ ວາກ຺ຍໍ ກເຖຕຸໍ ວຏ຺ຏຕິເຍວ. ປິສທ຺ເທນ ‘‘ອິມສ຺ສ ມຸຓ຺ຑກມ຺ມໍ ອາປຸຈ຺ຉາມີ’’ຕິ ວາກ຺ຍມ຺ປິ ສງ຺ຄຓ຺ຫາຕິ.

ເຕສນ຺ຕິ ວີສຕິອາທີນໍ ຠິກ຺ຂູນໍ. ‘‘ທຫຣຠິກ຺ຂູ ວາ ສາມເຓເຣ ວາ’’ຕິ ອິທໍ ອາສນ຺ນວເສນ ວຸຕ຺ຕໍ. ຄິຫິມ຺ປິ ເປເສຕ຺ວາ ອາປຸຈ຺ຉາເປຕຸໍ ວຏ຺ຏຕິ. ກສ຺ມາ? ‘‘ປພ຺ພຊ຺ຊາເປກ຺ຂໍ ວິນາ ວາ’’ຕິ ວຸຕ຺ຕຕ຺ຕາ.

ປພ຺ພາເຊນ຺ຕສ຺ສ ອນາປຕ຺ຕິເຍວ, ສຸປພ຺ພຊິໂຕຕິ ອາຫ ‘‘ປພ຺ພາເຊນ຺ຕສ຺ສາປິ ອນາປຕ຺ຕີ’’ຕິ.

ອາປຸຈ຺ຉິຕໍ ປເຄວາຕິ ໂຍຊນາ. ຂຓ຺ຑສີມາຍນ຺ຕິ ວິຫາຣສີມາຍ ວາ ອຸປຈາຣສີມາຍ ວາ ອພ຺ຠນ຺ຕເຣ ຐິຕາຍໍ ຂຓ຺ຑສີມາຍໍ. ໂຍ ປນາຕິ ປພ຺ພຊ຺ຊາເປກ຺ໂຂ ປນ. ວິພ຺ຠນ຺ຕໂກ ວາຕິ ນວວິພ຺ຠນ຺ຕໂກ ວາ. ປພ຺ພຊິຕານໍ ທ຺ວງ຺ຄຸລເກໂສ ວຏ຺ຏຕີຕິ ອາຫ ‘‘ທ຺ວງ຺ຄຸລເກໂສ ວາ’’ຕິ. ທ຺ວີຫິ ອງ຺ຄຸລີຫິ ອຕິຣິຕ຺ໂຕ ເກໂສ ອິມສ຺ສາຕິ ທ຺ວງ຺ຄຸລາຕິຣິຕ຺ຕເກໂສ. ເອກສິຂາມຕ຺ຕຘໂຣປິ ໂຫຕີຕິ ໂຍຊນາ.

໑໐໐. ມາຣພ຺ຍາຘິນາຕິ ມາຣຓາພາໂຘ. ໂສ ຫິ ສຕ຺ຕານໍ ມາຣຓຏ຺ເຐນ, ວິວິຘສ຺ສ ຈ ທຸກ຺ຂສ຺ສ ອາທຫຏ຺ເຐນ ມາຣພ຺ຍາຘີຕິ ວຸຈ຺ຈຕິ. ອິມິນາ ອຫິວາຕກໂຣເຄນາຕິ ເອຕ຺ຖ ອຫິວິສສທິເສນ ວາເຕນ ປວຕ຺ໂຕ ໂຣໂຄ ອຫິວາຕກໂຣໂຄຕິ ວຸຈ຺ຈຕີຕິ ທສ຺ເສຕິ. ຕມຕ຺ຖໍ ວິຕ຺ຖາເຣນ຺ໂຕ ອາຫ ‘‘ຍຕ຺ຣ ຫີ’’ຕິອາທິ. ຕຕ຺ຖ ຍຕ຺ຣາຕິ ຍສ຺ມິໍ ກຸເລ. ໂສ ໂຣໂຄ ຕສ຺ມິໍ ກຸເລ ທ຺ວິປເທ ຈຕຸປ຺ປເທ ປຐມໍ ຄຓ຺ຫາຕິ, ປຈ຺ຉາ ເຄຫສາມິເກ ຄຓ຺ຫາຕີຕິ ຘມ຺ມປທອຏ຺ຐກຖາຍໍ (ຘ. ປ. ອຏ຺ຐ. ໑.ສາມາວຕີວຕ຺ຖຸ) ວຸຕ຺ຕໍ. ຕຖາຕິ ຍຖາ ອຎ຺ໂຎ ຠິຕ຺ຕິໍ ວາ ຉທນໍ ວາ ຠິນ຺ທິຕ຺ວາ ປລາຍິຕ຺ວາ ຕິໂຣຄາມາທິຄໂຕ ວາ ຫຸຕ຺ວາ ມຸຈ຺ຈຕິ, ຕຖາ. ເອຕ຺ຖ ຈ ກຸເລ ປິຕາປຸຕ຺ຕາ ມຸຈ຺ຈິໍສູຕິ ອຕ຺ໂຖ.

ກາກຸຑ຺ເຑປກນ຺ຕິ ເອຕ຺ຖ ກາເກ ອຸຑ຺ຑາເປຕີຕິ ກາກຸຑ຺ເຑປໂກ, ກາເກ ວາ ອຸຑ຺ຑາເປຕ຺ວາ ຠຕ຺ຕໍ ຠຸຎ຺ຊິຕຸໍ ສກ຺ໂກຕີຕິ ກາກຸຑ຺ເຑປໂກຕິ ວຈນຕ຺ຖໍ ທສ຺ເສນ຺ໂຕ ອາຫ ‘‘ໂຍ ວາມຫຕ຺ເຖນາ’’ຕິອາທິ. ຕຕ຺ຖ ອຸຑ຺ຑາເປຕ຺ວາຕິ ອຸທ຺ຘໍ ອາກາສໍ ຄມນາເປຕ຺ວາ. ຕນ຺ຕິ ກາກຸຑ຺ເຑປກໍ.

໑໐໒. ອິຕ຺ຕຣສທ຺ໂທ ອປ຺ປມຕ຺ຕກວາຈໂກ ອນິປ຺ຜນ຺ນປາຏິປທິໂກຕິ ອາຫ ‘‘ອປ຺ປມຕ຺ຕໂກ’’ຕິ. ‘‘ກຕິປາຫເມວາ’’ຕິ ອິມິນາ ຕສ຺ສ ອຕ຺ຖໍ ທສ຺ເສຕິ.