໓໓. ອິຓາຍິກວຕ຺ຖຸກຖາ

໙໖. ອິຓາຍິໂກ ນາມາຕິ ເອຕ຺ຖ ອິຓນ຺ຕິ ອຸທ຺ຘາໂຣ. ໂສ ຫິ ຍສ຺ມາ ເອຕິ ວຸທ຺ຘິໍ ຄຈ຺ຉຕິ, ຕສ຺ມາ ອິຓນ຺ຕິ ວຸຈ຺ຈຕິ. ຕໍ ຄຓ຺ຫາຕິ, ຘາເຣຕີຕິ ວາ ອິຓາຍິໂກ. ຍໍ ວາຕິ ຊນໍ ວາ ອາຐເປຕ຺ວາຕິ ສມ຺ພນ຺ໂຘ. ອາຐເປຕ຺ວາຕິ ຈ ເປສນຕ຺ຖາຍ ຘນສາມິກສ຺ສ ສນ຺ຕິເກ ຐເປຕ຺ວາຕິ ອຕ຺ໂຖ. ອາກາໂຣ ຫິ ເປສນຕ຺ຖວາຈໂກ. ໂສປີຕິ ປິສທ຺ໂທ ປຸຣິມຊເນ ອເປກ຺ຂຕິ. ‘‘ຘາເຣຕີ’’ຕິ ອິມິນາ ອາຍິກປຈ຺ຈໂຍ ຘາຣຓຕ຺ເຖ ໂຫຕີຕິ ທສ຺ເສຕິ. ອຎ຺ເຎຕິ ມາຕາປິຕູຫິ ອຎ຺ເຎ. ຫີຕິ ສຈ຺ຈໍ, ຍສ຺ມາ ວາ. ເຕຕິ ອຎ຺ເຎ ຎາຕກາ, ຕໍ ອາຐເປຕຸໍ ຍສ຺ມາ ນ ອິສ຺ສຣາ, ຕສ຺ມາ ນ ອິຓາຍິໂກຕິ ໂຍຊນາ. ອິຕຣນ຺ຕິ ນອິຓາຍິກໂຕ ອຎ຺ຎໍ. ອສ຺ສາຕິ ຊນສ຺ສ. ນນ຺ຕິ ຕໍ ຊນໍ. ເຕສູຕິ ຎາຕິສາໂລຫິຕາທີສຸ. ຕຖາຣູປສ຺ສາຕິ ອຕ຺ຕໂນ ຎາຕິສາໂລຫິຕສ຺ສາຕິ ອຕ຺ໂຖ. ອາໂຣເຈຕພ຺ພາກາຣໍ ທສ຺ເສນ຺ໂຕ ອາຫ ‘‘ສເຫຕຸໂກ’’ຕິອາທິ. ຕຕ຺ຖ ສເຫຕຸໂກຕິ ຠພ຺ໂພ. ໂສຕິ ອຸປຏ຺ຐາໂກ. ປຏິປຊ຺ຊຕີຕິ ປຏິທທາຕິ. ເອຕນ຺ຕິ ກປ຺ປິຍຠຓ຺ຑໍ. ອຊານິຕ຺ວາຕິ ອິຓາຍິກຠາວມຊານິຕ຺ວາ. ປສ຺ສນ຺ເຕນາຕິ ອິຓາຍິກໍ ປສ຺ສນ຺ເຕນ. ‘‘ອປສ຺ສນ຺ຕສ຺ສ ຄີວາ ນ ໂຫຕີ’’ຕິ ອິມິນາ ປສ຺ສິຕ຺ວາ ອທສ຺ເສນ຺ຕສ຺ສ ຄີວາ ໂຫຕີຕິ ທສ຺ເສຕິ.

ປຸຈ຺ຉິຍມາໂນປີຕິ ‘‘ກິໍ ຕ຺ວໍ ອິຓາຍິໂກສີ’’ຕິ ປຸຈ຺ຉິຍມາໂນປິ. ຕນ຺ຕິ ອິຓາຍິກໍ. ຕຕ຺ຖາຕິ ອຎ຺ຎສ຺ມິໍ ເທເສ. ຕນ຺ຕິ ອິຓສາມິກໍ. ໂສຕິ ອິຓສາມິໂກ. ອຍນ຺ຕິ ອິຓາຍິໂກ. ອຍນ຺ຕິ ວຈນາ. ຕຕ຺ຖາຕິ ອິຓາຍິກສ຺ສ ປພ຺ພາຊເນ. ສາມີຈີຕິ ອນຸຘມ຺ມຕາ.

ນນ຺ຕິ ອິຓາຍິກໍ. ໂສຕິ ອິຓສາມິໂກ. ອສ຺ສາຕິ ເຖຣສ຺ສ. ຄີວາ ນ ໂຫຕີຕິ ສມ຺ພນ຺ໂຘ. ອຈ຺ຉຕູຕິ ອາສຕຸ ອຸປເວສຕູຕິ ອຕ຺ໂຖ. ໂສຕິ ອິຓາຍິໂກ. ອີທິໂສຕິ ສເຫຕຸໂກ ວຕ຺ຕສມ຺ປນ຺ໂນຕິ ອຕ຺ໂຖ. ອຕິອາຣາຘໂກຕິ ວຕ຺ຕາຈາເຣນ ເຖຣສ຺ສ ອຕິໂຕສໂກ.